|
شه‌ڕ له‌بادینان، تۆز له‌به‌رده‌م ده‌رکێ مه! |
|
پێشه‌وا که‌رکوکی
له‌به‌رئه‌وه‌ی ئایینی ئیسلام به‌زۆری شمشێرو ڕم خۆی سه‌پاندوو، له‌پێناوی مانه‌وه‌ی خۆشیدا هه‌ر ده‌بێت هه‌مان ڕێگا بگرێته به‌ر، ئه‌گینا ده‌بێت به‌جووته گۆڕ بۆ خۆی‌و شمشێره‌که‌ی هه‌ڵکه‌نێت! زۆرن ئه‌وانه‌ی به‌درۆ باسی ئه‌وه ده‌که‌ن که نه‌ته‌وه‌ی کورد، یه‌کێکه له‌و نه‌ته‌وانه‌ی که به‌خۆشی خۆی‌و به‌بێ کوشتارو شه‌ڕ، ئایینی ئیسلامیان په‌سه‌ند کردووه. هه‌ر ئهو که‌سانه‌ن، کاتێ که‌باسی په‌لامارو هێرشه نامرۆڤایهتییهکانی له‌شکری ئه‌نفال‌و تاڵان‌و بردنی که‌نیزه‌و جاریه‌و ملپه‌ڕاندنی خه‌ڵکی بێتاوانیان له‌لایه‌ن موسڵمانه‌کانه‌وه له‌گه‌ڵ ده‌که‌یت، به فتوحاتی پیرۆزی ناوده‌به‌ن! به‌ر له‌هه‌موو شتێک، عه‌ره‌به‌کان خۆیان دوای سه‌دان شه‌ڕو به‌سه‌دان هه‌زار کوشتارو له‌ترسان ئیسلام بووینه، چۆن ڕێی تێده‌چێت که نه‌ته‌وه‌یه‌کی وه‌کو نه‌ته‌وه‌ی کورد، که خاوه‌نی ئایینێکی تایبه‌ت به‌خۆی (زه‌رده‌شتی) بووبێت، هه‌روه‌کو موسڵمانه کورده‌کانی ئێستا بانگێشه‌ی بۆ ده‌که‌ن، ئاوا به‌ئاسانی‌و بێ شه‌ڕو به‌ره‌نگار بوونه‌وه موسڵمان بووبن؟ دواتر ئه‌ی ئهو هه‌موو گۆڕی عه‌ره‌به موسڵمانه شه‌ڕخوازه‌ی که په‌لاماری کوردستانیان داوه‌و، تاوه‌کو ئێستاش گۆڕه‌کانیان به‌ناوی دۆڵی ئه‌سحابان، گردی شه‌هیدان، ئه‌بابه‌یلێ‌و ئه‌سحابه سپی له کوردستان ماوه، له‌سه‌رچی‌و بۆ له‌کوردستان کوژراون؟ ئه‌وه جگه له گۆڕه‌کانی شه‌هیدانی کورد که به‌ده‌ستی ئهو موسڵمانه عه‌ره‌به هێرش هێنه‌رانه شه‌هید کراون، به دۆڵی کافران‌و گۆڕی کافره‌کان له‌لایه‌ن کورده‌وه خۆی ناوده‌برێن! هه‌روه‌ها به‌ده‌یان‌و سه‌دان مێژوونووسی ئیسلامیو عه‌ره‌بی سه‌رده‌می محه‌مه‌دی کوڕی عه‌بدوڵڵاو به‌ناو خه‌لیفه‌کانی ئیسلام، شه‌ڕو هێرش‌و په‌لاماره‌کانی ئیسلامیان بۆ سه‌ر کوردستان‌و، چۆنیه‌تی ڕووبه‌ڕووبوونه‌وه‌ی کوردو له‌شکری هێرش به‌ری ئیسلامیان له‌په‌رتووکه‌کانی خۆیاندا تۆمارکردووه. لێره‌دا نامه‌وێت درێژه به‌و باسه بده‌م، چونکه نیازم وایه له‌ده‌رفه‌تێکدا باسێک له‌سه‌ر به‌شه‌ڕو کوشتار موسڵمان بوونی کورد بنووسم. ئه‌وه‌ی لێره‌دا مه‌به‌ستمه که ده‌ری ببڕم، ئهو به‌زمه‌یه که موسڵمانه‌کانی دانیماک له‌سه‌ره‌تاداو ئینجا موسڵمانانی جیهان‌و له‌نێویاندا موسڵمانانی کوردستانی، نایانه‌وه بۆ گه‌ل‌و میری دانیماک. به‌ر له‌هه‌موو شتێک ده‌بێت موسڵمانانی هه‌موو جیهان ئه‌وه بزانن، که میری دانیمارک، وه‌کو ئایینی به‌زۆر سه‌پاوی ئیسلام به‌زۆر خۆی نه‌سه‌پاندووه، به‌ڵکو میرییه‌کی ته‌واو دیموکراسییه، واته هیچ کام له میری، په‌رله‌مان یاخود سه‌رۆکوه‌زیران ناتوانن ده‌ستیان بخه‌نه ناو کاروباری دادپه‌روه‌ری یاخود میدیای دانیمارکی، هه‌روه‌کو ئهو هه‌موو ده‌ست تێوه‌ردانانه‌ی له‌جیهانی ئیسلامیدا ده‌کرێت! دوای ئه‌وه‌ی ڕۆژنامه‌نووسی