په‌یڤ

ئه‌ڵقه‌ی 37

30 ساڵ زیندانی بۆ پرۆسه‌ی دیموکراسیه‌ت

 

 

ئه‌و دۆزه‌ی ئه‌مڕۆ ناوی "دۆزی د. که‌مالی سه‌ید قادر"ی هه‌ڵگرتووه‌ گه‌لێ باس و خواس و لێکۆڵینه‌وه‌ و تاوتوێ کردن هه‌ڵده‌گرێ و له‌ گه‌لێ رووه‌وه‌ ئه‌توانرێ سه‌یر بکرێ ، مه‌سه‌له‌که‌ ته‌نها ئه‌وه‌ نیه‌ که‌سێک جه‌سوورانه‌ به‌ڕووی ده‌سه‌ڵاتێکدا وه‌ستایه‌وه‌ ، ئه‌گه‌رچی من بۆخۆم سه‌رنجێکی زۆرم له‌سه‌ر ئه‌و جۆره‌ جه‌سووریه‌ هه‌یه‌ ، هه‌روه‌ها مه‌سه‌له‌که‌ش ته‌نها بوێری نووسه‌رێک نیه‌ ره‌خنه‌ی له‌ ده‌سه‌ڵاتێکی حیزبی و سیاسی گرتبێ ، ئه‌گه‌رچی من بۆخۆم سه‌رنجێکی زۆری ترم له‌سه‌ر ئه‌و جۆره‌ بوێریه‌ش هه‌یه‌ ، مه‌سه‌له‌که‌ له‌وه‌ ده‌رچوو رۆشنبیرێک یان نووسه‌رێک جه‌سوور و بوێرانه‌ به‌ڕووی ده‌سه‌ڵاتێکی حیزبیدا وه‌ستایه‌وه‌ ، چونکه‌ ئه‌گه‌ر گریمانی ئه‌وه‌ش هه‌بووبێت د. که‌مال به‌ هه‌ڵه‌ بۆ مه‌سه‌له‌کان چووبێت ، یان شێواز یان رێگه‌یه‌کی چه‌وت و هه‌ڵه‌ی گرته‌ به‌ر ، ئه‌وا به‌و سزایه‌ی بۆی بڕێندرایه‌وه‌ له‌لایه‌ن ده‌سه‌ڵاتێکی حیزبیه‌وه‌ ئه‌و هه‌ڵه‌ و ئه‌و چه‌وتیه‌شی سڕیه‌وه‌ ، چونکه‌ ئه‌و کاته‌ی تاکه‌کان وه‌ک تاک هه‌ڵه‌ ئه‌که‌ن ئه‌گه‌ر هه‌ڵه‌ بکه‌ن ، ئه‌وا ئه‌وان ،  واتا تاکه‌کان ، گوزارشت ته‌نها له‌ خۆیان ئه‌که‌ن ، به‌ڵام ئه‌و کاته‌ی ده‌سه‌ڵاتێکی حیزبی که‌ خۆی به‌ پێشه‌وا و سه‌رکرده‌ی سه‌رتاپای میلله‌تێک ئه‌زانێت و به‌و جۆره‌ش خۆی به‌ ده‌روه‌ی حیزبه‌که‌ی ئه‌ناسێنێت ، و سه‌رکردایه‌تی حکومه‌تێک ئه‌کات هه‌موو هیواو ئامانج و ئاواته‌کانمان ئه‌هێنێته‌ دی ، ئه‌و کاته‌ی ئه‌و ده‌سه‌ڵاته‌ به‌ هه‌ڵه‌ چاره‌سه‌ری هه‌ڵوێستێکی له‌و جۆره‌ ئه‌کات ، ئه‌وا ئه‌و کاته‌ ته‌نها ژیانی تاکه‌ مرۆڤێک ناکه‌وێته‌ مه‌ترسیه‌وه‌ ، به‌ڵکو ژیانی سه‌رتاپای میلله‌تێک ئه‌که‌وێته‌ مه‌ترسیه‌وه‌ و سه‌رجه‌می دروشمه‌کانی دیموکراتیه‌ت ته‌نک ئه‌بنه‌وه‌ و ئه‌دڕێن و هه‌نجن هه‌نجن ئه‌بن و خودی پرۆسه‌ی دیموکراتیه‌ت ئه‌که‌وێته‌ مه‌ترسیه‌وه‌ و هیچ جێگایه‌ک بۆ متمانه‌ نامێنێت له‌ ویژدانی میلله‌تدا به‌رامبه‌ر به‌و ده‌سه‌ڵاته‌ ، ئه‌و کاته‌ ده‌سه‌ڵاتی یاسا له‌و وڵامدا ئه‌که‌وێته‌ مه‌ترسیه‌وه‌ ، چاره‌نووسی بزووتنه‌وه‌ی سیاسی ئه‌که‌وێته‌ مه‌ترسیه‌وه‌ ، په‌یوه‌ندی نێوان میلله‌ت و ئه‌و حیزبه‌ کاڵ ئه‌بێته‌وه‌ و دواتر مه‌ودایه‌کی گه‌لێ قووڵ ئه‌که‌وێته‌ نێوان ئه‌و ده‌سه‌ڵاته‌وه‌ و میلله‌ته‌وه‌ ، ئه‌و کاته‌ میلله‌ت ئاماده‌ نیه‌ چاره‌نووس و دواڕۆژی خۆی بخاته‌ ده‌ستی دیکتاتۆرێکی تر له‌ جۆرێکی تر..

