|
تیرۆر ده‌نگی ڕاستی و ئازادی کپ ناکات، هه‌رچه‌نده
ده‌سه‌ڵاتی میلیشیایی له‌سه‌ر‌خوێنڕشتی ئازادیخوازان
ڕاوه‌ستاوه، تیرۆر هه‌ڕه‌شه‌یه له ئازادی
ڕۆژنامه‌وانی، هه‌ڕه‌شه‌یه له ئازادی تاک و ئازادی
بیڕوڕوا ده‌ربڕین. فشاری ده‌سه‌ڵات بۆ سه‌ر
ئازادیخوازان و خه‌فه‌کردنی ده‌نگی ڕاستی و پشکنین و
چاودێریکردنی ڕۆژنامه‌نووسان و گه‌ڕان بۆ دۆزینه‌وه‌ی
ئه‌و نووسه‌رانه‌ی که ناتوانن به‌سه‌ربه‌ستی به‌ناوی
خۆیانه‌وه، له‌ژێر سایه‌ی ده‌سه‌ڵاتی کوردیدا ڕای
خۆیان ده‌ربڕن و بابه‌ته‌کانیان بنووسن و
بڵاوبکه‌نه‌وه تا توشی سزای ئه‌شکه‌نجه و تیرۆر
نه‌بن. ئه‌گینا کێ سوودمه‌نده له‌کوشتنی نووسه‌ران؟
ئه‌م ڕه‌فتاره فاشیانه‌ش جێگه‌ی ترس و نیگه‌رانی و
په‌ژاره‌ی زۆره بۆ ئازادیخوازان و نیشانه‌ی
کۆمه‌ڵگه‌یه‌کی پڕ چه‌وسانه‌وه‌یه. ڕاستی ووتنی
قه‌ڵه‌مه بوێر و چاونه‌ترسه‌کان ترسی خستۆته دڵی
کۆنه‌په‌رستان و چه‌وسێنه‌رانه‌وه، ئاکامیش ڕۆتینی
گرتن و لێدان و کوشتن و تیرۆر زیادیکردووه، که
ئه‌وه‌ش ته‌نیا سیمای ڕه‌شی ده‌سه‌ڵاتداری سته‌مکاره.
ده‌سه‌ڵات دوژمنی سه‌رسه‌ختی ئازادی نووسین و
ڕاده‌ربڕینه، چونکه کاتێک نووسه‌رێکی ئازادیخواز
ڕاستیه‌کان ده‌خاته ڕوو ئه‌وا ڕووی ساخته‌ی
ده‌سه‌ڵات زێتر ده‌رده‌که‌وێ، که نووسه‌رێک
ڕه‌خنه‌کانی ئاڕاسته‌ی سیسته‌می به‌ڕیوه‌بردنی
کۆمه‌ڵگا ده‌کات، ئه‌وکات بێمافی و ناته‌واوی و زوڵم و
زۆرداریه‌کانی زیاتر ئاشکراده‌بێت. که ڕاستیه‌کان به
ده‌رکه‌وت، ده‌سه‌ڵاتداران توڕه‌و نیگه‌ران ده‌بن و بۆ
به‌رگرتن به‌و دۆخه‌ی که خۆیان لێی به‌رپرسیارن،
خه‌ڵکی ئازادیخواز و یه‌کسانیخواز و مرۆڤ په‌ره‌وه‌ر
به‌گێره‌شێوێن و سه‌رچاوه‌ی ئاژاوه و پشێوی ده‌ده‌نه
قه‌ڵه‌م. هه‌ر بۆیه تیرۆرکردنی سه‌رده‌شت و نووسه‌ران
و ڕۆشنبیرانی تری وه‌ک ئه‌و ناتوانێت ده‌نگی ئازادی
له‌ناو ببات و ڕاستیه‌کان بشارێته‌وه. بێڕێزیکردن و
ڕاونان و کوشتنی که‌سانێک که ته‌نیا چه‌کی ئه‌وان
قه‌ڵه‌ماکانی ده‌ستیان بێت نیشانه‌ی داماوی و زه‌لیلی