دانیمارکی (فلێمینگ غۆسه) که به‌رپرسی به‌شی ده‌رهێنانی لاپه‌ڕه‌ی ڕۆشنبیری‌یه له لاپه‌ڕه 3ی ڕۆژنامه‌ی (یولاندس پۆستن – واته نامه یان پۆستی یولاند)، له ڕۆژی هه‌ینی 30.9.2005دا وتارێکی له‌گه‌ڵ 12 کاریکاتێر له‌ژێرناوی "ده‌موچاوی محه‌مه‌د"دا بڵاوکرده‌وه، دوای سێ مانگ کاردانه‌وه‌یه‌کی توندوتیژوو بێمانا له‌سه‌رانسه‌ری وڵاتانی ئیسلامی سه‌ریهه‌ڵداو، به په‌لامارو سوتاندنی باڵوێزخانه‌کانی دانیمارك له سوریا، لوبنان‌و ئێران ده‌ستیپێکرد، دواتریش به‌خۆنیشاندانی توندوتیژترو سووتاندنی ئاڵای دانیمارک له پاکستان، لیبیا، ئه‌ندۆنیسیا، نێجیریا، ئه‌فغانستان، کوردستان‌و چه‌ندین وڵاتی تری ئیسلامیو تاکار گه‌یشته په‌لاماردانی دانیماکییه‌کان هه‌روه‌کو په‌لاماری عه‌ره‌به‌کانی ئیسرائیل که کردیانه سه‌ر کارمه‌ندانی نه‌ته‌وه یه‌کگرتووه‌کان له‌که‌رتی غه‌زه‌و، فه‌توادان به‌ئه‌نجامدانی ته‌قاندنه‌وه له دانیمارک‌و کوشتنی سه‌ربازو دانیمارکییه‌کان. ده‌بوایه ده‌سه‌ڵاتی کوردی‌و پێش هه‌موویان سه‌رۆکایه‌تی په‌رله‌مانی کوردستان (دیسان به‌تێکڕای ده‌نگ) ئهو ناڕه‌زایه‌ی که له‌دژی دانیمارک ده‌ریبڕی ده‌رینه‌بڕیبایه، چونکه ئه‌م دۆزه په‌یوه‌ندییه‌کی وای به کوردو کوردستانه‌وه نییه‌و، هه‌روه‌کو هه‌ولێری گوته‌نی: "شه‌ڕ له بادینان، تۆز له‌به‌رده‌م ده‌رکێ مه". ئاشکرایه ئهو کێشه‌یه‌ی نێوان جیهانی عه‌ره‌بی له به‌رانبه‌ر به ئه‌مه‌ریکاو ڕۆژئاوادا هه‌یه، زۆرتر کێشه‌یه‌کی ڕامیارییه‌و په‌یوه‌ندی به‌ململانێی نێوان ئه‌مه‌ریکاو ڕۆژئاوا له‌لایه‌ک‌و جیهانی عه‌ره‌بی له‌لاکه‌ی تره‌وه هه‌یه، نه‌ک کێشه‌یه‌کی ئایینی نێوان ئایینی گاور یان جووله‌که‌و ئیسلام بێت! سه‌باره‌ت به‌و کاریکاتێرانه‌ی که له‌کۆتایی مانگی سپتێمبه‌ری 2005دا له دانیمارک بڵاوکرانه‌وه، عه‌ره‌به‌کان هه‌وڵیاندا سۆزی جیهانی ئیسلامی له‌دژی ئه‌مه‌ریکاو ڕۆژئاوادا له‌پێناوی به‌رژه‌وه‌ندییه‌کانی خۆیاندا بخه‌نه گه‌ڕو پشتیوانی زۆرتر بۆ خۆیان کۆبکه‌نه‌وه‌و، ئهو بابه‌ته‌یان قۆسته‌وه‌‌و، له هه‌وڵه‌که‌شیاندا سه‌رکه‌وتوو بوون. سه‌ره‌تا سه‌رۆکایه‌تی په‌رله‌مانی کوردستان له‌و ڕاگه‌یاندنه‌ی خۆیدا که له 6.2.2006دا ڕایگه‌یاندووه‌و، له لاپه‌ڕه 2ی کوردستانی نوێ ژماره 3890ی ڕۆژی سێشه‌ممه 7.2.2006دا بڵاوکراوه‌ته‌وه، کۆمه‌ڵێک هه‌ڵه‌ی کردووه، له‌نێویاندا نووسیویه: (له‌چه‌ند ڕۆژی ڕابردوودا ڕۆژنامه‌ی (بولاندس بۆستن)ی دانیمارکی، چه‌ند وێنه‌یه‌کی کاریکاتێری له‌باره‌ی که‌سایه‌تی محه‌مه‌د بڵاوکردۆته‌وه). به‌ر له‌هه‌موو شتێک وێنه کاریکاتێریه‌کان به‌ر له‌چه‌ند مانگێکه نه‌ک چه‌ند ڕۆژێک وه‌کو په‌رله‌مانی کوردستان به‌هه‌ڵه بۆی چووه‌و، ڕۆژنامه‌که‌ش ناوی (یولاندس پۆستن)ه نه‌ک (بولاندس بۆستن). دواتر ده‌بوایه په‌رله‌مانی کوردستان، وه‌ڵامی که‌سێکی وه‌کو عه‌مرو موسا بداته‌وه که له‌ناو په‌رله‌مانی