ڕفاندن و تیرۆری ئاشکرای سەردەشت عوسمان، نارەزایەتی و نەفرەتێکی بەرینی بەدوای خۆیدا هێنا و شەقامی کوردستان و رەوەندی کوردی دەرەوەی وڵاتی تەکاندا. هەروەها زۆر لایەنی رەسمی و نارەسمی و میدیای جیهانی کەوتنە ئیدانەکردنی ئەو تاوانە. بێگومان زۆرجاریتر لەئاکامی کردەوەیەکی تیرۆریستیدا، چ ئیسلامیەکان یان حزبە قەومی و دەسەڵات بەدەستەکان، ئەنجامیان دابێت، توڕەیی و غەزەبی رەوتی ئازادیخوازی کۆمەڵگای کوردستانی بەدوای خۆیدا هێناوە. بەڵام ئەمجارەیان بەوهۆیەوە تاوانەکە ئاشکراترو بەرچاوترو گەورەترە، رادەی تورەیی و نەفرەتی خەڵکی ئازادیخواز، گەورەترو فراوانترە.
ئەوەی جێگای هەڵوێستەیە، ئەوەیە، کە دروشمی رەوتی نارەزایەتیەکان زۆرتر داواکردنی ئاشکراکردنی تاوانباران و پەلکێشکردنیانە بۆ بەردەم دادگا، دیارە ئەمە خواستێکی رەوایەو جێگای پشتیوانی لیكردنە. بەڵام ئەمە نە بە تەنها کافییەو نە تائێستاش بکوژانی نەیارە سیاسیەکان، رۆژنامەنوس و چەپ و ئازادیخوازەکان، دۆزراونەتەوەو دراونەتە دادگا!. هەروەها ئەوەی کە باسی ناکرێت یان زۆر لایەن و رەوتی سیاسی و ئایدۆلۆژی، بە ووردبینیەوە خۆیان لە وروژاندنی دەدزنەوەو بە قازانجیان نییە خۆ بدەن لە قەرەی، باسی زەمینەکانی تیرۆرە، خۆلادانە لە باسی کاراکتەرە سەرەکیەکانی خوڵقێنەرانی کەش و هەوای نائەمنی و تیرۆر. هەر ئەمەش هۆکارێکی سەرەکی خاوبونەوەی نارەزایەتیەکان و چونەوەیە بۆ دۆخی باوی پێش تیرۆرەکان و هێنانەخوارەوەی ئاستی تاوانەکان بۆ ئاستی باسی ئەکادیمی سەفسەتەی بیئاکام. و راگرتنی کۆمەڵگا بە دیار هیرشەکان و مەرگەسات و تیرۆرەکانی داهاتودا.
ئەمە بۆ وایە؟ بۆ تەنها نارەزایەتیەکان بزوتنەوەکان لەگەڵ کارەساتە دڵتەزێنەکان دەست پیدەکەن و پاشان بە دوای چەندین وادەی بێبنەما و بەڵێنی دەستپێکردنی پرۆسەی لێکۆڵینەوە، دەرکەوتن سەرەداوی بێسەر... خاودەبنەوەو بە سەمەر ناگەن؟
بۆ بەرەی رادیکاڵ و پێشکەوتنخوازی کۆمەڵگاو رۆشنبیران و قەڵەمبەدەستانی . هیچ لەوە سادەتر نییە کە بنەمای تیرۆر و تیرۆریزم سەرچاوەکەی ئایدۆلۆژیایە. کە بەر لە رووداوەکان، ئامادەیی هەیە. ژینگە سازکردنەکە پیش مەرگەساتەکان، کاریان بۆکراوە. تەوجیهەکان پێش تیرۆرەکانن. تیرۆر ئەوکاتە دەست پێناکات کە هەواڵی تەقینەوەیەک ئەبیستین، کە لاشەی رفێنراو و تیرۆرکراو ئەدۆزرێتەوە. کە داروخانی کتیبخانەو سوتاندنی ساڵۆنەکانی ژنان و شوێنەکانی گەشت و گوزارو دوکانەکانی مەیفرۆشی و رفاندنی نەیارانی سیاسی و ئازادیخوازان و رۆشنبیران و رۆژنامەنووسان ومناڵان... دەبیستین. بەر لەوە ئایدۆلۆژیاکە خاوەنانی دیارن. تیکەڵی ئایدۆلۆژیای ئەم ئینسانکوژانە لەگەڵ دەسەڵاتی سیاسی، لە پەروەوەردەو خوێندندا، لەیاساکاندا دەبینین. خاوەنان و قسەکەرانی هێڵە سورەکان، مقەدەساتە دینی و نەتەوەییەکان، پاسەوانانی ئادابی گشتی... ئاشکران و هاواردەکەن. دەیان بڵندگۆو مینبەرو بنکەی بارهێنانیان هەیە، دەریایەک لە داهاتی تاڵانکراوی لەبەردەستە، سەدان رۆژنامە و نوسەری موچەخۆری هەیە، سەدان دەزگای ئاشکراو نیوە ئاشکراو نهێنی و سەدان باندی پەروەردەکراوی هەیە و....
