|
نوره‌دین وه‌یسی بابه‌تێکی بڵاوکردۆته‌وه به‌ناونیشانی "شارۆن
و کۆمۆنیستی کرێکاری" که تیایدا زوخاوی خۆی به‌رامبه‌ر به
حیزبی کۆمۆنیستی کرێکاری هه‌ڵڕشتووه. به تایبه‌ت سه‌نگی
وه‌ڵامه‌که‌ی (سامان کریم) بۆ هه‌فته‌نامه‌ی چاودێر سه‌باره‌ت
به مه‌سه‌له‌ی که‌رکوک به ڕاده‌یه‌ک به ڕوخساری شپرزی
بابه‌ته‌که‌یه‌وه ده‌بینرێت، له جیاتی ئه‌وه‌ی که‌مێک
به‌زه‌یی به خۆیدابێته‌وه‌و زیاتر ڕۆنه‌چێته‌‌ناو زه‌لکاوی
وه‌همی نه‌ته‌وه‌چێتی، سوود له وه‌ڵامه‌که‌ی سامان کریم
ببینێت و ده‌ماره‌کانی ئاسووده‌بکات، ده‌مارگیرتربووه‌و
کۆنترۆڵی خۆی له ده‌ستداوه. که ده‌ڵێم زوخاوی هه‌ڵڕشتووه‌و
کۆنترۆڵی له‌ده‌ستداوه، مه‌به‌ستم ئه‌وه‌یه ئه‌م ئینسانه
به‌ر له‌وه‌ی ڕه‌خنه‌ی گرتبێت، هه‌ر ڕه‌خنه‌یه‌ک، وه‌ڵامی به
شتێک دابێته‌وه، هه‌ر شتێک، یا تیشکی خستبێته‌سه‌ر
ناڕۆشنییه‌ک، هه‌ر تیشکێک، شه‌رحی حاڵی خۆی ده‌کات له‌ناو
لیتاودا! ئیدیعای ناو لیتاویش له وه‌همێکی شێتانه به‌ولاوه‌تر
نییه. شه‌رحی حاڵێک که جێگای به‌زه‌ییه! له هه‌مان کاتدا
هه‌رچی کینه‌ی دڵی خۆیه‌تی له به‌رامبه‌ر کۆمۆنیزم
وئینساندۆستی و نه‌وعدۆستیدا به‌بایده‌کات! ئینسانێک که نوقمی
زه‌لکاوی ئایدۆلۆژیاو بیرکردنه‌وه‌ی نه‌ته‌وه‌په‌رستانه‌بێ و
ئه‌فسوس ده‌مارگیری میللی به‌جۆرێک به‌رچاوی تاریککردووه،
زه‌حمه‌ته له‌م دنیا ڕووناکه‌دا تروسکاییه‌ک ببینێت. که‌چی
بیه‌وێت به فڕێدانی قسه‌ی بێبناغه‌و هه‌ڵبه‌ستنی تۆمه‌ت و
درۆی شاخدار بۆ حیزبی کۆمۆنیستی کرێکاری عیراق، پاساو بۆ
وه‌زعی خۆی و زه‌لکاوێکیش بێنێته‌وه که به‌ره‌نجامی سیاسه‌ت
و کارکرد وه گه‌وهه‌ری تا ئێستای بزووتنه‌وه‌ی کوردایه‌تیه‌و
به‌دوای نه‌مانی ڕژێمی فاشیستی به‌عسدا، سێ ساڵه ناسیونالیزمی
کورد و حیزبه‌کانی سه‌رقاڵی چنینی نه‌خشه‌ی نانه‌وه‌ی
ڕقه‌به‌رایه‌تیی قه‌ومین له ناوچه‌ی که‌رکوکدا، هه‌تا
سه‌رتاپای جه‌سته‌ی شاری که‌رکوکیش له‌م لیتاوه هه‌ڵكێشن و
ئاگری شه‌ڕی نه‌ته‌وه‌کانی تیادا خۆشبکه‌ن، که‌چی به‌رامبه‌ر
هه‌ڵوێست و ڕێگاچاره‌ی عادلانه‌ی حیزبی ئێمه هه‌رچی به‌ها و
ویژدانه بیخاته‌لاوه، بێجگه له به‌زه‌ییپێداهاتنه‌وه‌ی
شایانی چی شتێکی دیکه‌یه! سیاسه‌تی حیزبی ئێمه ده‌رباره‌ی
مه‌سه‌له‌ی کوردستان وچاره‌نووسه‌که‌ی و کێشه‌ی
دانیشتوانه‌که‌ی به‌گشتی و سه‌باره‌ت به مه‌سه‌له‌ی شاری
که‌رکوک به‌تایبه‌تی ڕوون وڕه‌وان و ڕاگه‌یه‌نراوه‌و ته‌حلیل و
ته‌فسیر هه‌ڵناگرێت. هه‌رکه‌سێک دیدگا و ویژدانی ئینسانی خۆی
له‌ده‌ستنه‌دابێ ئاکامگیری وه‌کو وه‌یسی لێناکات! داواده‌که‌م
هه‌رکه‌س به هه‌ق به‌شوێن ڕێگاچاره‌یه‌کی عه‌مه‌لی و
کارسازه‌وه‌یه بۆ کێشه‌ی شاری که‌رکوک و ده‌وروبه‌ری، وه
ده‌یه‌وێت سیاسه‌ت و هه‌ڵوێستی حیزبی ئێمه‌ش بزانێت،
بگه‌ڕێته‌وه بۆ هه‌ڵوێست و ڕاگه‌یاندنه‌کانی حیزبمان
له‌مباره‌وه. به‌تایبه‌تیش وه‌ڵامه‌که‌ی سامان کریم بۆ
هه‌فته‌نامه‌ی چاودێر.
