بزمارێکی هیندی
|
له شه‌سته‌کانی سه‌ده‌ی ڕابردوا هه‌موو شتێک بۆن و به‌رامه‌ی خۆی هه‌بوو. له شاری سلێمانی دوو سینه‌ما هه‌بوون سیروان که خاوه‌نه‌که‌ی کاک برایمی سنگه‌ر بوو و ڕه‌شیدیش که کاک ئه‌کره‌می سالحی ره‌شه بوو. ئه‌و حه‌له به دوو ڕێگا ریکلامیان بۆ فلیمه تازه‌کانیان ئه‌کرد یه‌که‌میان ده‌هۆڵ کوتێک و زوڕناژه‌نێکیان سواری عاره‌بانه‌یه‌کی دووئه‌سپی ئه‌کردو به‌گه‌ڕه‌ک و کۆڵانه‌کانی شارا ئه‌یان گه‌ڕانن و به تێکه‌ڵ کردنی ده‌نگی ته‌پڵ و زوڕناکه ئه‌و خه‌ڵکه‌یان ئاگادار ئه‌کرده‌وه که ئه‌مجاره به‌هێزترین فلیمی سکۆب مله‌وه‌نیان هێناوه( سکۆب واتا هه‌موو شاشه‌که‌ی ئه‌گرته‌وه) شایه‌نی ئه‌وه‌یه ببینرێ. ئیتر مناڵ دوای عه‌ره‌بانه‌که ئه‌که‌وتن هه‌نێکیان هه‌ر چه‌نه به‌ینی تایه‌کانی دواوه‌ی ته‌لی دڕکاویان پێوه کردبوو ، گوێیان نه ئه‌یایه و خویان هه‌ر پیا هه‌ڵئه‌واسی، خێره‌ومه‌ندێکیش له‌ولاوه بۆ ئاگادار کردنه‌وه‌ی عاره‌بانچیه‌که هاواری ئه‌کرد قامچیه‌ک بۆ دواوه ،ئه‌ویش تێ ئه‌گه‌یشت و یه‌کسه‌ر له‌سه‌ر سه‌ری خۆیه‌وه قامچیه‌که‌ی ڕه‌وانه‌ی پشته‌وه ئه‌کردوو ئه‌چزا به پشتی مناڵی لاسارا و له‌تاوا خۆی فڕێ ئه‌یایه خواره‌وه. هه‌ندێکی تریش به‌ڕاکردن بۆ ئه‌وه‌ی دیعایه‌یه‌کی ئه‌و فلیمه وه‌رگرن که بڵاویان ئه‌کردوه دوای ئه‌که‌وتن. دووه‌میشیان کابرایه‌ک له‌وحێکی ته‌خته‌ی پێبوو دارێکی بارێکی له ناوه‌ڕاسته‌وه پیا داکوترابوو و خستبوویه سه‌ر شانی، دیعایه‌ی فلیمه تازه‌که‌ی به گه‌ڕه‌که‌کانا ئه‌گه‌ڕان و هه‌مان دیعایه‌شی به قه‌واره‌ی بچوک پێ بوو ئه‌ی یا به‌و خه‌ڵکه بۆ ڕاکێشانیان بو بینینی فلیمه‌که. سینه‌مای ئه‌وکاته کۆمه‌ڵی کردبوو به سێ چینه‌وه بۆژواو وه‌سه‌ت و فه‌قیر بۆ نمونه قاتی سه‌ره‌وه که مه‌وقیعی مومتاز بو به حه‌فتاو پێنج فلس بوو لۆجی خێزانیشی لێبوو ، ناوه‌راست به حه‌فتا فلس بوو چینی چه‌وساوه‌ش له خواری خواره‌وه له‌به‌ر ده‌می په‌رده‌کا ( سکرین) له‌سه‌ر کورسیه‌کی ڕه‌ق به چل فلس ئه‌یان هێشت فلیمه‌که ببینن، بۆیه هه‌ر که گڵۆپ ئه کوژایه‌وه هه‌ندێکیان به‌سه‌ر ئه‌و په‌رژینه ئاسنینه‌ی که