تێبینی:

گەرانەوەم بۆ وڵات لەم سیێ ساڵەی دوایێ بووە هۆی پچڕانم لە بڵاوكردنەوەی زنجیرەی ( بیرەوەریەكانم) لە سایتی ( دەنگەكان ) ی خۆشەویست ، لە دەرفەتی داهاتوپاش سەقامگیربونەوەمان لە ئوسترالیا بە ئومێدین درێژە بدەین بە بڵاوكردنەوەی بەشەكانی داهاتو ، داوای لێبوردن دەكەین لە خوێنەرانی بەرێز.. فایق

                                               
بابگەرێنەوە شاری كۆیە : قشڵە لەسەر بڵندو نێزیكترین گرد لە شار لە سەردەمی عوسمانیەكان بە بەردو گەچ دروست كراوە مەڵبەندی جەندرمەی ئەم كات بنكەی پۆلیس و بەندیخانەی سەردەمی حكومەتی عیراق ،تۆپی مانگی ( رمچان ) لە بەردەمی قشلە بەرانبەر مزگەوتی گەورە دامەزرابو، مەلای مزگەوت ( عەبدولرەحمان ) لەبەر كورتی باڵای ناسرابو بە مەلا ( فندق ) بۆ فتارو بانگدان دوگردەكەی نوێژێ لە بان گومبەتی مزگەوت رادەوەشاند تۆپەكەش لە بن قشلەَ گرمەی لێوە دەهات لەگەلأ هات وهاواری سەدان مناڵ و هەرزەكارو خەڵكانی كۆیە خۆشی بەربانگ ورۆژوشكاندن ..گردی قشلە گۆریكی زۆری بەسەریەوە بو سەدان دارە زەیتون دایپۆشتبو – دایكم لەم گۆرستانە شاردرایتەوە -- ، لە سەردانەكانم بۆ ئەورپای رۆژهەڵات گەلی َقشلەی لە شێوەی قشلەی كۆیە بەرچاو دەكەوێت گەرچی گەورەو بلندترن ، بۆ نمونە لە شاری ( نیش ) ی ( یوگسلاڤیا )ی پێشو نزیك سنوری دەوڵەتی بلگاریا ی دراوسێ قشلەیەكی عوسمانی زۆر گەورەو بلند هەیە هەر وەك خۆی ماوەتەوە بویتە ئاسەوارێك رۆژان بە سەدان گەشتیار سەردانی دەكەن لە هەمان قشلە شانۆیەكی گەورەیان تێدا دامەزراندووە گەڵێ ئاهەنگی میللی بە تایبەتی هی توركان ساڵانە تێدا ساز دەدرێ دەستكەوتیەكی تەواو بۆ حكومەت ئەهینیتە دی . ( نیش ) شاری دووەمە پاش ( بیوَگراد)ی پایتەخت زۆر جوان ورێك وپیًك فرەوان زۆربەی خەڵكانی توركن وابو لە ساڵانی دوا حەفتایەكان لە سەدەی رابوردو نیزیكەی حەفتەیك تێدا گوزەرانمان كرد .

