|
هاوده‌رد، گیانبه‌ختکردوو، ئه‌ی تینووی ئازادی،
ئازادییه‌ك که خواکانی ئاسمان و زه‌وی، دێمۆکراته
ڕۆشنبیره‌کان و خورافه‌چرانی مناره‌کان و پرۆفیسۆره‌کانی
زانکۆکه‌ت، ته‌نانه‌ت له‌وانه‌شه (له ناهوشیارییه‌وه
دایك و باوکیشت) لێی بترسن! ئازادییه‌ك پڕ به‌خه‌ونی
گشت کۆیلانی کۆمه‌ڵگه‌ی چینایه‌تی، ئه‌وه‌ی که ته‌نانه‌ت
جه‌سته‌تی لێبووبووه زیندان و ده‌یویست ببێته ئه‌و
هاواره‌ی که تا ده‌سه‌ڵاتدارانی بۆرژوازی کورد له
ئارادا بن له گوێیاندا بزرینگێته‌وه!
ئازیزم، هەرچەندە بەتەما نەبووم بە وتارێك بەشداری
بکەم، لەبەر ئەوەی کە واژۆی خۆم لە ناڕەزایەتینامەی
لێبوردنی نێونه‌ته‌وه‌یی و واژۆنامه‌ی هاوبه‌شی چه‌ند
سایتێک دابوو و هەروەها بەداخەوە هەژماری گرتن و
ئەشکەنجە و تیرۆر لە باشوور و عیراق و وڵاتانی دراوسێ
و جیهان هێندە زۆرە نە لە ژمارە دێن و نە کەسیش فریای
وتارنووسینی تایبەت بە هەریەکەیان دەکەوێت. من وه‌ك
تاکێك، نووسه‌رێکی سه‌ربه‌خۆ، بەپێچەوانەوەی ئەوانەی
کە بەناوی ئازادیخوازییەوە لایەنگرییان لە مرۆڤەکان
پابەندی خۆیی و ناخۆیی، باش و خراپ، ڕامیاریی و
ناڕامیاریی، ڕۆشنبیر و ناڕۆشنبیر، ناودار و کەسنەناس
دەکەن، دژی کوشتنی هەموو بوونەوەرێكم نەك تەنیا مرۆڤ،
دژی زیندانم بەگشتی نەك تەنیا زیندانی ڕامیاری و خۆیی،
دژی سێدارەم تەنانەت بۆ دوژمنەکەشم، چونکە هیچ پێناوێك
بۆ کوشتنی مرۆڤ نابینم، کەسیش مافی کوشتنی کەسی نییە
لای من، تەنیا مرۆڤ بەخۆیی ئازادانە وەك تۆ بۆی هەیە
بڕیاری گیانبەختکردنی خۆی بدات، ئەوە ئیتر ویستی مرۆڤه
و لای من لەسەری هەموو یاسا و ڕێسا و خوا و نیشتمان و
نەتەوە و چین و خێزان و خێڵ و هزرەوەیە، چونکە مرۆڤ
بەخۆی ئامانجە نەك پێكهێنەرەکانی دەوروبەری و نەك
دەستکردەکانی خۆی. به‌ڵام که دیتم به‌ناوی تۆوه سازش
له‌ته‌ك بکوژانت ده‌کرێت، ئیتر ویژدانم هه‌راسانی کردم
و هێنامیه پای ئه‌م نووسینه و وه‌ك هه‌ر خوێنه‌رێکی
په‌یامه‌که‌ت، له‌سه‌ر داوای خۆت و به مۆڵه‌تی خۆت،
من له پاش دوا وشه‌ته‌وه خاڵی کۆتایی دانانێم، چونکه
خه‌ونه‌کانمان یه‌کن، ئازادیمان ئه‌و ئامانجه‌ی
ملیۆنانی وه‌ك ئێمه ڕێبواری ڕێگه‌نی، هه‌ر هه‌مانه «خودایی
هه‌موو منه یاخییه‌کان، خودبوون-خودآیی»، هه‌مانه،
که تۆ وه‌ك په‌روانه‌یه‌کی شه‌یدا بۆی سوتای. من
کۆمایه‌ك داده‌نێم و به‌نۆبه‌تی خۆم، ویژدانم ڕاپێچی
کردووم، تا ڕمی ڕه‌خنه‌م، ڕه‌خنه‌ت ده‌مامکی نامه و
واژۆی نووسه‌رانی و ڕۆشنبیرانی به‌خواکراو داماڵێت. تۆ
ته‌مه‌نت کۆتایی هات و ئێمه پشوومان، ئارامی ڕواڵه‌تیمان
…
خوێنه‌رانی هێژا، هاوپۆل و هاوه‌ڵانی گاینبه‌ختکردوو
سه‌رده‌شت عوسمان ...
