|
ئه‌وه‌ی که من لێره‌دا گه‌ره‌کمه وخۆم خه‌ریکی کردنه‌وه‌ی
گرێ پووچکه‌یه‌کی ئاڵۆز ده‌که‌م و بۆ خستنه به‌ر باس
و لێدوانی، سووکه‌ڵه هه‌نگاوێکی بۆ ده‌هاوێژم ، له
راستیدا کاری ناوه‌ندێکی ئاکادامیکی به توانا و
لێزانه که ده‌بێ پێداچوونه‌وه‌یه‌کی ورد و بێ لایه‌ن
و به بێ به‌رژه‌وه‌ندی سیاسی وکه‌سێتی بێجگه له
داکۆکی له مافی تاک و بنچینه‌کانی مافی مرۆڤ و دوور
له هه‌ستی تۆڵه هه‌ستاندنه‌وه بێت . ده‌نگی بێ ده‌نگی
من ته‌نیا بۆ وه‌خه‌وه‌ر هێنانه‌وه‌ی خه‌وتووی وێژدانی
پێنووسوانی کورده ، به‌تایبه‌ت ئه‌وانه‌ی که زۆربه‌ی
ژیانی خۆیان له پێناو خه‌ڵکی کوردستان و له دژی
داگیرکه‌راندا داناوه و بگره هێندێکیان نه‌ک هه‌ر
ژیانیان به‌ڵکوو گیان و که‌س و کاریشیان له‌و پێناوه
داناوه.
1 – من وه‌ک هه‌ڵبژارده لێره و له‌وێ باس له‌و
پێنووسوانانه ده‌که‌م که جێگا و شوێنی تایبه‌تیان به
پێنووسه‌که‌یان بۆ خۆیان مسۆگه‌ر کردوه. وه هه‌ر وه‌ها
ناوی تاک و تروک له‌و که‌سانه‌ی له ناو خۆی کوردستان
و به‌ده‌ستی خۆیی له به‌رژه‌وه‌ندی سیاسی و حیزبی و
که‌سیتی و بنه‌ماله‌یی قۆربانی ره‌شه‌کوژی و تێرۆر
بوون ئاماژه‌یان پێ ده‌که‌م . جا ئه‌گه‌ر له کات و
شوێن و رێکه‌وت وگێرانه‌وه ...هتد له هه‌ر لایه‌که‌وه
توشی هه‌ڵه بوم داواکارم که بۆ زیاتر وه‌خه‌به‌ر
هێنانه‌وه‌ی وێژدانی پێنووس و بۆ به به‌ڵگه و پێناسه‌کردنی
دیارده‌ی قیزێون و بێزێونی تێرۆر و ره‌شه‌کوژی و
رفاندن و شوێنه ون کردنی مرۆڤی کورد به ده‌ستی کورد
چ به ئیمه‌یڵ و چ به نووسراوه‌ی ئاشکرا به‌شداریم له
گه‌ڵ بکه‌ن . به بیانووی دوژمنی زۆر و کزولاوازی
کوردان و کای کۆن به‌بادا کردن ، خۆیان نه‌پارێزن له‌به‌ر
ئه‌وه‌ی هه‌تا پێنووسی کورد له ناو خۆیدا ئازاو به‌هێزو
ئازادو سه‌ربه‌خۆو پاراو بێت ، ئه‌وه ئه‌وه‌نده‌ش تاک
و کۆمه‌ڵگای کورد به توانا و داگیرکه‌ریش لاواز ده‌بێت
.به مه‌رجێک ویژدان پێنووس بئاژوێت نه‌وه‌ک پێنووس
ویژدان بقاچێنێت .
2 – مه‌به‌ست له‌م نووسینه ته‌نیا باس کردن له
دیارده‌ی ره‌شه‌کوژی ناو خۆیی به ده‌ستی ناو خۆیه .
