کوردوستانی دوێنێ و دێو و دره‌نجه‌کانی ئه‌مڕۆ
بارزان شوان
زۆر ده‌مێکه ده‌مه‌وێ بزانین بۆ چی ته‌نها ئێمه بێ ووڵاتین، هه‌ر له سه‌ره‌تای درووست بوونی مێژووه‌وه ئێمه هه‌بوینه و توانیومانه جێگه‌ی باو باپیرانمان بپارێزین، دۆستایه‌تیمان باش بووه له گه‌ڵ یه‌کتریدا، له هاریکاری کردنی هه‌ڤدیدا زۆر به له‌ز بووینه بۆ هه‌ڤدی چ له خه‌رمانان بێت چ له دروێنه چ له کارو باری ڕۆژانه‌دا، هاو خه‌م و هاو خۆشی یه‌کتر بووین زه‌ره‌ری یه‌کێک بۆ ئێمه ناخۆشی بووه بۆ هه‌موان و هه‌وڵمان داوه که خۆمان بتوانین ئه‌و ماڵ و دره‌وه‌ی له‌ده‌ست یه‌کێکمان چوه بۆی کۆبکه‌ینه‌وه، له‌و محنه‌ته‌ی ده‌رباز بکه‌ین، هه‌میشه ماڵی کورد بۆ ده‌ورو دراوسێو خزمو بێگانان ئاواڵه بوه، یه‌کێک ناکۆکی هه‌بوایه شه‌رم بو بۆ گشتمان، هه‌وڵ ده‌درا هه‌ردووک زوو پێکبێنه‌وه، چاومان له ماڵ و حاڵی یه‌کتر بووه‌و پاراستومانه، دز له‌کوێ ده‌یتوانی جێی پێی خۆش بکات له ناوماندا، له مانه گرنگتر ئه‌وه‌بوه که ڕێزمان هه‌بووه بۆ یه‌کترو خۆشی یه‌کترمان ئاوات بوه.
هه‌رچه‌نده که ئێمه ی کورد له ڕوانگه‌دا میلله‌تێکی زۆر ئاشتی خوازین و زه‌ره‌رمان نه‌بوه بۆ هیچ دراوسێیه‌کمان، به‌ڵام دراوسێکانمان به‌و په‌ڕی تواناوه هه‌وڵیان داوه که ده‌ست وه‌رده‌نه ناو کاروبارمانه‌وه و ژیانمان لێ تاڵکه‌ن و ژێرده‌سته‌مان بکه‌ن. بۆ ئهم مه‌رامه نا مرۆڤا‌یه‌تیه هه‌ستاون به کڕینی هه‌ندێک خه‌ڵکان که هه‌ر خۆیان خۆفڕۆشبوونه‌و به‌رژه‌وه‌ندی تاکی خۆیان پاراستوه، ئه‌مانیش له لای خۆیانه‌وه ده‌ست و برد خه‌ڵکانی ساویلکه‌و هه‌ژارو داماویان له خۆ کۆ کردۆته‌وه‌و به پوولێکی زۆر که‌م بوونه به دارده‌سته‌ی ئم تاقمانه، ئه‌مه ئه‌وه ناگرێته‌وه که ئهم میلله‌ته زۆر به ئاسانی چه‌واشه ده‌کرێن و خۆیان ده‌فڕۆشن، نه‌خێر، به‌ڵکو ئه‌وه ده‌گه‌یه‌نێت که‌زوڵاڵی و هه‌ژاری و نا ده‌رامه‌تی هه‌ندێک له‌م خه‌ڵکانه بۆته هۆی ئه‌وه‌ی که ڕێگای چه‌وت بگرنه به‌ر ، ئه‌مه به پله‌ی یه‌ک، به پله‌ی دووه‌میش ئه‌وه بووه که زۆربه‌ی زۆری ئهم خه‌ڵکه نه‌خوێنده‌وار بوونه‌و ئه‌وانه‌ی که له خشته‌شیان بردوون زۆر نامرۆڤ و بێ ویژدان بوونه.چه‌ندین خۆفرۆش به خوێنی گه‌شی لاوانی کورد دام وده‌زگای زۆرداری و به‌دکاری خۆیان پێ داناوه.
