عه‌شق و سوتان

  عه‌بدول شارباژێڕی

 

 

                        -بۆ یادی شه‌هید نامیقی حه‌مه‌چه‌ته‌ گورگه‌یه‌ری-

 

کام کێوه‌ سه‌خته‌ له‌م وڵاته‌دا

به‌ژن و باڵاکه‌ی

به‌ لوتکه‌ی به‌رزی عه‌شقت نه‌ئه‌گه‌ی.

کام کانیاو وه‌کو چاوی قرژانگه‌

ڕوون و بێگه‌ردیی

به‌ ناخی دڵ و ده‌رووت نه‌ئه‌گه‌ی.

کاتێ ئه‌تبینی که‌ هه‌تیوبارێ

یا لێقه‌وماوێ

به‌ سکێ تێرن و به‌ سکێ برسی،

ئه‌بووه‌ خولیایه‌ک ئه‌چووه‌ سه‌رته‌وه‌

هه‌ر پێچت ئه‌دا و شه‌و نه‌ئه‌نووستی.

کاتێ ئه‌تبینی که‌ کرێکارێ

یاخود هه‌ژارێ

له‌به‌ر ته‌نووری نه‌بوونیدایه‌ و

ئاره‌قی شین و مۆری ده‌رئه‌دا.

ئه‌بووه‌ ئاگرێک وای ڕاپێچ ئه‌دای

تا له‌ ده‌روونتا بۆچه‌ک هه‌ڵئه‌سا

هه‌ر ئه‌و عه‌شقه‌ بوو وه‌های لێکردی

ماوه‌یه‌کی زۆر له‌ ژێرزه‌مینا

له‌ خه‌ڵوه‌تدا بی.

گه‌ر به‌ تۆ بوایه‌

خه‌ڵوه‌ پێشانگای که‌لله‌سه‌ر بوایه‌

چ بۆ به‌راز و که‌ته‌ی چه‌ته‌وڵ.

چ بۆ زۆردار و سپڵه‌ی خاک و گڵ.

هه‌ر ئه‌و عه‌شقه‌ بوو وای له‌ که‌لله‌دای

به‌ کوچه‌کانا

بوویته‌ دێوانه‌.

به‌دوای سه‌ریانا.

داخی ئه‌و دڵه‌ پڕ له‌ تۆڵه‌یه‌ت

چاک پێئه‌ڕشتن.

داخت ئه‌کردن.

 

په‌ییان پێ بردی

له‌بن باڵیاندای.

له‌ناو کۆڵان و جاده‌ی -خه‌بات-ا

ئه‌ڵقه‌ به‌ئه‌ڵقه‌ چوارده‌وره‌یاندان.

ئه‌و بوده‌ڵانه‌ سامیان لێکردن.

زوو دایانگرتن.

هاوڕێکه‌ت به‌رکه‌وت.

ئه‌ویان دابێژا و شه‌ڵاڵی خوێن که‌وت.

دوای به‌ره‌نگاری

وه‌کو هه‌ڵۆیه‌ك تۆیان تیاهه‌ستای.

ئه‌ڵقه‌به‌ئه‌ڵقه‌ت

له‌ گه‌مارۆکه‌ت له‌یه‌ک ترازان.

بۆی ده‌رباز بووی و ئه‌و داوه‌ت پسان.

چوویته‌ سه‌ر ڕێگای کۆچه‌رییه‌کان و

تێشووی کۆچێکی هات و نه‌هاتت

به‌سته‌ که‌مه‌ر و

بوویته‌ هاوه‌ڵی

دار و دره‌ختی ئه‌و سه‌ر کێوانه‌.

بوویته‌ ڕێبواری ڕێگای خه‌بات و

عه‌شقی شیرینی ئه‌م کوردستانه‌.

وه‌ک فه‌رهادانه‌.

به‌و هیوایه‌وه‌ تا ڕۆژێ زووتر

ده‌ستکه‌یته‌ ملی مه‌رام و مه‌به‌ست.

ئاگر به‌رده‌یته‌ خه‌رمانی ناحه‌ز.

سه‌ر بخه‌یته‌ سه‌ر باسک و قۆڵی هه‌ست.

دوای ماوه‌یه‌ زۆر

له‌ لوتکه‌ ڕۆییت داگه‌ڕای بۆ شار

دوعاخوازیت کرد

له‌ سه‌نگه‌ره‌کان

له‌ دۆڵ و چیا و له‌ ئاواییه‌کان.

