|
ئه‌و
شاره‌ی که یه‌کێتی سه‌د له سه‌دی ده‌نگه‌کانی تێدا به‌ده‌ست
هێنا له‌کاتی ده‌نگداندا به‌تایبه‌ت ساڵی 1992 شاره قاره‌مان
و ئازاکه‌ی که‌لار بوو . به‌ڵام ... ئه‌و به‌ڵامه زۆر
به‌ڵامێکی گرنگه له‌ناوه‌ڕاستی ووتاره‌که‌دا وه‌ڵامی ئه‌و
به‌ڵامه ئه‌ده‌مه‌وه . هه‌ر له‌به‌ر ئه‌و ئازایه‌تی و
پیاوه‌تی یه ی خه‌ڵکه‌که‌یه‌تی که ناڵێم شارۆچکه‌ی که‌لار
چونکه به‌ڕاستی که‌لارو خه‌ڵکه‌که‌ی نه‌ک شارێکی هاکه‌زایش
به‌ڵکو له‌دیدی منه‌وه ئه‌بێت پارێزگایه‌کی سه‌ربه‌خۆی
فیدڕاڵی ناو بێت ئه‌گه‌ر پێی ڕه‌واببینرێت . که‌لارو
ڕۆڵه‌کانی ئیسپاتیان کرد که خه‌ڵکی ئازادی خوازن و زوڵم و
گه‌نده‌ڵی نابێته گووڵی سه‌ر مێزی خیانه‌تیان . چونکه مرۆڤی
گه‌رمیانی و به‌تایبه‌ت سومبولی هه‌ناسه‌ی سه‌ربه‌ستی که شاری
که‌لاره فێری سه‌رشۆڕی نه‌بوون . ئه‌م شاره قاره‌مانه‌ی
تینووی هه‌نگاوه‌کانی ژیان و سه‌ربه‌ستی یه هه‌رده‌م
سه‌ربه‌رز بووه‌و به‌خوێنی ڕۆڵه‌کانی و فیداکاری یه‌کانی
خه‌ڵکه‌که‌ی له‌شۆڕشی ئه‌یلول و گوڵانداو به‌تایبه‌ت له‌شۆڕشی
نوێی گه‌له‌که‌ماندا به‌ڕابه‌رایه‌تی کۆمه‌ڵه‌و چه‌ند
ڕابه‌رێکی شۆڕشگێڕو ڕۆشنبیرو خاوه‌ن بڕوانامه‌و پێنوسی وه‌ک :
کاک ئارام ، خاڵه شه‌هاب (شیهاب) ، شێخ جه‌عفه‌ر و .. هتد .
بۆیه هه‌میشه ئه‌م شاره سه‌رتۆپکی شۆڕشه‌کان و ده‌نگه‌کان و
خۆپیشاندانه‌کان بووه ، چونکه هه‌ر له‌دایک بوونی یه‌وه
به‌ئازادی مێژوویه‌کی که‌ڵی مه‌ردایه‌تی لێدروست بووه ،
هه‌ربۆیه له‌هیچ کات و شوێنێکدا خه‌ڵکه‌که‌ی زوڵم و سته‌میان
قبوڵ نه‌بووه و هه‌تا زوڵم هه‌بووبێ لاوان و پیری ئه‌م
ده‌ڤه‌ره پێشمه‌رگه‌بوون و هه‌تا گه‌نده‌ڵی و چه‌واشه‌ییش
هه‌بێ که‌لار دڕکه بۆ چاوی دوژمن و ئه‌و ده‌سه‌ڵاته
سه‌قه‌ته‌ی که‌خه‌و ته‌نها به به‌کورسی و پاره‌وه ده‌بینن و
نمونه‌ی گه‌نده‌ڵ و مشه‌خۆرن .
لێره‌دا وه‌ڵامی به‌ڵامه‌که‌م ئه‌ده‌مه‌وه و ئه‌ڵێم : به‌ڵام
ئه‌م شاره کۆیله‌ی ده‌سه‌ڵاتی کوردیش نابێت وه‌ک و بۆ
دوژمنانیش چقڵی چاو بوو به‌ڵام مخابن ڕه‌نج و تێکۆشانی ئه‌م
میلله‌ته‌یان له‌به‌رچاو نه‌گرت ، چونکه ئێستا به‌هێنده‌ی
جاران ئه‌گه‌ر زیاتر نه‌بێت که‌متر نی یه له‌نه‌هامه‌تی و
نایه‌کسانی کۆمه‌ڵایه‌تی و که‌له‌پچه‌ی ده‌مه‌کان و بێ به‌رێتی
له ساده‌ترین ماف و ژیان و .. هتد . هه‌ربۆیه هه‌موو ڕۆژێ
ڕۆڵه قاره‌مان و چاونه‌ترسه‌کانی ئه‌م شاره خۆپیشاندان و
مانگرتن و به‌هه‌موو جۆرێک شۆڕشی مه‌ده‌نی و مۆدێرنی یه‌ت
ده‌که‌نه ئاڵایه‌کی شه‌کاوه‌و له‌سه‌ر سه‌ریان داده‌نێن .