هەروها بینای سەرای كۆیە كەوتوتە ناو شار لە گەرەكی ( بەفریقەندی) ئەمیش لە دەورانی عوسمانیەكان بە بەردو گەچ دروست كراوە هەڵبەتە لەم ماوەیە وەك پێویست دەستكاریەكی زۆری لێ كرا ، تا ئەم ساڵانەی دوایی حكومەتی كۆیە بە گشتی لەم بینایە كۆ بوبونەوە بە قایمقام ودادگاو پۆلیس و گشت فەرمانبەران گەرچی چەند ژۆرێ لە بینایەكە جیا كرابۆوە بۆ ( یانەی فەمانبەران ) . پۆستەخانە بریتی بولە تاكە ژورێ لە كۆشكی بینایەكی نارێك بەرانبەر مزگەوتی ( مەلای رەش )چەند سەد مەترێ لە ماڵی ئێمە دور . خوارەوەی بیناكە ماڵێ بەرێوەبەری پۆستەخانەكە بو بە ناو ( حەمدی ئەفەندی ) لە خەڵكانی شاری هەولێر كورانی( فەوزی و غازی وفەیسەل و سەلاحەدین ) هاوقوتابیمان بون لەوان بچوكتر گاریق ( تاریق ) گشتیان زۆربە رەوشت و پاكوخاوێن وپۆشتەو رێك وپێك لەوانەكان پێشكەوتو . خێزانی حەمدی فەندی دۆستایەتیان لە گەڵ ماڵێ ئێمە گەرم لە گەڵ باوك و دایكم بە توركی ئەدوان ، كەڵ و پەڵی دایرە بریتی بو بە لە مێزێ ودو كورسی شڕ لە گەڵ ( بدالەیەك – واتە بگۆر ) لە خوارەوەش ێندوقێ ئاسن سور بۆیەكرابو بە قەد دیوار هەڵواسرابو بۆ نامە كۆكردنەوە ، بگۆرەكە هەر بە خەرەك دەچو بەتەل لە سەر ئەستونی دارتا ( بەدالەی --- بگۆری ) ی هەولێربەسترابۆوە. دارتەلەكان زۆر شڕ ونابوت تەلە كان لە وەرزی زستان گەلێ جار ئەپچڕان . عگاو الله –( عەتاوڵاە ) تاكە فەرمانبەر پاش حەمدی فەندی –گشت كاری پۆستەخانەكە لە ئەستۆبو وابزانم ئەمیش لە خەڵكانی كەركوك ، كەواو چاكەت ومیشكی لەسەر ، عەتاولاە لە كاتی قسەكردنی لەگەڵ هەولێر دەسكە خەرەكەكەی بادەدا پڕ بە شاری كۆیە هاواری كابرای سەر بەدالەی هەولێری دەكرد --- دەیوت هەولێر....كورە هەولێر ... واوای لێكرای جواب دەوە .. هەزار جوێن بە فلسێ ...؟؟ بەم شێوەیە ئەمەی لە پۆستەخانە دەوترا و تەلەفۆن دەكرا زۆربەی خەڵكانی شار گوێبیست دەبون بە تایبەتی لە شەوانی هاوین . عەتالاە زۆر دەترسا شەوێ هاوین خەڵكان لە بانان خەوتوبون، هەرئەوەندەیان زانی هاواردەكات دەڵی بمگەنێ مار خواردمی ..؟ كە بەهانای چون دەركەوت پارچە گوریسیكی ئەستور لەسەر ریگا بۆ دانابۆوە ، ئیدی مام عەتا شەوان ئەم كۆلانەی تەرك كرد ئەم هەر بە ماری دەزانی ..