هه‌تا ئه‌م ساته‌ی نووسینی ئه‌م بابه‌ته‌ش هیواخوازم هه‌واڵی سزای 30 ساڵ زیندانی بۆ د. که‌مالی سه‌ید قادر هه‌واڵێکی درۆ بێت و ئه‌و ده‌سه‌ڵاته‌ی ئه‌و بڕیاره‌ی ده‌رکردووه‌ به‌درۆی بخاته‌وه‌ ، و له‌ جێگه‌یدا هه‌واڵی ئازاد کردنی د. که‌مالمان پێ راگه‌یه‌نێت..

ئه‌وه‌تا له‌ هۆڵه‌ندا رۆژانه‌ شرت و شوێ له‌به‌ر شاژنی هۆڵه‌ندا و بنه‌ماڵه‌ی شاژنی هۆڵه‌ندی ئه‌بڕدرێ له‌ رۆژنامه‌کان و بڵاوکراوه‌کاندا و له‌سه‌ر ته‌له‌فزیۆن و ته‌نانه‌ت شه‌وانه‌ ئه‌بنه‌ چه‌ره‌س و مه‌زه‌ی به‌رنامه‌کان و بینه‌ران ، و ئه‌شیان که‌ن به‌ بووکه‌شووشه‌ و ئابڕووشیان ئه‌برێت ، شاژنیش و بنه‌ماڵه‌ی شاژنیش بێزیشیان نایه‌ت ته‌نها ورته‌شیان لێوه‌بێت ، له‌ هیچه‌وه‌ نا ، له‌وه‌وه‌ باوه‌ڕی ته‌واویان به‌ دیموکراتیه‌ت هه‌یه‌ ، له‌ باوه‌ڕیانه‌وه‌ به‌ سه‌ربه‌ستی تاکه‌که‌سی و هه‌موو ئازادیه‌کانی راده‌ربڕین و ئازادی وشه‌ و ئازادی رۆژنامه‌وانی .. 

