|
ئه‌ی کچه شاعیره‌که
تۆ ده‌توانی بێشه‌رمانه له خۆشه‌ویستی بدوێی
بێبه‌کار هێنانی هێماو ناوی نهێنی
به ئاشکرا په‌نجه‌ی بۆ ڕاکێشی
به‌ڵام نازانم بۆ
هۆنراوه‌کانت پڕ له ئه‌وین وخۆشه‌ویستیه
بێ هێنانی ناوی پیاو دایئه‌ڕێژی
سمێڵم ناخه‌یه هۆنراوه‌وه
پێ له‌سه‌ر نه‌رمی ڕیشم داناگری
ده‌ست بۆ نێو موی سنگم نابه‌یو
حه‌زه‌کانی خۆت به تاڵێکیانه‌وه هه‌ڵناواسی
کۆشی من وه‌ک سه‌رین ناخوازی
پێت دانه‌گرتوه له‌سه‌ر ده‌ستبازی
به‌داخه‌وه ناتوانی
هێشتا ئاشکرا بدوێی
به‌داخه‌وه نازانم باس له ئه‌وینی کێ ئه‌که‌ی
من مه‌مکو مه‌مکدانه‌که‌تم له هۆنراوه‌ما جێپێداوه
وشه‌کانم له ڕانی نه‌رم گۆنای گه‌رمته‌وه خشاوه
به چاوی ڕه‌شو لێوی سورت ئاوم داوه
به‌ڵام پێم بڵێ
کام ئه‌ندامی منت له هۆنراوه‌کانتا ناو هیناوه
به‌کامیان ده‌ستنوێژی حه‌زت شکاوه
یا هێشتا به‌ریه‌ککه‌وتن له هۆنراوه‌شتا ڕوی نه‌داوه
یا ئێمه‌ی پیاوشوێنێکمان نیه جوان بێ
له هۆنراوه‌دا بشێ ناوی بێ
کێڵگه‌یه‌کی شیاو نیه ئه‌وینو خۆشه‌ویستی له‌سه‌ر بڕوێ
خۆ ده‌کری هه‌ر نه‌بێ دڕنده‌یه‌که‌مان شوێنی باس بێ
|