هیدایه‌ت مه‌لا عه‌لی

خه‌ڵکی هه‌ڵه‌بجه‌ کورتیان نه‌هێناوه‌ له‌ وه‌عد و به‌ڵێنی جێبه‌جێ نه‌کراو ، به‌ڵام پێوویستیان به‌ ئاو کاره‌با هه‌یه‌ ، خه‌ڵکی هه‌ڵه‌بجه‌ که‌میان نه‌هێنا له‌ به‌خشینی قوربانی و چه‌شتنی ئازاری زۆر ، به‌ڵام هه‌تا ئێستاش برینداره‌کانی کیمیاباران به‌ده‌م ژانه‌وه‌ ئه‌تلێنه‌وه‌ ، کیمیابارانی هه‌ڵه‌بجه‌ بووبه ‌هۆکاری به‌ده‌ست هێنانی ده‌یان ده‌سکه‌وتی سیاسی و ئابوری بۆ ده‌سه‌ڵاتداران ، به‌ڵام کۆڵان و شه‌قامه‌کانی هه‌ڵه‌بجه‌ هه‌مووی قوڕاو چڵپاوه‌ ، ده‌سه‌ڵاتداران زۆر ناوی هه‌ڵه‌بجه‌و خه‌ڵکه‌که‌ی دێنن ، به‌ڵام ده‌سه‌ڵات گوێ له‌ داخوازییه‌کانی خه‌ڵکی هه‌ڵه‌بجه‌ ناگرێت ، خه‌ڵکی هه‌ڵه‌بجه‌ بۆ پیاهه‌ڵدان و هۆنینه‌وه‌ی قسه‌ی ڕه‌ونقدار یه‌که‌من ، به‌ڵام خوێندکارانی ئه‌م شاره‌ له‌به‌ر چرا سه‌عی ده‌که‌ن و گه‌‌نجه‌کانیشی ته‌نها ناوبازاڕ شکده‌به‌ن بۆ به‌سه‌ر بردنی کاته‌کانیان ، خه‌ڵکی هه‌ڵه‌بجه‌ زۆر کۆنفراس و کۆبونه‌وه‌یان بۆ ده‌کرێت ، به‌ڵام هه‌تا ئێستاش ته‌واو ڕوون نییه‌ ئاو هه‌وای ئه‌و شاره‌ بۆ ژیان ده‌ست ده‌دات یان نا ، خه‌ڵکی هه‌ڵه‌بجه‌ دوای گه‌ڕانه‌وه‌یان بۆ شاره‌که‌یان له‌ ئازاری 1991 وه‌ به‌م شێوه‌یه‌ ده‌ژین ،خه‌ڵکی هه‌ڵه‌بجه‌ هه‌موو ساڵێک له‌یادی ساڵڕۆژی کیمیابارانی شاره‌که‌یان به‌شێوه‌ی جۆراو جۆر ناره‌زایه‌تی ده‌رده‌بڕن و خوازیاری ژیانێکی ئینسانی و ئارام و شایسته‌ به‌خۆیانن ، با له‌یادی 19هه‌مین ساڵڕۆژی کیمیابارانی هه‌ڵه‌بجه‌دا پشتیوانی له‌ داواکاری و خواسته‌کانی خه‌ڵکی هه‌ڵه‌بجه‌ بکه‌ین و به‌ده‌سه‌ڵاتدارانی کوردوستان بڵێین وه‌ڵام نه‌دانه‌وه‌ به‌ داواکارییه‌کانی خه‌ڵکی هه‌ڵه‌بجه هیچ ته‌بریرێک هه‌ڵناگرێت و داواده‌که‌ین به‌زووترین کات وه‌ڵام به داخوازیی و مافه‌سه‌ره‌تاییه‌کانیان بده‌نه‌وه‌ .