|
شێوازی فۆڕمی ده‌سته‌واژه‌یه بۆ دیقه‌تی شاعیر له چۆنیه‌تی
ڕیزبه‌ندکردنی به‌رهه‌م و قه‌باره و به‌رگ و ڕێکخستنی
بابه‌تی، ئه‌مه بۆ ڕێنمایی و ویستی شاعیر له چاپخانه،
چونکه خوێنه‌ر هه‌میشه حه‌ز ده‌کات به‌رهه‌مێکی جوان
بخوێنێته‌وه.
شۆڕشی نوێ، چینایه‌تی، یادگار و ئه‌ندێشه، خه‌و زڕان و خۆ
خواردنه‌وه، هیوا و ئاواتی گه‌ش له ڕێژگه‌ی ڕووباره شیعری
-شارباژێڕی-یه‌وه شه‌پۆل ده‌دات و ناسره‌وێ تا پیرۆزی وڵات،
داڵده‌ی بێ لانه‌کان، په‌پوله‌ی ڕۆحی شه‌هیدان، ده‌بنه
تریفه‌ی مانگه شه‌وی ئارام به په‌نجه‌ره‌ی خه‌ونه
وه‌نه‌وشه‌ییه‌کانه‌وه ده‌بینرێن.
ئاڵای سه‌ربه‌ستی له‌ناو -پۆلوو-دا هاواره بۆ کوردستان،
نه‌فره‌ته بۆ دوژمنان.
ئه‌م پۆله شیعره‌ی شاڕباژێڕی به‌ره‌نگاری و ڕقی پیرۆزه، ته‌می
ڕۆژانی ئه‌سته‌نگ و خه‌مه زبره‌کانی تێدایه.
ده‌توانم بیری شاڕباژێڕی بۆ ئه‌م هۆشیارییانه پۆلێن بکه‌م:-
١. چینایه‌تی/ شارباژێڕی کوڕه بۆرژوا نه‌بووه به‌ڵام زوو
هه‌ستی به به‌هاو ئاوات و خواستی مرۆڤ کردووه که‌ره‌سه‌کانی
خۆش گوزه‌رانی لای هه‌ندێک ئاسان و ده‌ستبه‌جێیه‌و لای هه‌ندێک
خه‌ون و هیوایه.
بۆیه ئه‌م هه‌ستی به‌و ده‌لاقه گه‌وره‌یه کردووه له
نێوانی مرۆڤه‌کاندا به پێی تیۆری مارکسیزم پرۆلیتاری له
بۆرژوا جیا کردۆته‌وه.
له‌گه‌ڵ پاچ و گاڵۆکی شوان و ده‌ستی ماندووی کرێکار و چینه
چه‌وساوه‌کانی تردا ئاشنا بووه و وه‌ک قارچک قوت بۆته‌وه،
دژی بۆرژوا و زۆردار و مرۆڤ به‌زێنه‌کان ڕاوه‌ستاوه تا مافی
هه‌موو ده‌سته‌به‌ربێ و ته‌مه‌نی مرۆڤ بێ هوده نه‌بێت.
٢. به‌رگری/ شارباژێڕی په‌یوه‌سته به خاکه‌وه و کینه‌ی
هه‌یه به‌رامبه‌ر خۆفرۆشان و ئه‌وانه‌ی ده‌ستکێشی ڕژێم بوون
بۆ وێران کردنی گونده‌کانی کوردستان، ئه‌وانه‌ی سه‌رچاوه‌ی
ئاوه‌کانیان کوێر کرده‌وه، ئه‌وانه‌ی ته‌ڕ و وشکیان سوتاند
له بۆته‌ی تیۆری فاشیزمی و به‌عسیزمدا. که ڕه‌گه‌زی هیتله‌ر
و مۆسولینی و چاوچیسکۆ و بینوشیته، له‌و تیۆرییه مه‌لعونه‌وه
که هه‌موو شت له پێناوی ده‌سه‌ڵاتدایه و شه‌رم و حه‌یا
ده‌پێچرێته‌وه و زه‌بر و زه‌نگ ده‌سته‌ویه‌خه‌یه، ئه‌ویش
میکافیلیه‌ته. شارباژێڕی ده‌بێته -ئارنست تشی جیڤارا- و به
قه‌ڵه‌مه‌که‌ی به‌ره‌نگاری ئه‌و ملهوڕانه ده‌بێته‌وه،
ده‌بێته -نیون ڤان ترۆی- جه‌نگاوه‌ری ڤێتنامی و ده‌بێته
پێشمه‌رگه و له چیاکانی کوردستان قه‌ڵه‌مه‌که‌ی ده‌کاته ڕم
بۆ سه‌رسنگی دوژمنان. شارباژێڕی ده‌بێته ڕه‌مزی به‌رگری
له‌ناو –پۆلوو-دا و خۆی له ڕاپه‌ڕیندا ده‌بینێته‌وه.
