|
میلیشیای هه‌ولێر بۆچی ڕێگه‌نادات ڤیستیڤاڵی ته‌له‌فزیۆنیی مناڵانی میلیشیای سلێمانی نمایشبکرێت!؟ |
|
حه‌مه‌غه‌فور له‌ماڵپه‌ڕی (پوک مێدیا)دا هه‌واڵێکی سه‌یرم خوێنده‌وه. سه‌یر به‌و مانایه نا که شتێکی ناسازگار له‌گه‌ڵ ده‌سه‌ڵاتی میلیشیایی وعه‌شیره‌یی یه‌کێتی وپارتیدا که‌وتۆته‌به‌رچاوم، به‌ڵکو له‌وێوه که ئه‌م دوو حیزبه تا ئه‌و ڕاده‌یه له به‌رامبه‌ر یه‌کتردا فاشیزم وده‌مارگیریی خێڵه‌کی ومیلیشیاییان به‌کاربردووه وتۆوکردووه به تایبه‌ت له جه‌نگی ناوخۆیاندا تاکارگه‌یشته ئه‌وه که نانی سه‌وز و زه‌ردیان سه‌پاند به‌سه‌ر نانه‌واکاندا وخه‌ریک بوو له مه‌ودای بایۆلۆژیشدا پڕوپووچی خوێنی زه‌رد و سه‌وزیان ده‌هێنایه ئاراوه، وسۆران وبادینانیان باوه‌شینده‌کرد! که‌چی ئێستا لایه‌کیان پێیوایه هه‌روا ئاسانه چالاکییه‌کی ته‌له‌فزیۆنی له ناوچه‌ی ئیماراتی ئه‌وبه‌ردا ئه‌نجامبدات!!هه‌واڵه‌که ده‌ڵێ، به‌رنامه‌ی مناڵانی کوردسات به‌ناوی (گورج وگۆڵ .. بووکه‌ڵه)وه دوای ئه‌وه‌ی ماوه‌یه‌ک له‌مه‌وبه‌ر ڤیستیڤاڵێکیان له ژێر ده‌سه‌ڵاتی میلیشیای سلێمانیدا سازکردبوو، وه به‌وهۆیه‌وه پێیانوابووبوو که به‌رزانی وتاڵه‌بانی به‌ڕاستیانه ئیداره ومیداره‌کانیان یه‌کپێگرتۆته‌وه، بۆیه وویستبوویان نه‌ک بۆ ئه‌وه‌ی مناڵانی ئه‌ولا دڵخۆشکه‌ن، به‌ڵکو بۆ ئه‌وه‌ی ده‌سپێشخه‌ریکه‌ن له کوێرکردنه‌وه‌ی زه‌ین وهۆشیاندا به‌شێوازی (یه‌کێتیانه)، وویستبوویان هه‌ر ئه‌و ڤیستیڤاڵه‌ش له هه‌ولێر نمایشکه‌ن. دیاره ناکرێ ئه‌م قسه‌یه‌ی من ئه‌و ئاکامه‌ی لێکه‌وێته‌وه که من یاخود که‌سێک پێێوابێ به‌رنامه وپرۆگرامی (کوردستان تی ڤی)یش به‌شێوازی (پارتیانه)ی خۆی شتێکی زیاتر یا باشتری له یه‌کێتی پێشکه‌شی مناڵان کردبێت. به‌ڵام جوامێرانه میلیشیای پارتی ڕێگه به‌م ڤیستیڤاڵه نادات. یه‌کێتی له‌ماڵپه‌ڕی خۆیه‌وه هاواری لێهه‌ستاوه. دیارنییه سه‌ره‌نجامی ئه‌م کێشه‌یه به‌کوێ ده‌گات. به‌ڵام لانی که‌م بۆ من جێگای سه‌رنج وتێڕامان بوو. ڕێگامبده‌ن سه‌رنجه‌کانم بنێمه‌به‌رده‌متان.