لە بارەی داب ونەرەتی خەڵكانی كۆیە : ژن هینان وگوازتنەوەی بونەكی زۆر گرنگ بو لە ژیانی كۆمەڵایەتی ساڵێ گەڵێ جار روی دەدا دایك -- بە دەگمەن كور - كیژەی دەست نیشان دەكرد بۆ خواستن، بە نهێنی دایكی كیژە بەم نیازە ئاگادار دەكرا هەڵبەتە ئەمیش لە لای خۆیەوە هەر نەبی بۆ هاوسەری وكیژەی دەدركاند . ( لەم مەیانە بەزۆری كیژ هیچ رای نەبو لە خودی میركردن تەنانەت لە كورەی داخوازیكەر لە هەمان كات زۆر جار لەمانە بو كورەو كیژە هەرگیز یەكتریان نە ناسیوەو نە دیتوە لەگەڵ وەش هەر نارەزایەك لە كیژەوە لە میركردنی بە چەشنێ دی لە قەڵەم دەدرا بۆیە بە توندی بەرهەڵستی لێ دەكرا ) بە هەر حاڵ پاش رەزامەندی ماڵی كیژە گفتوگۆ لە مەیان هەردو خیزان – بە تایبەتی هەردو دایك – دەستی پێ دەكرد لە بارەی مارەیی پاش وپێش جل وبەرگ و زیروخشلی بوك وچۆنیەتی گوازتنەوەو ماڵ دانان ، هەندێ جار گفتوگۆ بە سانا نەدبراوە كۆسپەی دەكەوتە بەر پێویستی بە پیاوانی ماقول وبەتەمەن وخزمانی هەردولای دەكرد بۆ جیبەجی كردنی ئەم كارە خیرە .لە لایەكی دی گەڵێ جارلە هەندێ خێزانی هەژار یا لەبەر چاوچنۆكی دایكی كیژە داوای ( شیربای ) ی – واتە مافی دایك لەشیردانی مناڵ -- دەكرد لە مالێ كورە بە - پارەی كاش - ئەم داوا كردنە زۆر باو نەبو و پەسند نەدەكرا وا لە قەڵەم دەدرا كە كیژە ئەفرۆشرێ . ئیدی كە هەمو شتی پەیوەندار بەم پرۆسەیە ئاسایی دەبو لە رۆژی دیاریكراو زۆربەی -- پاش بانگی عەسر یا مەغریبێكی زوو-- باوكی كورە و چەند دۆست و دراوسێ و خزمان لەگەڵ مەلای گەرەك هەروها دایكی كورە ودۆست دراوسَی وخزمانی ، سەردانی ماڵێ كیژەی دەكەن . ئەمانیش لای خۆیانەوە بە هەمان شێوە بە گەرمی پیشوازیان لێ دەكەن . لە دانشتە دو قۆڵیەكە داخوازی كیژە دەكرێ و فاتحە دەخوندرێ وشەربەت دەخورێتەوە ، لە دیوی ماڵەوەش لە لایەن ماڵێ كورە چەند ( كلیلیەك ) لێ دەدرێ لە هەمان كات دایكی كورە نیشانەی دەستگیرانی كە بریتیە لە پارچە زێرەك بە كیژەیەوە دەكات لە گەڵ ئەنگوستیلەیەكی زێر بۆ پەنجەی دەستی چەپەی . شایانی باسە لەم سەردەمە كیژبە زۆری بە خشڵ وزێر لە ناو كۆمەڵ هەڵدەسنگڕا بۆیە هەردەم دایكی داوای پارچە زێری گەورەی لەماڵی كورەی دەكرد تەنانەت داخوازكەران لە پیاوانی ناسراووماقول وبەجێ جێی شانازی ماڵی كیژەبو. پاش كێشەو پێشەی مەراسمی داخوازی زۆر جار بەماوەكی كورت - لەبەر چاونەفسی ناحەزان وبەستنەوەی كیژە - ماڵێ كورە بەخۆ دەكەوتن بۆ مارەكردنی، ئیدی لە رۆژی دیاریكراو كیژە لە ماڵێ خۆیان لە لایەن مەلا مارە دەكراو بەم بۆنە شیرنەمەنی لەسەر ئامادەبوان دابەش دەكرا دراوسێی ودۆستانیشی دەگرتەوە. بە دەرچونی قانونی ( الاحوال الشخصية) – باری كەسایەتی – لە ساڵانی پەنجاكانەوە لە سەدەی رابوردو ئەبواو وپێویستە مارەیی لە دادگای – باری كەسایەتی – لە لایەن دادوەر بە رەسمی مارە بكرێ ، لە گەڵ وەش گەڵێ جار پێشەكی لای مەلا مارە دەكرێ ، مارەی كیژەش بە زۆری بریتی بو لە 19 میسقالی زێر . هەڵبەتە پاش مارەیی ماڵێ كورە دەكەوتنە پاك وپوكی گوازتنەوەی كیژە بۆ لای مێردی ئەمەش بە گوێرەی بارودۆخی كورەی ئابوری و كۆمەڵایەتی كەم و زۆری ئەخایەند . لە مەراسیمی گوازتنەوە كە هەر لە رۆژی --دوشەمە و پینج شەمە -- ئەنجام دەدرا دەستە خوشكانی بوك هەندێ لە ئافرەتانی خزم ودۆست ودراوسێ لە ماڵی كیژەی كۆدەبونەوە بۆ ئامادەكردنی كیژە بە خەنە گرتنەوەو گەرماو رازاندنەوەی بە بەرگ و خشڵەكانی بوكێنی لەگەڵ چەند وردە گۆرانی و بەستەی تایبەت بە هەڵدان بە كچێنی وشوكردن ، هەڵبەتە پێش رۆژی گوازتنەوە باروبارگەو جیهازی بوك ئەگوَزرایەوە بۆ ماڵی كورە -- زۆربە ی ماڵی باوكی – بەڵام بۆ گوندو دیهات ئەم كارە لە هەمان رۆژی گوازتنەوە ئەنجام دەدرا . رۆژی گوازتنەوە -- چێشتان یا پاشنیوەرۆ -- باوكی كورە گەر نەبو- برا گەورەی ، مامی ، خاڵی ،بوكی - پەلەكێش دەكرد بە كلیلی وهات وهاواری خێزانی ماڵی كورە وخزمان و دۆست ودراوسێ بەرەو ماڵی زاوا ، گەر ماڵەكە دوربا بە سواری وڵاغ ئەگوازترایەوە پیاوێ رێشمەی وڵاغەكەی دەگرت دوانی دی هەردولای بوك بۆ پاراستنی لەكەوتن ، لە هەردو حاڵەتا كیژێ پارچەلە بە ئاوێنەیەكی گەورەوە روی لە بوك بو لە پێشی ریێ دەكرد بە مانای روناكی و شادی وبەختەوەری بۆ بوك ، هەڵبەتە كە ئوتومبێل باو بو بۆ ئەم گوازتنەوەیە بەكار دەهات گەر ماڵی كورە دور بێت یا نزیك چەند جارێ ئوتومبێلەكە لە گەڵ چەند ئوتوموبێلی خزمان ودۆست وداواتكراوان لە نێو شار ئەسورایەوە گەلێ جار بە دۆڵ وزورنا یا بە چەند ئامێری موسیقای تازە باو . شایانی وتنە مەراسیمی گوازتنەوەی بوك لە نێو خێزانانی دەوڵەمەند لە شار ، ئاغاو عەشایرو دیهات لە دەرەوەی شار بە جۆری دی سازدەكرا ، شایی رەشبەلەك و دۆل وزورنا وتەقە كردن ورمبازی بۆ ماوەی سێ رۆژی ئەخایەند لە هەمان كات جەمی سی رۆژ ئامادە دەكرا ، جارواش بوە لە سێ رۆژ زیاتر بەردەوام بووە ، ئەگێرنەوە جارێ لە گوندێ لە دەشتی شارەزور ئاهەنگی گوازتنەوەی بوك بۆ حەفتەیەكی رەبەق بەردەوام بووە، هەردەم نادەم بە گزادەیەك لەم ناوچەیە بە چەند سوارێكەوە لە نێو ئاهەنگەكەدا ئامادە بۆون بۆ رێزلێنانی بەگزادەو دەستوری عەشایری جەمی خواردن و شایی و دۆڵ وزورنا تازە دەبێتەوە ،گوندەكە لەم بەزم وهەرایە كاول دەبی ئاژەلەكانیان لە تێنان و وبرسیایەتی مرداردەبنەوە ئەوەی چاندراوە