|
پارته ده‌سه‌ڵاتداره‌کان به زۆر وایان له‌خۆیان گه‌یاندووه
که نه‌مانی ده‌سه‌ڵاتی به‌عس له لوله‌ی تفه‌نگی ئه‌وانه‌وه
بووه، که ئه‌وه به‌هیچ جۆرێک وا نه‌بوه‌وه و هه‌رواش
نه‌بوو!! به‌ڵکو ئهوان ته‌نها نوێنه‌رایه‌تی گیرفان و
به‌رژه‌وه‌ندی خۆیان ده‌که‌ن و هه‌رواش بوون، به
عه‌قڵییه‌تێکی تایفه‌چیه‌تی ژه‌مبورده‌ییه‌وه که ئه‌وه‌ش
به‌رده‌وامی پێشوو تری ژیان و پراکتیکیان بووه له شاخ
وله‌سه‌ر سنوره‌کانی ئێران و عێێراق. وه‌ک ئاشکرایه بۆچوونی
پارته ده‌سه‌ڵاتداره‌کان کاتێکی زیاتری گه‌ره‌که بۆ ئه‌وه‌ی
بگۆرێت، که ئه‌وه‌ش ته‌نها له‌ژێر فشاری حه‌ڵکدا ڕووده‌دات،
ئه‌گینا هه‌موو کارێک که ده‌یکه‌ن به‌پێی ڕۆژگار و ئه‌و
وه‌زعه‌ی که له ئارادایه پاساوی ده‌ده‌نه‌وه، به‌وه‌ش
ئه‌ندێشه‌ی سه‌رده‌می خۆیان ڕێکده‌خه‌ن و ئه‌و بیروڕایانه‌ش
به‌رهه‌م ده‌هێنن که به هیمه‌تی خۆیان و هه‌ندێ له خاوه‌ن
پێنووسه نازداره‌کانیان، که ئازادی خۆیان له‌پێناو هه‌ندێ
پاره و پوڵ و قورسی گیرڤان و پله‌وپایه یان هاتوچۆکانیان بۆ
ئه‌م سه‌رو ئه‌وسه‌ری دونیا له‌کیس داوه.
ده‌سه‌ڵاتداران بۆ به‌رده‌وامی فه‌رمانره‌وایه‌تیان ده‌بێت
هه‌ر سه‌راب به‌خه‌ڵک بفرۆشن و ئه‌وه‌ی که قبوڵیشیه‌تی ته‌نها
بوئه‌وه‌یه که بژێوی خۆی پێ مسۆگه‌ر بکات، له‌لایه‌کی
تریشه‌وه ده‌یسه‌پێنه سه‌رباقی جه‌ماوه‌ره‌که‌ی تر له رێی
بێئاگاکردنیانه‌وه، هه‌رکه‌سێکیش که ره‌خنه‌شتان لێبگرێ و
بزانن که مه‌ترسی بۆ کورسییه‌که‌یان نییه ئه‌وا ده‌ڵین
دیموکراسیه وهه‌موو که‌سێک مافی ره‌خنه‌گرتنی هه‌یه و ئێمه‌ش
به‌شێکین له‌م میله‌ته سته‌مدیده و زه‌حمه‌تکێشه.
به‌مجۆره پاساوی ده‌که‌ن له هه‌موو بڵاو‌کراوه‌یه‌کی بینراو
و بیستراودا، که له هه‌موو بۆنه‌یه‌کیشدا وه‌ک قه‌وان لێی
ده‌ده‌نه‌وه، به‌مه‌رجێک که ته‌ختی پاشایه‌تییان نه‌له‌رزێ
من پێم وایه ئه‌و که‌سانه‌ی که له‌کوردستان فه‌رمانڕه‌وایی
ده‌که‌ن جگه له‌وه‌ی که نازانن دیموکراسی و ده‌وڵه‌ت چییه،
به‌ڵکو هه‌ر فڕییشیان پێوه‌ی نییه و ته‌نها به تێڕوانینی
خێڵه‌کی وڵات ده‌‌به‌ن به‌ڕیوه و باوه‌ڕیشیان به‌ڕێنوێنی
که‌سێش نییه و هه‌رچه‌نده‌ش مێژووی ده‌سه‌ڵاتیان عه‌کسه‌که‌ی
سه‌لماندووه که‌چی سه‌رانی خێڵ ده‌وڵه‌ت ده‌ئاژوون.