به‌رله هه‌ر شتێک من پێموایه مناڵانی کوردستان له‌ژێر ده‌سه‌ڵاتی میلیشیایی ئه‌م دوو حیزبه‌دا، جا چ پێکه‌وه بن یا دوو ئیداره بن، زۆر بێ ماف تر، تێکشکاو تر،چه‌و‌ساوه تر، تۆقێنراو تر، بێ که‌سایه‌تی تروه‌شکاوه ترن له‌وه‌ی ئه‌م هێزه خێڵه‌کیانه بیانه‌وێ به‌مجۆره ڤیستیڤاڵانه پاساویده‌ن یاپه‌رده‌پۆشیکه‌ن. خه‌ڵکی کوردستان ئه‌مه ده‌زانن وجێگای بێزاریشیانه، که ئه‌م حیزبانه ناسیونالیست، نه‌ته‌وه‌په‌رست، دواکه‌وتوو، وه خێڵه‌کیین وهه‌تا سه‌ر مۆخیان گه‌و‌ره‌سالارن. یه‌کگرتنه‌وه ونه‌گرتنه‌وه‌ی ئیداره وشتی ئه‌مانه شتێک له‌و باره‌ی باسمکرد ناگۆڕێت له په‌یوه‌ند به ژیانی مناڵانه‌وه. له فه‌رهه‌نگی کوردایه‌تییاندا مناڵان له‌ڕیزی حه‌شامات ومه‌ڕوماڵاتدا دانراون. سه‌رنجێکی سه‌رپێیی له ژیانی کۆمه‌ڵی کوردستان ودیارده‌ی مامه‌ڵه‌ی دڕندانه‌ی ئه‌م هێزانه له‌گه‌ڵ مناڵاندا ئه‌م ڕاستییه ده‌سه‌لمێنێ. ده‌یان هه‌زار مناڵی ناسک وچاوگه‌شی کوردستان له په‌روه‌رده وفێربوون بێبه‌شن(ئه‌ویش نه‌ک په‌روه‌رده وفێربوونێکی مۆدێرن وئه‌مڕۆژیی!) وبوونه‌ته نێچیری سه‌رمایه‌داران ومفته‌خۆرانی بازاری کار وسه‌رمایه، وچین چین شیله‌ی گیانیان ده‌توێته‌وه وهه‌ر به‌مناڵی پیرده‌بن وده‌بنه نانئاوه‌ری خێزان. به‌ته‌نها هه‌ر ئه‌م دیار‌ده کاره‌ساتباره ڕیسواییه‌کی ته‌واوه بۆ ئه‌م حیزبانه وده‌بێت خه‌ڵکی کوردستان چی تر بێده‌نگ نه‌بن وبه‌جواب بێن له‌به‌رامبه‌ریدا. بائه‌شکه‌نجه ولێدان وتیرۆری که‌سایه‌تیان له‌ولاوه بووه‌ستێ له‌لایه‌ن باوک ودایک ومامۆستا وگه‌وره‌کانه‌وه. لێدان وته‌مبێکردنی مناڵان له‌فه‌رهه‌نگی کوردایه‌تیدا ئاسایی ترین کارێکه که‌ڕۆژانه ئه‌نجام ده‌درێت، ویاسا(که‌نییه!) وسیسته‌می په‌روه‌رده وبه‌رنامه وپرۆگرامی ته‌له‌فزیۆنی وئینته‌رنێتیی ژێر ده‌سه‌ڵاتی ئه‌م حیزبانه نه‌ک هه‌ر به‌لایدا ناچن، به‌ڵکو تابۆشیان بکرێت به‌ناوی فه‌رهه‌نگ وعاده‌تی "ڕه‌سه‌نی کورده‌وارییه‌وه" شه‌رعییه‌تی بۆ په‌یداده‌که‌ن. مناڵی کوردی "ڕه‌سه‌ن" به‌لای ئه‌وانه‌وه ئه‌و مناڵانه‌ن که‌ده‌بێت به‌سروودی نه‌ته‌وه‌چێتی ئه‌یڕه‌قیب گۆشبکرێن ودواڕۆژ ببنه خزمه‌تچییه‌کی باشی بزووتنه‌وه‌ی کوردایه‌تی ونه‌ک هه‌ر ئه‌وه‌ش به‌ڵکو ده‌بێت گیان له‌سه‌ر ده‌ست ئاماده‌ی فیداکاری بن له‌پێناوی خورافاتی کوردایه‌تیدا. بۆ نموونه (ڕێکخراوی مناڵپارێزی کوردستان)ی هێرۆ ئیبراهیم ئه‌حمه‌د به‌ناوی مناڵانه‌وه له‌جیاتی دانانی پرۆژه وپرۆگرامێک هیچ نه‌بێ بۆ سووککردنی بڕێک له‌مه‌ینه‌تییه‌کانی ژیانی ڕۆژانه‌ی مناڵانی سه‌رجاده، نه‌ک مناڵان به‌گشتی، بۆته ده‌زگا ودامه‌زراوه‌یه‌کی گه‌وره وده‌وڵه‌مه‌ندی بازرگانی وپرۆژه‌سازی له‌کوردستاندا، وسه‌رمایه‌ی به‌ملیارد ده‌ژمێردرێ وبه‌داخه‌وه بارودۆخی مناڵانیش ڕوو له‌خراپتره!