بۆیە بەر لە تەقینەوەکان، رفاندنەکان، تیرۆرەکان، درندایەتیەکان، ئاراستەکرن و وروژاندنەکان قێزەونترن.
چ لەوە دڕندایەتی ترە کە یاسای دژە ژن دەمەزەرد دەکرێتەوە، پەرلەمان یاسای فرە ژنی پەسەند دەکات. لەژیر ناوی شەرەف و ناموسدا رۆژانە ژنان دەکوژرێن یان ناچار بە خۆکوشتن دەکرێن. زوربەی هەرە زۆری تاوانبارانیش، ئازادن.
چ لەوە قێزەونترە کە مەلای فتواچی وەکو مەلا بەشیر ئەندامی پەرلەمانە، چ لەوە ناحەقترە کەسانیك بە ئاشکرا خۆیان کردۆتە کوێخاو پاسەوانی ئادابی گشتی، پیرۆزی دین و نەتەوەو ‌هێڵی سور و.... ماف بەخۆیان دەدەن، فتوا بدەن و ئیحساساتی خەڵکی و دەرویشەکانی خۆیان بوروژێنن بۆ دەست وەشاندن و تاوانکاری ئەنجام دان.
ئاخر بەر لەوەی سەردەشت تیرۆر بکرێت، دوو هەفتە بوو زۆرێک لە مەلاکان و یەکگرتووی ئیسڵامی لەدژی دەزگای سەردەم و ئاراس، لەدژی فەرهاد پیرباڵ و گۆڤاری وێران، لەدژی گۆڤاری ئێوە، کەوتبوونە بانگەشەی لغاوکردنیان. هەروەها فتوای مەلا عەبدولخالقی مزگەوتی روناکی لەهەولیر، تا ئێستا بەردەوامە لە نووسەران.
ئەمانە بەبەرچاوی سەرۆکی هەرێم و حکومەتەوە روودەدەن.
وە خودی سەرۆکی هەرێم ماوەیەک لەمەوبەر بوو بە ئاشکرا ووتی ئەوەی بە پێشمەرگە بڵێت" میلیشیا" لەکوردستان جێگای نابێتەوە. و دەیان هێلی سوری تر کە نوسەران و تاکی ئەم کۆمەڵگایە ناچار دەکات دەمیان ببەستن لەوەی بۆچوونی خۆیان دەرببڕن و هاوکات دەستی هەزاران دەروێشی حزب و باندی دڵسۆزی سەرۆک ئاوەڵا دەکات، پەیامی سەرۆک جێبەجێ بکەن.
لە ژێر سایەی سەرۆکی هەرێم و حکومەت و یەكێتی و پارتیدا، فتوا ئازادە و مەلاکان و ئیسلامیەکان، لەبەرامبەر هەموو داهینان و توێژینەوەیەکی زانستیدا، لەبەرامبەر هەر دەق و هۆنراوە و چیرۆک و .... کە رەخنە لە ئیسلام و رەمزەکانی بگرێت، دەست دەبەن بۆ فتواو هەرەشە.
لە ژیر سایەی سەرۆکدا، بۆ چرکەیەک چییە شەری دژی ژن، لەژیر ناوی بەرگری لە ناموس و شەرەفدا، وەستانی بۆ نییە و ئاماری کوشتنەکان، ناچاربوون بە خۆسوتاندنەکان، چەند بەرابەری قوربانیانی هەڵەبجەو تیرۆرەکانن.
لە ژیر سایەی سەرۆکدا، ئەوەی لەبەرامبەر بە سرودی ئەی رەقیب، ئاڵای کوردستان، سەرکردە بە قارەمانکراوەکاندا، سنور، کەلتور... رەخنەی ریشەیی دەربڕێت باجی ریزنەگرتن لە مقەدەساتی قەومی و نیشتمانی دەبێ بدات.
