دوای یه‌کگرتنه‌وه‌ی هه‌ردوو ئیداره‌ی سلێمانی و هه‌ولێر و، پێکهێنانی حکومه‌تی یه‌کگرتووی کوردستان، خه‌ڵکی چاوه‌ڕوانی باشتربوونی حاڵ و گوزه‌رانیان ده‌کرد، چونکه‌ پێشتر هه‌ر که‌موکورتییه‌ک هه‌بوایه‌ ده‌یانخسته‌ ئه‌ستۆی دووئیداره‌یی و دوو حکومه‌تی، به‌ڵام دوای تێپه‌ڕبوونی چه‌ند مانگێک به‌سه‌ر یه‌کگرتنه‌وه‌ی دوو حکومه‌ته‌که‌ماندا، که‌چی ئه‌و چاوه‌ڕوانی و پێشبینییه‌ی خه‌ڵک وا ده‌رنه‌چوو، به‌ڵکو حاڵ و گوزه‌رانی خه‌ڵک و هاووڵاتی ئاسایی به‌ره‌و خراپتر چوو، پێداویستییه‌ سه‌ره‌کی و رۆژانه‌ییه‌کانی به‌ گرانتر و قورستر ده‌ستده‌که‌وێت، خزمه‌تگوزارییه‌کانی وه‌ک کاره‌با و نه‌وت و غاز و به‌نزین رۆژ به‌ رۆژ که‌متر ده‌بێت و به‌ نرخێکی گرانتر ده‌ست هاووڵاتیان ده‌که‌وێت، ته‌نانه‌ت نرخی سوته‌مه‌نی به‌ جۆرێک گران بووه‌ که‌ بێ پێشینه‌یه‌ له‌ کوردستاندا، هه‌تا زه‌مانی گه‌ماڕۆی ئابووریی سه‌ر عێراق و کوردستان نرخی به‌نزین و غاز و نه‌وت وه‌کو ئێستا گران نه‌بوو، ئاشکراشه‌ که‌ گرانبوونی سوته‌مه‌نی کاریگه‌ریی راسته‌وخۆی هه‌یه‌ بۆ سه‌ر گرانبوونی سه‌رجه‌م پێویستی و که‌لوپه‌له‌کانی تری رۆژانه‌ی مرۆڤ، ئه‌مه‌ش ورده‌ ورده‌ سه‌ر ده‌کێشێ و سه‌ری کێشاوه‌ بۆ په‌یدابوونی دیارده‌ی گرانی، خۆ ئه‌گه‌ر سه‌ردانێکی کورتی بازاڕ بکه‌یت، ئه‌وه‌ به‌ ئاشکرا هه‌ست به‌و گرانییه‌ ده‌که‌یت.

له‌لایه‌کی دیکه‌وه‌، داهاتی هاووڵاتیان به‌ تایبه‌تی چینی (مووچه‌خۆر) که‌ به‌شێکی گه‌وره‌ و سه‌ره‌کیی خه‌ڵکی کوردستان پێک ده‌هێنن، له‌و ئاسته‌دا نییه‌ که‌ بتوانێ هاوتای ئه‌و گرانییه‌ بکات، که‌ ئێستا له‌ بازاڕه‌کانی کوردستان به‌ ئاشکرا هه‌ستی پێ ده‌کرێ، ئه‌مه‌ش وایکردووه‌ که‌ هاووڵاتیان له‌ کێشه‌ و قه‌یرانێکدا بژین و دابینکردنی پێداویستییه‌کانی ژیانیان شه‌که‌ت و ماندوویان بکات، جار جاریش ئه‌م شه‌که‌تبوون و ماندووبوونه‌یان له‌ چوارچێوه‌ی هه‌ندێ خۆپیشانداندا ده‌رده‌بڕن، به‌ڵام به‌داخه‌وه‌ ده‌سه‌ڵاتی کوردی له‌جیاتی به‌ده‌مه‌وه‌چوونی داواکانیان و دابینکردنی پێداویستییه‌کانیان، به‌شێوه‌یه‌کی نا دیموکراسییانه‌، به‌ڵکو له‌ هه‌ندێ شوێن پۆلیسیانه‌ مامه‌ڵه‌ی خۆپیشانده‌ران ده‌کرێ.

له‌ کۆتاییدا به‌ کورتی و به‌ کوردی ده‌مه‌وێ بڵێم که‌ ئێستا ده‌سه‌ڵاتی کوردی له‌ رووی دابینکردنی پێداویستی و خزمه‌تگوزارییه‌کان و دابینکردنی داهاتێکی گونجاو بۆ هاووڵاتیان به‌تایبه‌تی بۆ مووچه‌خۆران له‌ قه‌یران و ئه‌زمه‌دایه‌، ئه‌م حاڵه‌ته‌ش پێویست ده‌کات له‌سه‌رى که‌ خه‌مێکی جددی بخوات و هه‌نگاوی کرداری بۆ چاره‌سه‌رکردنێکی ئه‌و قه‌یرانه‌ و ئه‌زمه‌یه‌ بنێت، ئه‌گینا ورده‌ ورده‌ میسداقیه‌تی ده‌سه‌ڵاتی کوردی و باوه‌ڕی خه‌ڵک به‌و ده‌سه‌ڵاته‌ روو له‌ که‌می ده‌کات