|
له‌ودیوو په‌نجه‌ره‌که‌وه
پیاوێک
ره‌نگ په‌ڕیوو
په‌شۆکاو
شه‌ڵاڵ له خوێن
ده‌ستی هانا بۆ ڕۆحم دێنێ
پیاوێک له به‌فر
سپی... سپی
جلی سپی له به‌ردابوو
پرچی سپی و
ده‌ستی به‌فری و
ڕوخسارێکی شه‌کر ڕه‌نگی هه‌بوو
که ده‌گریا
له چاوانیدا
تک تک خوێنی سپی
ده‌ڕژا
پیاوێک له‌دیوو په‌نجه‌ره‌که‌وه
بوخچه‌یه‌کی سپیڕه‌نگی له کۆ ڵدابوو
زه‌یتونه چاوی ئاوی و
ورده ئێسکی شیری و
ڕۆحی سپی تیا هه‌ڵگرتبوو
ئه‌و پیاوه ماندوو شه‌که‌ت
له بیابانێکی گه‌لێک دووره‌وه هاتبوو
به نیازبوو
دوای پشویه‌کی که‌م
بۆ لای خودا بڕوا و
قیژه‌ی سپی و
هاواری بێزمان و
نزای مه‌خلوقاتێکی بێگوناهی بۆ ببا
پیاوێک له‌ودیوو په‌نجه‌ره‌که‌وه
له سه‌ر دڵی زامێکی قوڵ
هه‌ڵکه‌نراوه
به خوێنی سپی سه‌ر دڵی
به خه‌تێکی ڕوون و ڕه‌وان
له سه‌ر په‌نجه‌ره‌که‌م نوسی
منم ئه‌نفال......
29-08-2006
|