باڵنده‌یه‌کی سپی

سه‌لاح محه‌مه‌د

باڵنده‌یه‌ک له‌قه‌فه‌زه‌ی سنگما به‌نده‌

چاوه‌کانی گۆمی "وان" ن

په‌ڕو باڵی

پڕوشه‌ی سپی سه‌ر ده‌سماڵی کوێستانن

باڵنده‌یه‌ک هێنده‌ په‌له‌قاژه‌ ده‌کا

خه‌ریکه‌ سنگم کون ده‌کا

به‌ره‌ڵڵای که‌ن

به‌رگه‌ی ئازاری نه‌ک ئێوه‌

خۆیشی ناگرێ

به‌ره‌ڵڵای که‌ن

 بابه‌سه‌ربه‌ستی خۆی بمرێ

*

باڵنده‌یه‌ک له‌قه‌فه‌زه‌ی سنگما به‌نده‌

حه‌ز له‌هێلانه‌ی عیشق ده‌کا

باڵنده‌یه‌ک سه‌ر به‌دارو دیواری ڕقا ده‌دا

حه‌ز ناکه‌ن فێری عیشق ببێ

حه‌ز ناکه‌ن باڵ به‌یه‌کدا دا.

*