|
لاوانی کوردوستان ئه‌م کاته‌تان شاد سڵاوم هه‌یه بۆتان به هیوای خۆشیتان
به‌ڕێزان / ئێوه تووانیتان به خه‌بات و ناڕه‌زایه‌تیه‌کانتان له‌سه‌ر
شانۆی سیاسی کوردوستان ، ده‌ورو نه‌خشی خۆتان بگێڕن و جێگای ده‌ستان به ته‌واوی
خۆپیشاندان و داواکردنی خواسته‌کانی خۆتان و سه‌رجه‌م کۆمه‌ڵگاوه بنه‌خشێنن
، ده‌سه‌ڵاتداران له کوردوستان له‌م هاتنه مه‌یدانه‌ی ئێوه زۆر نیگه‌ران
و ناڕه‌حه‌ت بوون و ده‌بن ، خۆتان ئاگادارن که‌ده‌سه‌ڵات له کاتی ده‌نگ نه‌دانتان
بۆ ده‌ستوور چه‌ند نیگه‌ران بوون و چه‌ند ده‌رسێکی جه‌سورانه‌تان پیشاندان
.
له کاتی به‌ناو هه‌ڵبژاردنی 15ـ 12 ـ 2005 هه‌مووتان بینیتان که‌چۆن ته‌واوی
ڕاگه‌یاندن و قسه‌و لێدوانی سه‌رانی ئه‌حزابی ده‌سه‌ڵاتدار و هاوپه‌یمانه‌کانیان
ڕووبه‌ڕووی ئێوه بوو ، خۆتان ئاگادار بوون چۆن لێتان ئه‌پاڕانه‌وه‌و پێیان
ئه‌ووتن که چاره‌نووسی نه‌ته‌وه به ده‌نگی لاوانه‌وه به‌سراوه ، ئه‌وه‌ی
که ئه‌حزابی ده‌سه‌ڵاتدار و ڕاگه‌یاندنه‌که‌یان به ئێوه‌ی ده‌ووت هیچ نه‌بوو
بێجگه چاوبه‌ست و وه‌رگرتنی په‌نجه مۆری ئێوه بۆ کورسی ده‌سه‌ڵات و
مسۆگه‌ر کردنی به‌شی زیاتر .
من لێره‌دا قسه‌م له‌سه‌ر ئه‌وه نیه که له به‌ناو هه‌ڵبژاردنی 15 ـ 12ـ
2005 دا چه‌ند لاو ده‌نگی داوه یان ده‌نگی نه‌داوه ، به‌ڵکو قسه‌م له‌سه‌ر
ئه‌وه‌یه‌که ده‌سه‌ڵاتدارانی کوردوستان سیناریۆی به‌ناو هه‌ڵبژاردنیان
کردووه به‌و پرۆسه‌یه‌ی که خه‌ڵکی کوردوستان به گشتی و لاوان به تایبه‌تی
خواست داواکاریه‌کانیان به ئاینده‌یه‌کی نادیار بسپێرن بۆ دوای ئه‌نجامه‌کانی
هه‌ڵبژاردن و ڕۆژگارێکی هه‌رگیز نه‌هاتوو ، ده‌سه‌ڵاتداران ده‌یانه‌وێت
بڵێن قسه مه‌که‌ن و دانیشن تا ئه‌نجامه‌کانی هه‌ڵبژاردن ده‌رده‌که‌وێت ،
ده‌سه‌ڵاتداران ده‌یانه‌وێت به ناوی هه‌ڵبژاردنه‌وه ئاوی سارد بکه‌ن به‌سه‌ر
ژیله‌مۆی گه‌شاوه‌ی خواست و داواکاریه ئینسانیه‌کانتان . لاوانی کوردوستان
، ئه‌ی ئه‌و لاوانه‌ی که شایه‌نی جوانترین و شیاوترین ژیانی هاوچه‌رخ به
خۆتانن ، نابێت ئێوه به‌م سیناریۆیه مل بده‌ن نابێت ئێوه ده‌سخه‌ڕۆی به‌ڵێن
و گفته هه‌ڵخه‌ڵه‌تێنه‌ره‌کانی ده‌سه‌ڵات بن ، نابێت لاوان کێرڤی داواکاری
و ڕێکخستنی ناڕه‌زایه‌تیه‌کانیان بهێننه خواره‌وه ،" 14" ساڵه چی ده‌ستی
ده‌سه‌ڵاتدارانی گرتووه له کوردوستان تاکو وه‌ڵام به خواست و داواکاریه‌کانی
ئێوه بده‌نه‌وه .
ئه‌وه‌ی ده‌ستی ده‌سه‌ڵاتی گرتووه له وه‌ڵام به خواسته‌کانی ئێوه پێچه‌وانه
بوونی ئه‌م ده‌سه‌ڵاته‌یه له گه‌ڵ ئومێدێک که ئێوه هه‌تانه به‌ژیان و
ئاره‌زووه ئینسانیه‌کانتان .
لاوانی کوردوستان / کورسی زۆر له په‌رله‌مانی عێراق ، یه‌کگرتنه‌وه‌ی
ئیداره ، سه‌رۆک بوونی ئه‌م و ئه‌و ، وه‌زیر بوونی ئه‌م و ئه‌و ، ده‌ستووری
قه‌ومی و دینی، مانه‌وه‌ی میلیشیاو ده‌یان و ده‌یانی تر هیچ په‌یوه‌ندیه‌کی
نیه به ئاوات و ئومێدێک له دڵی ئێوه‌دایه . لاوانی کوردوستان ده‌بێت به
زووترین کات ئه‌م ده‌وره‌یه تێپه‌ڕێنن و بگه‌ڕێنه‌وه سه‌ر ئاستانه‌ی خه‌باتی
ڕۆژانه‌ی خۆیان و ، جارێکی تر ئه‌و په‌یامه بده‌نه‌وه به گوێی ده‌سه‌ڵاتداراندا
که خه‌باتی لاوان بۆ ژیانێکی باشتر به‌رده‌وامه ، لاوان زۆر به‌باشی ئه‌و
واقیعه‌ته ده‌بینن که یه‌که‌م به‌خشیشی ده‌سه‌ڵاتی دوای هه‌ڵبژاردن به‌رز
کردنه‌وه‌ی نرخی سووته‌مه‌نی و حوکمدانی دکتۆر که‌مالی سه‌ید قادره به"
30 " ساڵ زیندانی.لاوانی کوردوستان ده‌بێت مه‌یدانی خه‌باتیان گه‌رمتر و
خواسته‌کانیان له‌هه‌ر کات زیاتر به‌رزترو ڕواستاوانه‌تر ڕابگرن . سه‌رکه‌وتووبێت
خه‌باتی لاوانی کوردوستان بۆ به‌ده‌ست هێنانی مافه‌کانیان
هیدایه‌ت مه‌لا عه‌لی
19ـ1ـ2006
|