|
داده
بچکۆله مه‌زنه‌که‌م سڵاو ،
یادگارييه‌که‌ی مامۆستای مه‌دره‌سه‌ی کوردایه‌تی شاره خێر
نه‌دیوه‌که‌م ، کچه خنجیلانه دڵ پڕ له هیواکه‌ی کاکه شوان
. ئه‌ی من له سووره‌تی کام ئایه‌تی ئه‌شق ، وشه‌یه‌ک
بدۆزمه‌وه ، له تاسه و په‌رۆشیم بۆ تۆ بدوێ. وانه‌زانی له‌م
سه‌هۆڵبه‌ندانی غوربه‌ته ئێوه‌م فه‌رامۆش کردبيت . ئه‌مڕۆ
15/11 نامه‌که‌ی تۆ ڕچه‌ی تاساوی یادی زامه به سوێیه‌که‌می
شکاند و له خه‌ڵوه‌تی تازیه باری هێنامیه ده‌ر . من نازانم
له ده‌رگای کام کیتێبخانه ی مێژوو بده‌م له دیرۆکی
قاره‌مانیه‌تی سێ کوچکه‌که‌ی باوه‌گوڕگوڕ ، سێ پێشمه‌رگه‌که‌ی
ده‌سته‌ی ڕێکخستن ، سێ ڕۆڵه‌که‌ی که‌رکووکی ناسنامه لێ دزراو
بدوێ ، کاک شوانی ته‌نسیق سه‌رکرده‌ی لێهاتوو ، کاک جمهوری
مامۆستای ماندوونه‌ناس و کاکه نه‌وزادی قاره‌مان . به‌ڵێ
ئازیز ، ئه‌وان عاشقێکی گه‌رمیانی ( که‌رکووکی)دڵپاک بوون ،
ئه‌وینێکی بێگه‌ردیان بۆ نیشتیمان له‌دڵدا هه‌ڵگرتبوو ،
پێشمه‌رگه‌ی ڕاسته‌قینه‌ی خه‌باتی چینایه‌تی و نه‌ته‌وایه‌تی
بوون ، له هه‌موو پلان و چالاکیه‌کیاندا لاپه‌ڕه‌یه‌کی تری
شکۆمه‌ندیان له دیرۆکی خۆڕاگری میلله‌ته‌که‌مان تۆمار ئه‌کرد
، ئه‌وان و هاورێکانیان دوور له خۆ په‌رستی و به‌رژه‌وه‌ندی
کورسی و گیرفان ، ئازادی خاکی داگیرکراوو چینی هه‌ژاریان
کردبوو به بیرو باوه‌ڕو له پێناویدا خه‌باتێکی بێوچانیان
ئه‌کرد سه‌روماڵیان کرد به قوربانی .
ڕه‌وا
گیان له بیرته نه‌نه قه‌دری ئه‌یووت ، کاتێ نه‌وزاد ئه‌هات
بۆ ماڵمان له ئیمام قاسم ، ئه‌مووت ، شوانه نهێنی خۆت مه‌خه
ژێر ده‌ست ئه‌م منداڵه ، ئه‌ویش له وه‌ڵامدا ئه‌یووت ، دایه
گیان ئه‌م منداڵه‌ی تۆ ئه‌یبینی له حه‌وت پیاو ئازاتره و زۆر
باوه‌ڕم پێیه‌تی . به‌ڵی ئازیز ، بابه‌ی تۆ گه‌لێک مه‌زن بوو ،
مامۆستای ده‌یانی وه‌ک کاکه نه‌وزادم بوو . هه‌ر بۆیه خۆی و
کاکه جمهور کردبوویان به په يامنيرى خه‌باتی کوردایه‌تی و يه
كسانى ومرۆڤایه‌تی .ئه‌مڕۆش ئه‌وانه‌ی له‌سه‌ر دڵی میلله‌ت
دانیشتوون و له‌به‌ری ڕه‌نجی خه‌باتی ئه‌وان ئه‌خۆن ، ئه‌وه‌ی
له بیریان نییه به‌رژه‌وه‌ندی خه‌ڵکی فه‌قیرو هه‌ژاره .
ئه‌وانه‌شی که له دوێنێدا بۆ مستێ پاره ئه‌وانیان شه‌هید
کرد و وه‌ک به‌رزی بانان بۆی ده‌رچوون ،ئه‌وانه‌شی ده‌ستیان
به خوێنی ئه‌وان و سه‌دان پێشمه‌رگه‌ی گه‌له‌که‌مان سووره ،
تا دوێنێ چاو ساغی به‌عسیان بوون بۆ به‌گرتدانی خێزانی
پێشمه‌رگه، ئێستاش هه‌ر خۆیان بخۆر و ببڕن .
ئای
ڕه‌وا گیان کاتێ که گه‌ڕامه‌وه بۆ که‌رکووکه وێران
کراوه‌که‌م ، دڵم ئه‌یووت ئه‌وان زۆر له مێژه، له‌پێش ئێمه‌ش
گه‌ڕاونه‌ته‌وه و چاوه‌ڕوانی ئێمه‌ن . له‌ژێر قه‌ڵای هيماى
که‌رکووکی کوردان جه‌ژنی ئازادیيان ئه‌گێڕا ، له کۆنسێرتێکی
کاک ئازاد هه‌ورامی ، سروودی ڕێی خه‌باتیان ئه‌وته‌وه ،
موژده‌ی ئازادیيان به ڕه‌نجده‌ران و هه‌ژاران و منداڵانی
بێنازی ڕه‌حیم ئاوا وشۆریجه‌و ئاواره‌کانی مه‌لعه‌به‌که ئه‌دا
، گڕی بڕوایان به‌تینتر ئه‌کرد ، به‌هێزی مامه ڕیشه
هه‌ڕه‌شه‌یان له کاخی فیرعه‌ونه‌کانی سه‌رده‌م ئه‌کرد ، شاخ
وده‌شت و ڕێوبانی کوردستانیان گوڵباران ئه‌کرد .
نه‌خێر
گوڵم ئێمه هه‌رگیز له بیریان ناکه‌ین ، ئه‌م وڵاته ئێستاش
هه‌ر به بیرو باوه‌ڕو یادگارییه‌کانی ئه‌وانه‌وه جوانه .
وه‌ته‌ن
چاوی لێمانه ، ده‌ری که‌ین له ته‌نگانه ، حه‌یفه بێته
وێرانه
ئاوی
که‌وسه‌ره ، خاکی گه‌وهه‌ره، پڕ له گوڵ و نه‌سرینه
یادیان
به‌خێر ، ماڵیان ئاوا ، ئاشقه‌کانی خاک ، پێشمه‌رگه‌کانی
که‌رکووکی کوردستان .
تۆش
ڕه‌وا گیان هه‌ر له بیرو هؤش و ياد و تيفكرينميت .
داده ڕووناکت / ستۆکهۆڵم
--------------------------------------------------------------------------------------
1.تێبینی
/ نامه‌که‌ی ڕه‌وا شوان له کوردستانی نوێ
http://www.pukmedia.com/Kurdistani%20Nwe/15-11-2006/Kurdistani%20Nwe.htm
|
