ئه‌مه‌ نه‌جارێکه‌و نه‌دووه‌، کۆمه‌ڵ و یه‌کگرتووی ئیسلامی هه‌رایه‌کی گه‌وره‌ ده‌نێنه‌وه‌و ده‌چن به‌گژ نووسه‌ران و رۆژنامه‌نووساندا. به‌جارێک زه‌ره‌بینی سیاسی خۆیان خستۆته‌ سه‌ر قه‌ڵه‌م و په‌یڤی نووسه‌ران و رووناکبیران. ئایا ئه‌مه‌ گاڵته‌جاریه‌کی گه‌وره‌ نییه‌ ، حیزبێکی سیاسی کاری ته‌نها دژایه‌تیکردن و فه‌تواده‌رکردن بێت له‌ دژی نووسه‌ران؟ ئاخر حیزبێکی دوونیایی چۆن ده‌کرێت پشت به‌ په‌ره‌گرافی ئایینی و خورافات ببه‌ستێت؟ چۆن ده‌کرێت ته‌نها به‌ڵێن که‌به‌ خه‌ڵکی ئاسایی ده‌یدات ، به‌ڵێنه‌کانی خوداو پێخه‌مبه‌ر بێت؟ ئاخر چۆن ده‌بێت ، حیزبێک هیچ به‌رنامه‌و پێڕه‌وێکی نه‌بێت جگه‌له‌ ‌ له‌ قورئان و ووته‌کانی پێخه‌مبه‌ر ‌؟ . به‌بڕوای من بۆیه‌ ئه‌م حیزبه‌ ئیسلامیانه‌ خۆیان به‌ئایینه‌وه‌ هه‌ڵواسیوه‌، چونکه‌ هیچ کاتێک ناتوانن تاکێکی کورد ، به‌ به‌رنامه‌و ئامانجیان قه‌ناعه‌ت پێ بکه‌ن . هه‌موو کاتێک ده‌سه‌ڵات و سووڵتانه‌کانی رۆژهه‌ڵات ، بۆ ئه‌وه‌ی به‌رده‌وامی به‌ حوکمی خوێناوی و دڕنده‌یی خۆیان بدده‌ن ، پشتیان به‌ بیری ئایینی ئیسلامی ده‌به‌ست. هه‌مووکات سووڵتا‌نه‌کان خۆیان به‌ وه‌کیل خودا له‌سه‌ر زه‌و‌ی داده‌نا. ئه‌مرۆش به‌هه‌مان شێوه‌ حیزبه‌ ئیسلامیه‌کان ده‌یانه‌وێت خۆیان له‌ئێمه‌ بکه‌نه‌ وه‌کیلی خودا، هه‌ر به‌ناوی پاراستنی ئایینیشه‌وه‌ ، سزای خه‌ڵکی بدده‌ن. ئه‌وا ماوه‌یه‌که‌ کۆمه‌ڵه‌و یه‌کگرتووی ئیسلامی و کۆمه‌ڵێک کۆلکه‌ مه‌لا، هه‌رایه‌کی گه‌وره‌یان ناوه‌ته‌وه‌ ، به‌ناوی داکۆکی کردن له‌ خودا و ئایینی ئیسلام . به‌ناشرینترین شێوه‌، فه‌توای تۆقێنه‌رانه‌یان بۆ ده‌زگای ئاراس و گۆڤارێکیان ده‌رکردووه‌.
