|
داوايه‌ک له سه‌رۆکه‌کانمان |
|
سه‌رکه‌وت مه‌جيد به‌ڕێزان ئه‌گه‌ر ره‌خنه‌ی رۆشنبيران و خه‌ڵکی ساده وه‌رنه‌گر‌ن، چۆن ئاواتی دێرينه‌ی هه‌موو تووێژه‌کانی میلله‌ته‌که‌مان له ئه‌مڕۆی ده‌سه‌ڵاتتان به‌رجه‌سته ده‌که‌ن؟ ئه‌رکی نه‌ته‌وایه‌تی و مرۆڤایه‌تی سه‌ر شانی ئێوه‌یه که کوردستانێکی نموونه‌یی و مۆدێرنی دیموکراسی و ئاشتی له ده‌ڤه‌ری تووندڕه‌وانی نه‌ته‌وه‌په‌رستان و تاکڕه‌وانی ده‌سه‌ڵات و ده‌سه‌ڵاتی بنه‌ماڵه‌کان له رۆژه‌ڵاتی ناويندا بهێننه بوونه‌وه. ڕۆژانه پێشنیاری دڵسۆزانه بۆ حکوومه‌ت و کۆماره سه‌پێنراوه‌که‌ی عێراق و بۆ ته‌بایی لایه‌نه سیاسی و گروپه جه‌هاله‌تیه‌کانی هزری ئیسلامی تیرۆریستان ده‌که‌ن.. هه‌وڵی زۆرتان بۆ ئه‌وانی بێ متمانه‌یه پێتان ،.. که‌مێک پێشنیار و پلانه‌کانتان خۆماڵی که‌ن، به دیرۆکی خۆمانا بچنه‌وه..جارێ تر خۆتان مه‌که‌نه چاوساغی حکوومه‌ته یه‌ک له دوای یه‌که‌کانی خۆپه‌رستانی ژێرپێشته‌ماڵی برایه‌تی، جارێ تر ڕابردووی سه‌ڵاحه‌دینی خۆ به که‌مزان له ئاستی هاو به‌رماڵ دووباره مه‌که‌نه‌وه؛ به‌ڕێزان ده‌بێ ئێوه به‌خشنده و مل که‌چ بن له ئاستی هه‌زاره‌ها د. که‌مالی ڕه‌خنه ڕه‌قی هاووڵاتیانی خۆماندا،که ئه‌و کورسیه هاوبه‌شه‌تان به نسیب کرا.. ده‌بوایه باش بتانزانیایه؛ ڕه‌خنه‌ی تووندتریشیان ده‌بێ وه‌رگرن، بگره سنگتان ده‌بێ زۆر فراوان بێ بۆ جنێوی که‌سانی که‌م ئاستیش ( وه‌ک زۆر له سه‌رۆکه‌کانی وڵاتان)، ده‌بوایه و ده‌بوایه به‌ندینخانه‌ی تایبه‌ت بۆ هاووڵاتیانی خه‌مخۆران و دڵسۆزان به‌جیاوازی هزرییه‌وه نه‌که‌نه‌وه... ده‌بوایه ته‌ور بۆ زمانی قه‌ڵه‌می خۆماڵی به‌ره‌ی میلله‌ت به هیچ کڵۆجێ تیژ نه‌که‌نه‌وه. جێی داخه تا ئێستاش که‌سانێک له خۆتان نزیک ده‌که‌نه‌وه که ته‌نها به لایه‌نه باشکاریه‌کانتانا هه‌ڵبده‌ن، پێتان ئه‌سته‌نگه لایه‌نه که‌مته‌رخه‌مکاریه‌کانتان به چرپه‌ش بدرکێنرێ، ئه‌وانه‌ی دوژمنی بنه‌چه سه‌ختی میلله‌ته‌که‌مانن سازشیان له‌گه‌ڵا ده‌که‌ن که‌چی بێخوودێکی دیار چاره‌نووسی کورد ئه‌گه‌ر ڕه‌خنه‌تان لێ بگرێ و پێشنیارێکی مۆدێرن و باشکاری جیا له پێڕه‌وی ئێوه بڵاو بکاته‌وه به دووژمنی ئاسایشی نه‌ته‌وایه‌تی ده‌زانن. به‌ڕێزان ئه‌وه‌ناحه‌ز نیه، قه‌ڵه‌مێکی دڵ شکاوه پێشبینی ئاینده‌یه‌کی دڵسۆزانه‌ی برایانه‌تان ئاراسته ده‌کات، ئه‌وه