|
جه‌عفه‌ری و بیر ته‌سکی ڕامیاری و خه‌یاڵی مه‌زهه‌بی . . . ! به‌شی یه‌که‌م
م . حه‌مید عه‌زیز
کورد وه‌ته‌نی مانگ سه‌ر له‌ئێواره دیاره . هاتنی جه‌عفه‌ری بۆ ده‌سه‌ڵات و پۆستی سه‌ره‌ک وه‌زیران که‌له‌ساڵی پاردا 2005 ڕویدا ببوایه به‌وانه‌یه‌ک بۆ پیاوانی ڕامیار له عێراق و کوردستان بۆ ئه‌وه‌ی جارێکی تر نه‌یانهێشتایه پیاوێکی وه‌ک جه‌عفه‌ری بهاتایه‌ته‌وه سه‌ر شانۆی کاری ڕامیاری له‌عێراق . له‌وه ئه‌چێ ئه‌و هه‌موو پیاوه ڕامیارانه‌ی عێراق ڕامیار ناس ( السیاسی ) نه‌بن ئه‌گینا ئه‌بێ بزانن له‌گه‌ڵ کێ کار ده‌که‌ن و کێ ڕۆشن فیکره‌و کێ خه‌باتی هه‌یه و کێ ئیسلامی یه‌و کێ عیلمانی یه‌و کێ ڕه‌ش بین و گه‌ش بینه به‌و پڕۆسه‌یه و له‌گه‌ڵ سیستمی ده‌سه‌ڵاتی نوێدا چی ئه‌که‌یت و له‌گه‌ل کێ کار ئه‌که‌یت ؟ . ساڵی پار 2005 ساردی یه‌ک له‌نێوان مام جه‌لال و جه‌عفه‌ری دروست بوو هۆکه‌یشی هه‌موو که‌س ئه‌یزانی که جه‌عفه‌ری ئه‌یویست ده‌سه‌ڵاتی ( صلاحیات ) سه‌ره‌ک کۆمار زۆر نه‌بێت و هه‌وڵی ئه‌دا که که‌متری بکاته‌وه . که‌واته ئاشکرایه ڕاو بۆچوونی جه‌عفه‌ری به‌رامبه‌ر به‌کورد چونکه ئه‌وه‌ی کردی به‌رامبه‌ر مام جه‌لال له‌گه‌ڵ کوردی بوو چونکه ئه‌و کوردی له‌مام جه‌لاله‌وه ئه‌بینی . که‌چی به‌هه‌مان هه‌ڵه‌دا پیاوانی ڕامیاری عێراق و کوردستان ڕایان له‌سه‌ر بوو که جارێکی تر جه‌عفه‌ری بێته‌وه سه‌ر شانۆی کارو ڕامیاری خۆی به‌هه‌مان فیکری ڕه‌شی یه‌وه ده‌ست پێ بکات . ئه‌بوایه بزانرایه ئه‌م پیاوه چه‌ند ڕه‌شبینه به‌رامبه‌ر ژیان و مرۆڤ چونکه پارساڵ قه‌راری دا که‌هه‌رچی له‌وه‌زاره‌ت کارده‌کات له‌ژنان و ئافره‌تان ئه‌بێ له‌چک بکه‌نه سه‌ریان ( من له‌گه‌ڵ ئه‌وه‌دانیم که‌ئافره‌ت له‌چک نه‌کات ، من له‌گه‌ڵ ئه‌وه‌دام که به‌زۆر نه‌بێت چونکه ئاین و بیروباوه‌ر به‌ئاره‌زومه‌ندانه بێت باشتره چونکه ئه‌وه ئاینی خودایه که‌س ناتوانێ به‌زۆر بیسه‌پێنێ به‌سه‌ر مرۆڤدا چونکه خوا خۆی مرۆڤی به‌ئازادی دروست کردووه به‌ڵام مرۆڤه‌کان خۆیان به‌قه‌راری خۆیان ، خۆیان کردووه به وه‌کیلی خودا ، مرۆڤی ژیرو تێگه‌یشتوو به‌ئازادی که‌ڵک له ژیان وه‌رده‌گرێ نه‌ک به‌زۆر چونکه ئاینه‌کان زۆرن و یه‌ک خوداشیان هه‌یه ) . به‌کورت و کرمانج ویستوو خواستی جه‌عفه‌ری ئه‌وه‌یه که هه‌مان ڕژێمی ئێران بهێنرێته عێراقه‌وه‌و خه‌ڵک له‌سایه‌ی ئه‌و سیستمه تاریکه‌دا بژی ، چونکه ئه‌وه‌ی فیکری جه‌عفه‌ریش نه‌زانێ ئه‌بێ به‌و ڕیش و پاک و ته‌میزی یه‌ی بزانێ که‌چۆن بیر ئه‌کاته‌وه . زۆر سه‌یره ئه‌بێ ئه‌و نه‌ته‌وه زوڵم لێ کراوه‌و سته‌م دیده‌یه‌ی عێراق چی بدورنه‌وه له‌سایه‌ی فیکرێکی تاریکی وه‌ک جه‌عفه‌ری که‌هه‌میشه دوواکه‌وتن و بیری تاریک ئه‌چێنێ سه‌رکرده‌کانی کورد به‌درێژایی مێژوو هه‌ڵخه‌ڵه‌تێنراون ئه‌گینا پیاو ڕامیار بێت و کاری ڕامیاری بکات ئه‌بێ بزانێ یه‌کێکی وه‌ک جه‌عفه‌ری چۆن بیر ئه‌کاته‌وه ئه‌گینا که‌به‌یه‌کێک ئه‌ڵێن ڕامیار زان ته‌نها هه‌رئه‌وه‌یه درۆی باش بزانێ ؟ بێگومان نه‌خێر . که‌واته به‌ڵگه‌ی ناوێ بۆ جه‌عفه‌ری که چی یه‌و چۆن بیر ئه‌کاته‌وه ، بائیتر به‌س بێت بێئاگایی و تۆزێک به‌خۆماندا بچینه‌وه و نه‌هێڵین خوێنی هه‌زاران شه‌هید به‌فیڕۆ بڕوات و ئه‌م پڕۆسه‌یه له‌بار ببرێت . چوونی جه‌عفه‌ری بۆ تورکیا وه‌ک ئه‌وه‌یه بچێ بۆلای دووژمنی کورد و پیلان له‌دژی بگێڕێ و په‌یوه‌ندی باشیشی له‌گه‌ڵ ئێراندا هه‌یه‌و ئه‌وه‌ش هه‌ر پیلانه‌و باتائێره به‌س بێت .
|
|
|
02/09/2015 |