|
ده‌سته‌ڵاتدارانی کورد و پێشێل کردنی یاسا |
|
بارزان شوان هه‌موو نه‌ته‌وه‌کان هه‌ر یه‌ک له شوێن خۆی ڕاپه‌ڕیوه، لاوه‌کانیان ئاڵای سه‌ربه‌ستی و ئازادیان هه‌ڵکردوه گه‌لێک کۆمه‌ڵی نهێنیان پێکهێناوه بۆ ڕزگار کردنی گه‌ل و نیشتمانه‌که‌یان بۆ ڕزگارکردنی خه‌ڵکانی ئازادیخوازی نه‌ته‌وه‌که‌یان له ژێر ڕکێفی ڕژێمی کۆنه‌په‌رستی و بیروباوه‌ڕی پڕو پووچ . هه‌رگیز کۆڵی نه‌داوه له وه‌ی که ڕاپه‌ڕینه‌کانی گه‌ل خامۆش بێته‌وه، به‌ڵکو به پێچه‌وانه‌وه ئاگر و کوڵپه‌ی ئازادیخوازان سووری هێناوه و سه‌رمای چیا به‌فراویه‌کان ساردی نه‌کردۆته‌وه، به‌ڵکو زیاتر هاتۆته خرۆش و له مه‌یدانی شۆڕش و ڕمبازیدا زیاتر هاتۆته جۆش.
گرنگترین ئارمانجه‌کانی خه‌ڵکی له نێو ئهم جیهانه پان و به‌رینه‌دا، که مخابن ئه‌مڕۆ زۆر شت گۆڕدراوه تیایدا و بێگومان کوردوستانیش پارچه‌یه‌که له‌م زه‌مینه دا ، ، کۆششه بۆ به‌رقه‌راربوون و ئاسایش و ئارامی و چه‌سپاندنی مافی تاکه، که به یه‌کێک له هه‌ره گه‌وره‌ترین ده‌ستمایه‌کانی میلله‌ت ده‌ژمێردرێت .
له‌وه‌ی ده‌رکه‌وتوه بۆمان دوای یه‌کگرتنه‌وه‌ی ئهم دوو ئیداره‌یه یاخود ئهم دوو وڵاته بچکۆلانه بێ یاساییانه‌ی درووست بوون، که پێشتر به ئاشکراو ڕوون تاڵانیان له‌م گه‌له ده‌کرد و ئهم ڕه‌وته‌شیان ته‌نها دژ به تاکه که‌سی هه‌ژار و داماو له هه‌ردوو ئیداره‌که‌ی سلێمانی و هه‌ولێردا ده‌کرد. ده‌نگیان ده‌خواردن و مافه‌کانیان پێشێل ده‌کردن به بێ هیچ بیروبۆچوون و بنه‌چه‌ی یاسایی و مرۆڤایه‌تی. زیاتر له‌مه به ده‌نگێکی به‌رزو زۆر به بێشه‌رمانه وه‌ک که‌ڵه‌شير ده‌یانقووقاند و ناوی شه‌هیدانی کوردوستانیان ده‌برد بۆ به‌رژه‌وه‌ندی چڵکنی خۆیان و ملکه‌چکردنو هه‌ڵخه‌ڵه‌تاندنیان و هان دانیان بۆ شه‌هید کردنی پێشمه‌رگه‌ی نوێو زیاتر له نێوان دلێرانی کوردوستاندا، ئه‌وه‌ش ته‌نها بۆ پاراستنی کورسیه کۆنه‌کانی خۆیان بوو.
بۆ به‌رقه‌راربوونی ئهم ئاواته مه‌زنه وڵاتانی هاوپه‌یمانان هه‌ستان به فشار کردن له سه‌ر ئهم دووئیداره‌و ده‌سته‌ڵاته، هه‌ر له به‌ر ئه‌وه‌ش بوو ئه‌وانیش ئهم ڕێگایه‌یان گرته به‌رو ملی خۆیان که‌چ کرد بۆ چه‌سپاندنی ئهم پرۆسه‌ی ئاشتیه، هه‌رچی براکوژی و وێرانکردنی دێهاته‌کان و ماڵی خه‌ڵکی بوو به چاو نووقاندنێک، وه‌ک چه‌قه‌نه‌یه‌ک له بیری خۆیان برد. به‌ڵام هه‌رچۆنێک بێت له جاران باشتریان کردوون.
ئاخاوتن له سه‌ر پرۆسه‌ی ئاشتی به بێ باوه‌ڕیه‌کی ته‌واو و پێشخستنی مێشکی کۆنیان که به بێ رق و تۆڵه بێت. واته ئهم دوو ده‌سته‌ڵاته با به دڵێکی نوێ و به کرده‌وه هه‌ستن بۆ ڕزگارکردنی خه‌ڵکی کورد و به‌خۆیاندا بچنه‌وه ئه‌گه‌ر ئه‌وان به‌ڕاستی تامه‌زرۆی پڕۆسه‌ی ئاشتین و ده‌یانه‌وێت برا کوژی بنه بڕ بکرێت. ئهم دوو ده‌سته‌ڵاته با ڕاستگۆبن وبه ووریایانه به‌خۆیاندا بچنه‌وه، که کرده‌وه‌کانیان له پرینسیپی ماف ویاسای نێوده‌وڵه‌تی به‌رامبه‌ر به خه‌ڵکانی کوردستان و ووڵاتانی ده‌وروبه‌ریان ده‌که‌ن به دوور نه‌بێت له یاسا نێو ده‌وڵه‌تیه‌کان، گه‌ر وا ناکه‌ن ئه‌وا یاری ده‌که‌ن به ئاگر، دوورنیه خۆیان بسووتێنێت.