له‌و ساته‌وه‌ی که نووسه‌ران و خۆبه‌ڕۆشنبیرزان و
شوانه ڕامیاره‌کان به بۆنه‌ی تیرۆری گیانبه‌ختکردوو
سه‌رده‌شت عوسمانه‌وه نامه‌ی هه‌ستبزوێن بۆ خواکانی
سه‌رزه‌وی و ده‌ستوپه‌یوه‌نده‌کانیان به‌ڕێکرد، ئارامم
لێبڕاوه و ده‌ترسم ئه‌گه‌ر به‌یانی منیش به‌ر په‌لاماری
ئه‌و ده‌سته چه‌په‌ڵانه که‌وتم، به‌ناوی منه‌وه و
بۆ من نووسینه‌کانم له‌به‌ر پێلاوی خواکان دانێن! هه‌ر
بۆیه وه‌خۆ که‌وتم له‌بری ئه‌و و ملیاردانی به‌ر له
ئه‌و و خۆشمه‌وه نه‌فره‌تبارانیان بکه‌م.
سەرەتا پێیویستە ئەوە بڵێم هەڵوێستەکان ناتەبا و
ناکۆکن، هاوکاتی ئەو ئازیزەمان (سەردەشت عوسمان) پێنچ
مرۆڤی تر لە سایەی دەوڵەتی خواکاندا لە سێدارە دران،
لە سلێمانی لاوێکی تر ڕفێندرا و بووە قوربانی
سەرمایەداریی بنەماڵەکه‌ی و چەتەگەری باندێك، ئیتر
نازانم له‌و چرکه ساته‌وه چەند ژن سوتێنراون، چەند
مناڵ ئەتکراون، چەند زیندانی ئەشکەنجە دراون، چەند
هەستناسكی وەك سه‌رده‌شت هه‌ستبرندار کراون، چەند مناڵ
و لاو و ژنی بێچارە چ ڕاسته‌وخۆ به چاوزه‌قکردنه‌وه
لێیان یا به ته‌له‌فۆن و کورته په‌یام ترسێندراون؟
من نامه‌وێت بڵێم ئه‌وه‌ی ده‌یکه‌ن زۆره، به‌ڵام بۆ
بۆ ئه‌وانی تر نایکه‌ن، ئایا هۆیه‌که‌ی که‌می سوودی سه‌رمایه‌گوزاری
ڕامیاریی نییه له‌سه‌ر ئه‌وانیتر بۆ پارت و سایت و
ڕۆژنامه‌کانیان؟!
