سڕینه‌وه‌ی سروودی ئه‌ی ڕه‌قیب نیشانه‌ی پاشه‌کشه‌ یه‌  به‌ ناسیونالیزم

حه‌مه‌ که‌ریم 

ده‌رهاویشتنی سروودی ئه‌ی ‌ڕه‌قیب له‌ زیهن و مێشکی ملیونان خه‌ڵکی سته‌م دیده‌ی کوردستان و جێ گرتنه‌وه‌ی به‌ سرودێک که‌ خواستی زوربه‌ی خه‌ڵكی کوردستان نیه‌ کارێکه‌ ته‌نها له‌هه‌گبه‌ی پارتی و یه‌کیه‌تی دا هه‌یه‌ ، وه‌ ڕێز دانه‌نان بۆ خه‌ڵکی کوردستان نیشانه‌ی ملهوڕی ناسیونالیسته‌کانه‌ ،  وه‌ ئه‌م ئاڵوگۆڕه‌ش  دیسان په‌نجا به‌ په‌نجاکه‌ تیایدا ڕه‌نگی دایه‌وه‌ ، به‌وه‌ی که‌ سرووده‌که‌ دانه‌ره‌که‌ی شێرکۆ بێکه‌سی ینک و ئاوازه‌که‌ی پدک ه ،  که‌ هه‌ڵکه‌وت زاهیری ئاوازدانه‌رو زوڕناژه‌نی ده‌رباری بارزانیه‌  ، من به‌ش به‌حاڵی خۆم باوه‌ڕم به‌و سرووده‌ نیه ، وه‌کو ناوه‌رۆک ، ‌ به‌س ئه‌وه‌ مڵکی پارتی و یه‌کیه‌تییش نیه‌ به‌ڵکو سروودێکه‌ خه‌ڵکی کوردستان له‌ کاتی به‌گژاچوونه‌وه‌ی دوژمندا ، له‌ کاتی هه‌ڵمه‌ت بردندا ، له‌کاتی به‌رگریدا ، له‌کاتی شاڵاودبردن بۆ دوژمن دا ، له‌کاتی خۆڕاگریدا ، له‌ پێش په‌تی سێداره‌دا ، به‌ درێژایی زیاتر له‌نیو سه‌ده‌   سروودی به‌ره‌نگاری بووه‌ ، ئه‌و سرووده‌ له‌ دڵ و مێشکی ملیۆنان مرۆڤی کوردا یاداوه‌ری به‌جێهێشتووه‌ ،  ئه‌و سرووده‌ و گۆڕینه‌که‌ی ده‌بوایه‌ به‌ هه‌ڵبژاردن و وه‌رگرتنی ڕای خه‌ڵکی کوردستان  ئه‌نجام بدرایه‌ ، نه‌ک به‌یه‌ک دانیشتنی ژێربه‌ژێری سه‌رانی پارتی و یه‌کیه‌تی بگۆڕدرایه‌ ، ئه‌و گۆڕینه‌ به‌خاتری ڕازی کردنی دڵی مه‌لا عه‌لی و مه‌لا کرێكآره‌كان  بووه‌ نه‌ک به‌وه‌ی که‌تازه‌کردنه‌وه‌ی شته‌کۆنه‌کان  بێت .