ئێمه‌ی کورد ده‌بێت زۆر سوپاسگوزاری خوداو وڵاتانی هاوپه‌یمانان بین که ڕزگاریان کردنین له ئه‌فله‌قیه‌کان و عاره‌به شۆڤیه‌نیه‌کانی خوێنمژ، که‌چی زۆر به ڕاشکاوانه ئهم دوو ده‌سته‌ڵاته چه‌ندجارێک ده‌نگی کوردی زوڵاڵیان پێشێلکردوه ئه‌ویش به‌وه‌ی که هه‌ستاون به ده‌ست ماچکردنو پاڕانه‌وه ڕووبه‌رووڕی ڕژێمی فاشیست و سیستێمو دامو ده‌ستگا بۆگه‌نه‌که‌ی. که میلله‌ت ئه‌مڕۆ ئهمهیان له بیر خۆ بردۆته‌وه، مانای ئه‌وه نیه که ئهم گه‌له جارێکی تریش ئاماده‌ی سه‌رشۆڕیه‌کی ترن له ژێر ئاڵای یه‌کگرتنه‌وه‌ی ئهم دوو ئیداره‌یه، که زووتر به به‌ڵگه خه‌ڵکانێک هه‌ن له‌و مه‌سئوولانه سیخوریان بۆ به‌عسی گۆڕ به گۆڕ کردوه دژ به میلله‌ته‌که‌یان کاریان کردوه. قه‌ومی کورد قه‌بووڵی دیکتاتۆرێکی تر ناکات به ناوی حکوومه‌تی ئازادی کوردوستانه‌وه بێت و له بنه‌چه‌دا خۆی ده‌ستبڕ و پێشێلکه‌ری ئازادی و سه‌ربه‌خۆیی بێت. به‌ڵام نه‌خشه‌ی ئینگلیزو ئامریکا زۆر ئاشکرایه بۆ سه‌رکرده‌کان، که ئه‌گه‌ر ئه‌وان له ژێر پرۆژه‌ی هاوپه‌یمانان نه‌جووڵێنه‌وه واته ئه‌گه‌ر وان وڵاته‌که به‌ره‌و دیموکراتیه‌ت و سه‌ربه‌ستی نه‌به‌ن ئه‌وا زۆر به ئاسانی ده‌توانن میلله‌تیانی لێهه‌ڵگه‌ڕێننه‌وه. سه‌رکرده‌کانیش زۆر به‌ووردی ئهم بۆچوونانه ده‌بێت قه‌بووڵ که‌ن. ئه‌ویش هه‌ر له به‌ر ئه‌وه‌ی که میلله‌ت تا دوێنێش زۆر لێیان ناڕازی بوون. پشکنینی سیسته‌مێکی زانیاری و لۆجیک ته‌نها له ناو خۆماندا ده‌بێت هه‌ڵبکوڵێت. هه‌رچه‌نده لاسایی کردنی میلله‌تانی پێشکه‌وتوتر له ئێمه که جیاوازی کولتوری و ڕۆشنبیریان هه‌یه و هه‌مان هه‌ڵوێستی ڕۆژانه‌ی میلله‌تی کوردیان نیه و که‌ڵکیان ده‌توانین لێوه‌رگرین ، به‌ڵام مێژووی ئه‌و میلله‌ت و ووڵاتانه له گه‌ڵ گه‌لی کوردا یه‌ک نین به‌وه‌ی که کورد هه‌میشه فشاری ئایینی و نه‌ته‌وایه‌تی میلله‌تانی وه‌ک عه‌ره‌ب و تورک و فارسی ده‌وروپشتیان خراوه‌ته سه‌ر. ئه‌و میلله‌تانه به ناوی ئایینه‌وه توانیویانه شۆڕشه‌کانی به‌ر له مێژوو وکاتیدا له‌نێو به‌رن، ئهم ڕووداوانه‌ش زۆر که‌وتوه له‌سه‌ر پڕۆژه‌ی سه‌ربه‌ستی میلله‌تی کورد، ئه‌و میلله‌تانه به هۆی گرتنی سیخور و خۆفڕۆشی هه‌ندێک له سه‌رکرده‌کانی شۆڕشی کۆن و نوێ ی کوردا گه ییشتوونه به مه‌رامی له ناوبردنی ئازادی کوردوستان، به کوردی هه‌ندێک له کۆنه پیاو وسه‌رتیره‌کانیانی سه‌ربه‌خۆیانی ده‌کرد به پێشڕه‌وی میلله‌تی کورد، به شه‌رتێک که کۆمه‌ڵێک له‌م سه‌رکردانه جاشایه‌تیه‌کانیان به پاڵه‌ونێتی و تاکتیکی له قه‌ڵه‌م ده‌برد.
من نامه‌وێت باسی ڕێکخراو و پارته بچکۆله‌کان بکه‌م لێره‌دا، که هه‌ندێکیان به ئاشکرا بوونه به دارو ده‌سته‌ی عاره‌بستانی سه‌عوودی و ئێران و ئه‌لقاعده وه‌ک ئه‌نساری ئیسلامی چونکه ئه‌وان ئه‌گه‌ر جاشازیه‌تیشیان کردبێت ئه‌وا سنووربه‌ند بوونه و کێشه‌که‌یان ترسناک نه‌بوه، که ئه‌وانیش به یارمه‌تی ئامریکاوه له نێو چوون و له ناوچه‌کانی هه‌ڵبجه‌و ده‌ورو پشتی ته‌فرو تونا کران و بارو بارخانه‌یان پێ هه‌ڵپێچدرا.