ئیشك دەبێت بری ئازۆقەو خواردنەمەنی لە ئاوایی نامینێت . كە بوك گەیشتە ماڵی كورە جگە لە سەرشۆری ناسراو بە بەربوك هەندێ جار دایكی كورەش لە گەڵ دا – چاوەروانی بە زاوا بونی كورەی دەكات ئەمێش بە پارچە قوماشی چەند درۆپە خویناویەكەی سەربەرزی ئەگەیاندە ماڵی كیژە لە هەمان كات پیاوەتی وخۆهەڵكێشان وخۆشی بۆ ماڵێ كورە ، هەڵبەتە ئەم چەند درۆپە خوینە بە دی نەكرێ كێشەكی دژوارو ئالۆز لە مەیان هەردو خیزان رودەدا ، پێشەكی كیژەی رەوانەی ماڵێ باوكی دەكرێ بە دوای ئەم گرفتە زۆری دەخایەند هەر نەبێ بە لێك جیا بونەوە .( هەندێ جار لە بنەرەتا كیژ لەبەر هەندێ هوَی فسیلوَجی ( پەردەی ) مێینەی ئاسایی نەبوە یا لە مناڵی لە كەوتنێ بێ وەی كیژە هەستی پیێ بكات پەردەی بە شێوەیەك پچراوە ئەشێی هەستی پێ كردبێت بەڵام لە شەرمان -- یا هەر بەهەندی نەزانیوە -- باسی نەكردوە ، گەرچی لە راستی دا زۆر جار باس كردنەكەشی ئەبوە كێشەكی گەورە . ) ... لە لایەكی دی زۆر جار كورە مام ئەبووە كێشەو كۆسپە لە پێش مێركردنی كیژ بە دەستوری فامیلی وعەشایری ئەم سەردەمە كیژ هی كورە ئامۆزایە تەنانەت خاوەن ژن ومناڵیش بێت- بۆ كەسی دی ناشێ بۆیە پێویست بو هەرچۆنی بێت ئەبی رازی بكرێت یاهەرنەبێ رەزامەندی وەرگیرێت . گەڵێ جار.بە پێچەوانە ئەبوە رك بەركیێ كیژە مێردی بە ئامۆزای نەدەكرد یا دایك وباوكی قایل نەدەبوون ، لەم مەیانە كیژە ئەمایەوە نە ئەم ئەیتوانی شوكات نە كەسیش داخوازیكاری دەبو . رۆژی دوایی پاش زاوابونی كورە ماڵی كیژە جەمی خواردنی بەیانی تایبەت بۆ ماڵی كورە دەنێرن بەم چەشنە سێ رۆژ بەردەوام . هەروها پاش ماوەیەكی زوو یا درەنگ ماڵی كورە لە گەڵ چەند خزمانی نیزیكی هەردولا لە ماڵی كیژە زۆربەی بۆ جەمی نیوەرۆ داوەتدەكرێن ، ئەم داواتە گەڵێ مانای دەدا لە لایەك سەربەرزی وخۆشی كیژەكەیان لە لایەكی دی بە مەبەست پتەوكردنی خزمایەتی نۆیێ و ناسینی كەس وخزمانی هەردولا لە هەمان كات پێكردنەوەی و هاموشۆكردنی كیژە بۆ ماڵی باوكی چونكە كیژ بۆی نەبو سەردانی ماڵی باوكی كات وروبەرو بێت لە گەڵ باوكی و براكانی تا ئەم داواتە سازنەكرێ . هەر بەم شَێوازە لە زۆر خێزانان باوك و كوری گەورە لە مەیان چەند رۆژی گوازتنەوەی كیژەكەیان لە ماڵ نەدەمان تەنانەت هەندێ لەمان شاریان بەجیێ دەهێشت ، لایان شورەیی بو كیژیان شوی كردوە ، لە دوا وتەمان لە بارەی داب ونەرەتی ژن هینان ئەڵێن لە ساڵانی پەنجاكانەوە لە سەدەی رابوردو لە هەندێ خێزانانی دەوڵەمەند و روشنبیر بوك وزاوا یەكسەر رویان دەكردە هاوینەهەوارەكانی كوردستان یا بە تایبەتی شاری بەغدا بۆ رابواردنی مانگی هەنگوین بە دەگمەن بووڵاتانی دەرەوە .
