ئاسۆ بیاره‌یی
سوێد
   25-1-2006

زۆر که‌س به ‌په‌رۆشه‌وه‌‌ بوون بۆ بیستنی هه‌واڵێکی دکتۆر که‌مال، یه‌کێک له‌وانه من.  خۆشبه‌ختانه به ‌ده‌نگی خۆی توانی له‌یه‌کێک له‌زیندانه ‌کۆنه‌‌کانی سه‌رده‌می ڕژێمه داگیرکه‌ره‌که‌ی به‌عسه‌وه، له پایته‌ختی ئه‌مڕۆی باشووری کوردستان، باسی خۆی بگه‌ێنێته دونیا. به‌ڵی!  به‌داخه‌وه 15 ساڵ زیاتره هێشتا ئه‌و زیندانه ترسناک و ئه‌نگوستانه‌ی ڕۆژانی ئه‌و ڕژێمه فاشسته، لێره‌ و له‌وێ ماون و جێگای دیلکردنی مرۆڤی کوردن له‌لایه‌ن‌  ده‌سه‌ڵاتدارانی کورده‌وه.

که دکتۆر که‌مال باسی ڕفاندنه‌‌که‌ی خۆی له لایه‌ن میلیشای ئه‌و ده‌سه‌ڵاته‌وه کرد، ساڵانی هه‌شتاکانم که‌وته‌وه یاد، کاتێک (مولازم موحسین)ی ئه‌نتی کورد، لاوانی شاری سلێمانی له گه‌رمه‌ی خه‌ودا به‌وپه‌ڕی دڕنده‌ییه‌وه، ڕاکێشی زیندانه‌کان ده‌کرد و تا ماوه‌یه‌کی زۆریش که‌س سۆراخی نه‌ ده‌زانین. له بیرمه دایکێک که ‌کوڕه‌که‌یان بردبوو، پڕ به گه‌ره‌ک هاواری ده‌کرد و ده‌گریا، چه‌ند جاشێک که له‌گه‌ڵ هیزه‌که‌ی (مولازم موحسین)دا بوون، پێیان ووت: شێڕه ‌شیڕی  چیته کوڕه‌که‌ت ده‌یه‌وێت سه‌ددام بڕوخێنێت!

میژووی گه‌لی کوردی ژێرده‌سته پڕن له نموونه ‌و کاره‌ساتی تاڵ که تا سه‌ر ئێسک و له قوڵایی ده‌رونی مرۆڤی کورددا ڕیشه‌یان داکوتیوه. دووباره کردنه‌وه‌ی هه‌مان سیناریۆی خوێناوی به‌ ده‌ستی خودی کورد، نه‌ک هه‌ر پرۆسه‌ی دیموکراتی له ‌بار ده‌بات، به‌ڵکو بزوتنه‌وه‌ی ڕزگاری میلله‌ته‌که‌مان له ‌ناو چاره‌نووسێکی هه‌ڵدێر ووند‌ه‌کات،  که کڵتوری کوشت و بڕ و تاکڕه‌وی تیایدا زاڵبێت. ئه‌نجام ئه‌و تروساکه‌یه ڕوناکیه‌ی که ئاسمانی کوردستانی که‌مێ ڕۆشنکردووه‌ته‌وه، ده‌بێته تاریکستانی نه‌وه‌کانی تر.

لێره‌وه پێشنیار‌ده‌که‌م:

• که تا زووتره  ئه‌و زیندانه‌ی که له سه‌رده‌می سه‌ددامی فاشست بۆ ئه‌شکه‌نجدان و له‌ ناوبردنی گه‌لی کورد کروان، بڕوخێنرێن و له نه‌خشه‌ی ده‌زگاکانی کۆمه‌ڵگه‌ی هاوچه‌رخی کوردستاندا نه‌مێنن.

• ناردنی دادوه‌ر و پۆلیسه‌کانی باشووری کوردستان بۆ کۆرسی تایبه‌تی بۆ ئه‌وه‌ی بۆچۆنی مرۆڤانه‌یان لا به هێزبیت‌  و دووربن له‌ گیانی تۆڵه‌سه‌ندنه‌وه و سۆزی بنه‌ماڵه و لایه‌نگری و تۆڵه‌سه‌ندنه‌وه.‌

• به‌کارهێنانی ڕه‌فتاری مرۆڤدۆستانه کاتێک تاکێکی کورد له سه‌ر تاوانێک ده‌گیرێت.

• ئاگادارکرنی میدیا هه‌مه‌جۆره‌کانی کوردستانی باشوور له‌و جۆره ‌پرۆسانه‌دا.

• پاراستنی پیرۆزی سه‌ربه‌خۆیی و  بێلایه‌نی دادگا له وه‌رگرتنی بڕیاره‌کانیدا.

• پێکه‌وه‌نانی کۆمیته‌یه‌کی تایبه‌تی بۆ چاودێریکردنی ده‌زگا گرنگانه‌ی ده‌‌سه‌ڵاتی کوردستان که کاره‌کانیان بۆ سوودی هاووڵاتیان به‌شێوه‌یه‌کی دروست ئه‌نجام بده‌ن.

• ته‌رخانکردنی به‌شێکی  میدیای کوردی بۆ کاری هۆشیارکردنه‌وه‌ و که‌مکردنه‌وه‌ی ڕه‌فتاری توند و تیژی له ژیانی تاک و کۆمه‌ڵگه‌ی کوردی.

بۆ دووباره نه‌بوونه‌وه‌ی کێشه‌یه‌ک وه‌کو کێشه‌که‌ی دکتۆر که‌مال، ده‌بێ هه‌نگاوی دڵسۆزانه له‌و باره‌و بنرێت، ئه‌گینا تاک و کۆمه‌ڵگه‌ی کورد بڕوای به‌ حکومه‌تی کوردی نامێنێت. ئه‌‌وسا بوونی دیموکراتی له دیکۆر و ووشه‌ی ڕه‌ق و بێ ناوه‌ڕک تێپه‌ڕناکات.

با هه‌موومان پێکه‌وه بۆ سڕینه‌وه‌ی کڵتوری به‌عسیزم، له کۆمه‌ڵگه‌ی کوردی تێبکۆشین! 

باتێکڕا بلێین: نا بۆ کڵتوری به‌عسیزم، به‌ڵی بۆ جێگیرکردنی  ئازادی و دیموکراتی له باشووری کوردستان!

04/07/2007