ئه‌گه‌ر جارێکی تر ئهم دوو زل هێزه زیندوویان نه‌که‌نه‌وه بۆ به‌رژه‌وه‌ندی یه‌کێ له‌لایه‌نه‌کان له ناوچه‌که دا ئه‌وا ببڕای ببڕ جارێکی که ناتوانن بێنه‌وه گۆڕه‌پانه‌که. هه‌ر ئهم نائیسلامیانه بوون که هێرشیان ده‌که‌رده سه‌ر ماڵ و حاڵی خه‌ڵکی و ده‌ستیان دابوه کۆمه‌ڵکوژی له‌و ناوچانه‌ی له‌ژێر ده‌ستیاندا بوو، ئه‌وێش به یارمه‌تی کێ بوو ،ئه‌گه‌ر لایه‌نێک له‌م دوو زلهێزه یارمه‌تی نه‌دابێت، به‌وه‌ی که ڕاسته‌وخۆ هاریکریان ده‌کردن، ئه‌گه‌رچی ئه‌و یارمه‌تیه به‌ته‌نها به خۆیان کردبێتیان یان به فه‌رمانی میتی تورک و پاسدار و به‌عسه‌وه بووبێت. ئه‌و یارمه‌تیه‌یان ده‌دا، کاتێک که زۆر چاک ئه‌و دوو زل هێزه ده‌یانزانی که ئه‌و کاره‌یان دژ به گه‌لی کورده . بۆیه جارێکی تریش زۆر به ڕاشکاوی ده‌مانه‌وێت بهێنینه‌وه یادیان که میلله‌تی کورد ئه‌مانه‌یان له بیر نه‌چۆته‌وه و ده‌مانه‌وێت هه‌ردوو لا به‌رامبه‌ر به مێژوو به‌رپرس بن .
ئێمه‌ی کورد زۆر باش ده‌زانین که کاروباری کوردوستان له‌م قۆناغه‌ی ئێستادا زۆر نا سکه، وه هه‌روه‌ها ده‌سته‌ڵاتداره‌کانیش ئهمهیان هه‌ڵقۆستۆته‌وه بۆخۆیان که هیچ که‌سێک له‌م بارو دۆخه‌دا باسی شه‌ڕی برا کوژی و میلله‌ت فڕۆشی و چه‌واشه کردنی خه‌ڵکی ناکه‌ن، بۆچی ئه‌وان که‌میان کرد به‌م گه‌له به‌وه‌ی که دووبه‌ره‌کیان خسته نێو ڕیزه‌کانی میلله‌ته‌وه به کوشتنی خه‌ڵکانی بێ تاوانی کورد و دێهات چۆڵکردن وویرانکردن و له سێداره دانی پێشمه‌رگه‌ی کوردی سه‌ر به‌لاینه‌که‌ی تر، کرده‌وه‌کانیان که‌متر نه‌بوون له ڕه‌فتاره‌ی عه‌فله‌قیه‌کان ئه‌گه‌ربه شێوه‌یه‌کی نسبێ بیگریت، ده‌ڵێین! با ئه‌وان تاوانبارن، به‌ڵام قه‌ده‌ر وای کردوه که ئه‌مان وه‌ک ڕێوی له پێسته‌کانێان هاتنه ده‌رێو دووباره ده‌ستیان کرده‌وه به ده‌هۆڵ لێدانی دیموکراسیه‌ت. به‌ڵێ ده‌بێت ئه‌مانه ووریا بن و بزانن که میلله‌تی به‌شخورای کورد نه‌خه‌وتوه چی دی، سزادانی ئه‌وان بۆ مێژوو جێ دێڵین ،چونکه سه‌رکرده‌کان به‌خۆشیان ده‌زانن که ئه‌وڕۆ گه‌ڕان به دوای سزادانیان له به‌رژه‌وه‌ندی کود دا نیه. ئاشکرایه لای هه‌ر هه‌موان که دوژمنانی نه‌ته‌وه‌ی کورد زۆرن به‌تایبه‌تی ده‌ورو دراوسێکانمان که به گشت شێوه‌یه‌ک خواست و ویستیان بووه که مێژووی گه‌لی کورد بێننه گۆڕین، ئه‌مه‌ش بوه به‌هۆی وون بوون و زنجیرشکاندنی ڕاستیه‌کانی مێژووی کوردو بنه‌مای نه‌ته‌وایه‌تی، بۆیه ده‌مه‌وێت بڵێم که کورد پێویستی به سیسته‌مێکی نوێ هه‌یه بۆ ڕه‌فتار کردن و هه‌ڵسووکه‌وت کردن له گه‌ڵ چه‌رخ و خوله‌کی ڕۆژانه‌دا ، ئێمه نابێت هه‌ندێک بنه‌ما بکه‌ینه یاسا و ده‌ستوور که نه‌گونجێت له گه‌ڵ کولتووری کوردیدا و لاسایی کرنه‌وه‌یه‌کی زه‌قانه له گه‌ڵ پرینسیپی میلله‌تانی تردا له‌وانه‌یه به چه‌وتی به‌سه‌رماندا بشکێته‌وه که له‌گه‌ڵ خودی واقیعی کوردیدا یه‌ک ناگرنه‌وه. ده‌سته‌ڵاته‌داره‌‌کانی ئه‌وڕۆ نابێت که فه‌رمانێکیان بۆ دێت له هاوپه‌یمانانه‌وه، یه‌کسه‌ر بیکه‌ن به یاسا له کوردوستاندا ، به‌ڵکو ده‌بێت زۆر به ووریایانه بۆ بابه‌ته‌کان بچن و نه‌ک به ته‌نها ئه‌و بابه‌تانه بکه‌ن به چه‌کووش و یاساو بیده‌ن به سه‌ری میلله‌تدا، که یه‌ک گرنه‌وه له گه‌ڵ به‌رژه‌وه‌ندیه‌کانیاندا، نه‌خێر به‌ڵکو ده‌بێت بیر له دوا ڕۆژی کورد بکه‌نه‌وه، بۆ چه‌سپاندنی ئهم بڕگه گرنگه‌ش پێویستیه‌کی زۆریان به ڕاوێژکاری داد و یاسا هه‌یه، نه‌ک هه‌ر به‌خۆیان هه‌ستن یاساکانمان بۆ دابڕێژن وه‌ک یاساکانی سه‌ددامی گۆڕبه‌گۆڕ. ئهم ده‌سته‌ڵاتدارانه ئه‌وه‌شیان پێ کردنین له دامه‌زراندنی ده‌ستووری هه‌میشه‌یی عێراقدا، که زۆر له مافه‌کانی میلله‌تی کوردی تێدا پێشێل کرا له‌سه‌ر حیسابی که‌مه پێکهاتوه‌کانی تر، ئه‌ویش هه‌ر بۆ ئه‌وه‌ی ئامریکا به‌و شێوه‌یه ده‌ێویست، سه‌رکرده‌کان جه‌ختیان له مادده‌ی ١٣٧ دا ده‌کرد که بۆ به‌رژه‌وه‌ندی خۆیان نووسرابۆوه، که بنه‌ماکه‌ی ئه‌وه‌یه که هه‌رچی کراوه له کوردوستاندا وه‌ک کڕین و فڕۆشتن و یارمه‌تی ماددی که دراون به میلله‌ت و مه‌سئووله‌کان لرفیان کردبێت بێ حیساب بێت و لێی نه‌پێچرێته‌وه.