هه‌ر بۆیه سه‌ربڵندو له‌سبه‌ینێی مێژودا ئه‌وان سه‌رتۆپک و
ناودارو سومبول ده‌بن له‌لاپه‌ڕه جوانه‌کانی چیرۆکی شۆڕشدا
له کتێبخانه‌ی کورده‌واری و هونه‌رو به‌رخۆداندا .
ئه‌وه‌ی که‌گرنگه‌و بابه‌ت و وتاره‌‌که‌یشی پێوه به‌نده
ئه‌وه‌یه که ( بۆچی یه‌کێتی له‌م شاره له‌سه‌داسه‌د ده‌نگی
هێنابێ له‌هه‌ڵبژاردندا ... ؟ به‌ڵام ئێستا هه‌موو ڕۆژێ ده‌نگی
ناڕه‌زایی و برسێتی و نایه‌کسانی و زوڵم ئه‌گاته ئاسمان .
ئه‌مه پرسیارێکی زۆر ساده‌و سانایه و ئه‌گه‌ر ده‌سه‌ڵاتێ خۆی
به میرو ئاغای ناوچه‌که بزانێ ئه‌بێ ئه‌م پرسیاره‌ی له‌خۆی
کردبێ .. ! . به‌داخه‌وه پێویسته پارته‌کان بزانن پێداویستی
خه‌ڵکی چی یه و چۆن ده‌ڕوات به‌ڕێوه بۆئه‌وه‌ی کاره‌کانیان
بۆ جێبه‌جێ بکرێ و خه‌ڵکی له‌خۆیان ڕازی که‌ن به‌ڵام
به‌داخه‌وه ئێستا لێپرسراوان و ده‌سه‌ڵاتی کوردی له‌ناوچه‌که
به‌هیچ شێوه‌یه‌ک بیری خه‌ڵکیان نی یه و نایان په‌رژێته سه‌ر
خه‌ڵکی به‌ڵام که‌ئیشیان به‌خه‌ڵک هه‌بوو ئینجا ده‌ست ده‌که‌ن
به‌مه‌رایی و پڕوپاگه‌نده و درۆکردن . زۆر ئاسانه هه‌رحیزبێک
یان هه‌ر میری یه‌ک بیه‌وێ چاکسازی بکات ، به‌ڵام له‌لای ئێمه
به‌ته‌مای چاکسازی نه‌بین چونکه ... ! وه‌ڵامی ئه‌و
چونکه‌یه‌ش له‌دوو سێ دێڕی تردا ئه‌نوسم . ووڵاتانی دنیا
له‌وه‌دا نه‌ماون خه‌ریکی خزمه‌تگوزاری و یارمه‌تی بن چونکه
هه‌موو شتێک ڕێکخراوه و دڵنیا بووه ژیانی خۆیان و میلله‌تیان
وه‌ک و سه‌عات ئه‌ڕوات به‌ڕێوه و ئه‌وه‌ی هاوڵاتی یه و
ئه‌وه‌یشی په‌ناهه‌نده‌یه ماف و ژیانی هه‌یه‌و وه‌ک ماڵ و
پاره‌ی مانگانه که‌بێکاریش بیت وه‌هه‌روه‌ها نه‌خۆشخانه‌ش
به‌خۆڕایی یه که ئه‌گه‌ر مرۆڤ بێکار بێت ، بێجگه له‌وه‌ی
له‌هیچ مافێک بێبه‌ش نین و بیر له‌وه ده‌که‌نه‌وه که
زه‌مینێکی ترو شوێنێکی تر هه‌بێت بیدۆزنه‌وه بۆ حه‌سانه‌وه‌ی
میلله‌ته‌که‌یان . بالێره‌دا وه‌ڵامی ئه‌و چونکه‌یه
بده‌مه‌وه که‌له سێ دێڕی پێشودا باسمان کرد ... بۆ وه‌ڵامی
چونکه‌که ئه‌ڵێم : ( له‌به‌رئه‌وه‌ی دوو پارته‌که‌ی کوردستان
هه‌ر خه‌ریکی شه‌ڕی ناوخۆبوون . به‌ڵام ئه‌م شه‌ڕه‌یان به
چه‌کێکه له تفه‌نگ و شمشێر ترسناکتره ، ئه‌ویش شه‌ڕی
سه‌نگه‌ر گواستنه‌وه‌یه .. بۆنمونه یه‌کێتی چاکسازی و
لێپرسینه‌وه بکات له‌گه‌ڵ لێپرسراوێکیدا ، له‌به‌رئه‌وه‌ی
تاوانبارو پاشه‌ڵ پیسه بۆ سبه‌ینێ کابرای لێپرسراو له‌ناو