به‌بڕوای من ئه‌گه‌ر له‌توانایاندا بووایه هه‌ردوو لا، یانی پارتیش ویه‌کێتیش، چه‌رخی مێژوو وگه‌شه وپێشکه‌وتنیان ڕابگرتایه، ئه‌م کاره‌یان ده‌کرد ومناڵانی کوردستانیان به‌وجۆره‌ی خۆیان پێیانباشه په‌روه‌رده ده‌کرد. به‌ڵام خۆشبه‌ختانه ئه‌م کاره‌یان بۆ ناکرێ وناچارن دوای فه‌رهه‌نگی مۆدێرنی کۆمه‌ڵی کوردستان که‌ون، وله‌هه‌وڵی خاوکردنه‌وه‌ی پرۆسه‌ی پێشکه‌وتنه‌که‌یدا بن. پێوانه‌ی ئینسانییه‌ت وگه‌شه وپێشکه‌وتوویی هه‌ر کۆمه‌ڵگایه‌ک به‌بارودۆخی ژیانی مناڵان، وه‌مامه‌ڵه‌ی ئه‌و کۆمه‌ڵگایه‌دا ده‌رده‌که‌وێ له‌گه‌ڵ مناڵاندا! ده‌سه‌ڵاتێک ئه‌وه‌ی له‌سه‌ره‌وه باسی کرا فه‌رهه‌نگ وڕووانگه‌ی بێت بۆ مناڵان وژیان ومافه‌کانیان، به‌ته‌نها بۆله‌کارخستن باشه. چرۆی مژده پووچه‌کانی تاڵه‌بانی وبه‌رزانی هێشتا نه‌پشکووتووه له‌مه‌ڕ باشی وگرنگی وچاره‌نووسسازی یه‌کخستنه‌وه‌ی ئیداره‌کانیانه‌وه، که‌ده‌بینین ڕێگابه نمایشی چالاکییه‌کی ته‌له‌فزیۆنی خۆیان ناده‌ن، ئاخۆ ده‌بێ خێری ئه‌م یه‌کگرتنه‌وه‌یه بۆ خه‌ڵکی له‌چیدا بێ؟! به‌ڵام نا خێری چی چاوه‌ڕووان بکرێ له‌مانه! ئه‌م دوو حیزبه ده‌یانه‌وێ به‌ناوی یه‌کگرتنه‌وه‌ی ئیداره‌کانیانه‌وه کڵاوێکی تر بخه‌نه سه‌ر خه‌ڵکی کوردستان وهه‌تا بۆیان بکرێت له‌م بارودۆخه‌ی ژێر سایه‌ی داگیرکاری ئه‌مریکادا له‌ده‌سه‌ڵات وسه‌روه‌ت وداهاتی عێراق بخۆن، وه‌له‌م پێناوه‌شدا کوردستان بلکێننه‌وه به‌عێراقه‌وه له‌ژێر ناوی یه‌کگرتنه‌وه‌یه‌کی کاتیدا. ده‌نا له‌سه‌ر ته‌نها یه‌ک ووشه‌ش یه‌کناگرن وڕێکناکه‌ونه‌وه له‌چه‌شنی ناوی (خوێندکار) و (قوتابی). هه‌تا پارتی ویه‌کێتی هه‌بن به‌ین وجیاوازیان قووڵترده‌بێته‌وه. چونکه له‌ناوه‌رۆکدا که‌مترین مۆرکی سه‌رده‌میان هه‌ڵگرتووه وزیاتر له دوو خێڵ ده‌چن. له‌که‌ش وهه‌وای خوسوسی هه‌ردوو لادا ئه‌ملا به‌وی تر ده‌ڵێ (مه‌لایی) ئه‌ولاش به‌میان ده‌ڵێ (جه‌لالی)،وه ووشه‌ی خوێندکار هی یه‌کێتییه و ووشه‌ی قوتابیش هی پارتی. به‌ڵام به‌هه‌ق سه‌یر به‌لامه‌وه ئه‌وه‌یه بێجگه له‌و به‌شه که‌مه له‌خه‌ڵکی کوردستان که‌به‌رژه‌وه‌ندیی کاتییان به‌رچاوی گرتوون وه‌یا زۆر به‌داخه‌وه خۆشباوه‌ڕ وفریوخوواردوون، که‌سانێک هێشتا له‌ناو خه‌ڵکی کوردستاندا مابن به‌سوێندی ئه‌م حیزبانه بڵێن ئامین!! 17-1-2006
|
|
|
04/07/2007 |