له به‌ر ئه‌وه‌ی که ئهم دوو ئیداره‌یه فێره به له‌خشته‌بردنی خاڵکان و ئه‌وانیش ئهم کاره‌یان کردوه به پیشه‌ی خۆیان، دوور نیه ئهم دوو ئیداره‌یه جارێکی تریش بکه‌ونه نێو هه‌ڵه‌ی مێژووییه‌وه، ئه‌گه‌ر هه‌موو میلله‌ت چاوه‌ڕوانی ده‌ستی ئهم دوانه بن، هه‌ر له‌م دواییه‌دا بۆ ناڵێیت که ه‌ستیان دایه گرتنه ژێر ده‌ستی ڕاپه‌ڕینه‌که‌ی ساڵی ١٩٩٠ که به‌زۆری ده‌سته‌ڵات و چه‌ک توانیان ئه‌و ئینتیفازه‌یه‌ش ڕاگرن و بیکه‌ن به ڕاپه‌ڕینی حیزبی. کاتێک که خۆی له ڕاستیدا میلله‌ت به‌و ڕاپه‌ڕینه هه‌ستابوو.
گرنگه له‌سه‌رمان که هه‌میشه ئاگاداری مێژوو بین، تۆ ته‌ماشا بکه کاتێک ده‌سته‌ڵاتداره‌کانمان چه‌ند لاوازو بێ هێز خۆیان نیشانی عه‌ره‌بی عێراقی ده‌ده‌ن، خۆیان کردوه به جان جاک ڕۆسۆ بۆ چاکردنه‌وه‌ی به‌ره لابه‌لاکانی پارته عاره‌بیه‌کاندا، به مه‌رجێک چاک بوونه‌وه‌یان مه‌ترسیه له سه‌ر مانه‌وه‌ی گه‌لی کورد، تۆ بڵێێ ئه‌وه‌ی ئێمه باسی ده‌که‌ین سه‌رکرده‌کانمان بیریان لێ نه‌کردبێته‌وه، ئه‌مه پرسیارێکی بێ وه‌ڵامه! ده‌ڵێن مێژوو خۆی دووپات ده‌کاته‌وه، که بیرکردنه‌وه‌ی مێشکی سه‌رکرده‌ی کورد باوه‌ڕی هه‌ر له کۆنه‌وه هه‌بوه به مرۆڤانی نامۆو بیانی، که له پاشه‌ڕۆژدا به خراپه که‌وتوه به‌سه‌ر شانی کورداو چه‌ند ساڵی بردوه تا لێی قورتاربووین.
