پەیروكردنى سیاسەتى شەلم كوێرم كەس نابوێرم بەشێك لەوجۆرە نووسینانە دەگرێتەوە كە دەمێكە بە بەردەوام لەسەر روپەڕى رۆژنامە و گۆڤارەكانى نێوخۆ دەبیندرێن ، ئەو جۆرە نوسەرانە ئامادەن قسەلەسەر هەموو شتێك بكەن و راست وچەپ خەت بەسەر هەموو شتێكدا بێنن ، هەموو دونیا بە ئیزدواجییەت و دووڕوو دەبینن ، بەڵام خۆیان بە یەك روو ، پێیان وایە ئەخلاق ئەگەر هەبىَ هەر ئەوەیە كە ئەوان هەیانە و تیگەیشتون ، خۆیان بە نووسەرى سەربەخۆ و ئازاد دەزانن و بەرامبەرو دەوروبەریش بە بەكرێگیراوە ، بەردەوام بە بۆنە و بىَ بۆنە دەم لە هەموو شتێك دەكوتن ، هەموویان باس لە ئەخلاقى رۆژنامەگەرى دەكەن ، كەچى لە چەندین وێستگە خۆیان پێشێلى دەكەن . ئەگەر شتێكت وت ئەوان لە شەرەف و ناموستەوە دەست پێدەكەن ، لە كۆمەڵگاى ئێمەدا ئەمە جۆرێكە لە پەێڕەوكردنى سیاسەتێكى ترسناك ، بۆ بێدەنگكردن و قسەنەكردن لەسەر حەق .
بەو مانایەى ئەوكاتە ئازادى هەیە كە تەنیا ئەو قسە بكات ، بەبىَ لەبەرچاوگرتنى ئەو راستییەى كە ئازادییەكەى ئەو لەو شوێنە كۆتایى دىَ كە ئازادى بەرامبەر پێشێلدەكات ، بۆیە تێگەیشتن لەو فەلسەفەیە گەیشتۆتە ئەو ئاستەى ئەگەر شتێكت لە سەر كەسێكى لەو جۆرە نووسى وەها خۆى پفدەدات پلى لێدەى دەتەقىَ ، كێشەكەش لەوەدایە ئەوان ئامادە نین نەك لەسەر بچووكەكان بنووسن ، ئاماد نیین وەڵامیشیان بدەنەوە ئەگەر لەسەریشیان نووسیبن ، ئەگەر بڕیاریشیاندا قسە بكەن ئەو عەنتەرە بچووكانە لە گەڵ سەرۆك و سكرتێرو گەورە بەرپرسان نەبىَ ناێنە مەیدان ، كاتێك پێدەڵیى بووستە عەنتەر ئەوها نییە ئەوهایە پێتدەڵىَ ، بێدەنگ بە من وەڵامى تۆ نادەمەوە ، ئەگەر قەرار بىَ وەڵامت بدەمەوە لە سەرۆكەكەتەوە دەست پێدەكەم ،( سكرتێرى حیزبێك پێى وتم پێیان بڵىَ ئەگەرفلان رۆژنامە لەسەرم بنووسىَ من لە گەورەكەیانەوە دەست پێدەكەم ) ، ئەو جۆرە نوسەرانە هەوەلین قسەو دواین قسەشیان لەسەر بێگەردى خۆیان ئەوەیە كە كىَ یەك بەڵگەو زانیارى لەسەریان هەیە با بێمنەت بڵاوى بكاتەوە ، ئەوە هەر قسەى ئەوان نییە قسەى جۆرێك لە رۆژنامە بە قەولى خۆیان ئەهلییەكانیشە ، كە هەمووجارێك لە وەڵامى ئەوەى كە رۆژنامە ئەهلیەكان لایەن و كەسانێكیان لەپشتە ، بێمنەت داواى بڵاوكردنەوەى بەلگە و زانیارییەكان دەكەن ، ئەوان یان خۆیان لە خەتى ( 36 ) دەدەن یان خەڵكیان پێگێلە ( مەگەر نازانن بە دەرخستن و ئاشكرا كردنى نهێنی و زانیارییەكان سحرەكە بەتاڵدەبىَ و كۆتایى بە گەمەكان دىَ ) .
ئەو عەنتەرانە ئەوەندە بە دڵنییایەوە داكۆكى دەكەن وەك ئەوەى ، ئەوەى راستییە ئەوان تێگەیشتون ، ئەوەى ئێمەش تێگەیشتوین پێچەوانەكەێتى . سەیرەكەش لەوەدایە كەسانێك هەبن راستەوخۆ و نارەستەوخۆ لە نێوكایە و دەزگاكانى حیزب كاربكەن و لافى عەنتەریاتى لێبدەن و پێیان وابى ئەوەى ئێمە تەجموعى حیزبییەو هى ئەوانیش تەجموعى فكرى .