تۆ بڕوانه له مێژووی کوردوستان! بزانه چه‌ندین جار ئهم ڕوانگه‌یه خۆی دووپاتکردۆته‌وه هه‌ر له سه‌رده‌می پێش ئایینی ئیسلامه‌وه تا وه‌کوو ئم سه‌ده‌یه.
ڵیره‌دا ماوه نیه به پڕانی باسی هه‌ر هه‌موو سه‌ده‌کان بکرێت، به‌ڵکو وه‌ک نموونه هه‌ندێک ڕووداوه مێژووییه‌کان ده‌اتوانین باس بکه‌ین، وه‌ک دوازده سواره‌ی مه‌ریوان و شیخ مه‌حموودی نه‌مرو شێخ عه‌بدوڵڵای نه‌هری و سمکۆ و قه‌ده‌مخێرو به‌گزاده‌ی بانه‌وخه‌باتی شێخ سه‌لام و مه‌لا موسته‌فای بارزانی و شێخسه‌عیدی پیران و کۆماری مه‌هاباد.
هه‌رکه‌س خاوه‌ن ویژدان بێت و کوڕی بابی خۆی بێت زۆر به ڕاشکاوی و به ده‌نگێکی بڵنده‌وه ده‌ڵیت که ئهم گه‌لی کورده زۆر ئازاو به‌جه‌رگ بوونه و نه‌وه‌و نه‌وه‌چڕکی زۆر لێهاتوویان لێ پاشه‌که‌وت بوه.
ئه‌وانه‌ی که له ئاوێنه‌ی خۆیانه‌وه سه‌یری گه‌لی کورد ده‌که‌ن وگوێز له هه‌مبانه‌ی خۆیانه‌وه ده‌ژمێرن و به شانو شه‌وکه‌تی ئهم و ئه‌و و ئهم سه‌رکرده‌و ه‌و سه‌رکرده‌یه‌ی ئه‌مڕۆمان هه‌ڵده‌ده‌ن و به ناوی گه‌لی کورده‌وه ئهم و ئه‌و ده‌که‌نه سه‌رکرده‌و سه‌رۆک، با بڕۆن ئهم نه‌ته‌وه دڵ پته‌وه بزانن چیه‌و چۆنه‌و له ڕابردووی دوورو نزیکیان بکۆڵنه‌وه که سه‌ره‌ڕای ئه‌و هه‌موو بێکه‌سیه‌و لێکبڵاویه له مه‌یدانی شه‌ڕدا چاو نه‌ترس بوه‌و له‌شکری دوژمنانی هه‌میشه به‌زاندوه.
زۆر سه‌یره به‌لامه‌وه که خه‌ڵکانێک هه‌ن هه‌ر بۆ ته‌نها پارچه نانێک که له سه‌رکرده‌یه‌که‌وه بۆی فڕێ ده‌درێت، ده‌بێته نۆکه‌ری و له نێو کۆمه‌ڵ و ئه‌و دانیشتنو ئهم کۆبوونه‌وانه‌دا ده‌بنه سه‌گێکی هار ده‌حه‌پنه ئه‌وانه‌ی که ده‌نگی ڕاسته‌قینه‌ی زوڵاڵی کورد به‌رزده‌که‌نه‌وه‌و ڕاستیه‌کان دێننه به‌ر چاو، کاتێک که ئهم تووته‌ڵه بێ ئابڕوویانه ئێسکێکیان بۆ داده‌نرێت، نازانن به‌وه‌ی که سه‌رکرده‌کانیان به مه‌لایین دۆلارو پاره‌و پوولی ئهم میلله‌ته ده‌خه‌نه نێو به‌رکی چڵکنی خۆیان و به‌و پاره‌یه‌ش چه‌ندین خۆفڕۆشی تر درووست ده‌که‌ن.