ئهم دوو ده‌سته‌ڵات و دوو ئیداره‌یه به هۆی باوه‌ڕنه‌بوونیان به میلله‌ت و، ته‌نها باوه‌ڕیان به‌چه‌ند تاکه که‌‌سانێکی سه‌ربه‌خۆیانن له کوردوستانداو ڕه‌وڕه‌وه‌ی پێشکه‌وتنێ کورد ڕاده‌گرن و به لای خۆیاندا ڕایده‌کێشن، هه‌ر له‌به‌ر ئه‌وه‌شه ده‌مه‌وێت خه‌ڵکی ئاگادار که‌مه‌وه که نه‌هێڵن ئه‌مانه به هۆکاری درووست کراوه‌وه نه هێڵن هێنده‌ی دی ده‌سته‌ڵاتدار تر بن. هه‌ر بۆیه کردار و دیموکراسیه‌ت و پڕۆسه‌ی گه‌شه پێدانی ووڵات له‌م دوو ده‌سته‌ڵاته نابینم، چونکه وان پاک نین به‌رامبه‌ر به میلله‌ت و هیچ کارێکیشیان نه‌کردوه بۆ له ناو بردنی گه‌نده‌ڵی ، ئه‌ویش هه‌ر له‌به‌ر ئه‌وه‌یه که خۆیان له سه‌ر لووتکه‌ی گه‌نده‌ڵیه‌که دانیشتوون، جا کاری چلۆن دژ به گه‌نده‌ڵی بکه‌ن، خۆ ئه‌گه‌ر کاری بۆ بکه‌ن ئه‌وا ده‌که‌ونه خواره‌وه‌و لاقی خۆیانی تیادا ده‌شکێت، به‌ڵێ ده‌سته‌ڵاتیان به‌کار هێناوه تا وه‌کو ئێستا بۆ گه‌نده‌ڵی و پاره‌کۆکردنه‌وه‌و، پاره گۆڕینه‌وه‌و، پاره‌پێگیرانیان له گه‌لێک ووڵاتاندا وه‌ک تورکیا، که هه‌ر جاره‌ش لێی زه‌وت کردوون. تاپۆ کردنی زه‌ویوزار هه‌ر مه‌ژمێره چۆنکه هه‌ر مه‌سئوولێک ڕادده به‌ده‌ر زه‌وی له‌سه‌ر تاپۆ کراوه. جگه، له هه‌ندێک خزمانی نوێیان به ناوی پیاوه ماقووڵ و ڕیش سپی وهۆڵ و مووسته‌شار که به هه‌زاره‌ها دۆلار وه‌رده‌گرن، ئه‌مه جگه له خانووبه‌ره‌و ناو ماڵ وخواردن و خواردنه‌وه‌ی مێزی شه‌وانیان، که پاره‌ی هه‌ر یه‌ک شه‌وێکی ئه‌وان خۆی له ٢٠٠ دۆلار ده‌دات. ئاخر گه‌لۆ پێم ناڵێن ئهم ناڕه‌واییه بۆچی؟؟؟ ئایا ئهم نا هه‌ڤاڵانه چیان بۆ میلله‌تی کورد کردوه؟؟؟ یان تۆ بڵێ ئه‌مانه له چ بوارێکدا لێزانن یان تۆ بڵێی ئه‌وانه هه‌ر هه‌موویان مێشکی ئانیشتاین یان ڤۆلتێری فه‌ره‌نسیان پێوه‌بێت وداهێنه‌ر بن؟؟؟
ئێستا دادگاکانی ده‌سته‌ڵاتداران پێشکه‌وتوون هه‌ر وه‌ک ڕژێمی پێشوو فێری یاسا دانان بوون، هه‌ر که‌سێک به پێی قانوونی هه‌رێمی (ئهم دوو ده‌سته‌ڵاته ) به‌خراپ له‌سه‌ریان بدوێت ئه‌وا یه‌کسه‌ر مۆری خائینی نه‌ته‌وه‌و گه‌لی له‌سه‌ر ته‌مغه ده‌که‌ن و جێگه‌یان بێسه‌رو شوێن ده‌بێت و ده‌خرێنه ناو زیندانه‌کانه‌وه ئه‌وه ئه‌گه‌ر به به‌زه‌یی بن و خۆتیش چانس داربیت بێ گومان چه‌ند مه‌سئوول و کاربه‌ده‌ستێکی به‌ده‌سته‌ڵاتیش واسته‌ت بۆبکات، خۆ ئه‌گه‌ر نا، ئه‌وا زۆربه ئاسانی له په‌نایه‌کدا به یه‌ک فیشه‌ک ساردت ده‌که‌نه‌وه. مه‌رامی فه‌رمانبه‌رانی ئهم دوو ده‌سته‌ڵاته ته‌نها ئه‌وه‌یه که هه‌ر که‌س با له جێی خۆی دانیشێت و وورته نه‌کات هه‌ر چ شتێکی نا ڕه‌واشی به‌ر چاو که‌وت، ئه‌وا با چاوی لێ بپۆشێ و وه‌ک كوێر و ڵاڵ بێت.
بۆیه داواکارین له ئه‌ندامانی ڕاسته‌قینه‌ی کوردوستان، نه‌ک ئه‌و ده‌سته‌یه‌ی ئێستا هه‌ن که میلله‌ت پێیان ده‌ڵێن جه‌ماعه‌تی ئه‌شهه‌دووی ئه‌و دوو حیزبه‌ن که هه‌ڵوێستی نوێ بنێن بۆ سه‌قامکردنی ئاشتی وئارامی وئابووری بۆ خه‌ڵکانی کوردوستان. ئه‌وه‌ش ده‌کرێت ته‌نها به دامه‌یراندنی زۆر لیژانی تایبه‌تمه‌ند که له پسپۆرانی مێژووییو شاره‌زایی ئابووری گشتی ناوخۆ و ده‌ره‌وه وه له زانایانی یاسایی پێکهاتبن، زانایانه کولتووریه‌کان له ئامێز که‌ن بۆ ئه‌وه‌ی بتوانن پرینسیپه کۆنه‌کانی هه‌ڵوێستی کۆمه‌ڵایه‌تی بگه‌ڕێننه‌وه بۆ کۆمه‌ڵگای کوردی. ئه‌مڕۆ له کوردوستاندا له جیاتی ئهم پسپۆرانه پیاوانی ئیسلامی و ئایینیو بێ سه‌وادیان خستوونه‌ته جێ. لێزانه‌کانیش له چایخانه‌کاندا بۆخۆیان تاوڵه ده‌که‌ن.
ئه‌وان گه‌ر بیانه‌وێت ده‌توانن ئهم لێزانانه بێننه پێشه‌وه چونکه هه‌ر ئه‌مان ده‌توانن نه‌خشه‌و پلان داڕێژن و داخوازیه‌کانیان کوردیانه بێت که بگونجێت له گه‌ڵ خودی خواست و وویستی کورد له‌م ڕۆژه‌دا.