سه‌یری
ئه‌م لینکه بکه‌ن:
http://www.bopeshawa.com/pdf2006/darkrdniarabahawrdakan.pdf.
وه‌یسی ده‌ڵێ، کۆمۆنیستی کرێکاری هێشتا کوردستان به به‌شێک
له عێراق ده‌زانن سه‌ره‌ڕای ئه‌وه‌ی ته‌رحی ڕیفراندۆم هی
ئه‌وانه! به جیا له‌وه‌ی که ته‌رحی ئه‌م باسه به‌م
شیوه‌یه چه‌نده نازانستییه و ناوبراو کام مه‌به‌ستی
تایبه‌تیی لێی هه‌یه، کاڵفامییه ئه‌گه‌ر که‌سێک
وابیربکاته‌وه که به ته‌نها ناوبردنی کوردستان
وه‌کو"کوردستانی باشوور!" یا هه‌ر شتێکی تر، به واتای ته‌رحی
ڕێگاچاره‌ی عادلانه‌یه بۆ چاره‌سه‌ری کێشه‌ی کوردستان!
کوردستانی "باشور و باکور" شیعاری بزوتنه‌وه‌یه‌کی نه‌زۆکی
قه‌ومپه‌رستانه‌ی پانکوردییه که (په‌که‌که) داهێنه‌ری بوو.
ئه‌م بزووتنه‌وه‌یه ناکامی خۆی ته‌جره‌به‌کرد و نوره‌دین
وه‌یسی تازه‌به‌تازه دڵی پێی خۆشکردووه. لووتکه‌ی
ناسیونالیزمی کورد که ئه‌مڕۆ یه‌کێتی و پارتی نوێنه‌رایه‌تی
ده‌که‌ن، خۆیان له ئه‌ندازیارانی گێڕانه‌وه‌ی کوردستانن بۆ
ژێرچه‌پۆکی شۆڤێنیزمی ئیسلامی-عه‌ره‌بی. داهێنه‌رانی ته‌رحی
فیدراڵی بۆ کوردستان و بڕیاری 58 گوایا بۆ چاره‌سه‌ری که‌رکوک،
که که‌سانی وه‌کو ناوبراو ته‌پڵی بۆ ده‌ژه‌نن، ته‌رحێکه بۆ
شه‌ریکبوون له ده‌سه‌ڵاتی مه‌رکه‌زدا و به کرده‌وه
کوردستانیش له‌به‌رده‌م هه‌ڕه‌شه‌ی دووباره‌بوونه‌وه‌ی
کاره‌ساته‌کانی ڕابردووی خه‌ڵکی کوردستاندا ڕاده‌گرێت، بڕیاری
58یش ته‌رحێکی کۆنه‌په‌رستانه‌ی قه‌ومییه بۆ له
خوێنهه‌ڵکێشانی شاری که‌رکوک و خه‌ڵکه‌که‌ی به‌مه‌به‌ستی
به‌کارهێنانی وه‌کو وه‌ره‌قه‌یه‌ک به ده‌ستی حیزبه‌کانی
بزووتنه‌وه‌ی کوردایه‌تییه‌وه له ململانێیاندا له‌گه‌ڵ
هاوپه‌یمانه‌کانی ئه‌مڕۆی بنیاتنانه‌وه‌ی عێراقی
عه‌روبی-ئیسلامیاندا.
ئاڵایه‌کیش که به ئاڵای کوردستان ناوی ده‌برێت، ڕه‌مزی
ناسیونالیزمی کورده بۆ ته‌وقکردنی زه‌ین و هۆشی خه‌ڵکی
کوردستان له چوارچێوه‌ی ته‌سکی نه‌ته‌وه‌په‌رستیدا! به‌م
مانایه درووست وایه ئێمه به ڕه‌مزێکی کۆنه‌په‌ستانه‌شی
داده‌نێین. به پێی کام به‌ڵگه و مه‌دره‌ک خه‌ڵکی کوردستان
ئه‌و ڕه‌مزه ناسیونالیستییه به ئاڵای خۆیان ده‌زانن!؟
به‌هه‌ق ئه‌گه‌ریش به ئاڵاو ڕه‌مزی خۆیانی بزانن کاره‌ساته!