لەژێر سایەی سەرۆکدا، ئازادی بێدینی تاوانە.
لەژیر سایەی سەرۆکدا، بەخەیاڵیش بیرکردنەوە لە بنەماڵە، تاوانە.
لەژێر سایەی سەرۆکدا، ئازادی تاک و دەربرینی بۆچونی ئازادانەی تاکەکان، سزای قورسی هەیە.
لەژێر سایەی سەرۆکدا، تاڵانی ئاشکرای داهاتی خەڵکی کوردستان دەکرێت، پەرلەمان دزترین دەزگای یاسایی و رەسمییە. ئەندام پەرلەمان بوون یانی موچەی سەدان قاتی کرێکارو کارمەندیکی ئاسایی، ئەوە جگە لە ئیمتیازەکانیان.
لە ژێر سایەی سەرۆکدا، دەیان باندی جاسوسی ئیران و تورکیا... مۆڵگەیان هەیە.
لە ژیر سایەی سەرۆکدا، تۆپبارانی ئێران و زیدەڕەوی ئاسمانی و زەمینی تورکیا، بێ هێڵی سورە.
لە ژێر سایەی سەرۆکدا، هەموو رۆژێک هیرش بۆسەر نووسەران، ڕۆژنامەنووسان، میدیای نەیاری دەسەڵات، گەرمە. سزادان و بانگهێشتکردنیان بۆ دادگا!! بەردەوامە، کەچی نابینرێ مەلایەکی فتواچی، سەرکردەیەکی حزبی دەسەڵات، دادگا و یاسا پێێ بگات.
لەژیر سایەی سەرۆکدا، دەیان رۆژنامەو گۆڤار داخراون، کەچی یەک مینبەری مزگەوت، یەک رۆژنامەو گۆڤاری ئیسلامیەمان و حزبی دەسەڵات، راناگیرێن.
لەژیر سایەی سەرۆکدا، حزب و لایەنی سیاسی نەیاری دەسەڵات، هەمیشە لەژێر گوشارو زۆر بۆ هێنان و بیدەنگکردندان.
لە ژیر سایەی سەرۆکدا،بە جیا لە پاراستن و زانیاری، تائیستا دوو هێزی ئاسایش، دوو هێزی پێشمەرگە، دوو دەزگای دژە تیرۆر، هەن. کەچی بکوژانی ئازادیخوازان و نوسەران و رۆژنامەنوسان و نەیارانی دەسەڵات... ئاشکرا ناکرێن.
لەژێر سایەی سەرۆکدا، هەردوو حزب هەموو جومگەکانی ژیانی ئابوریان قۆرغ کردوەو تائیستا پاروی دەمی خەڵک، بە بارمتەگیراوە.
لەژێر سایەی سەرۆکدا، رۆژانە بەردی بناغەی مزگەوت دائەنرێت و قوتابیانیش لەبەر بێجێگایی ٤٠ کەسیان لە پۆلیکدا دائەنرێن.
بە بەرچاوی سەرۆکەوە، دەسەڵات خەریکی دامەزراندنی مەلایە، کەچی بە هەزاران دەرچوی زانکۆکان بێکارن.
لە ژیر سایەی سەرۆکدا، پارەوپولێکی خەیاڵی تەرخانی مزگەوت، تەکیەوخانەقاکان، مەرقادو شێخ و مشایەخەکان، تەرخانی دوبارە بەرهەمهێنانەوەی بۆنەو یادە ئیسلامیەکان، بۆنەو یادە قەومیەکان و کەسایەتیەکانیان دەکرێت. کە بەراسی تیرۆری ئابوری کۆمەڵگایە.
لەژیر سایەی سەرۆکدا، بڵاوبونەوەی سیدی فتوا ئامێز، کتێب و نامیلکەی ئاگراوی، ئازادن.
