خۆپیشاندان له‌ دژی پارتیی له‌ئوسترالیا دواخرا

به‌ناوی که‌مپه‌ینی ئازادیی بۆ د.که‌مال سه‌یید قادر ( کۆمیته‌ی ئوسترالیا ) ه‌وه‌ ، سوپاسگوزاریی و پێزانینی زۆرمان بۆ هه‌موو ئه‌و به‌ڕێزانه‌ هه‌یه‌ که‌ ئاماده‌ییان نیشاندا که‌ به‌شداریی خۆپیشاندان و پرۆتستۆی بڕیاری 30 ساڵ زیندانییکردنی د.که‌مال له‌به‌رده‌م کۆنسڵیتی ئه‌مێریکادا رۆژی چوارشه‌ممه‌ ( 25-01-2006 ) بکه‌ن. جێگه‌ی خۆیه‌تی ده‌ستخۆشیی له‌هه‌موو نێوه‌نده‌ کولتووریی و رۆشنبیریی و ئه‌و حیزب و لایه‌نه‌ سیاسییانه‌ بکه‌ین که‌به‌فه‌رمیی هاتنه‌ پشت ئه‌م خۆپیشاندانه‌وه‌، وێرای ئاماده‌یی نیشاندانی چه‌ندین ئه‌ندام پارله‌مانی ئوسترالیاو چه‌ندین سه‌ندیکای کرێکاریی و ریکخراوه‌ی چه‌پ و سه‌وزو لیبراڵه‌کان و نوێنه‌ری چه‌ندین حیزب و ریكخراوی سیاسیی ناوچه‌ی پاسیفیک ،بۆ پرۆتێستکردن دژ به‌و پێشێلکارییه‌ی مافی مرۆڤ و ئازادیی بیروراده‌ربڕین له‌دادگایه‌کی پارتییدا، له‌شاری هه‌ولێر کراوه‌.

پاش ئه‌و پێشهاته‌ سیاسییه‌ی له‌لایه‌ن به‌ڕێز جه‌مال قاسم ( ئه‌ندامی پارله‌مانی کوردستان – لیستی زه‌رد ) خرایه‌ روو له‌ ژووری ( کوردستان یونایتید- پاڵتۆک ) دا ، گوایه‌ د.که‌مال سه‌یید قادر 30 ساڵ زیندانییه‌که‌ی لابراوه‌و له‌چه‌ند ڕۆژی داهاتوودا ، پارتی به‌فه‌رمیی د.که‌مال ئازاد ده‌کات. ئێمه‌ بڕیارماندا وه‌ک وه‌ڵامێکی ته‌ندروست و مامه‌ڵه‌یه‌کی ژیرانه‌ له‌گه‌ڵ ئه‌م پێشهاته‌داو پاش پرس و راوێژکردن به‌ده‌یان که‌سایه‌تیی و تاکی سه‌ربه‌خۆی کورد ، خۆپیشاندانی رۆژی 25-01-2006 له‌به‌رده‌م کۆنسڵیتی ئه‌مێریکادا رابگرین تا له‌ئایینده‌یه‌کی نزیکدا ، ئه‌گه‌ر د.که‌مال سه‌یید قادر ئازاد نه‌کرا به‌ گوڕوتینێکی زۆرتره‌وه‌ تێهه‌ڵچینه‌وه‌.

وێڕای گومانێکی زۆر له‌م مانۆڕو شانۆگه‌رییه‌ی پارتیی بۆ ئازادکردنی د.که‌مال، ئێمه‌ به‌له‌به‌رچاوگرتنی رای جیاوازجیاوازی تاک تاکی خه‌ڵک ، بڕیاری دواخستنی ئه‌م خۆپیشاندانه‌مان دا. هیوادارین پارتیی چیتر به‌نیازی هونه‌ری ده‌ستخه‌ڕۆیی له‌گه‌ل که‌مپه‌ینی ئازادیی بۆ د.که‌مال مامه‌ڵه‌ نه‌کات ، چونکه‌ شه‌پۆلی ناره‌زایه‌تی ئازادییخوازان تا دێت زێتر له‌ناوه‌و ده‌ره‌وه‌ی کوردستان بڵاو ده‌بێته‌وه‌و گوشاره نێوده‌وڵه‌تییه‌‌کانیش له‌سه‌ر پارتیی زێتر چڕ ده‌بنه‌وه‌.

خۆپیشاندانمان ته‌نها راگرتووه‌ ، ئه‌گه‌ر به‌زووترین کات د.که‌مال سه‌یید قادر ئازاد نه‌کرێ ، به‌رده‌وام ده‌بین له‌وه‌ی که‌ خۆپیشاندان ڕیک بخه‌ین و بیکه‌ین . کۆمیته‌ی ئوسترالیای که‌مپه‌ینی ئازادیی بۆ د.که‌مال سه‌یید قادر ، درێژه‌ به‌ چالاکییه‌کانی خۆی ده‌دات به‌شێوازی جۆراوجۆری تر ،هه‌رچه‌نده‌ بۆ ماوه‌یه‌کی کاتیی خۆپیشاندانمان هه‌ڵپه‌ساردووه‌، به‌ڵام به‌رده‌وام ده‌بین له‌ ریسواکردنی ئه‌و حوکمه‌ ناره‌واو به‌عسییانه‌یه‌دا .

کۆمیته‌ی ئوسترالیای که‌مپه‌ینی ئازادیی بۆ د.که‌مال سه‌یید قادر.

23-01-2006