بەرێزان ئەندامانى پەڕِلەمان

من کەلە وەزارەتى کاروبارى شەهیدان وئەنفالکراوەکانى حکومەتى هەرێمى کوردستان ئەم نامەیەتان ئاراستە دەکەم، لە وڵاتێکدا کە نەتەوەکەى مێژوویەکى دوورودرێژى هەیە لە ماڵوێرانى و خوێنڕشتن و بەکۆمەڵکوژى و چەوساندنەوەو دەربەردەرى، گومانیشم لەوە نیە کەبەهۆى تەمەنێکى دوورودرێژ لە هاوژیانى و هاوسێیەتى میللەتەکەتان لەگەڵ نەتەوەى کورد کەسانێکى خودان مۆڕال و بەویژدان لەناوتان دەست دەکەوێت کەلەو ڕاستییە مێژووییە بە ئاگان و گشت ئەو مەینەتیانەى بەسەر نەتەوەکەمدا هاتووە ویژدانى زیندویان ئازار بدات .

ئەوەى لێرەدا جێگاى پرسیارو سەر سورمان و نائومیدیە ئەو هەڵوێستەى چەند رۆژى رابردووى ئێوەیە ،کەبەزۆرینەى دەنگ پەسندى ئەوەتان کرد سوپاى تورکیا بەمەبەستى سەرکوتکردنى (pkk) سنورى سیادەى وڵاتێک ببەزێنێت و ئەم ئەم ناوچەیە جارێکى تر بکاتەوەبە مەیدانى شەڕو کوشت و کوشتار ، ئەم هەڵوێستەى ئێوە نواندتان وەکو ئەندامێکى پەڕِلەمان زۆر پێچەوانەى ئەو ئەرکە پیرۆزەیە کە پێتان سپێردراوە.

مەرجە کەسێکى پەڕِلەمانتار کەلەلایەن گەلێک متمانەى پێ دەبەخشرێت وهەڵدەبژدرێت هەڵگرى گشت بنەما ئەخلاقى و مرۆڤایەتیەکان بێت و لە پێناو چارەسەرکردنى گرفت و هێنانە کایەى خۆشبەختى میللەتەکەى بە تایبەتى و جیهان بەگشتى تێبکۆشێت . کەچى ئێوەى بەرێز بە پێچەوانەى ئەمە بەبێ ڕەچاو کردنى ئەرکە مرۆڤایەتیەکانتان زۆر بە خێرایى و بەسانایى شەرعیەتتان دا بەهەڵگیرسانى شەر، ِکەشەڕیش جگە لەماڵوێرانى و خوێنرشتن و ئاوارەیى وبرسیەتى ئەنجامێکى تر بەدەستەوە نادات .

ئێوە بەو هەڵوێستەتان پێتان وایە ئەرکى نیشتیمانى و دڵسۆزى خۆتان بۆ گەلى تورکیا بەجێ گەیاندوە، بەو ئومێدەى پارێزگارى لە ئاسایش و ماف و خۆشبەختى گەلەکەتان بکەن، بەڵام ئەو راِستیەتان فەرامۆش کردووە کە خۆشبەختى و بەرقەراربوونى ئارامى لە وڵاتى ئێوە نایەتەدى کاتێک خۆشبەختى و مافى ژیانى میللەتى کورد کە هاوڵاتى و هاوسَیى دەوڵەتەکەى ئێوەیە بکەوێتە مەترسیەوە.

 ئەوە بنەمایەکى جێگیرە کە خۆشبەختى و ئاسایشى هیچ لایەنێک لەسەر حیسابى نەهامەتى لایەنەکەى تر بەدى نایەت، مەگەر لە کۆمەڵگایەکى هەمەجى و بێ قەیدو بەندى دوور لە بەهاو رێساى مرۆڤایەتى، کەمێژووش ئەو راستیەى سەلماندووە .

بەرێزان ئەگەر بۆ چەند چرکە ساتێکیش بێت ئاورێک لە مێژووى سەدان ساڵەى ئەو ناوچەیە بدەنەوە ئەوەتان دێتەوە یاد کە لەژێر سایەى دەسەڵاتدارەکانى ئیمپراتۆرى فارس و عوسمانى و بەرلەوان ئەمەوى و عەباسى ئەو ناوچەیە زۆربەى کات لە دۆخێکى پڕ لەشەڕ و نا ئارامیدا ژیانى بەسەر بردووە ،کە زۆربەى نەتەوەکانى ناوچەکە تیادا بوونەتە قوربانى هەوەسى دەسەڵاتداریەتى و بەهێزکردنى تاج و تەختى فەِرمانِرەواکانى ئەو کاتە، لەئاکامدا بەسەدان و بگرە هەزاران کەس لەناوچووەو شارو گوندەکانیش بەرشاڵاوى تاڵان و وێرانکردن هاتوون، کە بەداخەوە لەو پێودانگە میللەتى کورد گەورەترین بەشى بەرکەوتووە .

