|
جه‌عفه‌ری و بیری ته‌سکی ڕامیاری و خه‌یاڵی مه‌زهه‌بی . . ! به‌شی دووه‌م
م . حه‌مید عه‌زیز کورده‌کان به‌دڵ پاکی خۆیان یان به نه‌زانی هه‌میشه یان غه‌دریان لێکراوه یان گۆڵ ، کێشه‌که ئه‌وه‌یه میلله‌تی کورد به پیاوی ڕامیاری و بازاڕی یه‌وه واده‌زانین دنیا هه‌مووی دۆستمانه‌و کێشه‌مان نی یه به‌تایبه‌ت له‌گه‌ڵ شیعه و ئه‌مه‌ریکا که‌هه‌موو بیر مه‌ندێک ده‌زانێ ئه‌مه‌ریکا دۆستی نی یه ته‌نها به‌رژه‌وه‌ندی نه‌بێت . نه‌شیعه دۆستی کورده و نه ئه‌مه‌ریکا و نه سونه‌کان چونکه باری ڕامیاری و به‌رژه‌وه‌ندی ئه‌مانه‌ی کردووه به‌هاوڕێی کورد ئه‌گینا نه‌وه‌ک و کورد ماڵیان وێرانه نه وه‌ک و کورد ووڵاتیان داگیر کراوه نه‌وه‌ک و کورد به‌درێژایی مێژوو زوڵمیان لێکراوه نه‌وه‌ک و کورد له‌تکراون و به‌ش به‌شن نه‌وه‌ک و کوردیش بێ به‌شن له‌زمانێکی یه‌کگرتووی تایبه‌ت که‌گفتووگۆی پێ بکه‌ن . به‌ڵگه‌ی تریش زۆرن که‌جه‌عفه‌ری و گروپه‌که‌ی و شیعه‌کانی ترو ئه‌مه‌ریکا و سونه‌کان و ووڵاته عه‌ره‌بی یه‌کان و ووڵاته زلهێزه‌کانی تری دنیا وورته‌یان لێوه نه‌هات که کاتێک کوردستان جه‌هه‌نه‌م بوو ته‌ڕو ووشک به‌یه‌که‌وه ئه‌سووتان و قورئان و منداڵی کورد به‌یه‌که‌وه زینده به‌چاڵ ئه‌کران مێژووی ڕه‌شی عێراق و سه‌دام که‌له ئه‌نفاله‌کاندا له‌به‌رواری 1988 ده‌ستی چه‌په‌ڵیان به‌ده‌ریایه‌ک خوێنی ئه‌م نه‌ته‌وه سته‌م دیده‌یه سور بوو پیاوێک نه‌بوو له‌هه‌موو عا‌ره‌بدا بێته گۆو بڵێ به‌سه ئه‌م زوڵمه ئه‌م نه‌ته‌وه‌یه‌ش مرۆڤن و موسوڵمانن بۆوایان لێ ئه‌که‌ن ؟ . به‌پێچه‌وانه‌وه هه‌موو دنیا چاوپۆشیان لێ کرد و زۆربه‌ی عاره‌به‌کان پشتگیریشیان لێکرد و ویژدانیان هه‌ڵگرت بۆ دووایی کیژه گه‌نج و جوانه‌کانی ئه‌نفالیان کڕی له‌سه‌دام و به‌کاریان هێنان بۆ خزمه‌تکاری و بێ ڕه‌وشتی خۆیان . ئه‌مه پرسیاره . . ئه‌مه‌ریکاو ئه‌م گروپه مرۆییانه له‌کوێ بوون کاتێک به‌زیندوویی ئه‌خراینه چاڵ ؟ جه‌عفه‌ری له‌کوێ بوو که‌کوردستان بوو بوو به‌قه‌قناس و ئاسمان بۆنی کوردی لێ ئه‌هات بۆنی هه‌ناسه‌ی منداڵی بێ باوک و دڵی سوتاوی بێوه‌ژناکانی ئه‌م شانۆ ڕه‌ش و وێرانه‌یه و سێبه‌رو تارمایی ترسناکی ڕه‌ش له‌به‌ران و مێرد کوژراوی هه‌ناسه ساردی لێ ده‌هات ؟ . شیعه‌کان له‌کوێ بوون ؟ که سه‌دام هه‌زاران حه‌سه‌ن و حوسه‌ینی ئه‌کوشت و مه‌رقه‌ده‌که‌یانی کردبوو به‌به‌ڕه‌ڵا خانه . ئێستا جه‌عفه‌ری ڕقی پڕ بوغزی به کورد ئه‌ڕژێ . . ! . ئه‌ی بۆناچێ داوای مافی ئه‌و مرۆڤانه بکات که‌به‌ش خوراون و ژیانیان تاڵ بووه به‌هۆی سیستمی خوارو خێچی باشوری عێراقه‌وه که هیچی که‌متر نی یه له‌و سیستمه بۆگه‌نه‌ی قوم و ته‌هران . که‌چی له‌گه‌ڵ تورکیا ده‌س تێکه‌ڵ ئه‌کا که‌سه‌رتاپای ووڵاتیان به‌شۆڤێنی یه‌ت و به‌ڕه‌ڵایی نه‌خشاندووه هه‌ر بۆیه هیچ ووڵاتێک دۆستایه‌تی له‌گه‌ڵ ناکات و نایانه‌وێن ، که‌واته ڕاستیان ووتوه ( مه‌نجه‌ڵ بۆ سه‌ر قاپی خۆی ئه‌گه‌ڕێ ) . ته‌نها نه‌ته‌وه‌یه‌ک ئه‌سوتا و نه‌ته‌وه‌یه‌ک ده‌ربه‌ده‌ر ده‌بوو خه‌ونه‌کانی تێک ئاڵۆسکابوو له بێ که‌سیدا له‌بێ پشتیدا که‌چی ڕامیاریسته‌کانمان و دڵسۆزانی نیشتمان له‌گه‌رمه‌ی شه‌ڕی ناوخۆدابوون و ده‌یان ووت _ ئه‌مه شه‌ڕی براکوژی نی یه . . ! شه‌ڕی ناوخۆیه چونکه ئه‌وانه برامان نین . باشه ئه‌م نه‌ته‌وه سته‌م دیده‌یه ڕوو بکاته کوێ به‌ده‌ست ئه‌م قۆنته‌راتچییانه‌وه ؟ . دووای ئه‌و هه‌موو نه‌هامه‌تی و ماڵ وێرانی یه و زیاتر له‌سه‌ده‌یه‌ک چه‌و‌سانه‌وه‌ی نه‌ته‌وه‌یی و چینایه‌تی و نزمی ئابووری و که‌م و کوڕی سیستمی کۆمه‌ڵایه‌تی و دوواکه‌وتن و گرنگی پێنه‌دان له‌باری ژیانه‌وه بێ به‌ری و که‌م به‌شیش له بچوکترین ماف له‌باتی یارمه‌تی و ساڕیژکردنی برینه قوڵه‌کانمان جه‌عفه‌ری پاشقولمان لێده‌گرێ و له‌گه‌ڵ دووژمنانی کورد کۆده‌بیته‌وه‌و پلان داده‌نێ ئیتر ئه‌مه به‌ڕیشی کێ ڕه‌وایه دۆستی نه‌ته‌وه‌یه‌کی وه‌ک و کورد بێت که هه‌م وه‌ک ئه‌و شیعه نی یه و عاره‌ب نی یه‌و بیر تاریک نی یه‌و نزیکه له عیلمانی یه‌ت و قابیلی پێشکه‌وتنه . ئه‌م خاڵانه جیاوازین بۆکه‌سێکی بیر ته‌سکی وه‌ک جه‌عفه‌ری یان مه‌زهه‌بی یه‌کی عاره‌بی شۆڤێنی . هه‌رکه‌س مافی ژیان به‌گه‌لێکی تر ڕه‌وا نه‌بینێ به‌چاوی مرۆڤ و ئازادی نیگای نه‌ته‌وه‌کان نه‌کات و نه‌یانخوێنێته‌وه وه‌ک مرۆڤ پێم وایه چاوی کوێر نی یه به‌ڵکو مێشکی دنیای تاریکستانه . ئه‌گه‌ر ئاوڕێک له‌دنیای مرۆڤ دۆستی بده‌ین ده‌بینین ئه‌مانه چه‌ند سه‌ده‌یه‌ک له‌دووای خه‌ڵکه‌وه‌ن . مرۆڤێک تازه منداڵه‌که‌ی فێری خوێن و کوشتن و شمشێر بکات ئه‌وه له‌ده‌ریای نه‌زانی