لە بونەكانی شاری كۆێی ئاهەنگی مەولودی پێغەمبەر زۆر باو بو. بە تایبەتی لە مانگی مەولود وجیّژنی قوربان ، لە وەرزی هاوین بە شەولە سەر بانوی خانوەكان-- زۆریان بی َشورەبون -- لە نێو ماڵ لە زستان ، مەلا بە كوردیەكی مەلایانە مەولودی دوخوێندەوە چەند فەقێ بە تەكییەوە ئەیانگێرایەوە ،ئێستاش رستەیەك لە خوێندنەوەكەم لە یادە لە وەسفی پێغەمبەر ئەیوت ( نە كورتە و نەتەویلە فەوقەلغایە جەمیلە ) بەم شێوەیە گەڵێ رستەی (سەجع ) ی دی باسی دایكبونی پێغەمبەروژیانی وكۆچی دوایی دەكرد ، لە هەمان كات گەر مەولودەكە بە تێروتەسەل كرابا تاقمەكەی ( مەلا ئەسعەد ) بە دەف و مەقامی ئایینی جۆشی دەدا ، بەڵام گەر مەولود فرەوان بێت بەتایبەتی لە مانگی مەولود لە مزگەوتی گەرەك یا لە مزگەوتی گەورەی كۆیە ساز دەدرا . بە درێژایی ساڵ لە گەڵێ بونەكانی ئایینی و كۆمەڵایەتی وەك شەوی گواستنەوەی بوك ، گەرانەوەی حاجیان ، سونەتانەی كور ، لە دایكبونی منالأ بە تایبەتی كور یا نۆبەرە دەهاتە ئەنجام ، هەندێ جار ئافرەت مرازی هاتباجێ بەم بونە لە ماڵ مەولودی دەگێڕا یا خیرو مەسرەفی مەولودەكەی ئەدا بە مەلاو فەقیێ مزگەوت ئەمان لای خۆیانەوە لە جیاتی خاوەنی مەولودیان بە كورتی جێبەجێ دەكرد واش دەبو مەولود ساز دەكرا بە بونەی گەرانەوی خۆشەویستی َ بۆ ماڵ یا هەڵسان لە نەخۆشیەكی قورس تەنانەت سەركەوتنیك و رزگاربون لە كیشە ومەترسیەك . هەڵبەتە مەولودی ژن گواستنەوە هەر بە شەو سازدەدرا زۆر جار درەنگ تەواو دەبو چۆل دەبو لە مەلاو فەقێ و پیاوانی بەتەمەن ئیدی ئەبوە ( ئەگلەنجە ) واتە خواردن وخواردنەوەو گۆرانی بە دەف و وموسیقاو زۆر جار تایەر تۆفیق وسیوەو گورانبیژانی كۆیە تا بەرە بانگی بەیانی ئەیانچراند .

