سروشتی ژیان پڕ پڕه‌ له‌ هاوكێشه‌ی جۆراوجۆر ، جگه‌ له‌ یاساكانی سروشت خودی مرۆڤه‌كان داهێنه‌ر و خولقێنه‌ری ئه‌و پرنسیپ و هاوكێشانه‌ن ، له‌ ئه‌زله‌وه‌ مرۆڤ خۆی له‌به‌رده‌م ململانێ‌ و زۆرانبازییه‌كه‌ی نه‌بڕاوه‌ و بێپسانه‌وه‌دا بینیوه‌ته‌وه‌ تاكو ژیان به‌رده‌وامی هه‌بێت ئه‌و ململانێ و كێشمه‌كێشانه‌ بوون و درێژه‌ی هه‌یه‌ ، به‌ لۆجیكێكی تر ژیان بریتیه‌ له‌و بۆربورین و كێبڕكێیه‌ هه‌مه‌جۆر و هه‌مه‌چه‌شنه‌ی نێوان مرۆڤ و مرۆڤ له‌لایه‌كه‌وه‌ و له‌ لایه‌كی تره‌وه‌ له‌گه‌ڵ سروشتدا به‌ سوڕی زه‌مه‌نه‌كه‌یه‌وه‌ ، له‌ناو ئه‌و هێڵی هاوكێشانه‌دا دوو دیارده‌ی زه‌ق و به‌رچاو مه‌ترێز و سه‌نگه‌ری دژ به‌ یه‌كیان گرتووه‌ ئه‌ویش لایه‌نی باش و لایه‌نی خراپن یان هێزی رووناكی و هێزی تاریكی و ئیراده‌ی خێر و ئیراده‌ی شه‌ڕن ... هتد .
ئێمه‌ی مرۆڤ له‌ناو ناخی خودی خۆماندا ئه‌و دوو سه‌نگه‌ره‌ ئاوه‌دانه‌ و هه‌ردوو لایه‌نه‌كه‌ی تێیدا به‌رجه‌سته‌یه‌ و هه‌مێشه‌ له‌ زۆرانبازی و ململانێدان ، بۆ ئه‌وه‌ی جوانیه‌كانی ژیان وه‌كو خۆی ببینین و تابلۆ و ره‌نگه‌كان له‌دید و هزرماندا تێكه‌ڵ و پێكه‌ڵ نه‌بن بۆ ئه‌وه‌ی تاكه‌كانی كۆمه‌ڵگا به‌ كه‌سوكار و خۆشه‌ویستی خۆمان بزانین ، بۆ ئه‌وه‌ی ناسنامه‌ و به‌ها مرۆییه‌كانمان وه‌كو خۆی به‌ده‌ووربه‌رمان بناسێنین ، بۆ ئه‌وه‌ی ژیانی كۆمه‌ڵگا لێوان لێو كه‌ین له‌ به‌خته‌وه‌ری و تێڕوانینی جوان جوان ، ده‌بێت هه‌وڵ بده‌ین لایه‌نه‌ باشه‌كه‌ی ناو ناخه‌وه‌مان به‌هێز بكه‌ین ، ده‌بێت هه‌میشه‌ له‌ خو و پیستی مرۆڤدا بین و نه‌چینه‌ به‌رگ و كه‌وڵی تره‌وه‌.
كورد له‌ دێر زه‌مانه‌وه‌ ده‌بێژێ‌ :(سینه‌ی بێ‌ كینه‌ پێعه‌مبه‌ر سڵاوات) ، ئێمه‌ی تاكی كۆمه‌ڵگای كوردی ده‌بێت له‌ ده‌ستپێكدا له‌گه‌ڵ خۆماندا ئاشت بێنه‌وه‌ به‌و لۆجیكه‌ی مرۆڤ له‌گه‌ڵ خودی خۆیدا ئاشته‌وایه‌ك به‌رقه‌رار بكات ، سینه‌ی له‌كینه‌ و رق خاڵی بكاته‌وه‌ و ئینجا ئه‌و ئاشتییه‌ی ناخی نیشان بدات و نمایشی ده‌ووروبه‌ری بكات ، هه‌موو تاكێك وورد و درشت سه‌نگ و قورسای خۆی له‌كۆمه‌ڵگادا هه‌یه‌ ، هه‌موومان ره‌وڕه‌وه‌ی ژیان پاڵ ده‌نێین ، كه‌م و زۆر هه‌موو كه‌س به‌گوێره‌ی رۆڵ و ده‌وری خۆی نه‌خشی له‌ جوڵانه‌وه‌ی ئه‌و ره‌وره‌وه‌یه‌ هه‌یه‌ و له‌و ته‌كانه‌ی به‌ره‌و پێشچوونه‌دا هاوبه‌ش و به‌شداره‌ .