سه‌رانی ئه‌حزابی کوردی هێشتا جگه له ئیداره‌یه‌کی میلیشیایی
و خێڵه‌کی گه‌نده‌ڵ له کوردستان که بۆته جێگای گاڵته‌جاڕ و
نه‌فره‌تی قووڵی جه‌ماوه‌ری، هیچیان بۆ کوردستان
ئه‌نجامنه‌داوه، 15ساڵه له‌ژێر سێبه‌ری هه‌ر ئه‌و ئاڵایه‌ی
وا به‌ڕێزتان باسی ده‌که‌ن، 5ساڵ جه‌نگی ناوخۆیان به‌رپاکردو
هه‌زاران که‌س کوژران و ده‌یان هه‌زاری دیکه‌ش ئاواره بوون
وه 15ساڵه ئه‌م کۆمه‌ڵگایه‌یان له سه‌رگه‌ردانی و
چاوه‌ڕوانیدا ڕاگرتووه! له‌ژێر سایه‌ی ئه‌و ئاڵایه‌دا
هه‌زاران ژن
به به‌هانه‌ی نامووسییه‌وه قه‌سابیکران و مناڵان تیایدا
له‌ڕیزی مه‌ڕوماڵاتدا دانراون، لاوان ڕوویانکردۆته خۆکوژی و
ماده بێهۆشکه‌ره‌کان!
به‌ڵێ، به‌لای ئێمه‌وه سیاسه‌تی "ته‌کرید" که ناوه‌رۆکی
بڕیاری (58)ه، به هه‌مان ڕاده‌ی سیاسه‌تی ته‌عریب شۆڤێنیستی
و کۆنه‌په‌رستانه‌یه! هه‌روه‌ک چۆن پێمانوایه ته‌نها
چاره‌سه‌ری واقعی و عه‌مه‌لی بۆ کوردستان، جیابوونه‌وه و
پێکهێنانی ده‌وڵه‌تی سه‌ربه‌خۆیه، که‌رکوکیش له‌و
چوارچێوه‌یه‌دا به ڕیفراندۆمێک یه‌کلاده‌کرێته‌وه نه‌ک
گرتنه‌به‌ری سیاسه‌تی ته‌عریب وته‌کرید، به‌ڵێ، هه‌رواش
پێمانوایه پێکهێنانی ده‌وڵه‌تێکی سه‌ربه‌خۆی فه‌له‌ستینی
خاوه‌ن ئیعتباری سیاسی ونێوده‌وڵه‌تی به هه‌مان ڕاده‌ی
ده‌وڵه‌تی ئیسرائیل، ته‌نها چاره‌سه‌ری کێشه‌ی خه‌ڵکی
فه‌له‌ستینه، نه‌ک درووستکردنی مسته‌وته‌نات یا ده‌رکردنی
ئیسرائیلییه‌کان! ناسنامه‌ی کوردبون، عه‌ره‌ببوون،
شیعه‌وسوننه‌بوون وجوله‌که‌بوون خورافی ودرۆیینه‌ن.
ده‌سته‌به‌ندیکردنی ئینسان پێیان زه‌وتکردنی ناسنامه‌ی
ئینسانییه، له هه‌مان کاتدا تاوانێکی گه‌وره‌یه! چڕینی
ئینسان به‌م ناسنامه درۆزنانه‌یه خۆی له خۆیدا عه‌قڵییه‌ت
وئایدۆلۆژیایه‌کی ڕه‌جاڵه!
سه‌باره‌ت به ئیدیعای "مرۆڤدۆستربوونی شارۆن" گوایا له چاو
حیزبی کۆمۆنیستی کریکاری عێراقدا، که له‌لایه‌ن نوره‌دین
وه‌یسییه‌وه داهێنراوه، ئه‌بێت بڵێم؛ نه‌بوونی تروسکایی
مرۆڤدۆستی لای وه‌یسی و له‌ده‌ستدانی کۆنترۆڵی فکریی به‌هۆی
گرژبوونی ده‌ماری نه‌ته‌وه‌په‌رستانه‌یه‌وه،وایکردووه که
له‌ناو لیتاوێکدا که تێیکه‌وتووه وله‌گۆشه‌نیگای توونێلی
داڕووخاوی قه‌ومپه‌رستانه‌ی کوردییه‌‌وه بێجگه له
گوستنه‌وه‌ی ته‌جروبه‌ی سیاسه‌تی پاکسازی قه‌ومی وجینۆساید
وته‌رحیلی ئیجباری خه‌ڵکی فه‌له‌ستین له‌لایه‌ن ده‌وڵه‌تی
فاشیستی ئیسرائیله‌وه بۆ وه‌ڵامدانه‌وه به مه‌سه‌له‌ی شاری
که‌رکوک، هیچی دیکه‌ی بۆ نه‌ماوه‌ته‌وه! ده‌نا کێ هه‌یه
جورئه‌تی ئیدیعایه‌کی له‌م چه‌شنه بکات، که شارۆنی جه‌للادی
قه‌سابخانه‌کانی سه‌برا و شاتێللا به هه‌ر مانایه‌ک بهێنرێته
ناو باسی مرۆڤدۆستبوون ونه‌بوونه‌وه!
29-5-2006
|