کێ سه‌رده‌شت عوسمانی تیرۆر کرد؟ هێشتا به‌ته‌واوی
دیار نییه، به‌ڵام تارمایی ده‌سته‌کان له‌به‌ر ڕوناکی
گومانه‌کاندا خه‌ریکه ده‌ڕه‌وێته‌وه. ئه‌ی کێبوون
کردیانه چه‌شته‌ی نیازه گڵاوه‌کانی خۆیان؟ پێش ئه‌وه‌ی
وه‌ڵامی ئه‌م پرسیاره بده‌مه‌وه، جارێ با به زنجیره‌ی
پرسیاره‌کاندا تێپه‌رین. گیانبه‌ختکردوو چۆن له بوونی
خۆی دڵنیابوو، ئاواش له کوشتن و کۆتایی ته‌مه‌نی
دڵنیابوو، به‌ڵام گیانی ئازادیخوازانه‌ی له جه‌سته‌یه‌کی
ملکه‌چدا جێی نه‌ده‌بووه، بۆیه ئاماده نه‌بوو نه‌ك
نامه‌ی په‌شیمانی و داوای لێبوردن له پارێزه‌رانی
تابووه‌کان به‌ڕێ بکات و بکات، به‌ڵکو درێژه‌ی به
چالاکی خۆیدا-هه‌رچه‌نده به‌رای من پێویست بوو لایه‌نیکه‌م
ئه‌و ده‌ڤه‌ره به‌جێبهێلێت-!ئیتر نازانم فس فس نووسه‌ران
چۆن ڕێگه به‌خۆیان ده‌ده‌ن، له‌سه‌ر وی و به‌ناوی ئه‌وه‌وه،
له‌بری درێژه‌دان به به‌ره‌نگاری ده‌سه‌ڵات و شکاندنی
تابووه‌کان، دونیای ئینته‌رنێت پڕ ده‌که‌ن له نامه‌ی
پڕ له کروزانه‌وه و پیاهه‌ڵدان و تکا و پاڕانه‌وه و
بزواندنی سۆزی سه‌رۆکان و ده‌سه‌ڵاتدارانی کوردستان؟
حه‌ز ده‌که‌م بزانم، ئایا ئه‌و نووسه‌رانه پێیانوایه
ده‌سه‌لاتداران ده‌رکی ئه‌و تاوانانه ناکه‌ن یا ئه‌وه‌تا
خۆیان ده‌رکیان به تاوانباربوونی ده‌سه‌لات به هه‌موو
ڕه‌نگ و شێوه‌کانییه‌وه ناشکێت؟
به‌رای من ئه‌و ده‌سته چه‌په‌ڵانه‌ی بڕیاری ڕفاندن و
ئه‌وانه‌ی گوله‌یان به‌زاری سه‌رده‌شت عوسمانه‌وه نا
زۆر به‌به‌زه‌یی و مرۆڤدۆستانه‌ترن له‌وانه‌ی که به‌ناوی
ئه‌وه‌وه داوای به‌زه‌یی و سۆزداری له بکوژان و
بڕیارده‌رانی تیرۆر ده‌که‌ن! چونکه ئه‌وانه‌ی
تیرۆریان کرد، نێویان به‌رزکردوه، به‌لام ئه‌وانه‌ی
که نامه بۆ سه‌رۆکان و جه‌لاده‌کانی ده‌سه‌ڵاتی سه‌رمایه
ده‌نووسن، خه‌ریکن خامه‌که‌ی سه‌رده‌شت له‌به‌رده‌م
پێلاوی تیرۆرستاندا نه‌وی ده‌که‌ن!