کوردستاندا له 23.10.2005دا سووکایه‌تی به‌هه‌موو کوردو کوردستان کرد، کاتێک که گوتی: "کوردستانی عێراق نه‌ک ته‌نیا به‌شێکه له‌عێراق، به‌ڵکو به‌شێکی گرنگی جیهانی عه‌ره‌بیشه"، هه‌روه‌ها موسا له‌درێژه‌ی وتاره‌که‌یدا گوتی: "کوردو عه‌ره‌ب خاوه‌نی یه‌ک ڕۆشنبیرین". که‌چی که‌سێک نه‌بوو وه‌ڵامی عه‌مرو موسا بداته‌وه! دوایی له‌سه‌ر سووتاندنی ئاڵای دانیمارک، ده‌بوایه سه‌رۆکی هه‌رێم، مه‌سعود بارزانی، هه‌روه‌ها سه‌رۆکی حکومه‌تی هه‌رێم نێچیرڤان بارزانی، بهاتنایه وه‌ڵام‌و به‌لای که‌مه‌وه پرۆتێستی ئهو کاره‌یان بکردایه، هه‌روه‌کو کاتی خۆی له‌مانگی شوباتی ساڵی 2003دا له‌ئه‌نجامی سووتاندنی ئاڵای تورکیا هه‌ردوو سه‌رۆک به‌جووته هاتنه وه‌ڵام‌و، ته‌نانه‌ت ئهو که‌سانه‌ی ئاڵاکانیان سووتاندبوو به به‌دڕه‌وشتیان ناوبردن‌و، ناڕه‌زایی خۆشیان ده‌ربڕی له‌دژی ئهو کاره بۆ ڕازیکردنی دڵی تورکیای دوژمنی سه‌ر سه‌ختی کوردمان، ئه‌ی بۆ له‌دژی سووتاندنی ئاڵای دانیمارکی، ئهو دوو سه‌رۆکه ته‌نانه‌ت یه‌ک ووشه له‌زاریان ده‌رنه‌چوو؟ ئه‌وه له‌کاتێکدا تورکیا دوژمنه‌و، دانیمارکیش دۆستی کورده‌و به‌هه‌زاران کوردی په‌ناهه‌نده‌ی داڵده داوه! له‌ڕۆژی 14.2.2006دا ژماره‌یه‌ک کوردی شمشێر وه‌شێن‌و فه‌توا ده‌ری سه‌ر به پارته ئیسلامییه‌کانی کوردستان، خۆنیشاندانێکیان له‌شاری هه‌ولێری پایته‌ختی به‌ناو عه‌لمانییه‌ت له‌دژی حکومه‌تی دانیمارکی‌و، مه‌ریوان هه‌ڵه‌بجه‌یی، نووسه‌ری په‌رتووکی سێکس‌و شه‌رع‌و ژن له‌مێژووی ئیسلامدا کردو، چه‌ند ئاڵایه‌کی دانیمارکیان سووتاندو داوای کوشتنی مه‌ریوان-یان کردبوو! سه‌یره له هه‌ولێری به‌ناو مه‌ڵبه‌ندی دیموکرسی، مافی مرۆڤ، ئازادی تاک‌و ڕۆژنامه‌گه‌ری‌و عه‌لمانییه‌ت‌و، به‌به‌رچاوی حکومه‌ت‌و دادگادا هه‌ڕه‌شه‌و فه‌توای کوشتنی نووسه‌رێک ده‌رچێت‌و، هیچ ده‌زگایه‌ک نایه‌ته وه‌ڵام!! ده‌رباره‌ی وێنه کاریکاتێریه‌کانی (یولاندس پۆستن)ی دانیمارکی، که له‌خواره‌وه بڵاویان ده‌که‌مه‌وه بۆ ده‌بێ موسڵمانه‌کان له‌وه توڕه ببن که بۆمبێک له‌ناو مێشکی محه‌مه‌ددا چێنراوه، یاخود شمشێرێکی له‌ده‌ستدایه! ئه‌ی ئه‌وه محه‌مه‌د خۆی‌و قورئانه‌که‌ی نین، هانی خه‌ڵک ده‌ده‌ن بۆ توندوتیژی، په‌لاماردان، کوشتن، سه‌ربڕین‌و جه‌نگ؟ ئایه‌ته‌کان خۆیان وا ده‌ڵێن‌و داوای ئهو شتانه ده‌که‌ن، نه‌ک یولاندس پۆستن بوختانی به محه‌مه‌دو ئیسلام کردبێت! ده‌رباره‌ی په‌رتووکه‌که‌ی مه‌ریوان هه‌ڵه‌بجه‌یی-ش، تائێستا ئهو په‌رتووکه‌م نه‌خوێندۆته‌وه، به‌ڵام (خوێننامه)م خوێندۆته‌وه که ئهو نووسیوێتی‌و، ئایه‌ت به‌ئایه‌ت شرۆڤه‌ی کردوون‌و پشتی به‌قورئان‌و شرۆڤه‌کردنی زانا موسڵمانه‌کان بۆ قورئان‌‌و، ئهو مێژوونووسه ئیسلامییانه‌ی که مێژووی ئیسلامیان نووسیوه‌ته‌وه به‌ستووه، که جێگای باوه‌ڕی موسڵمانه‌کان بووینه‌و ئه‌وان خۆیان شانازییان پێوه ده‌کردن‌و ده‌که‌ن!