پارتی تۆز ده‌کات وه هه‌روه‌ها پارتیش ئه‌گه‌ر له
لێپرسراوێکی گه‌نده‌ڵی بپرسێته‌وه ئه‌وه بۆ به‌یانی به‌خزم
و که‌سه‌وه له‌ناو یه‌کێتی ئاغایه‌و پله‌ی گه‌وره‌تری
ده‌درێتێ . جابه‌و شێوه‌یه ووڵات ئه‌چێ به‌ڕێوه که‌هه‌رگیز
چاکسازی نه‌بینێ به‌خۆیه‌وه .. ؟ . وه‌ک هه‌میشه ووتومه و
ئه‌یڵێم : ( بوون به‌باوک ئاسانه ، به‌ڵام باوکایه‌تی گرانه
) . ئه‌م هاوکێشه‌یه بۆئه‌م بابه‌ته پڕ به‌پێستێتی ، چونکه
بوون به‌ده‌سه‌ڵات و میری هێنده‌ی به‌ڕێوه‌بردنی گران نی یه ،
چونکه ده‌توانی به‌هێز یان سه‌روه‌ت یان کوده‌تایه‌کی
سه‌ربازی شاد بیت به‌ده‌سه‌ڵات و ببیته میری و ده‌سه‌ڵات
له‌شوێنێکدا یان له‌ناوچه‌یه‌کدا ، به‌ڵام به‌ڕێوه بردنی
ناوچه‌که به‌شێوه‌ی سه‌رده‌م و یه‌کسانی ، ئه‌وه سه‌نگی
مه‌حه‌کی باشی یان خراپی ده‌سه‌ڵاته نه‌ک هاتنه سه‌ر
حوکمه‌که‌ی چونکه پرۆلیتاری دیکتاتۆرمان هه‌یه وه‌ک و
ئه‌مانه‌ی له‌مه‌ڕ ئێمه که‌خۆیان برسی و ڕوت وقوت بوون و
ژیانیان له‌سه‌ر لادێکان بوو به‌خۆیان ده‌گووت پرۆلیتار به‌ڵام
ئه‌مڕۆ بوون به‌پڕۆلیتاری دیکتاتۆر . زۆر جاریش ده‌نگی
ده‌هۆڵه‌که‌ی ده‌سه‌ڵات له‌دوره‌وه خۆشه بۆ نمونه : چۆن
ئه‌و عه‌ره‌بانه‌ی فه‌له‌ستین و ئوردن و یه‌مه‌ن و سۆماڵی
یه‌کان ... هتد . به‌ده‌نگی ده‌هۆڵه‌که‌ی سه‌دام شاد بووبون
چونکه سه‌دام هه‌میشه ئه‌یووت : من خه‌بات ده‌که‌م بۆ ئێوه‌ی
عاره‌ب که‌ڕزگارتان که‌م له‌چنگی ئیستیعمار ، کوردیش
واتێگه‌یشتبوو که‌هه‌موو به‌رهه‌ڵستکاران و پارته کوردی
یه‌کان شۆڕشگێڕن و ده‌بن به‌مامۆستای دیموکراتی بۆ ئه‌وگه‌له
سته‌م دیده‌یه . ئه‌بێ یه‌کێتیش بیر له‌وه‌بکاته‌وه که بۆ
ئه‌مڕۆ به‌ره‌و نه‌مان و له‌ت بوون ده‌ڕوات و خه‌ڵکی متمانه‌ی
له‌ده‌ست داوه‌و کار به‌ره‌و خراپی ده‌روات ، چونکه بۆ تاکو
دوێنێ شارێکی زه‌حمه‌تکێشی وه‌کو که‌لار له‌سه‌دا سه‌د ده‌نگ
بدات به یه‌کێتی به‌ڵام ئه‌مڕۆ له‌به‌ر نایاسایی و نایه‌کسانی
و گه‌نده‌ڵی بته‌قێته‌وه به‌ڕویدا ، ئه‌مه بۆخۆی پرسیاره‌و
پێویسته لێپرسراوانی یه‌کێتی ئه‌و پرسیاره له‌خۆیان بکه‌ن
تاکو ئه‌و میلله‌ته هه‌ژاره نه‌دۆڕێنن و خوێن و هیلاک بوونی
هه‌زاران ڕه‌نجده‌رو شه‌هید به‌فیڕۆ نه‌ده‌ن و ئه‌و میلله‌ته‌ش
ئاسوده‌بێت چونکه له‌مێژه هیلاکو نه‌حه‌ساوه‌یه .
م . حه‌مید عه‌زیز
M_Hamidaziz@hotmail.com
|