له‌م جیهانه ماتریالیزمه‌ی ئیمه‌دا زۆر شت که نا ڕه‌وایه، ده‌بێته ڕه‌واو ده‌ست لێخۆشکه‌ری، به‌ڵام له هه‌مان کاتدا وا دێته گوێم که مرۆڤ ئیتر به‌سیه‌تی داخ هه‌ڵکێشێ و خۆزگه بخوازێت. وه به بریا ماڵی که‌س ئاوه‌دان نه‌بۆته‌وه، پیاو ده‌بێت به‌بازووی خۆی تێی که‌وێو له ڕێی دابینکردنی ئاواته‌کانی نیازو ئاره‌زووه‌کانی قه‌د نه‌سره‌وێو چه‌کی مه‌ردانه‌ی لێ هه‌ڵبکاو به زه‌بری پێنووس و چه‌ک ملی دێوه‌کانی نائومێدی باداو کۆسپو به‌رهه‌ڵستان و خۆفڕۆشان به بازووی کوڕی کوردی ئازا له سه‌ر ڕێ لادات.
له‌م هه‌ل و مه‌رجه‌ی که ئه‌مڕۆ بۆ کورد هه‌ڵکه‌وتوه چاکتر نایه‌ته دی، ئیتر جارێکی تر نابێت خه‌و به‌وه ببینین که ووڵاته زل هێزه‌کانی دنیا فریامان بکه‌ون و ڕزگارمان ده‌که‌ن له ژێر ده‌ستیو چه‌وساوه‌یی،
جارانێک بوو ده‌مان ووت ،له‌به‌ر ئاغاو ده‌ره‌به‌گ و کوێخا نه گه‌‌یشتین به ئاره‌زوه‌کانمان، هه‌ر له به‌ر ئه‌وان بوو کوێره‌وار بووین و له‌چه‌رخو خوله‌کی زه‌مانه‌دا دوا که‌وتین، ئه‌مه تابڕێک ده‌توانین بڵێین ڕاسته‌و گومانی تیادا نیه، هۆیه‌کانیشی زۆرن و ئاشکران، ئه‌و ده‌ره‌به‌گانه هه‌موویان بوون به په‌ند بۆ گه‌ل و لاپه‌ڕه‌ی مێژووی کوردیان به ره‌شی جێ هێشت.
به‌ڵام خۆ له خوا به زیاد بێت ئه‌و سه‌رکردانه‌ی که هه‌مانه لای خۆیان وڵات پارێزن و کوردستان په‌روه‌رن و بۆ دیمکراتیه‌ت خه‌بات ده‌که‌ن و نه‌فرینی خۆپه‌رستی و ئاغاو ده‌ره‌به‌گایه‌تی ده‌که‌ن، که‌چی له کاتێکتدا هه‌ر زۆر به ئاشکراو بێ شه‌رمانه دژ به گه‌له‌که‌یان به شێوه‌یه‌کی نا دیموکراتیه‌تانه هه‌ڵس و که‌وت ده‌که‌ن و به‌رو بوومی وڵات بۆخۆیان وه‌ک برا به‌ش ده‌که‌ن و زه‌وی وزار و کێوانی کوردستان به یه‌کتر ده‌به‌خشن و ئه‌وه‌ی توانیویانه‌و له ده‌ستیان هاتوه کردوویانه‌و که‌م ته‌رخه‌میان تیا نه‌کردوه.
ئهم کاره ناڕه‌وایانه به ئه‌نجام ده‌گه‌یه‌نن کاتێک که میلله‌ت بوه به ڕیسوای بن ده‌ستیان و نه‌بوونی کاره‌باو نه‌وت و غاز لێیان بوه به کارو پیشه‌ی ڕۆژانه‌یان. له لایه‌که‌وه مه‌سئووله‌کان له جیاتی خزمه‌ت گووزاری، جێگۆرکێ وئاڵ وگۆڕی ده‌سته‌ڵات ده‌که‌ن و له لایه‌کی تره‌وه به‌روبووم له نێوانیاندا دابه‌ش ده‌کرێت و میلله‌تی بێتاوانیش له دووره‌وه ته‌ماشای ئهم دێوانه ده‌که‌ن که چۆن ڕۆژانه‌ی خۆیان به ڕابواردن و ترۆمبێل گۆڕینو خانو به‌ره کڕین و فڕۆشتنن ته‌رخان کردوه.