کێ که‌م ئاوه‌زه؟ کێ بێده‌رکه؟ کێ نه‌زانه، ده‌سه‌لاتداران
و میدیاکانیان و ڕاوێژکارانیان که شێوازی تیرۆر و به‌هره‌کێشی
و ملکه‌چپێکردنی چین و توێژه ژێرده‌سته‌کان -بێده‌سه‌ڵاته‌کان-نیان
بۆ مه‌یسه‌ر ده‌که‌ن یا ئه‌وانه‌ی که نامه‌ی پڕ شه‌رمنۆکی
و کروزانه‌وه و ختوکه‌ده‌رانه‌ی ئالۆشی ده‌سه‌ڵاتخوازی
سه‌روه‌ران به‌ڕێ ده‌که‌ن؟
پرسیارێکی دی، که یه‌خه‌ی ویژدانم به‌رنادا ئه‌وه‌یه،
بۆ به‌ر به‌تیاچوونی ئه‌و لاوه خوێنگه‌رمه نه‌گیرا؟
تۆ بڵێی ئه‌و ئاوا پۆلیس و به‌ڕێوه‌به‌رانی زانکۆی
ئاگادار کردووه‌ته‌وه، ڕۆژنامه و گۆڤار و سایت و
هاوه‌ڵه‌کانی ئاگادار نه‌کردبێته‌وه، که بۆی ده‌نووسین
و له‌ته‌کیان ده‌ژیا؟ ئه‌ی بۆ نه‌یانگه‌یانده ئه‌و
باوه‌ڕه‌ی که خودی ئه‌و زۆر له ئامانجه هاوبه‌شه‌کانی
ئه‌و و ئه‌وان به‌نرختره و مانه‌وه‌ی ئه‌و و به‌رده‌وامی
نووسینی ئه‌و زۆر له ده‌نگۆی کوشتنی کاراتر ده‌بێت؟
نووسه‌ران و ڕۆشنبیران خه‌ون به‌کامه یاساوه ده‌بینن
و خوازیاری سه‌روه‌ری کامه یاسان و چ یاسایه‌ك له‌ته‌ك
ئازادی و ڕێزی مرۆڤدا هاتووه‌ته‌وه و دێته‌وه؟ ئه‌گه‌ر
سه‌رنجی هه‌را و هوریای زۆرینه‌ی نووسه‌ران و
نارازییان و سایت و ڕۆژنامه و میدێاکان بده‌ین، ده‌بینین
خوازیاری سه‌روه‌ری یاسان و ده‌سه‌لاتدارانی هه‌ریمی
کوردستان به‌وه تاوانبار ده‌که‌ن، که له پای قسه‌کانی
خۆیان له‌مه‌ڕ سه‌روه‌ری یاسا رانه‌وه‌ستاون. ئایا ئه‌مه
وایه؟ ئایا گلەیی و سکاڵاکەیان لەجێی خۆیدایە؟ بەرای
من نا و نەخێر! چونکە لە کوردستان چ لەسەردەمی بەعس و
چ لەسەردەمی دوای تێكشکانی ڕاپەڕین تا پێش ڕوخانی
ڕژێمی بەعس و چ پاش ڕوخانی ڕژێمی بەعس، لە هەموو
سەردەمەکاندا یاسا سەروەر بووە و هەشە. مەگەر ئەوە
یاسا نییە، کە خەڵك دەکاتە زیندان، مەگەر ئەوە یاسا
نییە کە خەڵك سەرکوت دەکات، مەگەر ئەوە یاسا نییە، کە
کۆمەڵگە بەڕێوەدەبات؟ ئەگەر وانییە، با ئەو
خۆشباوەڕانە برۆن و بەبێ مۆڵەت، بەپێ پەیڕەوکردنی یاسا
کارێکی ئاسایی ڕۆانە هەر لە فرۆشتنی کیلۆیەك تەماتە
لەسەر عەرەبانەیەك تا دەگاتە خوێندن و نیشتەجێبوون و
گەشتوگوزار و هیتر بەبێ پرس و یاسای سەروەر هەنگاوك
بنێن! یاسا چییە، کە تاکی ناهوشیاری کورد شەیدای کراوە
و لێی کراوەتە دوائامانج؟ مەگەر لە وڵاتە تۆپ
دێمۆکراتەکان ئەوە یاسا نییە، کە بەپێچەوانەی خواستی
خەڵکەوە سەربازان بۆ جەنگی وڵاتانی تر دەنێرێت، ئەوە
یاسا نییە و بەپێی سەروەری یاسا نییە لە گێنەوا، لە
ئەسینا، لە ئاڵمان پۆلیس تەقە لە خۆپیشاندەران دەکات و
سەریان دەپلیشێنێتەوە؟ دەکرێت بزانین نووسەرانمان کامە
یاسایان دەوێت؛ یاسای هەرێمی کوردستان، یاسای شەریعەتی
ئیسلام، یاسای پاپ و ڤاتیکان یا یاسای تۆپ
دێمۆکراتەکانی ئەوروپا و سندوقی دروای نێودەوڵەتی؟ هی
کوردستان ئەوەتا سەروەرە و نارازییان تیرۆر دەکات و
ڕۆژنامەنووسانی خۆیی و بیانیی بەر شەق و قۆنداخ دەدات،
هی ناوەندی عیراق سێدارە تازە دەکاتەوە،هی ئێران و
سعودیە دەستوپێی تاکەکان لێدەکاتەوە، هی ئەوروپا
دەتوانن سەرنجی ڕسواکارییەکانی هێموت کٶڵ و
پارلەمانتارەکانی بریتانیا بدەن، لە گوڵ کالتریان پێ
نەوترا و دزی پاکە جگەرەیەكیش بەپێی سەروەری ئەو
یاسایە چەند ڕۆژ زیندانی و سوکایەتی پێدەکرێت! هی
سندووقی دراوی نێودەوڵەتیش سەرنجی داواکارییەکانیان لە
وڵاتانی قەرزار بدەن!