ئه‌وه‌ی هه‌ڵه‌بجه‌یی باسی کردووه هه‌مووی ڕاستییه، ئه‌ی خۆ نایه‌ت درۆیان بۆ بکات‌و بڵێت له‌قورئاندا باسی دیموکراسی، مافی مرۆڤ، ئازادی ژن، ئازادی تاک‌و کۆمه‌ڵ، ئازادی هه‌ڵبژاردن‌و گۆڕینی ئایین، مافی فره حزبی، جیاکردنه‌وه‌ی ئایین له ده‌وڵه‌ت، جیاوازی نه‌کردنی نێوان نێرو مێ‌و نه‌ته‌وه‌کان، ئازادی بیرو بۆچوون، ئازادی ڕۆژنامه‌گه‌ری ده‌کات‌و باوه‌ڕی ته‌واوی پێیه‌تی!
بۆ ئیسلامییه‌کان باشتر بوو ڕێگای دادگا بگرنه‌به‌ر، ئه‌گه‌ر به‌بڕیاری دادگای دانیمارکی ڕازی نه‌بوون، ده‌بوایه سکاڵاکه‌یان ببردایه "دادگای بازاڕی هاوبه‌شی ئه‌وروپا"، چونکه ئهو کاردانه‌وه توندوتیژانه زیانی زۆرتری به ئیسلام گه‌یاندو، بۆ جارێکی تر سه‌لماندییانه‌وه که ئایینی ئیسلام ئایینی ئاشتی‌و برایه‌تی‌و به‌یه‌که‌وه ژیان نییه، هه‌روه‌کو خۆیان بانگێشه‌ی بۆ ده‌که‌ن! به‌ڵکو ئایینی توندوتیژیو ته‌قاندنه‌وه‌و کوشتن‌و تیرۆرو تۆقاندنه! موسڵمانه‌کان بۆ ده‌بێت له‌وه توڕه ببن، کاتێک که ئایینی ئیسلام، به‌ئایینی کوشتن‌و بڕین‌و تیرۆرو تۆقاندن ناوده‌برێت؟ ئه‌ی ئه‌وه نییه قورئان خۆی هانی کوشتن‌و بڕین‌و تیرۆرکردن ده‌دات! فه‌رموون بابه‌یه‌که‌وه سه‌یرێکی ئهو قورئانه بکه‌ین، که ئیسلامییه‌کان به‌ئایینی ئاشتی‌و برایه‌تی‌و به‌یه‌که‌وه ژیانی ناوده‌به‌ن‌و، منیش ته‌واو به پێچه‌وانه‌ی ئه‌وان پێم وایه ئایینی شه‌ڕو کوشتارو تیرۆره، چونکه به‌دایان ئایه‌ت هه‌ن هانی جه‌نگ، په‌لاماردان، کوشتن‌و کاری توندوتیژی ده‌ده‌ن. بۆ نموونه:
له‌سوره‌تی ئالعه‌مران، ئایه‌تی 85دا ده‌ڵێت: (ومن یبتغ غیر الاسلام دینا فلن یقبل منه وهو في الاخر‌ة من الخاسرین). واته "ئه‌وه‌ی بێجگه له‌ئاینی ئیسلام په‌یڕه‌وی هه‌ر ئاینێکی تر بکات لێی قه‌بوڵ ناکرێت، له‌قیامه‌تیشدا دۆڕاون". سه‌یرکه‌ن، خوا لهم ئایه‌ته‌دا، ته‌نانه‌ت هه‌ڕه‌شه له که‌سانی سه‌ر به‌ئایینه‌کانی گاورو جووله‌که‌ش ده‌کات که‌باوه‌ڕیان به‌بوونی خوا هه‌یه‌و، باوه‌ڕداری یه‌کێک له‌ئایینه ئاسمانییه‌کانن که‌گوایه له‌لایه‌ن خواوه خۆی ناردراوه‌ته خواره‌وه! هه‌مووشمان ده‌زانین "لێی قه‌بوڵ ناکرێت" له‌ئیسلامدا، واته ئه‌گه‌ر به‌رده‌وام بێت له‌سه‌ر ئایینه‌که‌ی خۆیداو نه‌بێت به‌ئیسلام، ئه‌وه سزا ده‌درێت، سزاکه‌ش بریتیه له‌کوشتن‌و به‌تاڵانبردنی ماڵو سامان‌و ژن‌و خوشک‌و دایک وه‌کو که‌نیزه‌و جاریه، ئه‌مه‌ش واته ئه‌نفالکردنێکی تر. ئه‌ی که‌واته، کوا ئاشتی‌و برایه‌تی ئیسلام چی به‌سه‌ر هات؟ ئایا ده‌بێت ڕاست بێت که‌گوایه خوا په‌رتووکی هه‌رسێ ئایینی جووله‌که، گاورو ئیسلامی ناردبێته خواره‌وه؟ ئه‌گه‌ر ڕاست بێت، بۆ لێره‌دا هه‌ڕه‌شه له گاورو جووله‌که ده‌کات؟ ئه‌گه‌ر ڕاست بێت‌و خوا خۆی هه‌رسێکیانی یه‌ک له‌دوای یه‌ک ناردبێته خواره‌وه، بۆ هه‌ریه‌که‌و له‌ئاوازێک ده‌خوێنن‌و، ئایینی ئیسلام زۆر توندووتیژه‌و ئه‌وانی دیکه نه‌رم‌و نیان؟ ئه‌گه‌ر ڕاست بێت‌و ئێستا ئه‌وانه‌ی تری به‌گوێره‌ی قورئان ڕه‌تکردبێته‌وه، که‌واته خوا هه‌ڵه‌بووه، بۆیه ئه‌وانه‌ی پێشووی ڕه‌تکردۆته‌وه! ئه‌ی ناڵێن خوا هه‌رگیز هه‌ڵه ناکات، ئه‌ی ئه‌وه هه‌ڵه نییه؟ یان فه‌لته‌یه‌کی محه‌مه‌ده داویه‌تی؟
له‌سوره‌تی ئه‌نفال (تاڵانکردن) ئایه‌تی 65دا هاتووه: (ياايها النبي حرض المؤمنين على القتال ان يكن منكم عشرون صبرون يغلبوا مائتين وان يكن منكم مائة يغلبوا الفا من الذين كفروا بانهم قوم لايفقهون). واته "ئه‌ی پێغه‌مبه‌ر، هانی باوه‌ڕداران بده له‌سه‌ر جه‌نگ، ئه‌گه‌ر بیست که‌سی خۆڕاگر هه‌بێت له‌ئێوه، ئه‌وه زاڵده‌بن به‌سه‌ر دووسه‌د که‌سدا، خۆ ئه‌گه‌ر سه‌د که‌س له‌ئێوه هه‌بن، ئه‌وه به‌سه‌ر هه‌زار که‌س له‌وانه‌ی که بێباوه‌ڕن زاڵده‌بن". ئایا ئهو ئایه‌ته، خه‌ڵک هان ده‌دات بۆ برایه‌تی‌و ته‌بایی، یان بۆ ئاژاوه نانه‌وه‌و کوشتن‌و به‌رپاکردنی جه‌نگ؟ ئایا هاندان بۆ توندوتیژیو کوشتن‌و جه‌نگ هه‌ڵگیرسان، ناچێته خانه‌ی تاوان یان پشتیوانیکردن له‌تاوان؟
له‌سوره‌تی ئه‌لتۆبه (شمشێر)، ئایه‌تی 29دا نووسراوه: (قتلوا الذين لايؤمنون بالله ولا باليوم الاخر ولايحرمون ماحرم الله ورسوله ولايدينون دين الحق من الذين اوتوا الكتب حتى يعتوا الجزية عن يد وهم صاغرون). واته "بکوژن‌و بجه‌نگن له‌دژی ئه‌وانه‌ی باوه‌ڕیان به‌خواو به‌ڕۆژی قیامه‌ت نیه‌‌و ئهو شتانه‌ی خواو پێغه‌مبه‌ره‌که‌ی به‌حه‌رامیان داناوه به‌حه‌رامی نازانن‌و په‌یڕه‌وی دینی حه‌ق ناکه‌ن، له‌وانه‌ی که په‌رتووکیان پێدراوه له (گاورو جوو)، هه‌تا ئهو کاته‌ی به‌ناچاری باج بده‌ن تاوه‌کو گیانیان بپارێزرێت". لێره‌دا کوشتنی هه‌موو ئهو که‌سانه‌ی که باوه‌ڕیان نییه به‌خوا، به‌ئێستا مه‌به‌ستی ئیسلامه، به‌دواڕۆژ مه‌به‌ستی زیندووبوونه‌وه‌یه، هه‌روه‌ها ئهو که‌سانه‌ی که ئه‌لکهول ده‌خۆنه‌وه، گۆشتی به‌راز ده‌خۆن، سێکس ده‌که‌ن له‌ده‌ره‌وه‌ی گرێبه‌ستی هاوسه‌رێتی، نوێژ ناکه‌ن‌و به‌ڕۆژوو نابن، ڕێگه‌ی پێده‌دات. ئایا ئهو هه‌موو که‌سه بکوژرێت کێ ده‌مێنێت؟ ته‌نیا شمشێر وه‌شێنه‌کان که ناتوانن بۆ خۆیان ده‌رزییه‌کیش دروست بکه‌ن!
