: و‌اده‌زانم که‌ دوێنێ بوو
پۆلی یه‌ک بووم ،
یان پۆلی دوو...
منی شه‌رمنۆکه‌ی که‌مدوو ،
به‌ حینجه‌حینج ، سه‌روگوێچکه‌ی ووشه‌کانم
...... . بۆ ڕاده‌بوو
واده‌زانم که‌ دوێنێ بوو:
مام که‌ریمی گو‌ێچکه‌ڕه‌شی ) دراوسێمان )
بۆ بژێووی...بۆ گووزه‌ران.... 
لێو به‌ سیخار ،
ده‌ست به‌ گۆپاڵی داربه‌ڕوو ،
هه‌رده‌م به‌دوای
گوێدرێژێکی مل به‌ریشمه‌ی زه‌نگووڵه‌دار
به‌ ڕێوه‌ بوو...
تا گوێدرێژی زه‌نگووڵه‌دار
ده‌گه‌یشته‌ به‌ر دوکانه‌ سه‌رقاڵه‌که‌ی
,( سۆفی سه‌لیم )  
به‌ گۆپاڵی ده‌ستی قورسی ( لالۆ که‌ریم) 
دادو بێداد..... .....
ده‌ها شوولی ته‌ری ده‌خوارد.
واده‌زانم هه‌ر دوێنێ بوو:
که‌ ( مامو‌ستا ) ڕایده‌گرتین.....
به‌ داره‌وه‌ ،
ده‌رگای پۆلی لێده‌گرتین.....
وامده‌زانی ... ماموستاکه‌م
کتومت هه‌ر ( مام که‌ریمه)‌
منی گوێقووته‌ی شه‌رمنیش
گوێدرێژێکی دۆغریمه.‌ 

* * *
واده‌زانم دوێنێ شه‌و بوو:
له‌ کاتێکا منی نه‌فام ،
له‌ناو چیغی ده‌ورانده‌وری ته‌خته‌به‌ندی هاوینانا ،
له‌ باوه‌شی دایکمه‌وه‌ ،

ئه‌ستێره‌کانم ده‌ژماردن
گڤه‌گڤی شنه‌ی شه‌ماڵ
زرنگه‌زرنگی زه‌نگووڵه‌که‌ی
ئه‌م گوێدرێژه‌ی بۆ ده‌هێنام ،
وام هه‌ست ده‌کرد
ئه‌م زه‌نگووڵه‌ به‌و ئاوازه‌ پڕ غوو‌ربه‌ته‌
به‌ گوێجکه‌ی ( مام که‌ریم ) ده‌ڵێ:
..... ده‌ سه‌یرکه‌ .....من تا سه‌حه‌ر"
به‌ ئه‌فسانه‌ی ئه‌و ئاوازه‌
راتده‌ژه‌نم....
ئه‌ی تۆ بۆچی
کۆنه‌به‌رگت دانادری ،
ئه‌و گؤپاڵه‌ له‌سه‌ر پشتم.......له‌ گه‌ردنم...
هه‌ڵناگری !؟"
واده‌زانم هه‌ر دوێنێ بوو: 
که‌ سبه‌ینان 
له‌ حه‌وشه‌که‌ی قوتابخانه‌ ،
چین چین ، به‌ریز
وه‌ک گوڵاڵه‌ی نه‌خشینراوی رۆخی
لاکێشه‌ مافووری جوانی ( ته‌ورێز) 
ڕاده‌وه‌ستاین....
کۆڕاڵ..کۆڕال....
له‌گه‌ڵ بانگی که‌ڵه‌شێرو
قاسپه‌ی که‌وی ده‌رو ناوماڵ...
به‌ سرووده‌ خۆشه‌کانی
( بیلاله‌فه‌ندی ) و ( باکوری )
خه‌نده‌و گوڵمان ده‌خسته‌ سه‌ر
لێوی شارێ
نقووم بوو بوو له‌ ناسووری... 
له‌و کاتانه...‌...به‌ په‌نهانی...
به‌ خه‌یاڵی گو‌ێدرێژه‌که‌ی ( لالۆ که‌ریم)
له‌ناو دڵی خۆمدا ده‌مگووت: 
"! مامو‌ستا گیان
ئێستا ئێمه‌ ...هه‌ر هه‌موومان ،
بۆ چاوی تۆ .....بۆ شاری تۆ... 
وا سروودو ستران ده‌چڕین...
که‌چی هه‌ردوای ده‌مێکی تر
هه‌ر هه‌موومان
له‌ ئازاری دارهه‌ناره‌که‌ی ده‌ستی تۆ
ده‌بێ بگرین.....
ئه‌سرینی چاوانمان بسڕین !!"

* * *

چۆن ده‌توانم
که‌ ئه‌م په‌رده‌ خماوییه‌ی شانۆی ته‌مه‌ن
دادامه‌وه‌ !؟
ئێستێش له‌دوای
نیوسه‌ده‌ ، له‌و رۆژگاره‌وه:‌
که‌ دارده‌ستی ماموستاێک
له‌نێو چاوانما ده‌چه‌قێ ،
گۆماوی یادم ده‌شڵه‌قێ:
وا هه‌ست ده‌که‌وم
که‌ ئه‌و زاته‌ ... روخسار گوڵه‌ "
له‌ کات و شوێنێکی ترا ،
ئه‌ویش ( لالۆ که‌ریمێکی ) کوێره‌واری داخ له‌ دڵه.‌ 
خۆێشم ، گو‌ێدرێژه‌ پیره‌که‌م... 
به‌ڵام... به‌نده...‌
گوێدرێژێکی بێ زه‌نگووڵ !."‌

------------------------------------------
) -لالۆ که‌ریم) باخچه‌وانێکی روحسووکی بناری چیای (باواجی) بوو له‌ نزیک گو‌ندی (کێله‌خواره)ی شاری (کۆیه)‌

-بیلاله‌فه‌ندی):له‌ په‌نجاکاندا) ماموستای به‌ناوبانگی مۆزیک و هونه‌ر بوو له‌ شاری (کۆیه))

 - (باکوری): گۆرانیبێژی به‌ناوبانکی کورد