له‌ دارچنار و گوێز و به‌ڕووه‌کان.

له‌ نیوه‌ شه‌وا

به‌ره‌و هه‌واری ماڵه‌ ناسیاوێ

خۆت به‌ شار گه‌یان.

له‌ ڕێی عه‌شقتا عه‌شقی گه‌ل و خاک

زۆر به‌ سانایی که‌وتیته‌ ناو داو.

په‌ییان پێ بردی

له‌ ناخافڵا دایان به‌ سه‌رتا

به‌ کڵاو گیرای!.

له‌ قه‌فه‌زێکا له‌ قاڵب درای.

وه‌ک زه‌رده‌واڵه‌

وه‌ک دووپشک و مار

پێوه‌یان ئه‌دای.

ڕۆژی چه‌ند جارێ

سارد ئه‌بوویته‌وه‌

گه‌رم ئه‌بوویته‌وه‌.

وه‌کو لافاوێ

عافواتێ هات و

له‌ناو قه‌فه‌زا په‌لیان گرتیت و

مه‌ره‌خه‌س کرای.

وه‌ک هه‌ڵۆ چونکه‌

متووی لووتکه‌ بووی

خۆت پێنه‌گیرا

داته‌وه‌ چیا.

          *  *  *

ئای له‌و ساڵه‌ وه‌ختانه‌

خه‌می هه‌موو هه‌ژار و

چه‌وساوه‌ت له‌کۆڵنابوو.

گوندا و گوند و

ماڵ به‌ ماڵ.

یاڵه‌ویاڵ و

کوخ به‌ کوخ.

به‌ناو جوتیاره‌کانا

ئه‌تگێڕا و ئه‌تکرده‌وه‌

بێ ماندووبوون بێ پشوو.

تۆی کۆچه‌ر شه‌وه‌ها

ئاسمان بۆت لێفه‌بوو

زه‌وی بۆت ڕاخه‌ربوو.

خه‌ریته‌ت سه‌رین بوو.

ساڵانی ژینی خۆت کرده‌ چرای

پێکراوی

ته‌مه‌نی کۆچه‌ری.

قه‌ت بێزار نه‌ ئه‌بووی.

گه‌ر تۆف و

ڕه‌هێڵه‌ و

بۆران و

با بوایه‌.

گوێسوانه‌ چلوره‌ به‌ند بوایه‌.

لادێیه‌ هه‌بووبێ له‌م خاکه‌

ڕۆژێک له‌ ڕۆژانێ

تۆ ڕێت تیا نه‌کردبێ؟

شێرێکی زاماری ناو بێشه‌و چیابووی

سپێرێ هه‌بووبێ له‌ کوێستان

له‌م دیوو له‌ودیوی کوردستان

ڕاوت تیا نه‌کردبێ

به‌رامبه‌ر دوژمنان؟.

چونکه‌ تۆ دڵساف بووی

جارێ دی به‌ پیلان

به‌ره‌و شار داگه‌ڕای

داوێکیان بۆ ته‌نیت بێوێنه‌ دایان نای!

نا خافڵ

له‌ گوچه‌ی سه‌ر سه‌ده‌ی-دارۆغا-

بۆ دواجار که‌وتییه‌ داو

له‌ناکاو گوێم لێبوو

ڕێژنه‌ی چه‌ند چه‌کێ هات.

چ داوێ؟ بۆسه‌یێ

ئه‌وان بوون‌ به‌ڕاوچی و

تۆ نێچیر.

لێت بوونه‌ نیشانچی و

تۆ نیشان.

له‌ ناکاو دا بێژرای

وا بێژرای تیاسوتای.

ئه‌ی هه‌ڵۆی سه‌ر لوتکه‌ی

بۆ کوچه‌ داگه‌ڕاو.

ئه‌ی پشکۆی وه‌جاخی

ناو شاخی پڕ به‌فراو.

دێوانه‌ سه‌رمه‌سته‌

عاشقه‌که‌ی خۆره‌تاو.

شه‌هیدبووی

شادنه‌بووی به‌ باڵای

فریشته‌ی خۆره‌تاو.

           

 

04/07/2007

 

goran@dengekan.com

 

dangakan@yahoo.ca