له‌سوره‌تی محه‌مه‌د، ئایه‌تی 4دا هاتووه: (فاذا لقیتم الذین کفروا فضرب الرقاب حتی إذا أثخنتموهم فشدوا الوثاق فإما منا بعدوا وإما فداء حتی تضع الحرب أوزارها ذلک ولو یشاء الله...). واته: "کاتێک گه‌یشتن به‌وانه‌ی بێباوه‌ڕ بوون، بێنه ده‌ست لێیان‌و له‌گه‌رده‌نیان بده‌ن، تاکاتێک کوشتاری زۆریان لێده‌که‌ن، ئینجا که‌هێزیان نه‌ما، به‌دیل بیانگرن به‌توندی باڵبه‌ستیان بکه‌ن.....". به‌گوێره‌ی ئهو ئایه‌ته‌ش، سه‌ربڕین‌و ملپه‌ڕاندن ڕه‌وایه‌و دژ به‌ئیسلام نییه! ئه‌ی کوان ئهو موسڵمانانه‌ی که ده‌ڵێن، به‌پێی قورئان، سه‌ربڕین‌و ملپه‌ڕاندن ڕه‌وا نییه؟
له‌سوره‌تی مانگا، ئایه‌تی 216دا، خوا ده‌ڵێت: (کتب علیکم القتال وهو کره لکم وعسی أن تکرهوا شیئا وهو خیر لکم وعسی أن تحبوا شیئا وهو شر لکم والله یعلم وأنتم لاتعلمون). واته "جه‌نگ له‌سه‌رتان بڕیار دراوه که‌شتێکی گرانه لاتان، به‌ڵام له‌وانه‌یه شتێکتان لاناخۆش بێت که‌چی خێر له‌وه‌دا بێت، هه‌روه‌ها له‌وانه‌یه شتێکتان پێخۆش بێت، که‌چی شه‌ڕ له‌وه‌دا بێت، بێگومان هه‌ر خوا خۆی ده‌زانێت خێر له‌چی‌دایه، ئێوه نایزانن". به‌گوێره‌ی ئایه‌تی 216ی سوره‌تی مانگا، بۆمان ڕوونده‌بێته‌وه که بڕیاری شه‌ڕکردن‌و هێرش بردن‌و کوشتنی که‌سانی ناموسڵمان له‌لایه‌ن خواوه دراوه‌و، مرۆڤی موسڵمان ده‌بێت جێبه‌جێی بکات‌و هیچ ڕێگه‌یه‌کی تری له‌به‌رده‌مدا نییه!!
له‌سوره‌تی تاڵانکردن، ئایه‌تی 60دا خوا ده‌ڵێت: (واعدوا لهم مااسطعتم من قوة ومن رباط الخیل ترهبون به عدو الله وعدوکم وءآخرین من دونهم لاتعلمونهم الله یعلمهم وماتنفقوا من شي في سبیل الله یوف إلیکم وأنتم لاتظلمون). لێره‌دا خوا فه‌رمان ده‌دات که: "هه‌رچی له‌توانادایه بۆ به‌هێزکردنی سوپای ئیسلام بیخه‌نه گه‌ڕو ئاماده‌ی بکه‌ن‌و له‌ئاماده‌کردنی هه‌موو جۆره ئه‌سپ‌و هۆکانی تری گواستنه‌وه که‌مته‌رخه‌می مه‌که‌ن تادوژمنانی ئێستا پێی چاوترسێن ببن که ئێستا ئێوه نازانن کێن‌و نایانناسن، به‌ڵکو هه‌رخوا خۆی ده‌یانناسێت‌و هه‌رشتێک ببه‌خشن له‌پێناوی خوادا، ئه‌وه به‌فیڕۆ ناچێت‌و ده‌ستتان ده‌که‌وێته‌وه‌و ئێوه سته‌متان لێناکرێت". هه‌رکه‌سێک به‌ووردی سه‌یری ئهو ئایه‌ته‌ی سه‌ره‌وه بکات، بۆی ده‌رده‌که‌وێت که ئه‌وه له‌قسه‌ی خوا ناچێت، به‌ڵکو زۆرتر له‌بڕیاری وه‌زیرێکی به‌رگری‌و جاڕدانی شه‌ڕێکی سه‌رانسه‌ری ده‌چێت؟ جا تو ویژدانتان ئه‌مه خوایه، یان وه‌زیری جه‌نگ‌و به‌رگری وڵاتێکی شه‌ڕفرۆشه؟
له‌سوره‌تی تاڵانکردن، ئایه‌تی 39دا هاتووه: (وقاتلوهم حتی لاتکون فتنة ویکون الدین کله لله فان انتهوا فان الله بما یعلمون بصیر). واته "بیانکوژن تا ئاژاوه نه‌مێنێت، تادین فه‌رمانبه‌رداری هه‌ر هه‌مووی بۆ خوا بێت". به‌پێی ئه‌م ئایه‌ته‌ی سه‌ره‌وه، خوا له‌شکری دڕنده‌ی ئیسلام ده‌نێرێت له‌پێناو قه‌ڵاچۆکردنی ئایینه‌کانی ترو سه‌رخستن‌و سه‌پاندنی ئایینی ئیسلامدا، ئه‌ی کوا دورشمی "إنما المؤمنین اخوة"؟ یان ته‌نیا که ئیسلام بێهێزه کاری پێده‌کرێت!!