ده‌نا وه‌ک ئه‌ژمارتن ئه‌وانه‌ی که له لایه‌ن
داگیرکه‌رانه‌وه تێرۆر کراوه‌ن ئه‌وه‌نده زۆرن له
ئه‌ژمار نایه‌ن وه‌ک نه‌مران سه‌رگورد عه‌باسی سه‌رکرده‌ی
هێزه چه‌کداره‌کانی حزبی دێمۆکرات له مه‌هابادی ،
دوکتور قاسملوو و دوکتور سا دق شه‌ره‌فکه‌ندی و
هاورێیانیان له ئه‌ورۆپا له لایه‌ن کۆماری ئیسلامی
ئێرانه‌وه. نه‌مر پێنووسوانی خاوه‌ن ویژدان عه‌بدوولخاله‌ق
مه‌عرووف له لایه‌ن به‌عسی و ئیسلامیه‌کان له هه‌ولێر
. نه‌مر نووسه‌ری به توانا ئاپێ مووسا ( مووسا ئه‌نته‌ر
) له لایه‌ن داگیرکه‌رانی تورکیاوه . بگره سه‌دانی
تر له کوردستان و ده‌ره‌وه . هه‌ر وه‌ها له هه‌ر
شوێنێک باس له ویژدانی پێنووس بکرێت مه‌به‌ست له‌و
پێنووسانه‌یه که خاوه‌ن هه‌ست و هه‌ڵوێست بوون نه‌وه‌ک
پێنووس فرۆش و پێنووس فز و فس .
3 – لێدوان و باس کردن له نوێ کردنه‌وه‌و کولاندنه‌وه‌ی
ئه‌و برینه به زامه یه‌که‌م ده‌بێته هۆی ئه‌وه که
ئێمه ده‌ریده‌خه‌ین مرۆڤ گه‌لێکین ده‌توانین ئاوڕ بده‌ینه‌وه
سه‌ر رابوردووی خۆمان و وه‌به‌ر چاوی نه‌وه‌ی نوێ بده‌ینه‌وه‌و
ناحه‌ز و دزێوێکانی لێ جیا بکه‌ینه‌وه و مێژووی راسته‌قینه‌ی
مرۆڤی ئه‌م ده‌وه‌ره‌ی وه‌ک خۆی پێ بناسێنینه‌وه .
دووهه‌م به شوێن داچوونی ئه‌و دیارده شه‌رماوی و نا
مرۆڤانه ده‌بێته هۆی بناخه‌ی دامه‌زراندن و دابه‌زاندنی
لێپرسینه‌وه‌ی دادپه‌روه‌ری و هه‌ر وه‌ها بنه‌بڕکردن و
درێژه نه‌دانی تێرۆر و چرایه‌کی سووریش بۆ داهاتوو بۆ
ئه‌و که‌س و لایه‌نانه بێت که کردویانه نه‌یکه‌نه‌وه
و خه‌ڵکانی نوێش په‌ندی لێ وه‌ر بگرن .
له کۆمه‌ڵگای مرۆڤ دا هه‌ر که‌سه‌ی راسپارده‌یه‌کی چ
به خۆشی خۆی و چ به زۆرداری و چ به بێگاری و چ له
ناچاری و چ به بێزاری بۆی دیاری کراوه و شان به
شانی و ده‌سته و یه‌خه‌ی ژیانی له گه‌ڵ ده‌باته سه‌رێ
. یه‌ک به کرێکاری و کارداری و یه‌ک به مل هۆڕی و
زۆرداری ، یه‌ک به پاره و پووڵداری و یه‌ک به داشقه‌چێتی
و بێکاری ، یه‌ک سه‌ر کۆمار ویه‌ک ده‌رکه‌وان ، یه‌ک
ماوستا و یه‌ک شوان ، یه‌ک بریار ده‌ری دادگا و یه‌ک
به‌ندی ناو زیندان ، یه‌ک راوچییه له زه‌وزان و یه‌ک
بکوژه له زیندان ، یه‌ک ماڵی خاوه‌ن خوداکان پاقژ ده‌کا
و یه‌ک له سه‌ر شه‌قامه‌کان بۆ قونچکه جگه‌ره‌یه‌ک و
چایه‌ک ده‌ست درێژ ده‌کا ، یه‌ک گیانی له سه‌ر ده‌سته
له چیا و یک مرۆڤی لای قه‌له‌وانه بۆ زگیا ، دانه و
دوو و...... پێنووس به ده‌ستن بۆ هێنانه زمان و
پێناسه کردنی ئه‌و کۆمه‌ڵگایانه. پێنووس وانیس وه‌ک
هه‌موو ئه‌وانه‌ی سه‌ره‌وه خه‌ریکن له‌و جیهانه
بچکۆڵه ژیکه‌ڵانه که مرۆڤ له خۆی کردوت به
زیندانێکی پان و به‌رین و پێنووسیش مێژووکه‌ی به ناحه‌زو
جوانه‌وه شرۆڤه ده‌کات . با ورد بینه‌وه تا بزانین
چ له مابه‌ینی پێنووس و پێنووسوان له سه‌ر مرۆڤ رۆڵی
هه‌یه و له‌و کێ به‌ر کێ یه ، کێ به‌ره‌و ئاقاری
راستی لێده‌خۆرێت یان توشی لارێ و هه‌ڵدێری ده‌کات .