هاتنه‌ مه‌یدانی ئیسلامی سیاسی و خۆنیشان دانی وه‌ک ئالته‌رناتیڤی ناسیونالیزم و وه‌ک میراتگری ده‌سه‌ڵات خۆده‌نوێنێت ، ‌ به‌پشتیوانی ده‌وڵه‌تانی ئیسلامی کۆنه‌په‌ره‌ستی ناوچه‌که‌و مل که‌چی و سات و سه‌ودای ناسیونالیسته‌کان له‌گه‌ڵیانداوسه‌ردانه‌واندن  له‌به‌رامبه‌ر داواکانیان بووه‌‌ هۆی  پاشه‌کشه‌ و لاواز بوونی ده‌سه‌ڵاتی سیاسی خۆیان  له‌ناو هاوکێشه‌ سیاسیه‌کانی کوردستان دا ، وه‌ پشتیوانی گه‌رم له‌لایه‌ن سه‌رانی کوردایه‌تیه‌وه‌ بۆ ده‌سته‌و میلیشیاکانی ئیسلامی سیاسی و هه‌ڵکردنی په‌رچه‌مه‌که‌یان  له‌لایه‌ن تاڵه‌بانی و بارزانیه‌وه‌ ، ڕاکێشانیان بۆناو زۆرانبازیه سیاسیه‌کان ، و بوونی گه‌نده‌ڵی و دزی وڕاووڕوتی لێپرسراوان ، بووه‌ هۆی ڕووسپی کردنه‌وه‌ی ئۆپۆزیسیۆنی ئیسلامی سیاسی ، تا کار به‌وه‌ گه‌یشت ئیسلامی سیاسی ڕۆژ به‌ڕۆژله‌خۆڕێک خستن دا بوو به‌رامبه‌ر به‌ ناسیونالیزم ، وه‌ڕۆژبه‌ڕۆژ داواکاری ئیسلامی سیاسی له‌ سه‌رانی ناسیونالیزم ڕوو له‌ زیادیه‌ ، تا کار به‌وه‌ ده‌گات جورئه‌ت ناکه‌ن ده‌م به‌رن بۆ هیچ هه‌لبژاردنێک ، چونکه‌ زمانی ته‌بلیغاته‌که‌یان وه‌ها ڕیسوا بووه‌ ، به‌هیچ شێوه‌یه‌ک نازانن جارێکی تر خۆڵ بکه‌نه‌ چاوی خه‌ڵکی تا ڕایان کێشنه‌ به‌رده‌م سندوقی ده‌نگدان . ئیسلامی سیاسی له‌کوردستان دا ڕوو له‌ هه‌ورازه‌و تاڕاده‌ی فه‌رزکردنی بیروڕاکانیان به‌سه‌ر ده‌ستووردا  ئه‌وه‌نده‌ی تر هێنانیه‌ پێشه‌وه‌ ، ته‌نانه‌ت له‌ شێوه‌ی دانیشتنی ناو په‌رله‌مان ئیسلامیه‌کان هیچ کاتێک له‌ته‌نیشت ژنانه‌وه‌ دانانیشن  ، ته‌نانه‌ت وایان لێ هاتووه‌ که‌ له‌ بڵندگۆی مزگه‌وته‌کانه‌وه‌ فتوای کوشتنی خه‌ڵکانی ئازادیخواز و کۆمۆنیست وڕۆشنبیران ده‌ده‌ن ، به‌ڵام لێپرسراوان جورئه‌ت ناکه‌ن له‌به‌رامبه‌ریاندا بێنه‌ وه‌ڵام ، ڕاوه‌دونانی نوسه‌ران ، داخستنی ڕۆژنامه‌کان شان به‌شانی ناسیونالیسته‌کان ، کارێکی کردووه‌ ئیسلامی سیاسی ساده‌ترین بابه‌ت  له‌سه‌ر ڕوپه‌ری ڕۆژنامه‌کان ده‌خه‌نه‌ ژێر سانسۆر و له‌بڵندگۆی مزگه‌وته‌کانه‌وه‌ هاوار  هاوار ده‌ست پێده‌که‌ن و لێپرسراوانی حکومی ده‌خه‌نه‌ ژێر پرسیار به‌وه‌ی ئه‌و بابه‌تانه‌ و ڕۆژنامه‌که‌و نوسه‌ره‌که‌ی ده‌بێت ڕه‌جم بکرێت  و ڕاوه‌دووبنرێت ، به‌مه‌ش ده‌سه‌ڵاتداران دێن به‌پیریانه‌وه‌ و گوێڕایه‌ڵیان ده‌که‌ن و ده‌بنه‌ پشتیوانی ئیسلامی سیاسی ، بۆیه‌ ده‌بێت هه‌رچی زووه‌ به‌ر به‌ ئیسلامی سیاسی بگیرێت ، وه‌ ڕێگه‌یان پێ نه‌درێت که‌ هه‌رچیه‌کیان ویست بیبه‌نه‌ سه‌ر ، ده‌بێت ئه‌وان مل که‌چ بن بۆ خواستی جه‌ماوه‌ر نه‌ک جه‌ماوه‌ر مل که‌چی ئیسلامه‌کان بێت .