ده‌سه‌ڵاته. ئه‌گینا ژیانی ئینسانه‌کان ئه‌وه‌نده
هه‌رزان نی یه تا ده‌سه‌ڵاتدارانی کۆنه‌په‌رست وا
به‌ئاسانی کۆتایی پێبهێنن و بشیانه‌وێت خۆیان بێتاوان
نیشان بده‌ن و بێ سزا بۆی ده‌ربچن. کۆمه‌ڵگایه‌ک
مرۆڤه‌کانی ژیان و مافه ئینسانیه‌کانی بێنرخ کرابێت و
سامان و موڵکی به تاڵانی برابێت، کاتێک ده‌نگێکی
ئازاد و ناڕازی له‌و ده‌سه‌ڵاته چه‌وسێنه‌ر و
گه‌نده‌ڵه بێته قسه، ده‌بێت ڕاوبنرێت و ڕووبه‌روی
سزا و ته‌قه‌لێکردن و هه‌تا مه‌رگیش ببێته‌وه. ئیتر
نه یاسایه‌ک هه‌یه پارێزگاری له ژیان و ماڵی خه‌ڵک
بکات، نه‌ده‌شتوانی ده‌نگی ئازادانه هه‌ڵبڕیت نه‌ک
ده‌سه‌ڵاتداران زویر بن و تووڕه‌ییان ببێته هۆی
تۆڵه‌سه‌ندنه‌وه و سزادانی مه‌رگت. به‌ڵام مردنی
خۆڕایی به‌ده‌ستی ئه‌و تیرۆریستانه زیاتر فێرمان
ده‌کات که نابێ ئێمه به ئاره‌زووی ئه‌وان بمرین یان
به‌زۆر بمان مرێنن. به‌رته‌سکردنه‌وه‌ی ئازادییه‌کان و
کپکردنه‌وه‌ی ناڕه‌زایه‌تیه‌کانی خه‌ڵک، کلتور و
پیشه‌ی چه‌ند ساڵه‌ی ده‌سه‌ڵاتدارانی بۆرژوازی کوردی
بووه. ئه‌مه زه‌مه‌نه‌نی سه‌رکوت و تیرۆری ده‌نگی
حه‌قه، گه‌ر ئازایانه قسه بکه‌یت، بوێرانه
ڕاستیه‌کان بڵێیت، ئه‌وه‌ی له‌پشتی په‌رده ڕووده‌دات
قسه‌ی له‌سه‌ر بکه‌ی، ئه‌وه‌ی له‌ژێر به‌ڕه‌یه
بیخه‌یته سه‌ر به‌ڕه، ئه‌وا ئیتر زه‌نگی مه‌رگت
لێده‌دات و به‌ده‌ردی سه‌رده‌شته‌کان ده‌چیت. هه‌واڵی
تیرۆری سه‌رده‌شت ئه‌و ڕاستیه‌مان پێده‌ڵیت بۆ
چه‌نده‌مین جار ده‌سه‌ڵاتداران ئاگادارمان
ده‌که‌نه‌‌وه که نابێت هێڵی سوور ببه‌زێنین، چونکه
ئه‌وان هێڵی سووریان بۆ خه‌ڵکی ناڕازی و ئازادیخواز و
یه‌کسانیخواز داناوه و نابێت ئه‌و هێڵانه
تێپه‌ڕێنین. ئه‌گینا ئیتر له‌م ژیانه تراژیدیایه
خولقێنراوه‌ی ده‌ستی ده‌سه‌ڵاتدارانه‌وه به‌ره‌و
ئایینده‌یه‌کی تراژیدیایی ترمان ده‌به‌ن ئه‌ویش
تارمایی مه‌رگ و تیرۆره.سه‌رده‌شتیش چووه ڕیزی
کاروانی گیانبه‌ختکردوانی ڕێگای ئازادی و تێکۆشان
له‌پێناوی مانه‌وه‌و که‌رامه‌تی ئینساندا.