له‌سوره‌تی شمشێر، ئایه‌تی 123دا ده‌ڵێت: (یاأیها الذین آمنوا قاتلوا الذین یلونکم من الکفار ولیجدوا فیکم غلظـة.....). واته "ئه‌ی ئه‌وانه‌ی باوه‌ڕتان هێناوه بکوژن‌و بجه‌نگن دژی ئهو بێباوه‌ڕانه‌ی که‌لێتان نزیک ده‌بنه‌وه به‌ده‌وروبه‌رتاندان‌و باتوندو تیژی‌و هێزو تواناتان تیادا به‌دی بکه‌ن". ئهو ئایه‌ته خۆی خه‌ڵکی موسڵمان هانده‌دات بۆ کوشتن‌و جه‌نگ له‌دژی ئه‌وانه‌ی موسڵمان نین‌و، داوا له‌موسڵمانان ده‌کات که توندوتیژی ئیسلامیان پێ نیشان بده‌ن! ئه‌ی بۆ موسڵمانه‌کان ده‌ڵێن ئیسلام له "سلم"ه‌وه واته له ئاشتییه‌وه هاتووه؟ من پێم وایه ئیسلام له "ئیستسلم"ه‌وه واته "خۆت بده به‌ده‌سته‌وه" هاتووه‌و، ئه‌مه‌ش واته مرۆڤ له‌مه‌ودوا خۆی خاوه‌ن بڕیار نابێت‌و ئه‌وان بڕیار له‌سه‌ر هه‌موو شتێکی ئهو ده‌ده‌ن!
له‌سوره‌تی محه‌مه‌د، ئایه‌تی 35دا هاتووه: (فلا تهنوا وتدعوا الی السلم وأنتم الاعلون والله معکم ولن یترکم اعمالکم). واته "ئێوه سستی مه‌که‌ن‌و داوای ئاشتی پێش وه‌خت له‌دوژمنان مه‌که‌ن، چونکه هه‌ر ئێوه سه‌رکه‌وتوو ده‌بن، دڵنیابن که خوایش له‌گه‌ڵتانه، کاروکرده‌وه‌تان به‌زایه نادات‌و لێی که‌م ناکه‌نه‌وه". لێره‌دا خوا خۆی داوا له‌موسڵمانان ده‌کات که‌داوای ئاشتی نه‌که‌ن‌و، گه‌ره‌نتی سه‌رکه‌وتنیشیان ده‌داتێ! که‌واته ئایینی ئیسلام ئایینی شه‌ڕو سه‌پاندن‌و زۆر لێکردنه، نه‌ک ئایینی ئاشتی که موسڵمانه‌کان پێیه‌وه ده‌نازن!
له‌سوره‌تی تاڵانکردن، ئایه‌تی 69دا هاتووه: (فكلوا مما غنمتم حللا طيبا واتقوا الله ان الله غفور رحيم). واته "بخۆن له‌و شتانه‌ی که‌ده‌ستتان که‌وتووه، به‌حه‌ڵاڵێکی چاک‌و پاک، له‌خوا بترسن‌و دینداربن، چونکه به‌ڕاستی ئهو خوایه لێخۆشبوو میهره‌بانه". به‌پێی ئایه‌تی 69ی تاڵانکردن، خوا نه‌ک ته‌نیا شه‌ڕی به‌ڕه‌وا داناوه بۆ موسڵمانان، به‌ڵکو تاڵانکردنی ماڵو سامانی که‌سانی تریشی بۆ به‌ڕه‌وا کردوون. ئه‌رێ تاڵانکردنی ماڵو سامانی که‌سانی تر، ناچێته خانه‌ی دزیکردنه‌وه؟
له‌سوره‌ی ئه‌لئه‌حزاب، ئایه‌تی 38دا هاتووه: (ماکان علی النبي من الحرج فیما فرض الله له سنة الله في الذین خلوا من قبل وکان امر الله قدرا مقدورا). هیچ گوناه و هه‌ڵه‌یه‌ک له‌سه‌ر پێغه‌مبه‌ر نیه له‌به‌رامبه‌ر کارێکه‌وه که‌خوا کردوویه‌تی به‌ئه‌رکی سه‌رشانی". به‌پێی ئه‌م ئایه‌ته‌ی سه‌ره‌وه نه محه‌مه‌دی به‌ناو نێردراوی خواو، نه‌هیچ موسڵمانێک تاوانبار نین، له‌و تاوانانه‌ی که موسڵمانان ده‌یکه‌ن. ئه‌ی ده‌بێت کێ تاوانبار بێت، کاتێک که بکه‌ری کاره‌که بێتاوان بێت؟ ئایا ئه‌مه گالته‌جاڕی ئیسلام نییه؟