تۆ واز له‌وه‌ بێنه‌ ئه‌م دوو حیزبه‌ هیچ کامیان به‌شداری خه‌باتی چه‌ککداری و سیاسی له‌ دژی فاشیزمی به‌عسی عه‌ره‌بی نه‌کردووه‌، له‌هه‌مان کاتیشدا ئه‌و هه‌موو کاره‌ساته‌ گه‌ورانه‌ش به‌سه‌ر کوردا دێت ، له‌ پارچه‌کانی تری کوردستاندا ، به‌تایبه‌ت له‌ توورکیاو ئێران ، ئه‌مانه‌ نووتقیان له‌ خۆ بڕیوه‌ و هیچ قسه‌ ناکه‌ن . به‌ڵکه‌ به‌ئاشکراش پشتگیری ئه‌ردۆگانی فاشیست و ئه‌حمه‌د نه‌ژادی جنۆکه‌ ده‌که‌ن و دژی بزاڤی ڕزگاریخوازی کورد ده‌دوێن . خۆ ئه‌مڕۆ چ له‌ توورکیا یان ئێران ، کورد به‌ ده‌ستی حزبێکی ئیسلامیه‌وه‌ ده‌چه‌وسێته‌وه‌. له‌ کاتێکدا که‌ له‌ تووکیادا مه‌لایه‌کی کورد ، گه‌ر به‌ کوردی دووعایه‌ک بخوێنێت، جا بۆ مسته‌فا که‌مالیش بێت، سزا ده‌درێت. له‌ توورکیا نه‌ک له‌ قووتابخانه‌و زانکۆ ، به‌ڵکه‌ گه‌ر مه‌لایه‌ک به‌کوردی سووپاسی خوداش بکات ، رژێمه‌که‌ی ئه‌رد‌ۆگان سزای خۆیی و خێزانیشی ده‌دات. کاکه‌ ئێمه‌ ناڵێین داوا له‌ برادینیه‌کانی توورکیاتان بکه‌ن ، با زارۆکی کورد به‌ زمانی خۆ بخوێنێت، به‌ڵکه‌ داوایان لێ بکه‌ن ، با مه‌لاکان له‌مزگه‌وت سزا نه‌درێن ، کاتێک به‌ کوردی دووعا ده‌که‌ن. ئه‌و دووحیزبه‌ نه‌ به‌شداریان له‌ خه‌باتی رزگاریخوازی کوردا کردووه‌، نه‌ئه‌مرۆش به‌شداری ده‌که‌ن . به‌ڵکه‌ ته‌نها کاریان دژایه‌تیکردن و به‌کافرکردنی خه‌ڵکی ئازادیخوازی کورده‌. جارێک ئه‌مانه‌ نه‌ک خۆیان به‌ڵکه‌ ناهێڵن منداڵه‌کانیشیان ناوی کوردیان هه‌بێت. وای لێهاتووه‌ هه‌رکه‌س بچێته‌ نێو ئه‌م حیزبه‌وه‌، پێش هه‌موو شتێک ده‌بێت ناوه‌ کوردیه‌که‌ی بکاته‌ عه‌ره‌بی ، بۆ ئه‌وه‌ی لای( برایانی دینی!) مه‌قبوول بێت. ئه‌وه‌ی که‌ زۆر ڕوون و ئاشکرایه‌ ، که‌ ده‌زگای ئاراس باشترین و گه‌وره‌ترین ده‌زگای چاپ و بڵاوکردنه‌وه‌ی کوردیه‌. بگره‌ یه‌کێک له‌ خاڵه‌ پۆزه‌تیڤه‌کانی پارتی ، کردنه‌وه‌ی ده‌زگایه‌کی وا گرنگ و پڕ بایه‌خی رۆشنبیریه‌ له‌ شاری هه‌ولێر. به‌ بڕوای من ده‌زگای ئاراس له‌هه‌موو ده‌زگاو سه‌نته‌رو بنکه‌ رۆشنبیریه‌کانی تری کوردستان ، خزمه‌تی ئه‌ده‌ب و رۆشنبیری کوردیان کردووه‌. ده‌زگایه‌که‌، خاوه‌نی زۆرترین کتێبی چاپککراوه‌ له‌ کوردستان . جگه‌ له‌وه‌ی له‌ ڕووی چاپ و ته‌کنیکی چاپخانه‌شه‌وه‌ ، له‌ ڕیزی پێشه‌وه‌ی ده‌زگاکانی تره‌. به‌ بڕوای من سه‌نگه‌ر گرتن له‌ ده‌زگایه‌کی ئاوا ، سه‌نگه‌ر گرتنه‌ له‌ ئه‌ده‌ب و رۆشنبیری کوردی. هه‌ربۆیه‌ به‌ جارێکیش هه‌موو نووسه‌ران و رۆشنبیرانی گه‌له‌که‌مان ، له‌ یه‌ک کاتدا دژی ئه‌م هه‌ڵمه‌ته‌ نه‌گریس و قێزه‌ونه‌ی بیری کۆنه‌په‌رستان وه‌ستانه‌وه‌. ئه‌وه‌ یه‌که‌مجاره‌ ، هه‌موو نووسه‌ران به‌بێ گوێدانه‌ فکری سیاسی و ئینتمای حیزبی ، پشتگیری ده‌زگایه‌ک بکه‌ن و دژی کۆنه‌په‌رستان بوه‌ستنه‌وه‌. هه‌ربۆیه‌ به‌ بڕوای من ، پشتگیری کردنی ده‌زگای ئاراس و گۆڤاری وێران ، پشتگیری کردنه‌ له‌ بیر و په‌یڤی ئازادو پێشکه‌وتنخواز. له‌هه‌مان کاتیشدا پێویسته‌ به‌هه‌موومانه‌وه‌ دژی ئه‌و ڕه‌وته‌ کۆنه‌په‌رست و بیرتاریک و تیرۆریستانه‌ بوه‌ستینه‌وه‌. هیچ کاتێکیش بیری تاریک ناتوانێت ، مۆمی ئازادی و پێشکه‌وتنخوازی بکوژێنێته‌وه‌.