٣. خۆشه‌ویستی/ شارباژێڕی له خیزانه‌که‌ی خۆیه‌وه خۆشه‌ویستی
ده‌کاته ڕه‌مزێکی باران ئاسا و ده‌بێته په‌ڵه هه‌ورێکی سپی
له هه‌موو کوچه و کۆڵانه بێ نه‌واکاندا بارانی خۆشه‌ویستی
ده‌بارێنێ. ئه‌وه‌تا (باران)ی کچی به ده‌سته
نه‌خشه‌داره‌که‌ی نه‌خشی نێوان کرۆکی شیعره‌کان ده‌نه‌خشێنێ و
مناڵه‌کانی تریشی ده‌کاته هۆره و حه‌یران و لای لایه‌ی
شه‌وانی درێژ و بێ په‌روا له‌ناو دنیا جوانه‌که‌ی ڕۆمانسیه‌تدا
تراژیدیا ده‌سته‌مۆ ده‌کا و وشه‌ی جوان ده‌کاته په‌پوله‌ی
نیازی گفتوگۆ به‌سه‌ر لێوی منداڵه‌وه. شارباژێڕی له پۆلوودا
جیهانی شیعری له چه‌ند که‌ره‌سه‌و تێڕوانینی جیادا
بینیوه‌ته‌وه. له نێوان -کوانووی شه‌وانی بێ ئاگر- و
–پۆلوو-دا بیست و شه‌ش به‌هاری گوڵ و ٢٦ زستانی شه‌خته و
به‌سته‌ڵه‌ک و ٢٦ ته‌نوری هاوین و ٢٦ شنه‌ی گه‌ڵا ڕێزانی
پایزدا ٢٦ هه‌زار ڕووداوی جیهانی و ناوچه‌یی و ناوخۆ ڕوویداوه
که‌چی شارباژێڕی هه‌مان بیر و باوه‌ڕ له نێوان ئازاری لێ
قه‌وماواندا ون ده‌بێ و زوڵم و زۆرداری ده‌خاته به‌ره‌ی
ئه‌هریمه‌ن و پاکی و خۆشه‌ویستی و مرۆڤایه‌تی ده‌خاته خانه‌ی
ئه‌هورا مه‌زداوه. شارباژێڕی زیره‌کانه مامه‌ڵه له‌گه‌ڵ ئه‌و
میترۆ خێرایه ده‌کات که پێ ی ده‌ڵێن ته‌کنه‌لۆژیای نوێ، له
هیچ ویستگه‌یه‌ک ناوه‌ستێ که شوێنه‌واری مرۆڤایه‌تی تیادا به
ڕۆشنی نه‌بینێ و، که زوڵم و زۆرداری به ئاسته‌نگ و له‌مپه‌ڕی
ڕێگه‌ی به‌ختیاری نه‌بینێ.
هیوادارم شارباژێڕی زیاتر بکه‌وێته نێو ئه‌ده‌بی جیهانییه‌وه
و شیعره‌کانی له سنووری کوردستان ده‌ربچێ. به‌لای منه‌وه
شیعری ئه‌فریقی و ئیسپانی و ئه‌مه‌ریکای باشوور سێ کوچکه‌ی
ئه‌ده‌بی سه‌رده‌من. گه‌ر شارباژێڕی له نیگای ئه‌وانه‌وه
شیعری کوردی به‌سه‌رکاته‌وه ئه‌وا زیاتر له ڤینۆس و
په‌یکه‌ری پۆتشلی و سه‌مفۆنیاکانی بتهۆڤن دڵه‌کان ئارام
ده‌کاته‌وه به شیعره شه‌پۆلاوییه‌کانی، هیوای سه‌رکه‌وتن بۆ
شارباژێڕی ده‌خوازم.
سلێمانی/ ١٧-٢-٢٠٠٦
|