سه‌رمایه‌درانی ده‌سه‌ڵاتدار ناتوانن به‌رگه‌ی ڕه‌خنه
و سه‌رنج و ڕاستی ووتن بگرن، ده‌رخستنی ڕووی
ڕاسته‌قینه‌یان له‌لایه‌ن یه‌کسانیخوازان و ئازادیخوان
و نه‌یارانیانه‌وه، تیرۆر و شه‌ڕ و کوشتن و ماڵوێرانی
لێده‌که‌وێته‌وه. واته له‌پشت په‌رده‌ی تیرۆره‌وه
پاڵنه‌ری سیاسی به‌ئاشکرا ده‌رده‌که‌وێ، چینی
ده‌سه‌ڵاتداری سه‌رمایه‌دار ده‌یه‌وێ به‌له‌ناوبردنی
سه‌رده‌شته‌کان که‌شی ترس و تۆقاندن له کۆمه‌ڵگادا
جێگیربکات و نه‌یارانی خۆی چاوترسێن بکات، تا زیاتر
به‌رژه‌وه‌ندیه چینایه‌تیه‌کانی بپارێزێت. پێشێلکردنی
مافی مرۆڤه‌کان و بردن و تاڵانی ماڵ و سامانی خه‌ڵکی
به مافی خۆی ده‌زانێ، ئیتر ئه‌گه‌ر کۆمه‌ڵگه ناکۆکی
و نابه‌رابه‌ری و زۆرداری تێدا له‌وپه‌ڕی
چه‌وسانه‌وه‌دابێت، ده‌بێت خه‌ڵکی هه‌میشه بێده‌نگ و
ملکه‌چ بن. که‌واته کێشه‌که لێره‌وه ده‌سپێده‌کات
جیاوازیه چینایه‌تیه‌کان دینه‌مۆی جوڵاندنی هه‌ست و
هۆشی خه‌ڵکی چه‌وساوه و مافخوراوه، هه‌ر بۆیه کاتێک
نووسه‌رێکی وه‌ک سه‌رده‌شت تیرۆر ده‌کرێت،
نووسینه‌کانی گه‌واهی وه‌ستانه‌وه‌ی قاره‌مانێکه
به‌ڕووی سیسته‌می گه‌نده‌ڵ و چه‌وسێنه‌ر و
نادادپه‌روه‌ردا. له‌مێژه بزووتنه‌وه‌ی کوردایه‌تی
خه‌ریکی گرتن و ئه‌شکه‌نجه و کوشتن و
بێسه‌روشوێنکردنی نه‌یارانێتی، گه‌ر لاپه‌ڕه‌کانی
مێژوو هه‌ڵده‌ینه‌وه ده‌ریایه‌ک تاوانیان له دژی
خه‌ڵکی ناڕازی و نه‌یاری خۆیاندا ئه‌نجامداوه،
له‌گه‌ڵ ئه‌وه‌شدا هێشتا نه‌یانتوانیوه به‌ر به
توڕه‌یی جه‌ماوه‌ر و ده‌نگی ڕاسته‌قینه‌و
ئازادیخوازانه‌و و پێشکه‌وتنخوازی بگرن. ئه‌مڕۆ
له‌کوردستاندا ده‌سه‌ڵاتی میلیشیایی حاکمه سه‌ره‌ڕای
بوونی حکومه‌ت و په‌رله‌مانی لۆکه‌ڵیش، تا ئێستا
ده‌ستورێکی پێشکه‌وتنخواز و مۆدێرن نییه تا به‌رگری
له‌مافه سه‌ره‌تاییه‌کانی خه‌ڵک و ئازادی بیروڕاو
ئازادی ووشه بکات هه‌تا له ڕووی تیۆریشه‌وه، چونکه
زۆرن ئه‌و ده‌سه‌ڵاتانه‌ی له ده‌ستور و په‌یڕه‌و
پڕۆگرامه‌کانیشیاندا باسی ئازادی و دیموکراسی ده‌که‌ن
و به‌ڵام له‌ڕووی پراکتیکه‌وه دیکتاتۆرانه مامه‌ڵه