له‌ولاوه هه‌ندێک که‌س زۆرجار فووده‌که‌نه خۆیان وخۆیان
توڕه ده‌که‌ن، ئیتر ئه‌مه چ له دڵسۆزییه‌وه بێت بۆ
کوردستانه بریناره‌که‌یان یان له به‌رژوه‌ندی
تایبه‌تییانه‌‌وه بێ، که لیی بێبه‌ش بوون یان که‌میان
به‌رکه‌وتبێت له‌و شاباش و به‌خشیشه‌ی که جه‌نابیان به‌ته‌مای
بووبن له حوکمه‌ته ساواکه‌یان که ڕۆژانه به
ده‌ستوپێوه‌نده‌کانیان ده‌یبه‌خشن له بری ئه‌و کارانه‌ی که
پێی هه‌ستاون یان له‌بری ئه‌و بێده‌نگییه‌ی که هه‌ڵیان
بژاردووه.
به‌ڵام ئه‌وه‌ی هه‌ر له سه‌ره‌تاوه دژی ئه‌م مشه‌خۆرانه
بوبێت، ئه‌وا که‌سێکی به‌رچاو ڕون بووه و له ماهییه‌تتان
تێگه‌یشتووه، بۆیه ئێستا و ئه‌وساش هه‌ر خه‌باتگێر بووه و
قه‌ت سه‌نگه‌ری دژایه‌تی لێ به‌جێ نه‌هێشتون، ئیتر چ
ده‌سه‌ڵاتداران عه‌گال له‌سه‌ر بووبن یا جامه‌دانه له‌سه‌ر،
ئه‌مه هیچی له هه‌ڵوێستی نه‌گۆڕیووه.
من پێموایه ته‌نها هێزێک که بتوانێ ئه‌م گه‌نده‌ڵییه
چینایه‌تییه بوه‌ستێنێت ته‌نها به‌ره‌نگاری و شۆڕشی
به‌رده‌وامی جه‌ماوه‌ره که ئه‌وه‌ش تا ئێستا پێنه‌گه‌ییووه
و که‌س چاوه‌رێی ئه‌وه له‌م خاوه‌ن میلشیایانه نه‌کات، واز
له هه‌ڵپه‌ی ڕاوڕووت بهینن به‌بێ خه‌باتی به‌رده‌وامی
سه‌رشه‌قامه‌کان. ڕاگرتن و دواخستنی خه‌باتی خه‌ڵکی له‌به‌ر
هه‌رهۆیه‌ک بێت، نیشانه‌ی هاوبه‌شی خۆشخه‌یاڵه‌کانه له‌و
باسانه‌دا که دژایه‌تی گه‌نده‌ڵی ده‌سه‌ڵاتی ئه‌وانی پێ دوا
ده‌خرێت. نموونه‌ی ئه‌م هه‌وڵانه‌ش هێنانه ئارای باسی یاسای
140 یان ترسی هێرشی توركیه ده‌هێننه پێشه‌وه که ده‌یه‌وێت
که‌ڵبه بژه‌نێته ئه‌و که‌لاکه‌ی که پێی ده‌ڵێن عێراق یان
هه‌ڕه‌شه‌ی عه‌ره‌به شۆفینیسته‌کان وه‌یان په‌ره‌سه‌ندی
ئیسلامییه توندره‌وه‌کان ده‌هێننه‌وه، هه‌موو ئه‌و هه‌وڵانه
بۆ چه‌واشه‌کردنی خه‌ڵکییه له‌لایه‌ن ئه‌م میلشیا و ئه‌و باند
