|
ڕاگه‌یاندنی بینراوی ئێمه‌ی کورد ،مه‌به‌ستم ته‌له‌فزیۆنه
،به‌داخه‌وه له‌بری ئه‌وه‌ی وه‌کو هه‌موو راگه‌یاندراوه‌کانی
تری، ئۆمه‌تی محه‌مه‌د،و عیسا، و موسا، هه‌تا ئه‌وانه‌شی که
باوه‌ڕیان به ئاینه ئاسمانیه‌کان نیه، ئامرازێکی مه‌عریفی
بێت، و مه‌به‌ستی به‌رزکردنه‌وه‌ی ئاستی هوشیاری کۆمه‌ڵایه‌تی
و سیاسی، و ئابووری، و پاککردنه‌وه‌ی چه‌ژو زه‌وقی هونه‌ریمان
بێت ، به‌داخه‌وه کاریگه‌ریه‌کی یه‌کجار سلبیان هه‌یه، له
دواخستن وه‌یان له‌باشترین حاڵه‌تدا وه‌ستاندنی عه‌قڵی جه‌معی
کورده‌واری له دۆخه دواکه‌وتووه‌که‌یدا ،ئه‌گه‌ر وانیه بۆ؟
1 ـ ئه‌گه‌ر که‌سێک بۆ ئاڵتون بگه‌ڕێ، ته‌نها ئه‌وه‌ی
له‌سه‌ره بچێته‌‌کن ئوم که‌لسوم، یان فه‌یروز، یان هایده
،یان مه‌هه‌ستی ،وه‌یان فه‌تانه، و به هێمنی گوێ بۆ
له‌ره‌ی داوه‌کانی قوڕگیان ڕادێرێ ،ئیتر نه‌ک هه‌ر ئاڵتون
به‌ڵکو گه‌وهه‌ریشی به‌سه‌ردا ئه‌بارێ. به‌ڵام ژنه کورده‌که
که وه‌کو خۆی ئه‌ڵێ به‌ڕێکه‌وت بووه به گۆرانی بێژ، ئه‌و
به‌پێچه‌وانه‌ی ئه‌وانه‌وه ، له‌کاتێکا که باری هه‌رموویان
ئاڵتوونی ڕاست و چه‌پ له خۆی به‌ستووه، باری یه‌ک لۆریش مسی
ژه‌نگاوی له گه‌رویدا که ئه ڵێی تونی تیمساحه خه‌زن
کردووه،و غه‌سبه‌ن له‌سه‌ر شواربی بینه‌رش له‌سه‌ر تی ڤی
گرمه‌و ناڵه‌ی دێ ، باشه خۆ ئه‌ڵێن مۆسیقی نابێته مۆسیقی،
ئه‌گه‌ر گوێکانی مۆسیقی نه‌بن ،من ئه‌ڵێم یان ئه‌وه‌ی ئه‌و
قسه‌یه‌ی کردووه سه‌هووه ،یان گوێی هه‌ندێ له موزیک
ژه‌نانی کوردیش یان مسی تیایه، یان جار جاره بۆ ته‌سهیلی
ئومور خۆیان مسی تێ ئه‌که‌ن.
2 ـ ژنه کوردێکی ته‌مه‌نی 35 ی تێپه‌ڕاندووه، که‌چی له
گۆرانیه‌که‌یا که به کراسێکی سپیه‌وه به‌عه‌ربی ئه‌یچڕێ،
ئه‌ڵێ: (أنا صبية من کوردستان) واتا من کچۆڵه‌یه‌کم له
کوردستان بۆ زانین ووشه‌ی صبية له زمانی عه‌ره‌بی دا،
ئه‌کاته کچێک که ته‌مه‌نی سیانزه یان چوارده ساڵان بێت ،
دیاره ئه‌وه‌ش موجامه‌له‌و خاترو خۆتری شاعیره
ئه‌فه‌ندیه، بۆ گۆرانی بێژ ،ئه‌گینا ئه‌بوایه بیگوتایه
(انا امرأة من کوردستان)، واتا من ژنێکم له کوردستان .
3 ـ باشه ئه‌گه‌ر پێشکه‌ش که‌ره ناڕۆشنبیره مێینه‌که‌مان،
له‌به‌ر جوانیه‌که‌ی خستۆته سه‌ر ته‌له‌فیزیۆن، و خۆمان
شته‌کانی بۆ ئه‌نوسینه‌وه،و ئه‌رکی ئه‌ویش ته‌نها حونجه
کردنێتی بۆ بینه‌ران، ئه‌وه‌ش له‌به‌ر ئه‌وه‌ی له کلتوری
ئێمه‌یا، سه‌یاره‌و ماڵ و خانوو و مناڵ و ژن و هه‌تا میدیاشمان
هه‌ر بۆ مه‌نزه‌ره ئه‌وێ ، ئه‌ی باشه کیژه ناشرینه
نه‌خوێنه‌واره‌که، چۆن هاته سه‌ر ته‌له‌فیزیۆن!