کرده‌وه‌ی ئهم سه‌رکرده‌و سه‌رۆکانه‌م زۆر لا سه‌یره به‌وه‌ی که له لایه‌که‌وه کوردستانیه‌و له‌لایه‌کی تره‌وه عێراقچێتی ده‌کات، له بری ئه‌وه‌ی که هه‌وڵ بۆ کوردستانێکی سه‌ربه‌خۆ یه‌کگرتوو بدات، که‌چی به پێچه‌وانه‌وه خه‌ریکی یه‌کگرتنه‌وه‌ی میلله‌تی عاره‌به و هه‌وڵی ئه‌وه ده‌دات که عیراق ببێت به پارچه‌یه‌ک له ئوممه‌ی عه‌ره‌بی.له لایه‌کی دیکه‌وه سه‌ره‌که‌ی دی به ناوی دیموکراتیه‌ته‌وه هه‌رچی و په‌رچی و کۆنه به‌عسیو بێویژدان و دارو ده‌سته‌ی خۆی و خزمی نزیک و دووری ده‌کاته ده‌سته‌ڵاتدارو ئه‌وانه‌ی که به شان شه‌وکه‌ت و باڵی دا هه‌ڵده‌ده‌ده‌ن پله به پله به‌رزیان ده‌کاته‌وه و ئه‌وه‌ی یه‌ک تاکه وشه‌ی خراپ به خۆی و خزمانی بڵێت له کونی تاریکی زیندانه‌کانیدا بێ سه‌رو شوێنی ده‌کات. و ته‌نها بۆ ئه‌وانه کار ده‌کات، که له خۆیه‌وه نزدیکن. به واته‌ی ئه‌وه‌ی که هه‌ر وه‌ک خۆی ده‌ڵێت ئه‌وه‌ی له بنکڕی برنجی ناو مه‌نجه‌ڵه‌که‌یدا نێزیک بێت تا هه‌تایه ده‌یخوات.
به لای منه‌وه ئه‌وه گرنگه که ئهم سه‌رکردانه له جیاتی ئهم هه‌موو کاره نا ڕه‌وایانه‌ی که ده‌یکه‌ن به‌رامبه‌ر ئهم گه‌له کۆڵنه‌ده‌ره ئه‌وه‌یه که هه‌ستن به کۆشش و ماندوبوون وخه‌مخۆر و ده‌ست به کار بن بۆ گرتنه‌وه‌ی تاکه‌کانی میلله‌ت و خۆی له‌و خه‌می دزینه ڕزگار بکات. ئه‌و بببێت به خزمه‌تکاری ئم میلله‌ته‌و ێخه‌ی ئهم گه‌له به‌رده‌ن ئی‌دی چی دی چه‌واشه‌یان نه‌که‌ن و ببن به کوردێکی دڵ بریندار، بۆ ئه‌وه‌ی کامه‌رانی و ئاره‌زووی خه‌ڵکی له به‌ین نه‌به‌ن و که مردیشن دوو که‌س با به کوردپه‌روه‌ر ناویان به‌رن.
ده‌ڵین کابرایه‌ک له خه‌ویدا شه‌یتانی زۆر به جوانی دیت، لێی پرسی که تۆ له وێنه‌و ڕووکاره‌کاندا به تاکه چاوێکی و شاخ و کلکیشت لێ ڕواوه،،، ئێستا ئه‌و شۆخ و نازداریه‌ت له کوێوه هێناوه؟؟؟ ئه‌ویش ووتی من فریشته‌م و فریشته‌ش هه‌ر هه‌موویان جوانن.
ئهم مه‌سئوول وسه‌رکردانه‌ش له ناوه‌ڕۆک و ڕاستیدا دێو و شه‌یتانن و له ڕووشه‌وه فریشته‌ن.