 

یان ئه‌وه‌تا به‌به‌رچاوی هه‌موو جیهانه‌وه‌ دیکتاتۆرێکی وه‌کوو سه‌ددام به‌و هه‌موو دڕنده‌یی و خوێنڕێژیه‌وه‌ به‌وپه‌ڕی دیموکراتی دادگایی ئه‌کرێت ، ته‌نانه‌ت ئه‌وه‌ستێت و ره‌خنه‌ش ئه‌گرێ و گوێشی لێ ئه‌گیرێت و وه‌ڵامیشی ئه‌درێته‌وه‌ ، نازانم ئه‌و دادگایه‌ی کوردستان چی بوو وا به‌و هه‌موو نهێنیه‌ و به‌و کتوپڕیه‌ ئه‌و بڕیاره‌ی ده‌رگرد به‌بێ ئه‌وه‌ی که‌س به‌که‌س بزانێت ، ئه‌ی داخوا د. که‌مال له‌ سه‌ددام تاوانبارتر بوو وا به‌و شێوه‌یه‌ دادگایی کرا؟ ئه‌ی داخوا سه‌رکردایه‌تی سیاسی کوردی هه‌ر ئه‌وه‌نده‌ له‌ وشه‌ی دیموکراتیه‌ت تێگه‌یشتوون ، ئه‌ی هه‌ر ئه‌وه‌نده‌ له‌ مانای سه‌ربه‌ستی و ئازادیه‌کان تێگه‌یشتوون ، ئه‌ی هه‌ر ئه‌وه‌نده‌ سوودیان له‌ 15 ساڵ سه‌ربه‌خۆیی و ئه‌زموونی دیموکراتی دوای که‌وتنی سه‌ددامی خوێنڕێژ بینی؟؟ ..

یۆیه‌ به‌ جه‌خته‌وه‌ ئه‌ڵێم 30 ساڵ زیندانی ته‌نها بۆ د. که‌مالی سه‌ید قادر نیه‌ ، به‌ڵکه‌ 30 ساڵ زیندانیه‌ بۆ هه‌موو پڕۆسه‌ی دیموکراتیه‌ت له‌ کوردستانی ئازاددا ، 30 ساڵ گه‌ڕاینه‌وه‌ دواوه‌ ، پڕۆژی دیموکراتیه‌ت له‌ کوردستاندا 30 ساڵ راگیرا. ئه‌وه‌ی من ئاگادار بم رۆژانه‌ چه‌ندین هه‌ڵمه‌ت رێکخراوه‌ له‌ رێی که‌ناڵه‌ جیاجیاکانی راگه‌یاندنه‌وه‌ له‌لایه‌ن رۆشنبیران و دڵسۆزانی میلله‌تی کورده‌وه‌ بۆ ئازاد کردنی د. که‌مالی سه‌ید قادر که‌ ئه‌وه‌ش خۆی له‌ خۆیدا به‌ هێندی ئه‌وه‌نده‌ی جاڕ و داواکاریه‌ بۆ ئازاد کردنی ئه‌و زاته‌ ، له‌هه‌مان کاتدا جاڕ و داواکریه‌ بۆ رزگار کردنی پڕۆسه‌ی دیموکراتیه‌ت و فریاکه‌وتنی ئه‌و پڕۆژه‌یه‌ی خوێنمان بۆ رشت ، هه‌وڵ و هاواره‌ بۆ پاراستنی سه‌روه‌ری یاسا و چه‌سپاندنی سه‌روه‌ری تاکه‌که‌سی و سه‌ربه‌ستی و ئازادیه‌کان ، مه‌به‌ست له‌و هاوار و داخاوازیانه‌ ئه‌وه‌یه‌ ئه‌و ده‌سه‌ڵاته‌ حیزبیه‌ی پێشه‌نگی ئه‌و بڕیاره‌بوو فریای خۆی که‌وێت و به‌و هه‌ڵه‌یه‌یدا بچێته‌وه‌ که‌ له‌وانه‌یه‌ له‌ دواڕۆژدا باجه‌که‌ی زۆر گه‌وره‌ بداته‌وه‌ ، بۆیه‌ ئه‌ڵێم ئیستاش هیشتا تیاماوه‌ فریاکه‌وین ئه‌وه‌ی ماوه‌ نه‌جاتی بده‌ین و ئه‌وه‌ی نه‌خنکاوه‌ له‌ په‌ل و پۆی دیموکراتیه‌ت فریای که‌وین نه‌خنکێت..