4 ـ زۆر به‌دڵ ،چاویشم کردبوو به گوێ، بۆ به‌رنامه‌ی چاوی
سێهه‌م، که تایبه‌ت بوو به هونهرمهندان، و ته‌نها باس باسی
ده‌ست که‌وته‌کانی هونهرمهندان و هه‌ڵوێسته سیاسیه‌کانیان
بوو، به‌ڵام نه به‌چاک و نه به‌خراپ، باس له دووکاری
هونه‌ری نه‌کرا که شیاوی 16 ساڵ له ئازادی بێت، زۆر بۆ
وه‌ڵامی ئه‌و پرسیاره‌م گه‌ڕام، ناچار به مێژووی هه‌موو
گۆرانی و دراما و مۆسیقا و په‌که‌ر تاشینه‌کانی ئه‌و
ماوه‌یه‌دا چوومه‌وه، ووتم ناهه‌قیان نیه ئه‌وخاڵه‌یان
خستۆته بن به‌ڕه‌که‌ی ،شتێکی وایان نه‌بوو ،ڕووی مه‌جلیسی
هه‌بێ ، ده‌نا باسیان ئه‌کرد.
5 ـ بۆ ته‌حلیلی ستراتیژی، ئه‌گه‌ر په‌نا بۆ که‌سێکی مه‌ده‌نی
به‌رین ،که‌له‌ڕووی ئه‌کادیمیه‌وه ئاماده نه‌بێ بۆ
ئه‌وکاره، واتا ئیختیساسی له‌و بواره‌یا نه‌بێ ،و ته‌نها
خوێنه‌ر یان ووتار نووسی ئه‌و بابه‌ته بێت، خوانه‌خوسته
قسه‌کانی ته‌رجه‌مه‌که‌ین، بۆ زمانی ئه‌و بێگانانه‌ی که
ستراتژیه‌ت لای ئه‌وان زانست و ئیختیساسه، مه‌علوم شتی
سه‌یرو سه‌مه‌ره‌ی لێ ده‌رئه‌چێت، ئه‌مما بۆ وه‌زعی ئێستای
ئێمه‌ی کورد، که ئه‌و پسپۆڕیه‌مان نیه، له‌سه‌رمانه
موساعه‌ده‌ی ئه‌و ڕاگه‌یاندنانه بکه‌ین، که به‌و ئه‌رکه
هه‌ڵئه‌سن ،و له توانای خۆیان ومیوانه‌که‌یان زیاتریان لێ
داوا نه‌که‌ین، به‌ڵام خۆ بۆ ته‌حلیلی وه‌زعێکی ستراتیژی
عه‌سکه‌ری ،زائیده‌ن سیاسی قه‌به‌ی وه‌کو لوبنان یان عێراق یان
ئێران، زۆر گران نیه بانگهێشتنی جه‌نه‌ڕالێکی عه‌سکه‌ری کورد
بکه‌ین، که ده‌وره‌ی ئه‌رکانی بینیبێ ، بۆ ئه‌وه‌ی له‌گه‌ڵ
میوانه مه‌ده‌نیه‌که‌یا پێکه‌وه له بابه‌ته‌که بدوێن،
لێره‌وه‌ئه‌وه‌مان بۆ ده‌رئه‌که‌وێ ،که سه‌رکه‌وتن یان
فه‌شه‌ل هێنانی هه‌ر به‌رنامه‌یه‌کی ته‌له‌فزیونی، راده‌ی
رۆشنبیری و ئاسۆ فراوانی ئه‌قڵ و سه‌لیقه‌ی ، ته‌نها ئاماده‌و
پێشکه‌ش که‌ره‌که‌ی دیاری ئه‌کا، نه‌وه‌ک میوانه‌که‌ی که
بیللا ته‌شبیه کورد واته‌نی که‌ری خانه خوێیه، له هه‌ر
کوێی دانیشینێ رووی نایه ئیعتریراز بگرێ و بڵێ جێگه‌که‌م
لێژه.
6 ـ له‌هونه‌ری گۆرانی و مۆسیقای کوردیا نه‌م بینی و نه‌م بیست
ڕۆژێک که‌سێک بڵێ من ئیختیساسم ته‌نها ئاواز دانانه، ئه‌وی تر
بڵێ من ته‌نها مۆسیقا دابه‌ش ئه‌که‌م ، ئه‌وی تریان بڵێ ئیشی
من نووسینی شیعری گۆرانیه، ئه‌وی تر بڵێ کاری من ته‌نها
گۆرانی ووتنه‌که‌یه ، شه‌وێک گوێم له جووکه جووکێک بوو ووتم
ئه‌وه چیه، ووتیان ئه‌و براده‌ره گۆرانی ئه‌ڵێ زۆر سه‌یرم
کردوو لێی وورد بوومه‌وه هه‌ر نه‌م زانی کێیه،و بۆ نه‌گبه‌تی
باسی کۆنسێرتیشی ئه‌کرد! ته‌له‌فونم بۆ گۆرانیبێژه‌که‌ی
براده‌رم کرد ووتم ئه‌وبراده‌ره به‌ڕاستێتی ئه‌ڵێ کۆنسێرت
ئه‌که‌م؟ ووتی له ئه‌سڵا خۆی مۆسیقا ساز ئه‌کا، ووتم کوره
ئه‌وه گۆرانی ئه‌ڵێ ،ووتی ئاخر خۆی ئه‌ڵێ راسته من ده‌نگم
خۆش نیه، به‌ڵام ئه‌زانم گۆرانی چۆن ئه‌وترێ، ووتم ئه‌گه‌ر
گۆرانی ووتنی ڕاست وابێ ،که‌واته ئه‌وانه‌ی جووکه‌یان نایه
گۆرانیبێژ نین، ووتی ئیتر به‌خوا ئه‌وه ئاوایه.
|