ئێمەش وەکو ئێوەو میللەتانى ترى ناوچەکە زوڵم و زۆردارى زاڵمان و حوکمڕانانى ئەو کات تەنگیان پێ هەڵچنیوین، ئەوە بوو هاوکات لەگەڵ برەوسەندنى خەباتى ئازادیخوازى و دروستکردنى دەوڵەتى نەتەوەیى دیموکراتخواز خەباتى خۆمان دەستپێکرد، بەیەکەوە دەستمان کرد بە پێکهێنانى کۆمەڵەو رێکخراوى رۆشنبیرى و سیاسى بۆ ئەوەى لەو دۆخە ڕزگارمان بێت کۆمەڵەى (ئیتیحاد و تەرەقى) مان دامەزراند ،ئەگەرچى زۆرى نەبرد ئێوەبە ئامانجى خۆتان گەیشتن و خیانەتان لە ئێمە کرد .

لەو ساتەوە ئێمە لە پێناو بەدەستهێنانى مافى نەتەوەیى و کیانێکى سەربەخۆ خەبات دەکەین و لەو رێگەیەدا بەهەزاران منداڵ و ئافرەت و پیرو لاوى کورد بوونەتە قوربانى، زۆرى ژمارەى قوربانیان و ئازارەکانیان بووە هۆى ئەوەى کە پێکهێنانى دامەزراوەیەکى تایبەت بە کەسوکارى شەهیدان و ئەنفالکراوەکان ببێتە پێوستى تاوەکو بەرێگاى ئەو کەناڵەوە بتوانین خزمەتى خانەوادە قوربانیدەرەکانى کوردستان بکەین، هەر لە سەرەتاى دامەزراندنى ئەم وەزراەتە هیواى ئەوەمان خواست کە بۆماوەیەکى دیاریکراو و کورت پێویستمان بە هەبوونى ئەو دامەزراوەیە بێت، بەو مانایەى کە ئاشتى و ئارامى لەسەرتاسەرى وڵات بەرقەرار بێت و جارێکى تر کەس نەبێتە قوربانى شەڕى ماڵوێرانکەر .

کەچى هەڵوێستى نامرۆڤایەتى توندوتیژانەى ئێوە ئەو مەسەلەیە پێچەوانە دەکاتەوە، لەبەرئەوەى بەم کارەتان ئێوە جارێکى تر ڕێگا خۆش دەکەن بۆ کوشتن و دەربەدەرکردنى خەڵکى گوندو شارو شارۆچکەکانى وڵاتى ئێمە.

ئەوەى لە هەموو ئەوانەى گوتران جەرگبڕو نائومێدکەرترە ئەوەیە کە لەسەدەى بانگەشەکردن بۆ پاراستن و ڕێزگرتن لە مافەکانى مرۆڤ و هزرى مەدەنیەت ، هەر بەرێگاى دامەزراوەیەکى کۆمەڵگاى مەدەنى و پێشکەوتوو پیرۆز شەرعیەت دەدرێت بە کوشتنى مرۆڤ و سەرکوتکردنى خەباتى ئازادیخوازى .

 لەکۆتاییدا بەناوى کەسێک کە لەگەڵ ئازارو مەینەتیەکانى نەتەوەکەم گەورەبووم و ئەمرۆکە ئەرکى پیرۆزى خزمەتکردنى قوربانیانى شەڕو ماڵوێرانى میللەتەکەم پێ سپێردراوە داواکارم :

1. بە هەڵوێستە توندوتیژو دژە ئەرکە پیرۆزەکەى خۆتان دا بچنەوە و ببنە نوێنەرى پەیامى ئاشتى و میللەتێکى ئاشتى خواز نەک شەڕانگێز و دڕندە .

2.  شەڕو ماڵوێرانى و باروت زەمانێکى دوورو درێژە بەرۆکى گرتوین و ئازیزانمان لەناو دەبات ،لێ گەرێن با ئێمەش وەکو ئێوە کەمێک هەواى ئازادى و شادى و ئارامى هەڵمژین .دڵنیابن ئەو بەهەشتەى هەوڵى بۆ دەدەن دروست ناکرێت ئەگەر ئێمەى میللەتانى هاوسێتان لە دۆزەخ دا بژین .

3. هاوکارى و پاڵپشتى لە میللەتانى ناوچەکە بکەن بۆ ئەوەى ئاشتى و ئارامى سەرتاسەرى ئەم ناوچەیە بگرێتەوە و ئێمەش و هیچ وڵاتێکى تر نە لە رۆژهەڵاتى ناوەڕاست و نەلەجیهان پێوستى بە دامەزراوەیەکى تایبەت بەناوى شەهیدان و ئەنفالکراوەکان نەبێت .

 چنار سعد عبداللە

وەزیرى کاروبارى شەهیدان و ئەنفالکراوەکان

لەحکومەتى هەرێمى کوردستان

                                                                                                       24/ 10/2007