ده‌بێ ئه‌مریکا به‌ فه‌رمی هه‌ڵوێستی خۆی سه‌باره‌ت به‌ دۆزی کوردستان پێشان بدات

    راپۆرته‌که‌ی بیکه‌ر- هاملتن کاریگه‌ری نه‌رێنی له‌سه‌ر ده‌روونی کوردستانیان داناوه‌ ،  ده‌بێ له‌ رێگه‌ی گوشاری کوردستانیانه‌وه به‌تووندی ره‌تبکرێته‌وه‌و پاشه‌کشه‌ی پێبکرێ.  ئێمه‌ وه‌ک به‌ره‌ی گۆڕان نه‌ک هه‌ر پشتیوانی له‌و رێپێوانانه‌ ده‌که‌ین که‌ دژ به‌ سیاسه‌تی ئه‌مریکا له‌ نێوه‌خۆی کوردستان و وڵاتانی ئه‌وروپادا به‌ڕێوه‌ده‌چن، به‌ڵکو خوازیارین که‌ کوردستانیان به‌هه‌رشێوه‌یه‌ک بۆیان ده‌کرێ ده‌نگی ناڕه‌زایی خۆیان پێشان بده‌ن و سیاسه‌تی به‌رژه‌وه‌ندخوازانه‌ی ئه‌مریکا ریسوا بکه‌ن . ئیمزا کۆکردنه‌وه‌ به‌ته‌نیا  له‌ توانای دانیه‌ ‌ پاشه‌که‌شه‌ به‌ ئه‌مریکا بکات ، ده‌کرێ  رێگه‌و شێوازی دیکه‌ی کرده‌یی هه‌ڵبگیرێته‌وه‌ .  ئێمه‌ راشکاوانه‌ راماندگه‌یاندووه‌و دووپاتیشی ده‌که‌ینه‌وه‌ که‌ ئه‌مریکا وڵاتێکی به‌رژه‌وه‌ندخوازه‌و  ته‌واوی به‌رنامه‌و سیاسه‌ته‌کانی خۆی بۆ گه‌وره‌کردنه‌وه‌و زۆرکردنی به‌رژه‌وه‌نده‌کانی ده‌کار ده‌هێنێ،  هه‌رچه‌نده‌ له‌شکرکێشی ئه‌مریکا بۆ عێراق و رووخاندنی رژێمی سه‌دام له‌به‌رژه‌وه‌ندی گه‌لی عێراق و گه‌لی کوردستان ته‌واوبوو،  که‌چی  ئامانج له‌و له‌شکرکێشیه رزگارکردنی گه‌لانی ژێرده‌ستی به‌عس نه‌بوو ، نه‌شتوانرا وه‌ک هه‌یه‌ بۆ به‌رژه‌وه‌ندی گه‌لی کوردستان ده‌کاربکرێ ،  هیچ کات ئه‌مریکا دۆستی گه‌لانی زۆرلێکراو و داگیرکراو نه‌بووه‌و نابێ . ئامانج له‌و شه‌ڕه‌ خۆپاراستن له‌شه‌ڕی تیرۆرو هاوکارانی رێکخراوی ئه‌لقاعیده‌ بوو .

ئه‌مریکا ده‌زانێ که‌ کێشه‌ی فه‌له‌ستین و کێشه‌ی کوردستان دوو کێشه‌ی به‌رچاوی رۆژهه‌ڵاتی ناوه‌راستن،  ده‌بێ یه‌كلایی بکرێنه‌وه‌ ،به‌بێ چاره‌سه‌رکردنی ئه‌و دوو کێشه‌یه، رۆژهه‌ڵاتی ناوه‌ڕاست ئاشتی و ئارامی به‌خۆیه‌وه‌ نابینێ . ئه‌مریکا و هه‌ندێ وڵاتی دیکه راشکاوانه‌ جه‌خت له‌سه‌ر چاره‌سه‌رکردنی کێشه‌ی فه‌له‌ستین ده‌که‌نه‌وه‌ ، به‌ڵام  له‌به‌رانبه‌ر کێشه‌ی کوردستان چاو داده‌خه‌ن ، به‌مه‌ش هه‌وڵه‌کانیان ده‌که‌وێته‌ ژێر پرسیاره‌وه‌ ، ئێمه‌  له‌ ئه‌مریکا ده‌خوازین هه‌ر چۆن هه‌ڵوێستی ئاشكرا له‌به‌رانبه‌ر کێشه‌ی فه‌له‌ستین پێشان ده‌دات ، به‌و شێوه‌یه‌ش ره‌فتار له‌گه‌ڵ کێشه‌ی کوردستاندا بکات و به‌فه‌رمی رامانی خۆی دیار بکات .

گفتوگۆی ته‌له‌فۆنی  جۆرج بووش  له‌گه‌ڵ سه‌رۆکی هه‌رێم و سه‌رکرده‌کانی دیکه ته‌نیا بۆ دڵنه‌وایی کردنه و ناکه‌وێته‌ خانه‌ی هه‌ڵوێستی فه‌رمییه‌وه‌ ، ئه‌و په‌یامانه‌ی له‌ رێگه‌ی ته‌له‌فۆنه‌وه‌ ده‌گه‌ن  تۆزقاڵێک له‌ نیگه‌رانیه‌کانمان به‌رانبه‌ر به‌ سیاسه‌تی ئه‌مریکا سه‌باره‌ت به‌ کێشه‌ی کوردستان که‌م ناکه‌ته‌وه‌ .

به‌ره‌ی گۆڕان،لێکدانه‌وه‌ی قه‌وانی سواوی وه‌ک ئه‌وه‌ی سه‌رۆک بووش به‌ڵێنی داوه‌ پشتیوانی له‌ گه‌لی کوردستان بکات ، به‌ خاپاندن داده‌نێ و پێیوایه‌ له‌و رێگه‌یه‌وه‌ ده‌خوازرێ که‌ گوشاره‌کان ده‌کار نه‌کرێن و ناڕه‌زایی پێشان نه‌درێن. له‌و پێوه‌ندیه‌دا جارێکی دیکه‌ش داوا له‌ کوردستانیان ده‌که‌ینه‌وه‌ که‌ له‌ هه‌ر کات و شوێنێکدا بۆیان ده‌لوێ ده‌نگی ناڕه‌زایی خۆیان به‌ ئه‌مریکیه‌کان به‌رزبکه‌نه‌وه‌و کارێ بکه‌ن که‌ واشنتۆن راسته‌وخۆ گوێی له‌ ناڕه‌زایی جه‌ماوه‌ری کوردستان بێ .

یه‌کڕیزی و هاوهه‌ڵوێستی نێوان کوردستانیان  راپۆرته‌که‌ی بیکه‌ر- هاملتن له‌کار ده‌خات و  ئه‌مریکا ناچار ده‌کات که‌ له‌به‌رانبه‌ر کێشه‌ی کوردستان چاو به‌ سیاسه‌تی خۆی بخشێنێته‌وه‌ . با هه‌موومان به‌یه‌که‌وه‌ راپۆرتی بیکه‌ر- هاملتن و سیاسه‌تی به‌رژه‌وه‌ندخوازونه‌ی ئه‌مریکا له‌ قاو بده‌ین .

به‌ڵی بۆ گۆڕان ..

به‌ڵی بۆ ئاشتی..

 ده‌سته‌ی کارگێڕی به‌ره‌ی گۆڕان

16-12-2006