هیچ داواکاریه‌ک بۆ میلله‌ت زۆر نیه، کاتێک خواستی مافه‌کانی تاکه که‌س ده‌کرێت. دوای ئه‌وه پێوست به نێگه‌رانی ناکرێت که گه‌ل داوای پلانێکی نه‌خشه داڕێژراو ده‌کات، ئهمهیان بێگومان هیچ ده‌سته‌ڵاتێک نابێت به‌رگری لێ بکات، ئه‌مڕۆ کوردوستان داوای رێفاندۆم ده‌کات، ئه‌و چاکسازیانه‌ی ئهم دوو ئیداره‌یه وویستیان بیخه‌نه گه‌ڕ هیچیان جێبه‌جێ نه‌بوون، له‌و باوه‌ڕه‌شدا نیم که ده‌ست به‌م چاکسازیه بکه‌ن دوای یه‌کگرتنه‌وه‌شیان جونکه ئه‌وان جارێ خه‌می دابه‌شکردنی سه‌رچاوه‌کانی کوردوستانن له نێو هه‌ردوو ده‌سته‌ڵاتدا . به‌ڵگه‌ش بۆ ئه‌مه ئه‌وه‌یه که گه‌لی کورد داوای کۆنفیندرالیه‌ت ده‌کات و سه‌ربه‌خۆیی ده‌کات، چونکه من تێناگه‌م ئایا جگه له کورد له‌م جیهانه‌دا هه‌یه بێ ووڵات بێت که خاوه‌نی ئه‌و هه‌موو مێژوه بێت،که ئه‌مه‌ش که‌مترین داواکاری میلله‌ته.
سه‌یر نیه کاتێک کورد داوای مافه ڕه‌واکانی خۆی ده‌کات، خه‌ڵکانێک هه‌بن که دژ به بۆچوونه‌کانت بچن به هۆی به‌ڵگه‌ی بێماناوه دژایه‌تیت بکه‌ن، ئه‌مانه دژ به بۆچوونی خه‌ڵکی ده‌که‌ن له‌به‌ر ئه‌وه‌ی که خۆیان پێیان ناخۆشه‌و هه‌ر خۆشیانن که ماف خواردنیان کردوه به پیشه‌یان. ئه‌وه‌ی بێده‌رامه‌ته داوای باری ئابووری و ئارامی و چێگه‌ی سه‌ربه‌ست و سه‌ربه‌خۆ ده‌کات بۆ خۆیی و منداڵه‌کانی، خواستی گه‌وره‌ی هه‌بوونی ده‌رمان و خه‌سته‌خانه‌یه، داوای مافی خوێندن ده‌کات، داوای سه‌ربه‌ستی و ئازادی ده‌کات، داوای ده‌نگه‌که‌ی ده‌کات که داویه‌تی به پارتێک که خۆی باوه‌ڕی پێیه‌تی، که‌چی زۆر به بێ شه‌رمانه ئه‌و مافه‌شی ده‌خورێت له سه‌ندووقی هه‌ڵبژاردنه‌کاندا به‌وه‌ی ده‌نگه‌کانیان ده‌گۆڕن بۆ چه‌ن پارتێکی ده‌سته‌ڵاتدار و ئاواته‌کانی ئه‌و هه‌ژاره‌ش زینده‌به‌چاڵ ده‌که‌ن.
به بۆچوونی من ناکرێت وه به‌هیچ شێوه‌یه‌ک نابێت ده‌سته‌ڵاتدار دژ به گروپێک یان حیزبێک بوه‌ستێت که خه‌ڵکانێکی له گه‌ڵدان، هه‌رچه‌نده وا گریمان ئهم لایه‌نه بۆچوونه‌کانی له‌گه‌ڵ بارودۆخی ئه‌مڕۆدا ناگونجێت. به‌ڵام بۆ که‌س نیه سووکایه‌تی به سه‌ر لایه‌نێکی تر بکات و خۆی بکات به مه‌شخه‌ڵی هه‌ڵگری کوردایه‌تی ، که‌چی له ڕوانگه‌دا هه‌ر به‌خۆی بوه به پێشێلی رێفراندۆم و ڕاسته‌وخۆ بێت یان نا ڕاسته‌وخۆ، چونکه ئه‌مه هه‌ر له خۆیدا ده‌ست تێوه‌ردانێکه له پرۆسه‌ی دیموکراتی و تێکدانی بیرو باوه‌ڕی ئازاده که بنچینه‌ی سه‌ربه‌ستی و ئازادیه له کوردوستانی ئه‌وڕۆدا.
سه‌رانی کورد ئه‌وڕۆ پڕۆسه‌یه‌کی نوێیان له به‌رده‌ستدایه، ئه‌ویش چه‌سپاندنی مافه ڕه‌واکانی گه‌ل و تاکه له کۆمه‌ڵگای کورده‌واریدا، ئم کاره ده‌بێت به مه‌رجێک بکه‌ن که دژی بۆچوونی گشتی نه‌بێت و داواکاریه‌کانی کۆمه‌ڵ به ئارمانجی میلله‌تی کورد بگه‌یه‌نن. له هه‌مان کاتدا نابێت زۆرینه یان کۆمه‌ڵێک ده‌سته‌ڵاتدار بێ یاسایی درووست بکات دژی که‌مه کۆمه‌ڵایه‌تیه‌کی ده‌وروپشتی خۆی.
خه‌ڵکانێک هه‌ن که بیروباوه‌ڕی جودایان هه‌یه و بۆچوونی تایبه‌تی خۆیان هه‌یه، ئه‌مانه وه‌ک تاک تووشی سزاو دوورکردنه‌وه بوون به هۆی بۆچوونی سیاسی و کۆمه‌ڵایه‌تیه‌وه. که ئه‌و جۆره سزایانه ته‌نها له سه‌رگوزشته‌و به‌د ڕه‌فتاری مرۆڤه دکتاتۆره‌کانه‌وه بیستراوه که سزای به ناو قانوونی ،به‌سه‌ر ئه‌و تاکانه‌دا ده‌پاسێنن، کاتێک ئه‌و یاسایانه که له‌لایه‌ن ئه‌و نامرۆڤانه‌وه دانراون،بۆ ته‌نها به‌رژه‌وه‌ندی ته‌سکی خۆیانه .