قه‌له‌مه، تفه‌نگ نیه،شه‌ڕی براکوژیتان ناکات به‌ڵکوو هه‌ر ئه‌ویش بوو داوای ڕاگرتنی شه‌ڕی براکوژی نێوان هه‌موو لایه‌نه‌کان و پارچه‌کانی وڵات و ئاشتی بۆ کوردستانی گه‌وره ده‌کرد نه‌ک قه‌ڵه‌مزه‌ڕی جه‌نگی نێوانتان، هه‌ر ئه‌و قه‌ڵه‌مه‌شه له یه‌که‌م شۆڕشه‌وه تا ئێستا پێسنیاری کردووه و هه‌ر پێشنیاری ئاشتی وئازادی و یه‌کسانی و ده‌سه‌لاتی پێکه‌وه‌یی که‌سانی لێهاتووی شایسته و له ناو چوونی تاکڕه‌ووی و بۆماوه‌یی و هه‌موو گه‌نده‌ڵییه‌کان ده‌کات...به‌ڕێزان هه‌وڵ بده‌ن ڕێزی بۆچوونه‌کانیان بگرن، باشکاریه‌کانیان با په‌یڕه‌و بکرێ، ده‌س له زیندان و ته‌وره‌کانتان هه‌ڵبگرن، ئه‌مڕۆ دنیایه‌کی تره ؛ ڕۆشنبیران و ماف په‌روه‌ران ده‌نگیان ئازاده ده‌گاته هه‌موو ماڵپه‌ڕه‌کان و سه‌ته لایته‌کان وزه‌نگ به هه‌موو زمانه‌کان لێده‌ده‌ن کلیلی ده‌روازه‌ی نه‌ته‌وه یه‌کگرتووه‌کان و خاچی سوور و مافی مرۆڤی جیهان و سه‌رۆکی زۆربه‌ی ووڵاته چاره‌نووس به ده‌سه‌کانی دنیایان پێیه، ده‌توانن ڕاستیه‌کانی ئازاری جه‌رگی به‌ره‌ی میلله‌ت بگه‌یه‌نن و به فشاری ئه‌وان بڕیاری نایاسایتان بگۆڕن خۆشحاڵ بوین وه‌کوو کورد ڕۆژێک له ڕۆژان که‌سێکی کورد به هه‌رچ پله و پایه ولایه‌نیه‌کیه‌وه له پێناو به‌رژه‌وه‌ندی میلله‌ته‌که‌ماندا بگاته نه‌ته‌وه یه‌کگرتووه‌کان و له کۆشکی سپی و له‌گه‌ل سه‌رۆکی وڵاتانی چاره‌نووس به ده‌سی تر، له به‌رده‌م کامێرای ڕاگه‌یاندنه جیهانیه‌کان؛ به زمانه پاراوه‌که‌مان، به جلی شانازیمانه‌وه ؛ بونی میلله‌ته‌که‌مان به دنیا ڕابگه‌یه‌نرێ...ئێوه هه‌ردووکتان ئه‌و شه‌ره‌فه‌تان پێدرا که به هه‌موو دوژمنانمان بڵێن (هه‌ر ماوه قه‌ومی کورد زمان)* وه پێشیشتان ده‌که‌وێ... هیوادارین پرۆژه‌تان بێ له هه‌موو ڕوویه‌که‌وه بۆدوونیا نموونه‌یی بین، نه‌ک ته‌نها گوێ ڕایه‌ڵی ئه‌وان بن (وه‌ک پۆل برێمه‌ر نووسیویه) و گوزه‌رانی ئێمه‌تان هه‌رگیز بیر نه‌بێ .خوا نه‌خواسته نه‌وه‌کوو خه‌باتی کوردایه‌تیتانتان گۆڕابێ به خه‌باتی ده‌سه‌ڵات! له‌ساڵی (1991) ه‌وه کوردستان ئێوه فه‌رمانڕه‌وایی ده‌که‌ن، ناڵێین هیچتان نه‌کردووه به‌ڵام میلله‌ت زۆر زۆر له‌وه زیاتری لێتان ده‌ویست هه‌نووکه‌ش هه‌ر هۆشداریتان ده‌دات، بۆچی ڕۆژێ له‌ڕۆژان خۆتان به که‌مته‌رخه‌م نازانن؟ دوژمنانمان که‌مته‌رخه‌م نین له پلانه‌کانیان بۆ پێشێل کردنی ساده‌ترین مافمان، گله‌یمان له‌وان نیه به‌ڵکوو له ئێوه‌یه له ئێوه‌ی برای هاوخوێن که ئه‌مڕۆ له‌سه‌ر کورسی ده‌سه‌ڵاتن؛ ئه‌گه‌ر خه‌ونێکی دێرینمان نه‌یه‌ته دی؟ که‌مته‌رخه‌می ئێوه‌یه، ئه‌گه‌ر که‌رکوک و خانه‌قین و ده‌ڤه‌ره دابڕاوه‌کانی خاکمان نه‌گه‌ڕێنه‌وه؟ که‌مته‌رخه‌می ئێوه‌یه، ئه‌گه‌ر ئاواره و...هتد هه‌ر هاوڵاتییه‌ک کێشه‌ی بێ لانه‌یی و ئاو و کاره‌با و..هتدی هه‌بێت؟ که‌مته‌رخه‌می ئێوه‌یه، ئه‌گه‌ر ڕه‌وی هه‌نده‌ران هه‌ر به‌رده‌وام بێت؟ که‌مته‌رخه‌می ئێوه‌یه، لێتانمان ده‌وێ به‌ره‌و کوردستانه‌که‌مان به‌شالاو بۆ گه‌شت و گوزار و بازرگانی و...هتد له وولاتانه‌وه ڕووی تێ بکه‌ن، له‌و خاکه داڵده‌ی په‌نابه‌ران بدرێ نه‌ک خۆمان تا هه‌تایه داوای په‌نابه‌ری بکه‌ین. زۆر له ولاتانی ئابووری کزی سه‌ر ئه‌م زه‌ویه توانیان به پلان و پرۆژه‌ی سه‌رکه‌وتوو و به ئه‌نجامده‌رانی شایسته و لێهاتووی دڵسۆز له هه‌موو بواره‌کاندا وڵاتێکی نموونه‌یی بن، زۆر له ووڵاتانی تری ده‌وڵه‌مه‌ند ده‌رامه‌تیان به فیڕۆ نه‌دا به‌ڵکوو گه‌شه‌ی سه‌رسووڕهینه‌رانه‌یان به وڵاته‌که‌یان دا، که‌چی جێی داخی هه‌موانه وڵاته‌که‌مان له هه‌موو بواره‌کاندا ده‌وڵه‌مه‌ندین ته‌نها له پلان و گه‌شه و به‌ڕێوه‌بردن و ده‌سه‌ڵاتدا نه‌بێ که له ساڵی 1991 ه‌وه ساده‌ترین کێشه‌ی کاره‌با و ئاوی خواردنه‌وه و سووته‌نی چاره‌سه‌ر نه‌کراوه. به‌ندێکی یاسایی چه‌سپاوی نه‌گۆڕی بی خاتر و واسته‌مان ده‌وێ که له سه‌رووی هه‌موو چین و توێژ و ئاین و ڕه‌نگ و زمان و هاووڵاتیانی ئه‌م شار و ئه‌و گه‌ڕه‌ک و گوندا بێت، هه‌موان (سه‌رۆک و گه‌وره‌کانی ئایین)یش له ئاستێدا زیاده ڕۆیی نه‌که‌ین؛ که‌س هێرش نه‌کاته سه‌ر که‌س و تویژ و ئاین و زاره‌ک و زمان و ڕه‌نگێک و که‌سیش بۆی نه‌بێت فتوا و بڕیاری نایاسایی خۆوویستی ده‌ر بکات،هه‌ر که‌سێک خۆی به هاووڵاتی کوردستان بزانێت با به‌رامبه‌ر ئه‌و به‌نده مل که‌چ بێت. به‌ڕێزان له‌وانه‌یه میلله‌ت له شه‌ڕی براکوژی و بڕیاری هه‌ڵه‌شه و سیاسه‌تی چه‌واشه‌کاری و به فیڕۆدانی زۆر ده‌رفه‌تی دانسقه‌ی مێژوویی و به فیڕۆدانی تر و ترتان ..... چاوپۆشی بکات به‌ڵام ئه‌گه‌ر ئه‌م هه‌له‌ی ئێستا بۆ به‌رژه‌وه‌ندی میلله‌تی کوردستان نه‌قۆزنه‌وه؛ خۆتان فریوو مه‌ده‌ن میلله‌ت به‌رامبه‌رتان ڕق ئه‌ستوور ده‌بێت.
|
|
|
02/09/2015 |