یاسا لە هەموو سەردەمەکاندا بریتی بووە لە ویستی چینی
دەسەلاتدار و ملکەچی ژێردەستان، ئەوەی کە خوازیاری
سەروەری یاسایە، کەواتە خوازیاری ملکەچی خۆیەتی و
ئەوەش لە کوردستان سەروەرە!!! ئیتر با چیتر گوێی
لاوانی کەم ئەزموون و ناهوشیاری پێ پڕ نەکەن، یاسا
واتە کوتەکی دەستی دەسەڵاتداران و پڵیشێنەری سەری
ئازادیخوازانە و هەر دەستوور و ڕێنامییەك کە
دەستەبژێڕێك لەسەرووی ویستی کۆمەڵگەوە بیسەپێنێت، بۆ
خۆی یاسایە و دژی مافی مرۆف و ئازادی و یەکسانی و
دادپەوەری کۆمەڵایەتییە. شتێك کە بتوانێت ڕێکخەری
کۆمەڵگە بێت، تەنیا ئامادەیی خۆخواستانە و خۆبەخشانەی
تاکەکان و خواستە هاوبەشەکانی مرۆڤ و ویستی ئازادانەی
مرۆڤە، کە دەبێتە بناخەیەك بۆ ڕێکخستن و بەڕێوەچوونی
کۆمەڵگە ئازادەکان. لە کوردستانی لای خۆشماندا لە
کۆندا زۆر شوێن کە هەبوون، کە بە سەردەمی کۆیلایەتی و
پێکهاتنی خێلایەتیدا تێنەپەڕیوون و بەبێ خان و بەگ
سەردەمانێکی زۆر بەخۆیان لەسەر بەرژەوەندی گشتی و
خواستە هاوبەشەکان پێکهاتوون. بەڵام لەو کاتەوەی کە
یاسای دەرەبەگان و سەرمایەداران ئەو هەڕێمانەشی
گرتووتەوە، ئیتر یاسا پیرۆز کراوە و هەرکاتێك تاکێك لە
ڕێسای خێڵ و پارت و میرایەتی لای دابێت، ئەوا وەك
سەردەشت تیرۆر، وەك فەرزاد لە سێدارە دراوە یا
بێسەروشوێن کراوە! ئەزموونەکانی مێژوو ئەوەمان نیشان
دەدەن، کە لە هەر شوێنێك یاسا سەروەر بێت، ئەوا ئازادی
بوونی نییە و خەڵتانی خوێن دەکرێت!