و ئه‌م گروپ و ئه‌وگروپه‌وه، که هه‌مووی بریتییه له درۆ و
هه‌ڵخه‌له‌تاندنی خه‌ڵکه به‌پێی به‌رنامه‌یه‌کی داڕێژراو
له‌لایه‌ک، له‌لایه‌کی تره‌وه سه‌رکه‌وتنی ئه‌و
گه‌نده‌خۆرانه‌یه. له‌به‌رامبه‌ر ئه‌م هه‌وڵانه‌دا پرسیاریك
خۆی قوت ده‌کاته‌وه، بۆچی خۆیان بۆ تاکه چرکه‌یه‌کیش بێت
واز له خۆ‌سپاندن و فه‌رهودکردنی سه‌رمایه‌ی ئه‌م میله‌ته
خافڵ نابن ؟
ئه‌وانه‌ی ئێستا له کوردستاندا حوکم ده‌که‌ن که‌سانێکن که
له به‌خشینی مه‌دالیای قه‌ڵب و پیرۆزکردنی داپڵۆسینی
نه‌یاره‌‌کانیاندا پێشینه‌‌یان هه‌یه، هه‌ربۆیه‌ش زۆر به
ئاسانی و ئاسایی به پاساوی خیانه‌تکارو دژی میلله‌ت و بگره
به کۆنه به‌عسی و کۆنه‌جاش وهه‌نێ ناووناتۆره و سوکایه‌تی
تر، ناره‌زایکارانی سیاسه‌ته‌کانیان ڕاپێچی به‌ندیخانه و
سوکایه‌تی پێکردن و بگره له‌ناوبردنیشیان ده‌که‌ن، له
کاتێکدا هه‌رخۆیان قاره‌مانترین که‌س بوون له‌و ناپاکیانه‌دا
و پاشه‌ڵیان باشترین سه‌لمێنه‌ری ئه‌م باسه‌ن.
من پێم وایه که‌س نییه نه‌ک هه‌ر له کوردستان بگره له
وڵاتانی جیهانیشدا له‌پێش هه‌موشیانه‌وه سه‌رۆک بوش ئاگاداری
ئه‌و دزی و بێ ئابروییه‌یان نه‌بێت و ته‌نانه‌ت له‌لای
ڕێکخراوه جیهانیه‌کانیش عێراق به کوردستانیشه‌وه
گه‌نده‌ڵترین وڵاتی جیهانه.
ئه‌وه‌ی له سه‌ره‌وه وتومه بوختان نییه، وه‌ک ئاشکرایه
مسته‌ر بوش چه‌کداری ده‌وێت بۆ پڕۆژه‌کانیان، ئیتر له ژێر
هه‌ر دروشمێکی سیاسیدا بێت بۆ ئهوان گرنگ نییه و له
سیاسه‌تیشدا مسۆگه‌ری نییه، ئه‌وه‌ی به‌و ده‌هۆڵه‌ش خه‌ڵک
ده‌خاته هه‌ڵپه‌ڕین ئه‌وا زانایه‌که بۆ خۆی و جا ئه‌و
چه‌کداره ئه‌مریکی بێت یان کورد یان هه‌ر که‌سێکی تر ئه‌وه
گرن نیه، به‌ڵکو بۆ ئهوان ئه‌مان باشترن چونکه ئه‌مانه
زیاتر ڕێکخراون له‌دێر زه‌مانه‌وه.