له وانه‌یه کورد له مه‌و پاش که ئهم کاره بۆرانه‌ی ئێوه دێننه به‌ر چاو بزه‌یان به نا خوێنده‌واری و کۆڵه‌واری ئێوه بێته‌وه. به زه‌ییان به هه‌ژاری ئاسه‌واری ئێوه‌ی به ناوی کورده‌واری دا بێته‌وه به هؤی که‌مته‌رخه‌می ئیوه‌وه ده‌ستبه‌کار بن بۆ ئه‌وه‌ی ده‌ری خه‌ن که ده‌توانن به بێ تۆی دێو و زۆر له تۆ چاکتر ئه‌و ئه‌رکانه پێک بێنن که وه‌ک خه‌و وان بۆ ئێوه، شان بده‌نه به‌ر به‌رینێکی وا که به شانازیه‌وه خۆ بنوێنن و له باتی ئهم کۆشمه‌یه‌ت و ئهم چه‌ند مۆره خوارو بۆره کۆشک و ته‌لاری ڕه‌شی ئێوه تێکهه‌ڵده‌ن و کۆشکی سپیکار هه‌ڵخه‌نه‌وه. کاری نه‌و نه‌وه‌ی نوێیه که سه‌رپلی ئه‌و ته‌شیه بێت که نه‌خشی ڕه‌نگین و به وێنه‌ی ده‌ست ڕه‌نگین شیرینکاران بێت، میلله‌ت به‌و کاڵه‌و پێتاوه که به به‌ن داپێچراوه ڕچه‌یه‌ک بشکێنێو ڕاوی پڵنگ و شکاری شێران بکات و کاره‌کانی چاپک سواران بێت.
ڕۆژێک دێت ئه‌ی دێو که میلله‌ت ڵیت ڕاست ده‌بێته‌وه‌و به گوریسی به‌نی کورده‌واری له نێو شه‌قام و جاده‌کانی گشت لادێو شاره‌کانی کوردوستاندا ڕاتانده‌کێشن وئه‌و تاونانه‌ی کردووتانه به‌رامبه‌ر به نه‌ته‌وه‌و گه‌ل ده‌بنه سزای دادی میلله‌ت، مه‌گه‌ر نه‌تانبیستوه کورد ده‌ڵێت، ئه‌گه‌ر میلله‌ت هه‌ستا ئه‌وا شاخ و كێو له بندا ڕاده‌چڵه‌کێنێت.
من له‌و باوه‌ڕه‌دام که گه‌ل بڕیاری دا که له سه‌ر خواستی خۆزیاو بریا لاچێت و به‌رانبه‌ر به ووزه‌و توانای خۆی به گژ ئه‌و کاره دژواره‌تاندا ڕاچێت.
ئاسمان دوور و زه‌وی سه‌خت گه‌لی پێشمه‌رگه‌ی جێی چیاو چۆڵی بێ ده‌ره‌تانی کڵۆڵ هه‌ر چوار لای لێ ته‌نراوه ڕێگه‌ی شارو لادێی لێ به‌ربه‌ست کراوه‌و گیرفان پڕه‌کانێش هێنده زۆرن که به‌رگه‌ی فوویه‌کی ده‌می شێرانی کورد ناگرن، ئهم جۆره بێ ویژدانانه‌ش که هه‌ڵخه‌ڵه‌تێنراون به پوول و پاره هێنده سووکن و بێ باوه‌ڕو ترسنۆکن، که به کوردی پێیان ده‌ڵین سنگشێری ماکه‌ر پشتن.
ئێوه‌ی دێو ده‌بێت له یادتان نه‌چیت که له‌و ساته‌وه‌ی ئاده‌م و حه‌وا له به‌هه‌شت ده‌ر کراون به‌ره‌و جیهان ڕاونراون و خانه‌و لانه‌یان بۆ خۆ پێکه‌وه ناوه نه‌وه‌یان لی بۆته‌وه که بێگومان له کورد ئازاو به‌جه‌رگتریان لێ نه‌که‌وتۆته‌وه، له به‌ر ئه‌وه زۆر به دڵنیاییه‌وه ده‌ڵێم ئه‌وه‌ی بیه‌وێت ئهم گه‌له به‌ره‌و دونیای تاریکی به‌رێ و له‌خشته‌ی به‌رێو به‌روبوومی به ئاشکرا بدزێت و ئازادی لێ بستێنێت ده‌بێته هۆی ئه‌وه‌ی که خۆی به ده‌ستی خۆی چاڵ بۆ خۆی هه‌ڵکه‌نێت. هه‌ر که‌سێک که لای وایه ئهم دزو مافیانه‌ی که وه‌ک نه‌خۆشی شێرپه‌نجه ته‌شه‌نه‌ی داوه له نیو هه‌ندێک خه‌ڵکانی ووریای کوردوستاندا و به ڕاست و چه‌پ به‌رووبوومی کوردوستان ده‌دزن و وا ده‌زانن که ئهم خاکه پیرۆزه ته‌نها هی خۆیانه‌و له باوکیانه‌وه به میرات بۆیان ماوه‌ته‌وه و ئیتر چی دی شێرانی لێ نابێته‌وه‌و درووست نابێت، ئه‌وانه زۆر به هه‌ڵه‌دا چون و شاشن، چونکه ئه‌گه‌ر ئازایه‌تی و نه‌ترسانی پێشمه‌رگه‌کان‌ی کوردوستان له بیچمو نێوچه‌وانی هه‌ر پیاوێکدا بهاتایه سه‌ر جیهان و تووشی هه‌ر که‌سێک بوایه به سه‌رکزی کڕنووشی بۆ ده‌کردو سوجده‌ی بۆ ده‌برد.