به‌رایی وه‌ڵام، ماوه‌ی چه‌ند ساڵێکه سایت و ڕۆژنامه
و گۆڤاره‌کان و فۆرومه‌کان و ته‌نانه‌ت هه‌ندێك له
پۆلیسه‌خوێنه‌ریش که له هه‌نده‌ران خه‌ریکی سیخوڕین
به‌سه‌ر نووسه‌ران و په‌نابه‌رانه‌وه، که‌وتوونه‌ته
پرسیار له ناوی سیانی و ناوی راستینه و داتای که‌سیی
نووسه‌ره‌کان. من پێموایه ئه‌گه‌ر له وڵاتێك پابه‌ندی
به پارێزراوی داتای که‌سیی وه‌ك مافێکی سه‌ره‌تایی
تاکی کۆمه‌ڵگه سه‌پێنرابێت و جێکه‌وته بووبێت، ئه‌وا
ئاساییه که نووسه‌ران ئه‌و داتاییانه ئاره‌زوومه‌ندانه
بخه‌نه ژێر ده‌ستی به‌ڕێوه‌به‌رانی سایته‌کان یا
خوێنه‌رانیان، به‌ڵام له کۆمه‌ڵگه‌یه‌کی ژێر ده‌مه‌چه‌قۆی
میلیشیاکاندا که نه‌ك نێوی تاکه‌کان، به‌ڵکو ده‌رگه
و ژووری خه‌وتنی تاکه‌کان پاریزراو نییه، چۆن ده‌کرێت
داوا له نووسه‌رێك بکه‌یت نێو و وێنه‌ی خۆی ئاشکرا
بکات، له کاتێکدا که قسه‌ی له شکاندنی بته پیرۆزه‌کانی
سه‌روه‌ری و قه‌ره‌قوشی ده‌سه‌ڵاتی هه‌رێم ده‌کات؟
وه‌ڵام ئاشکرایه و ئه‌گه‌ر له هه‌ر خوێنه‌رێکی
ئاسایی و دانیشتوویه‌کی هه‌رێمی کوردستان بپرسیت، ئه‌وا
ده‌زانیت که زۆربه‌ی ڕۆژنامه و گۆڤار و سایته‌کان که
ناوی سه‌ربه‌خۆبوون و ئه‌هلیبوون و چی و چیتریان له‌خۆناوه
سه‌ر به کام به‌ره‌ی ده‌سه‌لات یا ده‌سه‌ڵاتخوازانن.
هه‌روه‌ها نووسه‌رانێك که خه‌ریکی په‌یامی عاشقانه‌ن
بۆ سه‌رۆکان، شێوه‌نی گیانله‌ده‌ستدانی سه‌رده‌شته‌کان
ناکه‌ن، به‌ڵکو شیوه‌نی هه‌ریسه‌که‌ی ده‌سه‌لاتداری ده‌که‌ن
و ده‌یانه‌وێت له‌ژێر په‌رده‌ی ناڕازیبوون به تیرۆری
سه‌رده‌شت، به نیشاندانی هونه‌ری پیاهه‌ڵدان و
لاواندنه‌وه‌یان، سه‌رنجی ده‌سه‌ڵاتداران بۆ خۆیان
ڕابکێشن و له‌و ڕێگه‌وه پله‌وپایه‌ی ده‌سه‌ڵاتی یا سه‌رمایه
و زه‌وی به‌ده‌ست بهێنن.