ئه‌وه‌ی که له‌م بێدادییه لێپرسراوه به پله‌ی یه‌که‌م
خه‌ڵکه هه‌ڵخه‌ڵه‌تێنراوه‌که‌یه، که بوونه‌ته که‌سانێکی
که‌مته‌رخه‌م و چووه‌ته ژێر ده‌سه‌ڵاتی خێڵه‌وه،
ڕزگاربوونیش له‌م بارودۆخه به ئه‌مڕۆوه به‌ستراوه نه‌ك
سبه‌ی. ئه‌وانه‌ش که ده‌میان داخستووه تا سکیان تێر بێت،
که‌سانێکی هه‌لپه‌رستن و له ته‌نگانه‌شدا قه‌ت ئاماده نین
خۆیان به کوشت بده‌ن بۆ مێرانی سۆران و بادینان، به‌ڵکو نانی
هه‌لپه‌رستی خۆیان ده‌خۆن و ئه‌مانه‌ش له‌سه‌دا نه‌وه‌دی ئه‌و
قه‌ره‌باڵخیه‌ن که به‌دوای ده‌سه‌ڵاتدارانه‌وه‌ن و هه‌موو
وته‌یاکیان به حیکمه‌ت ده‌زانن و چه‌پڵه‌ی دورودرێژیان بۆ
لێدده‌ده‌ن، ته‌نانه‌ت بۆ لێبوردنی فایلداره‌کان که
له‌ژێره‌وه په‌یوه‌ندیان به ڕژمی به‌عسه‌وه هه‌بووه، که
ئێستا هه‌ندێک له‌و فایلدارانه لێپرسراوه‌تی باڵادان و
ده‌مڕاستی سه‌رۆکه‌کانن. به‌ڵام میلله‌تێک هێنده
چه‌واشه‌کرابێ که به‌ته‌مای میداڵیا (نوط شجاعه)ی ئهوان
بێت، ئه‌وا زۆر پێوستی به وریاکردنه‌وه هه‌یه به‌تایبه‌تی
له‌م کاته‌دا که ئیمتیازات نه‌ما زه‌وی دابه‌شکردن کۆتای هات
و قۆناخی کوله‌مه‌رگی به‌ڕێوه‌یه. ئه‌وه‌ی چاوه‌ڕوانی له
چاکسازی ئه‌م تاقمانه بێت، ده‌بێت له چاوه‌ڕوانیدا خۆی
به‌مه‌رگ بسپێرێ، ئه‌گه‌ر به‌ته‌مای ئه‌وه‌ش بێت، ماف وه‌رگرێ
و یان مافی چاره‌ی خۆنووسین به‌ده‌ست بێنێت، ئه‌وا خه‌یاڵی
خاوه و له ده‌ریای بێئاگاییدا خنکاوه یان له زه‌لکاوی
گومراییدا ژیان به‌فیڕۆ ده‌دات.
ئه‌م حیزبانه خولقێنه‌ری ئه‌م وه‌زعه‌ن له‌بێکاری،
ئه‌زمه‌کانی سوته‌مه‌نی وکاره‌باو پیسی وڵاته‌که‌ونزمی ئاستی
ته‌ندورستی ودزینی هه‌موو مومته‌له‌کاتی دوڵه‌ت ( له‌وانه‌ش
بینای هه‌ن‌دێك دائره‌وبانزینخانه‌کانکارگه‌کانی جگه‌ره‌و
چیمه‌نتۆکانی کوردستان) بگره تا تاپۆکردنی هه‌مو زه‌وی وزاره
به‌نرخه‌کانی به‌له‌دیه به‌سه‌ر ئه‌ندامانی خێڵدا که جاری
واهه‌بوه به چه‌ند سه‌د دۆنمێک که ژنه لێپرسراوێك ده‌ستی
به‌سه‌راگرتووه و هه‌موو وه‌زیفه وه‌زاریه‌کان بۆ بنه‌ماڵه‌ی
سه‌رۆکه‌کانه، چ کوردێک هه‌یه ئاگاداری ئه‌م وه‌زعه نه‌بێ؟
کێ هه‌یه ئاگاداری ئه‌وه نه‌بی که پاره‌ی ئه‌و پرۆژانه‌ی
که ده‌رچوون و جێبه‌جێ نه‌کراون و پاره‌که‌یان له گیرڤانی
کێدایه! کوان شاعیر و نوسه‌ره‌کان باسی شتێک بکه‌ن بۆ میللت
نه‌ک بۆ گیرفان؟
هه‌ر ئه‌م شۆڕه‌سوارانه نین که زه‌وی و زاری کشتوکالی به
نرخێکی هه‌رزان ده‌کڕن و پاش هه‌فته‌یه‌ك ده‌یکه‌ن به زه‌وی
نتشته‌جێ بوون و به نرخی ئاڵتون به خه‌ڵکی کوردستانه
خۆشه‌ویسته‌که‌ی ده‌فرۆشنه‌وه! با ئیمه باسی چه‌می قلیاسان
هه‌ر ناکه‌ین که به‌سه‌ر چه‌ند که‌سێک دابه‌شکرا که ملیوانی
کراسه‌که‌یان بۆ کورد چڵکن بووه. جگه له‌وه‌ی که هه‌رچی
داهاتی پرۆژه‌کانه له کۆمپانیای لێپرسراوه‌‌کانی یه‌کێتی و
پارتی دا ساغ ده‌کرێته‌وه، که یه‌کێک له‌و کۆمپانیانه
کۆمپانیای نۆکانه و ته‌نانه‌ت کتێبی قوتابخانه‌کانیش له
چاپخانه‌کانی خێڵدا به نرخێکی چه‌ند به‌رابه‌ر به‌چاپ
ده‌گه‌یه‌نرێ. چ گه‌مژیی و گه‌وجییه‌که که چاوه‌رێی ماف و
ژیان و چاکسازی له‌مانه بکرێت!!