سه‌ره‌کانی وه‌کو ڕم وابوون بازیان ئه‌یایه حه‌فتاییه‌وه به‌ڵام بێ شانسه‌کان ڕمه تیژه‌کان شه‌ڕواڵه‌کانیانی شیڕ دا ئه‌دڕیه خواره‌وه . هه‌ندێکی تریش دوای ئه‌وه‌ی که محله‌بیه‌که‌یان قوزه‌ڵقورت ئه‌کرد ده‌وریه فافۆنه‌که‌یان وه‌کو سه‌حنی تائیر به‌سه‌ر ئه‌و خه‌ڵکه‌یا هه‌ڵئه‌فڕان ئه‌ڕۆی تاخۆی نه کێشایه به په‌رده که‌یا نه ئه‌گیرسایه‌وه. گۆرانیه‌کانی پێش ده‌ست پێکردنی فلیم به زۆری حه‌سه‌ن زیره‌کو ئوم که‌لسوم و نازم غه‌زالی بوو له جه‌ژنانیشا له‌به‌ر ئه‌وه‌ی خۆشی و شادی بوو سینه‌ما رۆژانه لانی که‌م حه‌وت که‌ڕه‌ت ئیشی ئه‌کرد عه‌به‌ی سه‌یزایه‌و جه‌ماعه‌ته‌که‌ی که پۆسته‌و ئیداره‌یان پێ ئه‌وتن پێش ده‌ست پێ کردنی فلیمه‌که گۆرانیان ئه‌وت. فلیمه‌کانی جه‌ژن به‌زۆری هه‌رقل و عه‌به خڕه‌ی هاو په‌یمانی بوو، هه‌روه‌ها ماشستی و ئۆرسۆز و حه‌وت به‌ته‌ڵه‌که . ئه‌وه‌ی سه‌یر بوو ( له‌کاتێکا که هه‌رقل ئاوزه‌نگی له ئه‌سپه‌که ئه‌یا بو هێنانه‌وه‌ی ده‌نکه‌که‌ی که غاینه‌کان فڕاندبوویان سینه‌ما گه‌وره‌و بچوک ئه‌‌یکرد به چه‌پڵه رێزان و به یه‌ک ده‌نگ ئه‌یان ووت زۆر جوانه هه‌رقل! هه‌ر وه‌ها ته‌ڕه‌زان و مه‌یمونه‌که‌ی که ناوی شیتا بوو ( ئه‌و عانه ئه‌گه‌ر یه‌کێک ناشرین بوایه پێیان ئه‌وت ئه‌ڵێی شیته‌ی ته‌ڕه‌زانه) ئه‌و ته‌ڕه‌زانه که جونی سموله‌ر ی پاڵه‌وانی مه‌له‌ی ئه‌وکاته ده‌وره‌که‌ی ئه‌بینی، به‌وه ناسرابوو که له‌کاتی ته‌نگانه‌یا هاوارێکی ئه‌کرد هه‌موو حه‌یواناته‌کان به کۆمه‌کیه‌وه ئه‌هاتن، بۆیه فلیمه‌که تاهاواری زیاتر تیا بوایه بره‌وی زیاتر بوو. به گوێی خۆم جه‌ژنێک گوێم لێ بوو جامانه به‌سه‌رێک به یه‌کێکی تری ئه‌وت که تازه له بینینی فلیمه‌که ئه‌هاته ده‌ره‌وه چه‌ن هاواری تیایه؟ ئه‌ویش ووتی حه‌وت ئه‌میش ووتی ئه‌ی به قوربانی خوای بم و وه‌ک ته‌ڕه‌زان و ئازاتریش له‌و به‌سه‌ر ئێمه‌ی مناڵی ئه‌وکاته‌یا خۆی هه‌ڵدا بۆ به‌رده‌می کونی بلیت بڕینه‌که وبلیتی خۆی بڕی. ته‌ره‌زانی هیندیش دارا سه‌نگ بوو عاجباتیه‌که‌ی له‌وا بوو نیوه‌ی فلیمه‌که ڕه‌ش و سپی بوو نیوه‌که‌ی تری ره‌نگاو ڕه‌نگ ، ئێستاش نازانم حیکمه‌ت