بۆ نموونه دکتۆر که‌مال که من نه له دووره‌وه یان له نزیکه‌وه ده‌یناسم، ئه‌و و چه‌ند خه‌ڵکانێکی که هه‌ن گیراون و تووشی ڕۆژی ڕه‌شی خۆیان بوون و له به‌ندیخانه‌کانی ئهم دوو ئیداره‌یه‌دا ده‌ناڵێنن،و بێ ئه‌وه‌ی که‌س ئاگاداری هه‌واڵیان بێت یان لێیان بپێچنه‌وه. ئهم دکتۆره به‌ڕێزه واته دکتۆر که‌مال که ئهم ده‌سته‌ڵاتدارانه له نه‌زانی خۆیاندا کردیان به که‌ڵه گا به سه‌رشانی خۆیانداو ئێستا خۆشیان نازانن چۆن قورتار بن له‌و خه‌مه. من وه‌ک گوتم دۆستایه‌تیم نیه له گه‌ڵ به‌ڕێز د. که‌مالدا، به‌ڵام وه‌ک مرۆڤ وه‌ک تاکێکی کورد به هه‌موو هه‌ڵه‌کانی سیاسی و کۆمه‌ڵایه‌تی و بیروبۆچوونه‌وه تاکو بگاته ئه‌وه‌ی هه‌ڵه‌و ڕه‌خنه‌ی ناله‌بارو قسه‌و هه‌ڵبه‌ستی به‌سه‌ر که‌سایه‌تی سه‌رکرده‌کان و خێزان و گرووپه کورده‌کان کردبێت ، به‌ڵام وه‌ک من بۆم ده‌رکه‌وتبێت به گوێره‌ی ڕۆژنامه‌کان و ژووره کوردیه‌کاندا که ئهم نه پیاوی کوشتوه نه دژی میلله‌ته‌که‌ی کرده‌وه‌ی خراپی کردوه، نه دزیو جه‌رده‌یی کردوه وه هێچ ڕۆژێک خه‌نده‌قی جاشایه‌تی دژ به نه‌ته‌وه‌که‌ی هه‌ڵنه‌گرتوه‌و ماڵ و دێهاتی کوردی وێران نه‌کردوه‌و دژایه‌تی نێوان چینه‌کانی گه‌لدا نه‌خوڵقاندوه، ته‌نها تاوانه‌که‌ی وه‌ک من بیستوومه‌و به هه‌ڵه‌دا نه‌چووبم ئه‌وه‌یه که ووشه‌ی سووکایه‌تی به چه‌ند خێزانێکی سه‌رکرده‌ی کورد کردوه بێگومان ئه‌مه‌ش سزای تایبه‌تی خۆی هه‌یه، له جێی خۆیه‌تی سزا بدرێت و زۆر ڕاسته دادی شه‌رعی بکرێت له ڕووی یاساوه، ئه‌ویش به مه‌رجێک ده‌بێت گه‌ر هاتو ئه‌و که‌سه‌ی یان خێزانه‌ی سووکایه‌تی پێکراوه به ڕه‌سمی ده‌بێت له دادگادا شکایه‌تی خۆی به‌رزکاته‌وه، دوای ئه‌وه دادگا به خۆی دادوه‌ری ده‌کات ، بێگومان پاش لێکووڵینه‌وه‌و به‌ڵگه‌دان به‌ده‌سته‌وه. له ڕووی هه‌موو یاسایه‌کی نێوده‌وڵه‌تی ئه‌و زاته‌ی قسه هه‌ڵده‌به‌ستێت بۆ یه‌کێکی تر، گه‌ر ڕاست نه‌بێت ئه‌وا سزا ده‌درێت سزاکه‌شی به پله‌ی یه‌که‌م ته‌نها سزای غه‌رامه‌یه و تێپه‌ڕنا‌بێت ئه‌ویش چه‌ند دۆلارێکه که ده‌بێت بدرێت به‌و که‌سه‌ی سووکایه‌تی پێ کراوه، یان زیندانی کردنه بۆ ماوه‌یه‌ک له شه‌ش مانگێک تێپه‌ڕنه‌بێت گه‌ر هاتوو تاوانی تری کردبێت ، جگه له‌سووکایه‌تی پێ کردن. به‌ڵام که د:که‌مال سزای ٣٠ ساڵ زیندانیان کردوه، ئه‌مه به‌س له حوکمی قه‌ڕه‌قۆشدا بیستراوه. ئه‌مه نموونه‌یه‌کی زۆر زه‌قه و که‌س ناتوانێت بڵێت وا نیه، له هه‌مان کاتدا هه‌ڕه‌شه کردنێکه دژ به گه‌ل ومیلله‌ت و ئازادی بیروڕا ده‌ربڕینه، وانه(ده‌رس) پێدانه به خه‌ڵکی تاک و ئازاد که هه‌رگیز بیرنه‌کاته‌وه له ڕه‌خنه گرتن له خاوه‌ن شکۆ،ئاگادارمان ده‌که‌ن و پێمان ده‌ڵێن ئێمه وه‌ک خوداوه‌ندین ئه‌وه‌ی باسمان بکات به‌م ده‌رده‌ی ده‌به‌ین ئه‌گه‌ر ووشیارن نۆکه‌رمان بن و سوجده‌مان بۆ به‌رن و ده‌ست له سه‌ر سنگ به‌رامبه‌رمان بوه‌ستن ئه‌گه‌ر وا ناکه‌ن ئه‌و کاته ئێمه به ئاره‌زووی خۆمان داتانده‌ینه به‌ر شه‌پان و دادگاییتان ده‌که‌ین. دادگاکردنتان ته‌نها نووسینه‌وه‌ی چه‌ند دێڕێکه‌و ده‌یکه‌ین به یاسا. ده‌یانه‌وێ پێمان بڵێن که باس کردنی ئه‌وان و ڕه‌خنه گرتن له‌وان گۆڕهه‌ڵکه‌ندنه که خۆمان بۆ خۆمانی هه‌ڵده‌که‌نیت. چاو سوورکردنه‌وه‌یه له هه‌مو خه‌ڵکانی کوردوستانی خه‌باتکه‌ر و مشارێکه په‌نجه‌ی هه‌موو که‌سێکی پی ده‌بڕنه‌وه که ده‌یانه‌وێ به پێنووسه‌کانیان چی له ناو دڵیاندا که‌ڵه‌که‌ی کردوه بیخه‌نه به‌رچاوی خوێنه‌ر. به‌ڵام له خودا به زیاد بێت چاوی کوردیش هه‌رده‌م خۆڕاگرو نه‌ترس بووه دژ به زۆردار.
