چاوه‌کانم بۆ شاعیرێک با‌شیعری له‌دیار بهۆنێته‌وه‌

گه‌لاوێژ هیوا ... دانیمارک

چه‌ند ووشه‌یه‌کی ده‌روونم بۆ چاوه‌کانی شاعیر

چاوت چرای ماڵه‌ هه‌ژارێکی

بنار بوو ؟

وا زوو به‌ شنه‌ی شاماڵێک کوژایه‌وه‌

چاوت به‌فری

لووتکه‌ی چیای به‌ره‌و خۆر بوو ؟

وا زوو به‌ تیشکی زه‌رده‌ په‌ڕ

توایه‌وه‌

چ هه‌ورێکی شووم و تاره‌

چاوه‌کانی لێخن کردووی ؟

چ قه‌وزه‌یه‌کی به‌ دفه‌ڕه‌

کانی چاوی داگیر کردووی ؟

خۆ تۆ چاوت

ئه‌ستێره‌ی ئاسمانی گه‌ش بوو

هه‌موو ڕۆژێ ده‌ڕژایه‌ ناو

ده‌ریای جوانی و عه‌شق و ئه‌ڤین

خۆ تۆ چاوت

ووشه‌ نه‌ما  نه‌یدۆزته‌وه‌

له‌ ده‌ریای قووڵی فه‌رهه‌نگداو

نه‌یکا به‌ شیعرێکی هه‌نگوین ...

پاش چاوی

چ له‌ چاوی گڕ تێ به‌ربووی دڵم بکه‌م ..

فه‌رموو چاوم

شیعری له‌ دیار بهۆنه‌وه‌

فه‌رموو گیانم

بیسوتێنه‌وه‌ ... و

دیوانێکی تازه‌ی له‌ دیار بخوێنه‌وه‌ ...