هەروها كە ئەزاندرا حاجی لە گەرانەوەی نزیك شاربووە كورو براو خزمان هەندێ جار دۆست ودراوسێ ئەچونە پێشوازی حاجی بە سواری وڵاغ ، تا دەگەیی بە ماڵ هەردو دەستی بەم لاو ئەولای شۆر دەكردەوە خەڵكانیش بە درێژایی رێگا پەیتاپەیتا ناو پەلییان ماچ دەكرد بەم بروایە كە ناوپەلی حاجی مد فەرك وپیرۆزە لە بەردەرەشی كابەی ( كعبە )خشاندوە تەنانەت لای هەندێ ساولكە ماچ كردنەكی بە نیوە حەجی دەزانی، بە دابەزینی حاجی لەبەر دەرگای ماڵ یەكسەر گایەك سەردەبردرێ و گۆشتەكەی دابەش دەكرێ بەسەر دراوسێ وخزمان و چەند خێزانی هەژار ، لە رۆژی سێیەم بۆ جەمی نیوەرۆ خەڵكانێ زۆر داوەت دەكریًَن و لە هەمان شەویش مەولود دەگێردرێت بەم مەراسیمە ئەڵێن ( شیلانەی ) حاجیان . ئیدی هەر لەم ماوەیە بگرە تا یەك دومانگ خزمانی نزیك ودۆست ودراوسێ بە - دیاریەكی گونجاو - سەردانی ماڵی حاجی دەكەن بۆ پیرۆزبای . لەم كات پێشەكی گەر حاجی ئاوی ( زمزم)ی هاوردبی وا دانشتوان لە خزمەت حاجی وەك مد فەرك سەرو قومی لی دەخۆنەوە لە هەمان كات حاجیش دیاری حەجێ پێشكەش دەكات زۆربەی تەسبیح و بۆن وكڵ و دوگردو هەندێ جار قوماش و كراس و گەڵێ وردەواڵای دی . هەڵبەتە حەج كردن لەم سەردەمە زۆر زەحەت بو بە سواری ولاغ و زۆری ئەخایەند هەندێ جار ئەگەیی بە حەفت مانگ زۆر جار لە ماوەی سەفەرەكە پیرو نەخۆش لە حجاز یا لە رێگا ئەمردن لە گەڵ وەش هەبو حەجیان دوبارەو سێ بارە دەكردەوە . حاجی بە گشتی لە نێو كۆمەڵ رێزو شوێنی خۆی هەبو جیێ برواو موتمانەی خەڵكان بون .
بە پەێرەوی ئایین ونەرەتی كۆمەڵایەتی مناڵی كوری ئیسلام دەبی خەتەنە بكرێ بەزۆری لە تەمەنی یەك دو ساڵی ، هەندێ ئیدعایان دەكرد كە سەیدن و كەشیدار لە ماڵان ئەم كارەیان ئەنجام دەدا لە هەمان كات هەندێ بەربەری ناسراو لە شار ئەوانیش بەم كارە هەڵدەستان ،ئیدی لە ساڵانی بەدواوە نە سەید ونە بەربەر رۆل ودەوریان نەما نەخۆشخانەكان ئەم ئەركەیان بەخۆ گرت . پێش رۆژێ مناڵەكە بە شوَرین و دشداشە و كڵاوی سپی لە گەڵ گەمەی منا ڵان و نوقل و شەكرۆكە ئامادە دەكرا هەر بەم بوَنەوە خزم ودۆست و دراوسێ وهەندێ مناڵانی گەروك لە ماڵی كورەی كۆدەبونەوە زۆر جاریش جەمی نیوەرۆ لە گەڵ شەربەت و شیرنەمەنی پێشكەش دەكرا هەروها هەر لەهەمان شەوئاهەنگی مەولود ئەگیڕدرا .

(گوێزەبانە)لەبونەكانی دی خێزانانی كۆیە ، لە دواساڵانی چلەكانەوەلە سەدەی پێشو زۆر لە كورتی دا بە دەگمەن لە نێو كۆمەڵ روی دەدا ، گوێزەبانە واتە – گوێ و زبان _ ئاهەنگێ بو لە چوارچیوەیەكی تەسك ئەگێڕا بەلای ئایینی دادەشكا ،.زۆربەی لە رۆژی سێیەم لە دایك بونی مناڵ ساز دەدرا، ژنانی گەرەك وخزمان بە مەبەست خێر ودوعا كردن كە مناڵە تازەبووەكە لە گوێ وزمان ساغ بێت واتە ( كەڕ و ڵالأ)نەبێت ، بە بۆچونی ئەم كات كۆرپەی تازە گشت كەم وكورتی پێوەدیارە هەر – زمان وگوێچكە –نەبێت ، بەم بونەوە چەند دانە چكلێت لە ناوكولێرەێك ( ئەستوك ) لەسەر ماڵان دابەش دەكرا .