له‌وه چیبوو؟. ئه‌ویش هه‌موو حه‌یواناته‌کانی هیندستانی کردبوو به موریدی خۆی و پێی بووتنایه بمرن ئه‌مردن، ئیشه‌که‌شی پاککردنه‌وه‌ی دارستان بوو له ناپاکان . هه‌ر له جه‌ژنانا لگاوچیه‌کان له‌ده‌وروبه‌ری سینه‌ماکان و به‌ر ته‌ربیه‌ی کۆن که ئه‌که‌وێته ئه‌وبه‌ری مزگه‌وتی گه‌وره‌وه مشه‌مای لگاوه‌کانیان که ره‌سمی تاج و قه‌ره‌و له‌نگه‌رو سینه‌ک و کوپ و دیناری له‌سه‌ر کرابوو را ئه‌خست و عورفی ئه‌ویاریه‌ش ئه‌وه بوو ئه‌گه‌ر مۆره‌کان هه‌رسێکیان له‌سه‌ر یه‌ک ره‌سم بکه‌و‌تنایه‌ته‌وه بۆ نموونه له‌نگه‌ر هه‌ر دوقات پاره‌ی بۆ دائه‌نای به‌ڵام هه‌ندێکیان که بۆ راکێشانی مشته‌ری هاواریان ئه‌کر سێ ده‌بڵ ئه‌خوا. هه‌ندێ جاریش ئه‌یان ووت فڵان لگاوچی مۆره‌که‌ی سه‌ر ئه‌کا واتا به‌یه‌ک ره‌سما زۆر ئه‌که‌وێته‌وه بۆنمونه (قه‌ره) ئیتر خه‌ڵک پاره‌که‌یان له‌سه‌ر قه‌ره دائه‌نا . ئه‌گه‌ر پۆلیسیش بهاتایه ته‌نها په‌لاماری مۆره‌کانی ئه‌یا ئیتر لگاوچیه‌که چه‌ک ئه‌بوو چوونکه‌بێ مۆر لگاو نه‌ئه‌کرا . کاک چڵیتی مه‌حمو ده‌لیش سینیه‌کی خڕی له ته‌خته دروست کردبوو له مه‌رکه‌زه‌وه بۆ ده‌ره‌وه دابه‌شی کربوو به‌سه‌ر چه‌ن خانه‌یه‌کا خانه‌کان پاکه‌تی جگه‌ره‌ی تیا دانابوون له‌وانه، گریڤن، ڕۆسمان، کۆنسلێت، دیمۆری، و هه‌تا دوایی گه‌زێکیشی له‌ناوه‌ڕاستا کون کردبوو له‌سه‌ر دارێ که بزمارێک به‌سه‌ره‌که‌یه‌وه بوو له‌ناوه‌راستی سینیه‌که جێگیری کردبوو سه‌رێکی مورویه‌کی پیا شۆرکردبۆوه خه‌ڵکیش پاره‌یان له‌سه‌ر پاکه‌ته‌کان دائه‌ناو ئه‌ویش گه‌زه‌که‌ی یه‌ک جار با ئه‌یا موروه‌که له‌سه‌ر هه‌ر خانه‌یه‌ک بگیرسایه‌ته‌وه ئه‌گه‌ر پاره‌ی له‌سه‌ر بوایه ئه‌و‌که‌سه پاکه‌ته‌که‌ی ئه‌برده‌وه . هه‌ر له شته خۆشه‌کانی جه‌ژن نان و هێلکه‌و ترشیاته‌که بوو که سه‌ره‌ڕای ئه‌وه‌ی هه‌موو یه‌که‌م ڕۆژی جه‌ژن سه‌ر له‌به‌یانی تێرمان نان ئه‌خوارد به‌ڵام ئه‌بوایه پاروه هێلکه‌که‌شمان له‌لای سینه‌ماکان له مام برایم بکڕیایه. ئه‌وکاته خێزانیش ئه‌چوون بو بینینی فلیم به‌تایبه‌تی فلیمه هیندیه رۆمانسیه‌کان وه‌کو سه‌نگام وئاره‌زو و ئوم ئه‌لهند و زۆری