تۆ بڵێیت گه‌ر هاتوو د.که‌مال سووکایه‌تی و ته‌عنی به‌رامبه‌ر به خێزانێکی نه‌ناسراوی هه‌ژاری بێ ده‌سته‌ڵاتی کورد بکردبایه، هه‌مان سزای ده‌درا و ٣٠ ساڵیان له زیندانی ده‌نا ؟؟؟ ئه‌مه خۆی پرسیارێکی بێ وه‌ڵامه !!!!!
ئاواته‌خوازم که یاسای حکوومه‌تی یه‌کگرتووی کوردوستان زۆر به ڕاشکاوانه بنواڕێته ئهم ته‌جاوزاته نا یاساییانه و سنوورێکی بۆ دابین بکه‌ن، چونکه یاسا له سه‌رووی هه‌موومانه‌وه‌یه، هه‌ر وه‌ک چۆن سه‌رکرده‌کانی کورد به خۆیان دانیان به‌وه‌دا هێناوه، واته یاسا له سه‌رووی سه‌رکرده‌کانیشه‌وه‌یه. له‌و باوه‌ڕه‌دا نیم که د.که‌مال ته‌نها که‌س بێت به‌و ده‌رده گه‌ێشتبێت به‌ڵکو ده‌یانی وه‌ک ئه‌و هه‌ن که که‌س ناویشیان نابات.
من بۆیه لێره‌دا ده‌توانم بڵێم که ئه‌و ئاسایش و ئارامیه‌ی ده‌سته‌ڵاتداره‌کان به‌ر ئه‌نجامی ده‌ده‌ن له نێو ده‌زگاکانیان زیاتر بۆ به‌رژه‌وه‌ندی خۆیانه و بۆ مانه‌وه‌ی کورسیه‌کانیانه گه‌ر وا نیه ده‌ی چۆن سزای ٣٠ ساڵ ده‌خه‌نه پشت تاوانبارێک که ته‌نها پێنووسه‌که‌ی به‌کارهێناوه بۆ خزمه‌تی گه‌له‌که‌ی ئه‌ویش له شێوه‌ی ڕه‌خنه گرتندا بووه، سه‌ره‌ڕای ئه‌وه‌ی با بڵێین به هه‌ڵه‌شدا چوه، به‌ڵام که‌سانێک که ده‌سته‌ڵاتداران به‌کاریان هێناون بۆ پیاو کوشتن کاری خراپیان پێ ئه‌نجام داون، ئێستا خه‌ڵاتیان ده‌که‌ن و شوێنی باشین ده‌ده‌نێ و مه‌سئوولیاتی قه‌به قه‌به‌ی پێ ده‌سپێرن، له ئیداره‌کانیاندا دسه‌ت ڕۆیشتوو و پیاو ماقووڵن وکه‌س نیه له به‌رده‌میاندا فززه بکات. ( با نێکه و دوو هه‌وا)
له بری ئهم هه‌موو ئاکارانه‌دا که له کوردوستاندا به‌رئه‌نجام ده‌درێن که بوه به ماڵوێرانکردنی هه‌ندێک له خه‌ڵکان و بووژاندنه‌وی هه‌ندێک له دارو ده‌ستان ، ده‌بوایه سه‌رکرده‌کانمان وه‌ک بابه پیره‌مان زۆر دڵسۆزانه سه‌ری لاوانیان بخستابا سه‌ر شانی خۆیان و به په‌نجه فرمێسکه‌کانیان بسڕینایه و سه‌ری ماندو له‌شی زاماریان ڕائه‌ژاند و تیماریان ده‌کردن، داستانی کۆنی قاره‌مانێتی و چیرۆک و مێژووی باوباپیرانی کوردیان بۆ ده‌خوێندنه‌وه، هانیان بدانایه که ئه‌وانیش وه‌کوو گشت میلله‌تانی تر چاوی خه‌وڵوویان هه‌ڵبێنن و سه‌ربه‌رزکه‌نه‌وه بڕواننه میلله‌ته پێشکه‌وتوه‌کانی جیهان بۆ ئه‌وه‌ی بچنه کۆڕ و مه‌یدانی تێکۆشان، وڵات بپارێزن ی ڕۆحی کوردایه‌تیان تیادا زیندوو بکه‌نه‌وه وبه‌ره‌و ڕۆژێکی شادی و پڕ له ئازادی هه‌نگاوبنێن.
|
|
|
04/07/2007 |