ئه‌و ....

که‌ژاڵ ئیسماعیل

ئه‌و وه‌ک خاڵخاڵوکه‌یه‌کی هێمن

له‌سه‌ر له‌پی ده‌ستی ئه‌شقێک

خه‌ریته‌ی چاوی چه‌پی ڕۆحیم

بۆ ئه‌کێشێت و

منیش ..

وه‌ک مامۆستا

منالێکی عه‌جولی ناو دڵم فێر ئه‌که‌م

تا .. کاتی ژوان

ڕاسته‌و خۆ بچێته ئه‌و مه‌مله‌که‌ته‌و

له‌وێ ..

عه‌رشێ بۆ خۆی دروست بکات !

ئه‌و ....

وه‌ک په‌پووله‌یه‌کی شه‌رمن

ڕه‌نگ ئه‌بارێنێ به‌سه‌ر بێستانی ووشه‌مدا و

منیش ..

وه‌ک گووڵ فرۆش

له‌هه‌ر شیعره‌ی گووڵێکی بۆ ئه‌چنمه‌وه

تا .. کاتی دیدار

نه‌ڵێ ئه‌و شاعیره شێته

ڕه‌نگه‌کانی نه‌چنیمه‌وه ..!

ئه‌و ....

وه‌ک سروه‌هات و

بۆنی عه‌تری په‌رچه‌ممی بۆخۆی برد

منیش ..

وه‌ک و ده‌روێش حاڵی شێتیم لێهاتووه‌و

سینه‌شم پڕ له‌بۆنی

هه‌ناسه‌ی ... ئه‌که‌م  !

ئه‌و....

وه‌ک دێوانه

بووه به شێتی ئه‌شقی ئه‌م حه‌بیبه‌یه‌و

منیش ..

وه‌ک شه‌م

سه‌وداسه‌ری سووتانی ئه‌و حه‌بیبه‌م *

تێبینی / ئه‌م هۆنراوه‌یه له ژماره (611) هه‌فته‌نامه‌ی گوڵان بڵاو کراوه‌ته‌وه .