ئه‌وانه‌ی له‌و ده‌ڤه‌ره کورد نشینه‌دا ده‌وڵه‌مه‌ند بوون
ئه‌گه‌ر راسته‌وخۆ به‌شداری ئه‌و گه‌نده‌ڵییه‌یان نه‌کردبێ
ئه‌وا بێ هیچ گومانێک به‌گالیسکه‌ی ئه‌و گه‌نده‌ڵییه ڕاکێشی
کردوون.
من زۆر دڵنیام ئه‌وه‌ی لایه‌نگری ئه‌م ده‌سه‌لاتانه بێت
ئه‌گه‌ر ناویشی له سه‌ره‌نویێلکی پۆخڵدا نه‌بێت، بێگومانم که
مرۆڤایه‌تی خۆی بۆ پاره و پارچه زه‌وی و شقه و وه‌زیفه له
ده‌ستداوه، ئیتر له‌مپه‌ری چه‌په‌وه بۆ ئه‌وپه‌ڕی راست به
هونه‌رمه‌ند و نوسه‌ر و ئه‌دیبه‌وه بگره تا ده‌گاته
چه‌کداریکیان له کوردستاندا به ناوچه دابڕاوه‌کانیشه‌وه،
هه‌ر سه‌یری موچه‌ی ڕه‌فیق حیزبییه‌کان بکه به ئه‌ندام
په‌رله‌مانه‌کانیشه که چه‌نده‌ها جاری موچه‌ی فه‌رمانبه‌رێکی
ده‌رچووی زانکۆییه به خزمه‌تی بیست ساڵیشه‌وه‌له
دائیره‌یه‌کدا.
من دلنیام ئه‌و شه‌ڕه ئه‌هلییه‌ی که باشوری عێراقی
گرتۆته‌وه هه‌ر ده‌گاته کوردستانیش، چونکه خه‌ڵکێکی زۆر
بێکاره، بێده‌رامه‌ته جگه له‌وه‌ی هه‌ر له ئێواره‌وه
خه‌ڵکی هه‌ژاری ئه‌و وڵاته غه‌رقی تاریکی ده‌که‌ن که بواری
بیرکردنه‌وه‌ش به خه‌ڵکی ناده‌ن و‌ئه‌گه‌ر کاره‌باش هه‌بێ
ئه‌وا تراجیدیای ژیانی ڕۆژانه‌ی خه‌ڵکی، ئێواران به
کۆمێدییه‌کی بێ نرخ له ڕێی (به‌رنامه‌ی به‌رنامه‌وه) پیشانی
خه‌ڵکی ده‌ده‌ن تا به سه‌گ مه‌رگییه‌که‌ی خۆی پێبکه‌نێ و دڵی
به‌وه خۆش بکه‌ن که حکومه‌ت ئاگاداری مه‌ئاساتی
خه‌ڵکه‌که‌یه‌تی، ئا ئه‌مه دیمکراسی نه‌بێت ئه‌ی چییه؟
له کوردستاندا به‌هێزترین ده‌زگا داپڵۆسێنه‌ره‌کان به ئه‌من
و ئیستیخبارات وموخاباراته‌وه دامه‌زراونه‌ته‌وه که
زۆرترین به‌شی داهاتی میلله‌ت بۆ ئه‌وانه، ئه‌ی بۆچی ده‌زگای
ئاو و کاره‌با چاک ناکرێ ئه‌گه‌ر بۆ گه‌مژه‌کردن و داپڵۆسینی
خه‌ڵک نه‌بێ!