ئه‌م قۆناغه‌ هه‌ستیاره‌ی كه‌ كورد پێیدا گوزه‌ر ده‌كات ئاشتبوونه‌وه‌یه‌كه‌ی هه‌مه‌لایه‌نه‌ و گشتگیر ده‌خوازێت ئاشتبوونه‌وه‌یه‌ك كه‌ بریتی بێت له‌ داماڵینی هه‌موو بوغز و كینه‌ و رقێك به‌رامبه‌ر به‌یه‌كتر و چوونه‌وه‌ سه‌ر كرۆك و به‌ده‌نه‌ و لاشه‌ی مرۆڤانه‌ی خۆمان ، كوشتنی گیانی ئه‌نایه‌ت و خۆ به‌زل زانین و خۆ ویستی و خۆ په‌رستی ، ئاشتبوونه‌وه‌یه‌ك له‌ پێناو یه‌كتر بژێن و له‌ پێناو یه‌كتردا بمرین ، ئاشتبوونه‌وه‌یه‌ك له‌ پۆپه‌ی ده‌سه‌ڵاته‌وه‌ شۆڕبێته‌وه‌ بۆ ناوه‌وه‌ی خه‌ڵك ئاشتبوونه‌وه‌یه‌ك هه‌موو چین و توێژاڵه‌كان بگرێته‌وه‌ ، ئاشتبوونه‌وه‌یه‌ك نه‌ك ته‌نها وه‌كو ماچ مۆچه‌كانی جه‌ژن ته‌نها رۆژێك بێت به‌ڵكو به‌ دڵ یه‌كمان خۆش بووێت ، ئه‌بێت مه‌به‌ست و نێه‌تمان وابێت تاكو له‌سه‌ر گۆی ئه‌م زه‌وییه‌ن یه‌كمان خۆش ده‌وێت و ره‌ق و كینه‌ له‌ دڵ و ده‌رونماندا گه‌را ناخه‌ن و لانه‌ ناكه‌ن .
ژیان هی هه‌مووانه‌ پێویست ناكات هه‌وڵی یه‌كتر سڕینه‌وه‌ بده‌ین ، كه‌لتوری یه‌كتر سڕینه‌وه‌ هی چاخ و سه‌رده‌مه‌كانی پێشوو بوو ، ده‌كرێ‌ گوێ‌ بۆ یه‌كتر شل بكه‌ین وپرنسیپی دیالۆگ و حیوار میتۆد و رێباز و كارنامه‌ی ژیانمان بێت و فه‌رهه‌نگی پێكه‌وه‌ ژیان و پێكه‌وه‌ هه‌ڵكردن پیاده‌ بكه‌ین ، ده‌كرێ‌ یه‌كتر قبوڵ بكه‌ین چونكه‌ مێژوو ده‌ری خستوه‌ قبوڵنه‌كردنی یه‌كتر زیانی گه‌وره‌ی لێداوین ، ئێمه‌ی كورد هه‌موو پێكه‌وه‌ گرنگین ، پێكه‌وه‌ ده‌توانین شتی گه‌وره‌ ئه‌نجام بده‌ین و به‌ره‌و پێش هه‌نگاو بنێن .
ئێمه‌ ده‌بێت رۆژێك ئه‌م سه‌ر زه‌وییه‌ به‌ جێبهێڵین به‌دڵنیاوه‌ ده‌ڵێم ئه‌وه‌ی كرداری مرۆڤانه‌ بێت له‌ ژیاندا ناخی لیپا و لیپ بێت له‌ ئاشتی و خۆشه‌ویستی خه‌ڵك له‌ كاتی ئاویلكه‌ و گیانه‌ڵادا به‌ئاسوده‌ی رۆح ده‌سپێرێ‌ و به‌ به‌خته‌وه‌ری سه‌ر ده‌نێته‌وه‌ ، چونكه‌ سه‌ربه‌رزه‌ به‌رامبه‌ر به‌وێژدانی خۆی و به‌ر ئازاری ویژدان ناكه‌وێ‌ .


husin2008@yahoo.com