بۆ خوا پێتان ده‌ڵیم ئه‌ی ئه‌وانه‌ی بوونه‌ته پیاوی سه‌رانی هه‌ندێک له حیزبانی پاره په‌رستی کوردوستان ، تا زوه بارو هه‌ڕاجوجڵه‌وتان له یه‌ک نێن و بۆی ده‌رچن به‌ر له‌وه‌ی که تۆڵه‌ی شه‌هیدانی کوردوستانتان لێ بستێندرێته‌وه. ئه‌وه‌ی تا ئێستا دزیوتانه ببێت به زه‌هری مارتان و ده‌ستبه‌ردارمان بن بۆ ئه‌وه‌ی ئێمه‌ش وه‌ک گشت میلله‌تانی ئازادی دونیا ڕێو ڕێچکه‌ی خۆمان به‌ره‌و ئازادیه‌کی ڕاسته‌قینه به‌رین و چی تر دوا نه‌که‌وین له پرۆسه‌ی دیموکراتیدا.
کاره‌کانتان جیاوازی چیه له‌گه‌ڵ ئه‌وانه‌ی که دوژمنانی کورد بوون کوردیان ده‌کوشت و جووتیاری بێ چاره‌یان ده‌ڕووتانده‌وه‌و ماڵی کوردیان تاڵان ده‌کردو منداڵی سه‌ر بێشکه‌یان به برسێتی و بێ دایک وباب جێ ده‌هێشت له دووره‌وه فڕۆکه‌ی دوژمنیان شاره‌زا ده‌کرد که چۆن بۆمبامان به‌سه‌ردا ببارێنن و چۆن هه‌ست و نێشتمان بتارێنن، ئهم کارانه‌تان گشتی کردوه‌و که‌س نکۆڵی تیدا نکات ، کاتێک که مژوولی برا کوژی بوون، ئای له‌و ڕۆژه ڕه‌شانه‌ی که تا وه‌کو ئێستاش بۆته دوومه‌ڵێک به نێوچه‌ونتانه‌وه و هه‌رگیز له یادی گه‌ل ناچێته‌وه. به هیوای ئه‌وه‌ین که ئه‌و ڕۆژگارانه هه‌رگیز به خه‌ویش نه‌بینینه‌وه.
ئهم زۆڵه کورده مه‌سئولانه‌ی که هه‌ن تازه ترکێ بوون و دوو ڕه‌گ بوون و به ملهوڕی و گه‌لۆری ده‌ژین له ژێر په‌رده‌ی حیزبایه‌تی و ئاین و به ناوی وورگ زل و خڕیڵه‌وه سوێن و به سه‌ریان ده‌خۆن و شه‌ڕ به خه‌ڵک ده‌فڕۆشن، له تاڵانی و بڕین به‌ولاوه چی دی نازانن، ونازانن دونیا چباسه ، ئهم سه‌رکردانه پیاوانێکی وایان ده‌وێت که به پاروه به‌رماوێک و چنگه دۆلارێک کلکه سووته‌یان له به‌ر بکات کێچیان بۆ بکاته گاو به که‌ر بڵێ شێره و به چاو ساغ بڵێت کوێره و دزو بێویژدانه‌کان به خدری زینده له قه‌ڵه‌م بدات.
|
|
04/07/2007 |