خاڵه‌به‌کر 

چاوه‌کانت شێتێتیان لێ ئه‌بارێ...،

وێڵم مه‌که،زووه‌ جارێ..!

کۆرپه‌م، ده‌سته‌مۆم که‌،وه‌لام مه‌نێ،بێ بڕیارێ..

           * * *

وێڵم مه‌که‌..!

که‌ژاوه‌که‌م هه‌ڵده‌ره‌وه‌..!

باقومێ ئاسوده‌یی،له‌ناو ڕه‌زی عیشقی ته‌ڕتا بخۆمه‌وه‌..،

      * * *                 

وێڵم مه‌که‌..!؟

که‌ژاوه‌که‌م هه‌ڵده‌ره‌وه‌..!

تابه‌تاوتر، به‌ده‌م سێوێکی،ئیلاهیی،سه‌ر سینگته‌وه‌،

گڕوگاڵ که‌م و،بتریقێمه‌وه‌..!

* * *

    وێڵم مه‌که‌..! 

بادوور یان نزیک،نه‌که‌وینه‌ سه‌ر هیچ زارێ..،

بڵێن عاشق و مه‌عشوق، چ نادورنه‌وه‌،جگه‌ له‌خارێ..              

* * *

وێڵم مه‌که‌..! 

پێکێ له‌عه‌شقی کۆرپه‌ییم بخۆره‌وه‌..!

تا،له‌گه‌ڵ مه‌ست بوونی ئاهه‌کانتا..،

به‌حه‌سره‌ته‌وه‌..،

گه‌ردیله‌ به‌جێماوه‌کانی سه‌ر لێوت،به‌لێوه‌کانم بسڕمه‌وه‌..!

* * *

وێڵم مه‌که‌..!

خۆ،له‌به‌ر په‌نجه‌ره‌ی کراوه‌تا تاقه‌که‌س بووم..،

شه‌ویش نه‌بوو،له‌گه‌ڵ خورپه‌ی بێ ده‌نگیتا،

به‌بێ ده‌نگی،

شێتیت نه‌نێمه‌ بن سه‌رم..،

 * * *

وێڵم مه‌که‌..!

خۆ،دوێنێ گه‌رمتر له‌ئێستا سڵاوت لێ کردم..،

نه‌شئه‌ی شێتی له‌ده‌رونما مه‌ڕه‌وێنه‌..!

دڵ به‌به‌رێوه‌ نه‌ما..،

گرفتارم..،

بۆگوزه‌رانی شێتێتیم،خوناوی ووشک ئه‌ڕێژم،

* * *

وێڵم مه‌که‌..!

سه‌وداسه‌رم،

بۆ خه‌مه‌کانت ڕه‌نجده‌رم..!

بۆ ڕوخسارت،کائینێکی ده‌ربه‌ده‌رم..،

ئه‌ی چه‌مه‌نی دوا ساته‌کانی په‌نهانی عومرم..!

* * *

وێڵم مه‌که‌..!

ئه‌ی،دوا ووشه‌ په‌مه‌ێێکانی دوا قه‌سیده‌م،

ئه‌ی نه‌عره‌ته‌ بێ ئان و ساته‌که‌ی گرمه‌ گرمی چاوه‌که‌م،

ئه‌ی مه‌زرا سه‌وزه‌ جوانه‌ بێ هاوتاکه‌ی ئه‌ندێشه‌م..!

* *

وێڵم مه‌که‌..!

مێژوو دووباره‌ ئه‌بێته‌وه،

لێ ژیان..!!

ئه‌به‌د ئه‌به‌د ناژێته‌وه‌...!

سا،که‌ژاوه‌که‌م هه‌ڵده‌ره‌وه..،‌

تابه‌تاوتر، به‌ده‌م سێوێکی،ئیلاهیی،سه‌ر سینگته‌وه‌،

گڕوگاڵ که‌م و،بتریقێمه‌وه‌..!

* * *