|
له شاڵاوێکی تری حکومه‌تی عیراقی بۆ به‌رێوه‌بردنی
سزای له سێداره‌دان و دروستکردنی که‌شی تۆقاندن دژ
به خه‌لکی عیراق، سه‌رۆکی پۆلیسی پاریزگای ئه‌نبار
بهاء القیسي له لێدوانێکیدا بۆ رۆژنامه‌ی "الصباح"
که له ژماره‌ی 1965ی رۆژی 19/5/2010 دا
بڵاوکراوه‌ته‌وه، رایگه‌یاند که دادگای باڵای
فیدراڵی له پاریزگای ئه‌نبار بریاری سزای له
سێداره‌دانی به‌سه‌ر 62 زیندانیدا سه‌پاندوه و
گواستراونه‌ته‌وه بۆ به‌غداد بۆ ئه‌وه‌ی حوکمی له
سیداره‌دانه‌که به سه‌ریاندا جێبه‌جێبکرێت.
ئه‌م شه‌پۆلی له سێداره‌دانه‌ش به پێی یاسای دژه
تیرۆر و له‌ژێر بیانووی ئه‌نجامدانی ته‌قینه‌وه و
تیرۆردا ده‌رکراون و گوایا ده‌یانه‌وێ له‌م
رێگه‌یه‌وه به‌ر به تیرۆر و ته‌قینه‌وه‌کان بگرن.
به‌ڵام ئێستا بۆ هه‌موو که‌س رۆشنه و به‌ڵگه و
رووداوه‌کان ئه‌وه‌یان سه‌لماندوه که زه‌مینه‌و
هۆکاری نائارامی و تیرۆر و ته‌قینه‌وه‌کان بوونی هیزه
داگیرکه‌ره‌کان و خودی کێشمه‌کێشم و شه‌ری تایفی و
مه‌زهه‌بی و قه‌ومی نێوان حیزب و گروپ و هێزه
به‌شداربووه‌کانی ناو ده‌سه‌ڵاته له پێناو
به‌ده‌ستهێنان و گرتنی ده‌سه‌ڵات و ئیمتیازی زیاتر له
یه‌کتر، نه‌ک چه‌ند که‌سانێک که رۆشن نییه به‌پێێ
کام بڕیار و یاسای زیندان و ستانداردی لیکۆلێنه‌وه و
به‌ڵگه ده‌ستگیرکراوون و ئه‌م تاوانانه‌یان به‌سه‌ردا
ساغکراوه‌ته‌وه. له کاتێکدا چه‌ندین راپۆرت و
لێکۆلینه‌وه که له لایه‌ن ریکخراوه جیهانی و
ناوخۆییه جۆربه‌جۆره‌کانی داکۆکیکه‌ر له مافه‌کانی
مرۆڤ ئه‌وه‌یان نیشانداوه که ئه‌م تاوانانه به‌زۆر
و له‌ژێر باری فشار و هه‌ره‌شه‌و ئه‌شکه‌نجه‌دا
به‌سه‌ر ئه‌و زیندانیانه‌دا ساغده‌کرێته‌وه.
هه‌ر بۆیه بریاردان له‌سه‌ر ئه‌نجامدانی ئه‌م تاوانه
قێزه‌وون و دژی مرۆڤایه‌تییه به‌م ژماره زۆره وه‌ک
کۆمه‌ڵ کوژییه‌ک ته‌نها له یه‌ک پارێزگادا، نه‌ک هه‌ر
زه‌مینه‌ی کوشتن و تۆڵه‌سه‌ندنه‌وه زیاتر به‌رهه‌م
دینێت و په‌ره‌یپێده‌دات، به‌ڵکو له هه‌مانکاتیشدا
ئه‌م هه‌نگاوه نیشاندانی ناوه‌رۆک و مه‌به‌ستی سیاسی
حکومه‌ته بۆ زاڵکردنی هه‌رچی زیاتری فه‌زای ترس و
تۆقاندن به‌سه‌ر کۆمه‌ڵگا و خه‌ڵکدا. له لایه‌کی
تریشه‌وه هه‌نگاو هه‌ڵهێنانه به‌ره‌و ره‌سمیه‌ت دان
و ئاسایکردنه‌وه‌ی به‌کارهێنانی سزای له سێداره‌دانه
له به‌رامبه‌ر نه‌یارانی سیاسیدا به‌بیانووی تیرۆر و
ته‌قینه‌وه و تۆڵه‌کردنه‌وه له سه‌رانی رژێمی پێشوو
وه‌ک دووباره‌کردنه‌وه‌ی هه‌مان پیشه‌ی رژێمه‌کانی
پێشتر.
هه‌ربۆیه ئیمه به تووندی ئیدانه‌ی ئه‌م بریاره
ده‌که‌ین و دوا له حکومه‌تی عێراقی ده‌که‌ین که
ده‌ستبه‌جێ بریاری له سێداره‌دانی ئه‌م 62 زیندانییه
رابگرێت و هه‌ڵبوه‌شێنرێته‌وه.
له هه‌مان کاتدا بانگه‌وازی سه‌رجه‌م خه‌لکی
ئازادیخواز و رۆشنبیران و که‌سایه‌تیه‌کان و حیزب و
ریکخراوه و لایه‌نه‌کانی لایه‌نگر له مافه‌کانی مرۆڤ
له‌ده‌ره‌وه وناوه‌وه‌ی ووڵات ده‌که‌ین که ئه‌م
بریاره دژی مرۆڤایه‌تییه ئیدانه بکه‌ن و داوای
رگرتنی بکه‌ن. هه‌روه‌ها هه‌موو پێکه‌وه به
هه‌رشێوه‌یه‌ک که ئیمانی هه‌یه ناره‌زایه‌تی
ده‌ربرین و هه‌وڵ وناره‌زایه‌تییه‌کانمان یه‌کبخه‌ین
له پێناو به‌رێخستنی بزووتنه‌وه‌یه‌کی ناره‌زایه‌تی
به‌هێز بۆ ناچارکردنی ده‌سه‌ڵاتی ناوه‌ندی و هه‌رێمی
کوردستان که سزای له سێداره‌دان له یاسا و
ده‌ستووردا قه‌ده‌غه‌بکرێت.
سه‌نته‌ری دژی له سێداره‌دان
20/5/2010
|