مه‌له ئه‌کات و زۆر بێئاگایه له ئاین و له‌هه‌موو فیکره جیاوازه‌کان چونکه هه‌ر ئاین خۆی ئه‌ڵێ مرۆڤ خودا دروستی کردووه ئه‌گه‌ر مرد ئه‌گه‌ڕیته‌وه بۆ لای خۆی که‌واته گریانی ناوێ هه‌موو ئه‌بێ بمرین ، که‌چی ئه‌م پیاوه به‌رزه‌ی عێراق به‌هه‌موو بیرو هۆشی یه‌وه بۆ مێژوویه‌ک ئه‌گری که نزیکه‌ی 1450 ساڵ له‌مه‌وبه‌ره ، باشه ئایا که‌سێک ئاوا بیر بکاته‌وه ماف ئه‌دا به‌نه‌ته‌وه‌یه‌ک که‌باوه‌ڕی به‌و دوواکه‌وتوویی یه‌ی ئه‌و نه‌بێت و ڕه‌خنه‌ی لێبگرێت . یان ئه‌وه پیاوی ئه‌وه‌یه سه‌رکردایه‌تی نه‌ته‌وه‌یه‌کی بیست و پێنج ملیۆنی بکات به‌و بیرو ئایدیا ڕه‌شه‌وه ؟ ئایا ئه‌وه ڕای جه‌عفه‌ری و ئه‌وان نی یه که که‌رکوک به‌ماڵی کوردان ڕه‌وانابینن و دووایان خستووه بۆ ساڵی 2007 که‌چاره‌سه‌ر بکرێت . ئایا کاک مه‌سعود بیری چوو که‌له‌چاوپێکه‌وتنێکی که‌ناڵی ئه‌لعه‌ره‌بی یه ووتی ( که‌رکوک به‌هیچ شێوه‌یه‌ک گفتووگۆی له‌سه‌ر نی یه و کوردستانه ) باشه ئه‌ی مام جه‌ڵال بۆ ناوی ناوه قودس ، قودسی قوڕاوو چڵپاوو خێمه‌و ئاواره‌یی و برسێتی و بێ یاسایی و کوشتن و دزی و ڕفاندن و تۆقاندن ؟ . سودی چی یه دروشمی گه‌وره‌و زه‌ق که‌دوایی بچێته ته‌نه‌که‌ی خۆڵی له‌بیر چوونه‌وه‌وه ؟؟ . جه‌عفه‌ری با دڵنیابێت ئه‌وه‌ی پاشقول له میلله‌تی کورد ئه‌گرێ ئه‌یدۆڕینێ بابزانێ ئه‌وکاته به‌سه‌ر چوو که ئه‌و بوونی هه‌بوو وه‌ک نه‌ته‌وه‌ی عاره‌ب له‌عێراقدا هه‌موو نه‌ته‌وه‌کان و ئاینه‌کان له‌عێراق و له‌جیهان ئازادن هیچ بیر تاریکێک ناتوانێ ماف و مێژوو کلتوری نه‌ته‌وه‌یه‌ک بشارێته‌وه‌و خۆی به‌زۆر بسه‌پێنی و بێته پێشه‌وه و بڵێ ته‌نها من هه‌م ، وه‌ک مێژووی که‌مالیسته‌کانی لێ دێ که‌ئێستا چۆن دنیا پشتی تێکردون و نایانکه‌ن به‌ئه‌ندام له‌ئه‌وروپا و ڕسواو قه‌رزاری زۆربه‌ی ووڵاتانی جیهانن وه‌ک ئه‌مه‌ریکاو ئه‌ڵمانیاو . . هتد . شۆڤێنی یه‌ت و خۆپه‌ره ستی ئه‌نجامه‌که‌ی دۆڕاندن و ته‌نهایی یه باگه‌لی عێراق و کوردستان بزانن به‌درێژایی مێژووی عێراق ئه‌م جۆره ناوانه‌ی نه‌بووه و نه‌بیسراوه وه‌ک و جه‌عفه‌ری ، سیستانی ، شه‌هرستانی . . هتد . ئه‌م ناوانه به‌ڕه‌چه‌ڵه‌ک ئێرانین و مافیان به‌ناوچه‌که‌ی ئێمه‌وه نی یه باتائێره‌ش به‌س بێت هه‌تا به‌شی سێ هه‌م .
|
|
|
02/09/2015 |