کوردستان وڵاتێکه که تاقه یه‌ك ئاماری له‌‌هیچ بوارێکدا
تێدا نییه، که‌س نازانێ سه‌ڕۆکه‌کان مو‌چه‌یان چه‌نده،
چونکه ئهوان له‌وه به‌رزترن که موچه‌که‌یان ئاشکرا بکرێ!
له ڕۆژنامه‌یه‌کی کوردیدا له (کۆسره‌ت ره‌سول)یان پرسی
موچه‌که‌ت چه‌نده له وه‌ڵامدا وتی 5 یان 6 ملێون دیناره که
جاران ئێمه فه‌رمانبه‌ر بووین یه‌ک ساڵ چاوه‌رێی 2 دیناری
عه‌لاوه‌یه‌كمان ده‌کرد که هێشتا هه‌روایه بۆ فه‌رمانبه‌ری
نا حیزبی.
کوردستان وڵاتێکه له‌و په‌ری پاشاگه‌ردانی و به‌ڕه‌ڵایدایه و
سه‌رۆکه‌که‌ی گفتی داوه بیکاته دوبه‌ی، به‌ڵام که‌ی که
شه‌مه له مانگ بڕا!!! پاش دووساڵ له‌کردنی کورردستان به
دوبه‌ی تازه ده‌ڵێ "که به‌سه‌ر شه‌قامه‌کاندا تێده‌په‌ڕم
ده‌م وچاوم داده‌پۆشم تا خه‌ڵکی نه‌م بیینێ" ته‌نها له‌یه‌ك
ڕووه‌وه له دوبه‌ی ده‌چێ که کۆیله‌ی فلیپینیان هێناوه بۆ
لێپرسراوهکان که ژنه‌کانیان له خارج ناگه‌ڕێنه‌وه یان
نایانهێننه‌وه!
ته‌نها وه‌ڵامی لێپرسراوهکان ئه‌وه‌یه که ده‌ڵین به‌س نییه
ئێمه وه‌کو باشور به شه‌ڕی ناوخۆوه تێنه‌گلاوین، سه‌یرکه‌ن
چی به میله‌تی نائاگا ده‌که‌ن! چی ده‌که‌ن به پڕۆژه و
ئازایه‌تی به‌سه‌ر خه‌ڵکییه‌وه؟ ئه‌و لێپرسراونه له کن من
له مێژه به بازرگانی خوێنی ئه‌و میله‌ته بێ ئاگایه شوناس
کراون.
میله‌ت وا چه‌واشه کراوه، له‌لایه‌ک به‌ڵێنی ده‌وڵه‌تی
موئه‌سه‌سات ده‌ده‌ن، پاشانیش به یه‌‌کگرتنه‌وه‌ی چوار
پارچه‌که‌ی کوردستان کردوونیه‌ته خاوه‌ن خه‌ونێک که له ژێر
سه‌رکردایه‌تی ئه‌مانه‌دا نه‌بێ ده‌وڵه‌تی کوردی خۆر لێی نادا.
دواجار هه‌ر گیرگرفتێک له نیوان کاربه‌ده‌سته‌کاندا هه‌بێت
له‌سه‌ر به‌شه نه‌ك مافی خه‌ڵک، ئیتر له‌ر ژێر هه‌رتایتڵێک و
دروشمێکدا بێت، بۆیه پێویست نییه که‌س خۆی فریو بدا و
چه‌واشه بکات به‌نێوی ئۆپۆزسیۆن. چونکه که‌سانێک که
ئه‌ورۆکه به‌نێوی ئۆپۆزسیۆن و ڕیفۆرمخوازه‌وه خۆیان پێناسه
ده‌که‌ن، ڕۆژگارێک بڕبڕه‌ی پشتی ئه‌م گه‌نده‌ڵییه بوون و له
پانزه ساڵی ڕابووردوودا
به‌رده‌وام
بیانوویان بۆ نادادپه‌روه‌ری و گه‌نده‌ڵی ده‌سه‌لات
هێناوه‌ته‌وه وبه‌شێکیش بوون لێی، بۆیه ناکرێت ئه‌وڕۆکه
هیوایه‌کیان پێ ببه‌سترێت و ئه‌م هه‌وڵه‌شیان به چه‌واشه‌کاری
دانه‌نرێت. |