ده‌که‌ن. چونکه پاشماوه‌ی کۆنه‌په‌رستی و خێڵه‌کیانه
و ئایین و به‌رژه‌وه‌ندی بۆرژوازیانه‌یان ڕێیان
پێنادات ته‌نیا چرکه‌یه‌کیش بڕوا به‌ئازادی و
سه‌ربه‌خۆیی مافی ئینسانه‌کان بکه‌ن. هه‌ر ئه‌مه‌شه
وایکردووه که‌ئه‌م هه‌موو ده‌زگا داپڵۆسێنه‌ره بۆ
گیانی خه‌ڵکی بێتاوان و بێ چه‌ک دروست بکه‌ن. بڕیاری
کۆتاییهێنانی ئه‌م دۆخه دژوار و ناله‌باره له‌ده‌ست
خه‌ڵکی به‌شخوراوی کوردستان خۆیاندایه، مه‌سه‌له‌ی
سه‌ره‌کی و بنه‌ڕه‌تی بۆ یه‌کلاکردنه‌وه‌ی ئه‌م هه‌موو
تاوان و پێشێلکاریانه هه‌نگاو هه‌ڵگرتنه به‌ره‌و
خه‌بات و تێکۆشانی جه‌ماوه‌ری و هه‌ڵبڕینی ده‌نگی دلێر
و ئازادانه‌ی یه‌کسانیخوازان و ئازادیخوازان و
مرۆڤدۆستان و پێشکه‌وتنخوازان، ده‌بێ له‌ژێر چه‌تری
ئازادیخوازیدا یه‌کگرتوانه خۆمان ڕێکبخه‌ین. ده‌بێ
خه‌بات له‌پێناوی یاسایه‌کدا بکه‌ین که ئازادی نووسین
و ڕاده‌ربڕین مسۆگه‌ربکات، سنوورێک بۆمامه‌ڵه‌و
ڕه‌فتاره‌کانی حیزبه‌کانی ده‌سه‌ڵاتدار دابنێت و
له‌سه‌ر ئه‌و تاوانانه‌ی ڕۆژانه ئه‌نجامی ده‌ده‌ن
دادگایی بکرێن، چونکه له‌سه‌رهه‌ڵدانی هه‌رگرفت و
ناکۆکیه‌ک له ناو کۆمه‌ڵگه‌دا ده‌سه‌ڵاتداران
به‌رپرسیارن، ده‌ه‌رکه‌وتنی میدیا و دامه‌زراوه و
نووسه‌رانی نوێخواز و ئازادیخواز و یه‌کسانیخواز
نیشانه‌ی پێشکه‌وتنی کۆمه‌ڵگه‌یه، کاتێکیش به‌ره‌و
ڕووی ده‌سه‌ڵات ده‌بنه‌وه و ده‌سه‌ڵاتیش له
کۆنترۆڵنه‌کردنی ئه‌و بارودۆخه‌دا په‌نا بۆ هێزی خۆی
ده‌بات، به‌ڵام فشاری ڕۆحیه‌تی نوێی خه‌بات و
تێکۆشانی جه‌ماوه‌ریانه زۆر له‌وه به‌هێزتر و
گه‌وره‌تره و ده‌سه‌ڵات مل که‌چ و ناچار ده‌کا که
ئازادی زیاتر فه‌راهه‌م بکات. سه‌رهه‌ڵدانی ڕۆشنبیرێتی
شۆڕشگێڕانه چرای ئازادی له‌جاران زیاتر ڕوناکتر و
ده‌سه‌ڵاتیش داماو تر ده‌بێت و هزری ئازادیخوازی
له‌سه‌ر ئاستی کۆمه‌ڵگه‌دا هێدی هێدی پێشده‌که‌وێ و
بنج داده‌کوتێ و یه‌ک هه‌ڵوێستی جه‌ماوه‌ری وشیار
ته‌ختی سته‌م تێکده‌دات و ئایینده‌یه‌کی گه‌شتر و
یه‌کسان دێنێته کایه‌وه.
21/05/2010
|
