|
له سه‌نگه‌ری شاخه‌وه بۆ سه‌نگه ری عێراق !! |
|
هوشیار عوسمان دوای جه‌نگی جیهانی یه‌که‌م، له‌لایه‌ن ووڵاته زلهێزه‌کانی ئه‌و کاته،باشووری کوردستان به زۆره ملێ له له ده‌وڵه‌تی عێراقی ئه‌مڕۆ ماره کرا ، هه‌ر له‌و ڕۆژه‌وه تا وه‌کو ئه‌مڕۆ ئه‌وه‌ی فه‌رمان ڕه‌واو ڕژێم وده‌سه‌ڵاتداری ئه‌م ووڵاته بووه، بێجگه له ئاگرو ئاسن و توندو تیژی ، وێرانکاری و هه‌ژاری و به‌دبه‌ختی ، زیندانی کردن و له سێداره دان وکوشتنی به کۆمه‌ڵ،ئه‌نفال و کیمیاباران ،به‌رهه‌مێکی دیکه‌و ده‌سکه‌وتێکی مرۆڤانه‌یان بۆ ئێمه نه‌بووه. له‌و کاتانه‌ی هه‌ستیان به بێ هێزی ولاوازی کردووه و گڵۆڵه‌یان که‌وتۆته لێژی،په‌یوه‌ندیان به بزووتنه‌وه‌ی شۆڕشگێری کورده‌وه کردوه‌و له ڕێگه‌ی دانوستاندن و گفتووگۆ ،ماوه‌یه‌ک ئاگر به‌ستیان ڕاگه‌یاندووه، تا خۆیان باشتر پڕ چه‌ک بکه‌ن و دوا تریش له هه‌موو به‌ڵێن و گفت و په‌یمانێک پاشگه‌ز بوونه‌ته‌وه وله جاران خراپتر شاڵاوی دڕندانه‌یان ده‌ست پێکردوه‌ته‌وه. جێی داخه نه له ڕابوردوودا وه نه له ئێستادا، له‌و ئه‌زموونه تاڵانه په‌ندو ده‌رسمان وه‌رنه‌گرتوه‌و هه‌موو جاره‌کان به خۆمان و ده‌وروبه‌ر ئه‌ڵێین ئه‌م جاره‌یان جیاوازه !! که‌چی له هه‌موویاندا کوردو کوردستان توشی نسکۆو گلاندن هاتووه . !! با زۆر نه‌گه‌ڕێینه‌وه بۆ دواوه، به‌ڵکو ڕووداوه‌کانی دوای ڕماندنی ڕژێمی دیکتاتۆری سه‌دام به خێرایی بخه‌ینه به‌ر چاو. بزانین ره‌فتار و گوفتاری هێزی ئۆپزسیۆن و ئه‌وانه‌ی دوێنێ له گه‌ڵ کورددا هاوسه‌نگه‌ر بوون و له کوردستانه‌وه چاویان له به‌عس بز ئه‌کرده‌وه ، ئه‌مڕۆ دوای نه‌مانی سه‌دام به ناوی نوێنه‌ری ڕاسته‌قینه‌ی خه‌ڵکی عێراق ، له ئه‌نجومه‌نی حوکم وهه‌ر دوو حکومه‌ته‌که‌ی عه‌للاوی وجافری دا، له نووسینی ده‌ستوورو کێشه‌ی که‌رکوک و ناوچه ته‌عریب کراوه‌کان و ئاوه‌دانی شارو شارۆچکه‌کانی کوردستان به گشتی، چه‌نده که‌وتنه گێره شێوێنی و خۆ سوورکردنه‌وه لێمان !! ئه‌مڕۆیش که سه‌ر قاڵی دامه‌زراندنی کابینه‌ی ده‌وڵه‌تی چوار ساڵه‌ن ، تا بۆیان بکرێت مافی کورد و به‌شداری کردنی که‌م و بێ بایه‌خ ئه‌که‌ن .! که‌چی پێشمه‌رگه‌یه‌کی دوێنی شاخ و ئه‌ندامێکی سه‌رکردایه‌تی ئه‌مڕۆی کورد له چاوپێکه‌وتنی رۆژنامه‌ی( الاتحاد)ی ئیمارات ژماره 11176 ڕۆژی 09/02/2006 ده‌لێت: ئێمه به‌رژه‌وه‌ندی گه‌لی عێراق له سه‌رووی به‌رژه‌وه‌ندی کورده‌وه دائه‌نێین . * به ڕاستی تێڕوانینی سیاسیانه‌ی به‌م شێوه له زاری لێپرسراوێکی کورده‌وه جێگای پرسیارو سه‌رسوڕمانه .؟! ئه‌مڕۆ جافریه‌کان وسوونییه سه‌له‌فیه‌کان و عه‌ره‌به شۆڤینه‌کان خۆیان به نوێنه‌ری ڕاسته‌قینه‌ی خه‌ڵکی عێراق ده‌زانن، وه ئه‌مانه‌ش به‌رامبه‌ر به کوردو مافه‌کانی، هه‌ر سه‌ددامه‌که‌ی عێراقن و خۆیان بۆیه کردووه ! ئیتر که‌ی ڕه‌وایه و له سه‌رچ بنه‌مایه‌ک لێپرسراوێکی کورد که دوێنێ بۆ به‌رژه‌وه‌ندی کورد چه‌کی پێشمه‌رگه‌ی له شان کردووه ئه‌مڕۆ خۆی بکاته پاسه‌وانی عێراق.؟! ----------------------------------------- بۆ خوێندنه‌وه‌ی سه‌رچاوه‌ی ئه‌و نووسینه کلیکی ئێره بکه
|
|
|
02/09/2015 |