له‌سوره‌تی تاڵانکردن، ئایه‌تی 17دا هاتووه: (فلم تقتلوهم ولکن الله قتلهم ومارمیت إذ رمیت ولکن الله رمی ولیبلی المؤمنین منه بلاء حسنا إن الله سمیع علیم). واته "که‌وابوو ئه‌ی ئیمانداران: وه‌نه‌بێت ئێوه کافرانتان کوشتبێت، به‌ڵکو خوا کوشتنی‌و له‌ناوی بردوون، تۆش ئه‌ی محه‌مه‌د کاتێک مشتێک خۆڵت ڕوو به‌کافران فڕێدا ئهو کاره ته‌نها تۆ نه‌تکرد، به‌ڵکو خوا فڕێیداو (خۆڵی کرده چاوی کافرانه‌وه)، تائیمانداران تاقی بکاته‌وه به‌تاقی کردنه‌وه‌یه‌کی چاک، چونکه به‌ڕاستی خوا بیسه‌ری (دوعاو نزایانه)، زاناشه". به‌پێی ئایه‌تی 17ی تاڵانکردن، هه‌موو تاوانه‌کان خراوه‌ته سه‌ر خودی خوا خۆی، ئه‌مه‌ش بۆ ئه‌وه‌یه ئه‌گه‌ر له وڵاتێک که ئیسلام تیایدا باڵا ده‌ست بوو، هه‌رکه‌سێکی سه‌ر به ئایینه‌کانی تر کوژران، هیچ سزایه‌ک موسڵمانه تاوانباره‌کان نه‌گرێته‌وه! ئه‌گه‌ر وایه خوا با هه‌ر دروستی نه‌کردنایه! یان بۆ ئه‌وه دروستی کردوون موسڵمانه‌کان بیانکوژن؟
له‌سوره‌تی ئه‌لمائده، ئایه‌تی 44دا هاتووه: (ومن لم یحکم بما انزل الله فاولئک هم الکافرون). واته "ئه‌وه‌ی حوکم‌و داوه‌ری به‌و به‌رنامه‌یه نه‌کات که‌خوا دایبه‌زاندووه، ئائه‌وانه بێباوه‌ڕن". لهم ئایه‌ته‌ی سه‌ره‌وه‌دا خوا هیچ نرخێک بۆ ئایینه‌کانی تر ناهێلێت‌و ڕه‌تیان ده‌کاته‌وه‌و، هه‌رکه‌سێک به‌گوێره‌ی قورئان ڕه‌فتار نه‌کات به‌کافری ناوده‌بات‌و، سزای کافرانیش دیاره که کوشتنه یان سه‌ربڕینه!
محه‌مه‌دی به‌ناو پێغه‌مبه‌ر ده‌ڵێت: (من بدل دینه فاقتلوه). واته "ئه‌وکه‌سه‌ی ئایینه‌که‌ی خۆی گۆڕی بیکوژن". محه‌مه‌دیش لێره‌دا فه‌توای به‌ڕه‌وا خوێنڕشتنی هه‌موو موسڵمانێک که‌واز له ئیسلام بێنێت، ده‌دات. واته له ئیسلامدا ئازادی ئایین نییه! ده‌بێت به ئیسلامی له‌دایک بیت‌و به‌ئیسلامی بمریت، یان به‌نائیسلامی له‌دایک ده‌بیت‌و ده‌بێت ببیت به‌ئیسلام‌و به‌ئیسلامیش ده‌بێت بمریت، ئه‌گینا ده‌بێت بکوژرێیت!
له‌سوره‌تی ئه‌لنور، ئایه‌تی 2دا هاتووه: (الزانية والزاني فاجلدوا كل واحد منهما مائة جلدة). واته "سه‌دقامچی له‌هه‌ریه‌ک له‌ژن‌و پیاوی زیناکه‌ر بده‌ن". لێره‌دا بۆ که‌سانی ئاسایی، سێکس کردن هه‌رچه‌نده له‌سه‌ر خواستی هه‌ردوو لایه‌نی ژن‌و پیاوه‌که خۆشیان بێت، مادام له‌ده‌ره‌وه‌ی گرێبه‌ستی هاوسه‌رێتی بێت، ده‌بێت هه‌ریه‌که‌و سه‌ت قامچییان لێبدرێت، که‌چی له‌کاتی هێرش‌و په‌لاماره نامرۆڤایهتییهکانی ئیسلام بۆ سه‌ر نه‌ته‌وه‌کانی ترو، له‌پێناوی به‌زۆر به‌موسڵمان کردنیان، نه‌ک ته‌نیا سێکس ڕه‌وابوو بۆ موسڵمانه‌کان، به‌ڵکو داگیرکردنی ژن‌و کچ‌و دایکی خه‌ڵکیش ڕێگه‌ی پێدرابوو!
|
|
|
02/09/2015 |