تر له‌و فلیمانه که‌تراژیدیا سیمای دیاریان بوو ، بۆ یه به‌ده‌گمه‌ن یه‌کێک هه‌بوو بتوانێ خۆی ڕابگرێ و هۆن هۆن ئاو به چاوه‌کانیا بۆ مه‌زڵومیه‌تی کوڕه‌که یان کچه‌که یان خه‌سوو یان خه‌زوری یه‌کێک له‌و دوانه نه‌یه‌ته خوارێ. هه‌موو فلیمه‌کانیش ئه‌سپ و قیتارو جێبه ئه‌مریکه‌که‌و موساعیدی کوڕه‌که که کابرایه‌کی به‌حساب قسه‌خۆش بوو به‌ڵام زیاتر وه‌کو ته‌رتور به‌کاریان ئه‌هێنا ئه‌بوایه تیا بوایه. ئه‌و ساڵانه فلیمی هیندی وا ده‌ماخ و ئه‌قڵی ئه‌و خه‌ڵکه‌ی پێچابوو گۆرانی بێژ هه‌بوون میلۆدی گۆرانیه هیندیه‌کانیان هێنابوو به هۆنراوه‌ی کوردی ئه‌یان ووت و نه‌گبه‌تێکیش هه‌بوو ئه‌ی ووت من له گۆپاڵ ئه‌چم و خۆشی ئاگاداره و دیاریشی بۆ ناردووم ئیتر له‌و ڕۆژه‌وه ده‌م ڕووته‌کانی سلێمانی ناویان لێنا حه‌مه گۆپاڵ ئێستاش هه‌ر به‌و ناوه مه‌شهوره. یه‌کێکی تر ئیکمال ئه‌بێ و ئاخر چانسیشی ئه‌بێ ئه‌و ڕۆژه‌ش ئه‌و فلیمه هندیه‌ی که ئاشاپاریخ و دارامه‌نده‌ری تیایه ئاخر ڕۆژی نیشاندانی ئه‌بێ دا ئه‌مێنێ خوایه کامیان هه‌ڵبژێرێ ئینتیحانه‌که‌ی یان فلیمه‌که ئاخرێکه‌ی حه‌دێک بۆ دوو دڵی دائه‌نێ و نایکاته نامه‌ردی عیلمه‌که ئه‌کا به قوربانی ئاشاپاریخ. دیاربوو هیندوستانیش ئه‌ی زانی حاڵی ته‌ماشاکه‌رانی فلیمه‌کانی له‌ڕۆژ هه‌ڵاتا ئاوا شڕه‌و له‌و مه‌یانه‌شا گره‌وی له هۆلیود بردۆته‌وه بۆیه‌ی ساڵی شه‌ش سه‌د فلیمی به‌رهه‌م ئه‌هێنا . به‌نده و کۆمه‌ڵێ خه‌ڵکی تریش هه‌بوون حه‌زمان له فلیمی هیندی نه‌بوو به‌ڵام کاتێک ئه‌که‌وتینه موناقه‌شه‌وه له‌گه‌ڵ ئاشقانی هندو فلیمه‌کانی ئه‌وان یه‌ک له‌دوای یه‌ک ئیستیفاده‌کانی چوون بۆ ئه‌و فلیمانه‌یان بۆ ریز ئه‌کردین، له سه‌رووی هه‌موویانه باسی کوڕێکیان ئه‌کرد که هه‌ر له‌ڕێگه‌ی سه‌یرکردنی ئه‌و فلیمانه‌وه فێری هیندی بووه، ئه‌مان ووت گوێتان لێ بووه به هیندی قسه بکا؟ ئه‌یان ووت ئه‌ی چۆن ئه‌مان ووت چیتان گوێ لێبووه ئه‌یان ووت ئه‌وڕۆژه له جاده‌ی مه‌وله‌وی ئه‌و له‌به‌ری مه‌کتبه‌ی گه‌لاوێژ ئه‌بێ براده‌ره‌که‌شی له‌به‌ری بازاری عه‌سری به‌هیندی سڵاوی لێ کردووه ووتویه‌تی هێ دۆست. |
