کۆچی خه‌ون

 

ئه‌م بارانه‌ شێته‌ڵۆکه‌

دێت وژان تێکه‌ڵ

به‌ نوێن و

به‌ خه‌ون و

به‌ ئاواته‌که‌نمان ئه‌کات

 

ئه‌م کڕێوه‌ بێ ره‌حمه‌

باوه‌شی پڕ له‌ زوقم

به‌ دره‌خت و

به‌ منداڵ و

به‌ په‌پوله‌کاندا ئه‌کات

 

ئه‌م گه‌رده‌لوله‌ بێ سۆزه‌

ته‌پ و تۆزی رق

به‌ سه‌ر گوڵ و

په‌نجه‌ره‌و

هۆشمانه‌وه‌ جێدێلێ

 

ئیتر ئێمه‌ دوای ئه‌م

باران و

کڕێوه‌ و

گه‌رده‌لووله‌

 

چیدی ناتوانین

خه‌ون به‌ ساته‌ جوانه‌کانی

منداڵیه‌وه‌

ببینین

 

چیدی ناتوانین

له‌ ژوانێک

گوڵیکی ئاڵ

له‌ یه‌خه‌ی دلداریک

بده‌ین

چێدی ناتوانین

چیدی نا

چیدی

چید

چی

چ

 

                                        ژیار جاف     01-03-2006

zhyar@walla.com

 

           

 

02/09/2015