بەراستی هەموو ئەمانە، تیرۆری کۆمەڵگا نییە؟ تیرۆری هەوڵە مەدەنیەکان و بۆنەو یادە ئینسانیەکان نییە؟
ئەم هەموو زەمینە سازکردنە بۆ تیرۆر، ئەوەمان نیشان نادات، کە تەوجیهی تیرۆرەکان، سەد ئەوەندەی تیرۆرەکانە؟ بەراستی لە دۆخێکی ئاوادا، تیرۆرەکان لە تەوجیهەکانی تیرۆر کەمتر نین؟ تیرۆرەکان لە پەیامی تیرۆرەکان لەخوارتر نیین؟
ئایا تیکەڵکردنی دین و قەومپەرستی لەگەڵ دەسەڵات و یاسا و پەروەردەو فیرکردن، سەد بەرابەری تیرۆری جەستەیی کارەساتبار تر نییە و تیرۆری جەستەیی بەرهەمی تیرۆری فکری و یاسایی کۆمەڵگا نییە؟
ژینگەی تیرۆر، تەوجیهی تیرۆر، بەر لە تیرۆری باو، تیرۆری راستەقینەی کۆمەڵگایە. ئەم دەسەلاتە سیاسیەی لە کوردستان هەیە و سەرۆکی هەریم بەرپرسی یەکەمیەتی، مەیدان و زەمینەی تیرۆرەکانی سەدەشت و سۆرانی مامە حەمەو....و هەرەشە کردنە لە ئازادی و ئازدیخوازی.
لە ژیر سایەی سەرۆکدا، هەر یاساو بریاریک، هەر پەیام و دنیابینییەک، بەرگری لە مافی تاک و مافە مەدەنیەکانی ئینسان کردبێت، بەرگری لە ئیرادەی ئازادانەی فەرد کردبێ و رەخنەی رۆشنی ئاراستەی ئیسلام وعەشیرەت و قەومچێتی کردبێت، هەردوو حزب لەدژی وەستاونەتەوە. هەرەشەکان، نانبڕینەکان، رفاندنەکان، تیرۆرەکان کە لەدژی روناکبیر، رۆژنامەنووس، مامۆستای زانکۆ، هونەرمەند، گۆرانی بێژ، سیاسی، چەپ و کۆمۆنیست.... کراوە، ریشەی لەو راستیانەی سەرەوەدا بووە.
ئایا کاتیک خەرمانەیەک تاوانی یاسایی و نایاسایی، بیمافی و سەرکوت و کۆنەپەرستی و رفاندن و تیرۆر ....لە ژیر دەسەڵاتی سیاسی و سەرۆکی هەرێمدا، بەڕیوەدەچیت، بەس نییە بۆ ئەوەی بزوتنەوەی نارەزایەتی جەماوەری داوای توردانی برگەو دەستەواژەکانی وەکو ئادابی گشتی، مقەدەساتی دینی و نەتەوەیی و نیشتمانی و تایەفەو بنەماڵەیی، بکات.
ئایا کاتی ئەوە نەهاتووە بزوتنەوەی ئازادیخوازی و پێشکەوتنخوازی کوردستان، بزوتنەوەی دژی ژنکوژی، بزوتنەوەی دژی دەسەڵاتی میلیشیایی، بزوتنەوەی بەرگری لە مافە فەردی و مەدەنیەکان، بزوتنەوەی دژی کۆنەپەرستی دینی و عەشایەری و قەومچیتی، بزوتنەوەی دژی تیرۆر بە دەنگی بەرز داوای دەست لە کارکێشانەوەی سەرۆکی هەرێم بکات.
بە تایبەت کاتێک سەرۆکی هەرێم، خۆی بە ئاماژەدانی بە هێڵە سورەکان، بە راگەیاندنی ئەوەی هەرچی دەستەواژەو دەربرینی نامۆ بە هێڵەسورەکان! بەیان بکات، لەکوردستان جیگای نابێتەوە و تەمێ دەکرێت.
هەروەها نەک بکوژانی سەردەشت، بەڵکە بکوژانی دەیان نوسەر و رۆشنبیرو سیاسی و نەیاری دەسەڵات، تا ئێستا ئاشکرا نەکراون و لیژنەو بەدواداچونەکانیان!، بە شوێنێک نەگەیشتوون.
هەموو ئەمانە پێمان دەڵێین، سەرۆکی هەرێم پیویستە دەست لەکار بکێشێتەوە. بۆیە بزوتنەوەی نارەزایەتی ئێستای کوردستان، لەکاتیكدا پیویستە سەراسەری تر و رێکخراوتر بێت، پیویستە کرێکاران و کارمەندان بە راگرتنی کار بە بزوتنەوەکەوە پەیوەست بن، هاوکات پیویستە دروشمەکەشی ببێتە دەست لەکارکێشانەوەی سەرۆکی هەرێم.
١٤-٥-٢٠١٠