ناڕۆشنییه‌کی تری ڕۆشنبیران له‌وه‌دایه، که خوازیاری
دادگه‌ی دادپه‌روه‌رانه و ئاشکران، که ده‌سه‌لاتی قه‌ره‌قوشی
سه‌رمایه له کوردستان بۆیان دابین بکات! ئه‌مه
کرۆکی سه‌رلێشێواوی که‌سانێکه که له ئازادی و یه‌کسانی
و دادپه‌روه‌ری کۆمه‌ڵایه‌تی ده‌دوێن، که وه‌ها چاوه‌ڕوانییه‌کیان
له‌ده‌سه‌ڵات هه‌بێت، ته‌نانه‌ت له دێمۆکراته‌کانی ئه‌وروپاش
که بوونه‌ته سیمبولی ڕۆشنبیرانی کوردستان. ده‌سه‌ڵات
له هیچ سه‌رده‌مێکدا، هه‌ڵگری هه‌ر ناو و پرۆگرام و
په‌یامێك بووبێت، له به‌رژه‌وه‌ندی زۆرینه‌دا نه‌بووه
و کوته‌کی ده‌ستی چه‌وسێنه‌ران بووه! ئه‌وه‌ی
خوازیاری دادگه‌ی ئاشکرا و گه‌لی و دادپه‌روانه‌بێت،
پێویسته هه‌نگاو بۆ هه‌ڵخراندنی ڕێکخراوه جه‌ماوه‌رییه
سه‌ربه‌خۆکان و بزاڤه کۆمه‌ڵایه‌تییه دژه سه‌روه‌ریییه‌کان
بێت، چونکه ته‌نیا له ئاماده‌یی و شکاندنه‌وه‌ی
هاوسه‌نگی هێز به‌ڵای ئازادیخوازاندا ئه‌و خه‌ونه
دێرینه دێته دی، واته سه‌رهه‌ڵدانی هێزی ڕێکخراوی
جه‌ماوه‌ریی له خواروه بۆ سه‌ره‌وه، ئه‌وه‌ی له ئه‌مه‌ریکای
لاتین ده‌سه‌ڵاتدارانیقه‌ره‌قوشی ناچار به‌هه‌لدانه‌وه‌ی
په‌روه‌نده فه‌رامۆشکراوه‌کانی دیکتاتۆره‌کانی هه‌شتاکانی
سه‌ده‌ی رابوردووی ئه‌و ده‌ڤه‌ره کرد، که ده‌وڵه‌ته
دێمۆکراته‌کانی ئه‌مه‌ریکا و ئه‌وروپا پشتیوانیان لێده‌کردن
و چه‌ک و هێز و ده‌زگه‌ی سه‌ربازیی و سیخوروی
پانوپۆڕیان ده‌خستنه به‌رده‌ست! ئیتر کاتی ئه‌وه
هاتووه، که تاکی ژێرده‌سته‌ی کورد خۆی له داوه‌کانی
خۆشباوه‌ڕی ڕاپسکێنێت و سه‌رنجی مایه‌پوچی گه‌مه
پارله‌مانییه‌کان و ئه‌زموونه‌کانی خه‌باتی مرۆڤایه‌تی
بۆ ئازادی بدات، که ده‌ریانخستووه، تا چێنێك سه‌روه‌ری
چین و توێژه‌کانی تری کۆمه‌ڵگه بێت، تا پارت و ده‌سته‌بژێر
(نخبة)ی رامیاریی شوان و چاوساخی تاکه‌کانی تر بن و
ڕۆڵی سه‌رۆکخێڵه‌کانی دوێنێ بگێرن، خه‌ونی ڕۆشنبیرانی
خوشباوه‌ڕ به ده‌سه‌ڵات و دێمۆکراتی پارله‌مانی (ناراسته‌وخۆ)
به ئازادییه‌وه، خه‌ونی وشتر ده‌بێت به فڕین له
قولایی ئاسماندا!
یادی سه‌رده‌شته‌کان، فه‌رزاده‌کان، یادی قوربانییه
گومناوه‌کانی ڕێگه‌ی ئازادی، زیندوو
نێوی ده‌سه‌ڵاتداران و ده‌ستوپه‌یوه‌نده تیرۆریسته‌کانیان
ڕسوا و نیشانه‌ی شه‌رمه‌زاری
*لێره‌دا مه‌به‌ستم له‌و واژۆیانه نییه که
ئامانجیان فشارخستنه‌سه‌ر ده‌سه‌ڵاتدارانی عیراق و هه‌رێمی
کوردستانه له‌لایه‌ن ناوه‌نده جیهانییه‌کان و رای
گشتی جیهانییه‌وه، به‌ڵکو مه‌به‌ست له‌و نامه و
واژۆیانه‌یه که ئاراسته‌ی سه‌روه‌رانی کوردستان
کراون.
http://hawpshti.com/ku/petition_azady_rojnamagary/index.php
|