ئه‌وا جاریکی دی هاتنه‌وه ‌و گه‌رده‌لوولی مه‌رگیان بۆ هێنای ، له‌ ئه‌شکه‌وته‌ تاریکه‌کانی مێژووی نه‌گریسیانه‌وه‌ هاتن ، له‌ سه‌ره‌تای ساڵی تازه‌ و به‌هاردا گوڵ ونێرگز و نه‌ورۆزیان به‌ یه‌که‌وه‌ سه‌ربڕی، بزه‌ی منداڵانی شاریان له‌گه‌ڵ ڕه‌نگه‌کانی په‌لکه‌ زێڕینه‌ ئه‌نفال کرد ،  وه‌ک سوپاکه‌ی هۆلاکۆ کاغه‌ز و کتێبیان سووتاند ، خوێندنگه‌یان وێران کرد . به‌ڵێ ، ئه‌وان وا له‌ خاچمان ده‌ده‌ن و ئێمه‌ش به‌ دیار ڕه‌حمه‌تی بڕیاره‌ نه‌زۆکه‌کانه‌وه‌ خه‌وه‌نوچکێمانه‌ .

 تۆیش دڵه‌ زیندووه‌که‌ی گه‌رمیان ، ماندوونه‌ناسه‌ ده‌ست و مه‌چه‌ک نه‌وتاویه‌که‌ی هه‌رگیز نه‌سره‌وتووم ، کێ بێ و له‌ تۆ بریندارتر ، ئاواره‌تر و وێرانتر ؟؟ من نازانم له‌ ده‌روازه‌ی کام زامه‌وه‌ بتلاوێنمه‌وه‌ ، لایلایه‌ی کام دایکی هه‌ناو سووتاوت له‌ ئاوازیکی نوێ بۆ دابڕێژم . ئازای ئه‌ندامت هه‌ر زامه‌ و وه‌ک پاڵه‌وانێکی چه‌مووش هه‌ر به‌ پێوه‌ ڕاوه‌ستاوی ‌ .

 تۆ نه‌  ڕۆژی هێنده‌ دوور بی که‌ من هه‌رگیز پێت نه‌گه‌م ، نه‌ قودسیشی ئاواتێکی به‌دی نه‌هاتووی ژینم بی به ‌ده‌م هه‌نسکی تاسه‌وه‌ بۆ باوه‌شت ڕۆژ بکه‌مه‌وه‌ .  وه‌لێ هه‌رگیز چۆک دا مه‌ده ،  که‌ی ئه‌مه‌ تۆی ئاڵای سپیت هه‌ڵکردووه‌ و ده‌رگای ماڵت له‌سه‌ر گازه‌رای پشت کردۆته‌‌وه‌ ؟؟  چاره‌نووسی خۆت داوه‌ته‌ ده‌ست بازرگانه‌ ڕیسواکانی سه‌رده‌مه‌وه‌ ؟؟ چیتر چاو له‌ ده‌ست هیچ ناکه‌سێ مه‌به‌ ، تۆ گه‌دای ده‌رگای ئه‌وان نیت ، ئه‌وان چاو برسین و نوقمی ڵێڵایی ڕۆژی ڕه‌شی خۆیان بوون .  ئه‌م کۆتانه‌ له‌ ده‌ست و پێت بشکێنه‌ ، سه‌د و چل نه‌فره‌تیان لێ بکه‌ ، به‌ بێگومان و دوودڵی یاخی بوونی خۆت ڕابگه‌یه‌نه‌ ، تۆ هه‌یت یان نیت ؟؟ بڕیار بده‌ دوا بڕیار ، ئه‌م کۆیله‌تییه‌ تا که‌ی ؟؟ دڕکه‌ نامۆکان له‌ جه‌سته‌ت ده‌ربهێنه‌ و باخچه‌ی ناخت پڕ له‌ گوڵ  و شه‌وبۆ بکه‌.

له‌م مه‌رگه‌ساته‌وه‌ ژیان ده‌ستپێبکه‌وه‌ ، تۆ ئافه‌رێنه‌ری ئاگریت ، بڵێسه‌یه‌ک له‌ مه‌شخه‌ڵێکی نوێ هه‌ڵبکه‌ ، زۆر ده‌مێکه‌ بڵێسه‌ی ئه‌م مه‌شخه‌ڵانه‌ی ده‌ور و به‌رت خامۆش بوونه‌‌ . ڕابردووی خۆت له‌ یاد مه‌که‌ ، تۆ ئه‌مێستاش هه‌ر ئه‌و ڕۆڵه‌ی گه‌رمیانه‌ی که‌ له‌ کوێستان به‌ ده‌م ئازاری زامه‌وه‌ سروودی ڕێی خه‌بات ئه‌ڵێیته‌وه ‌.

6/4 / 2007

ستۆکهۆڵم