پێنووس ماشێنه و پێنووسوان شۆفیر و مرۆڤیش مسافیر .
ویژدان که رۆڵی سه‌ره‌کی له‌و که‌ینه و به‌ینه دا
هه‌یه چی و چۆنه . چلۆن ده‌توانین لێوه بدوێن . من
پێم وایه ویژدان هێزێکه له ناوه‌ندی مێشک و دڵ . به
سه‌ر فرمان وکرده‌وه‌ی مێشک و هه‌ست و قین و خۆشه‌ویستی
دڵ دا پێناسه بکرێت . مرۆڤ له کۆنی کۆنه‌وه هاتوه
و باس له خۆی و ده‌ور به‌ر ده‌کات و هه‌زاران خوا و
ئۆل و یاسا و رێسای بۆ سواری سه‌ری یه‌کبوون له سه‌ر
زه‌وی بۆ ئاسمان و له‌وێرا هێناوێتێ خواره‌وه . هه‌موو
مرۆڤێک توانیوێتی و ده‌توانی درو له گه‌ڵ خوا و دین و
یاسا و رێسای ده‌ستکردی خۆی بکات و کرده‌ی به نه‌کرده
نیشان بدات و یان ده سه‌ر وسه‌کوتی ئه‌ویدیکه‌ی هه‌ڵسوێت
و فرمێسک و قاقای به درو ببارێن و لێبدات و له گه‌ڵ
دار و به‌ردی به‌سته‌زمانیش ناراست بێت . وه هه‌ر یه‌که
هه‌زاران نه‌هێنی و شاراوه‌ی هه‌یه که تا هه‌نووکه
خوا و دین و یاساکه‌ی سه‌ری لێ ده‌ر نه‌هێناوه. به‌ڵام
له ناو خۆێدا و له ڕاست ویژدانی ( گرینگ نیه
ویژدانی چۆن بکار دێنێت ) دروێ بۆ ناکرێت و ناتوانێت
پێکۆڵکه‌ی له نه‌هێنیه‌کانی بکات . جا بۆیه لام وایه
که مرۆڤ چ خۆی به ویژدان و چ بێ ویژدان ده‌ر بخات ئه‌و
هێزه‌ی به‌ینی دڵ و مێشکی ( ویژدان ) له گه‌ڵی دایه
و خۆی له ده‌ستی قوتار نابێت . با بزانین ویژدان و
پێنووس له سه‌ر دیارده و کرده‌وه‌ی ناحه‌زی ره‌شه
کوژی و تێرۆری ناوخۆیی چۆن له گه‌ڵ یه‌ک هه‌ڵس و که‌وتیان
کردوه.
من ده‌مێکه و له زۆر شوێن باس له‌و تێرۆرانه ده‌که‌م
به تایبه‌ت تێرۆره‌کانی خه‌باتکارانی رۆژهه‌ڵات له
باشووری کوردستان . پێم وابوو ده‌بێ ئه‌و لایه‌ن و که‌سانه
که به هه‌ر هۆکارێك كه بۆخۆیانی ده‌هێنه‌وه و
پاساوی ده‌ده‌ن ئه‌وه‌نده به ئێش و ئازارن و هه‌ر وه‌ها
راده‌ی تێگه‌یشتنی کۆمه‌ڵگای کوردیش له‌م باره‌وه ئه‌وه‌نده
چوته سه‌ره‌وه که ئیدی تێرۆر و ره‌شه‌کوژی و رفاندن
و فرێدانی ته‌رمه‌کان وه یان شوێنه‌ون کردن بنه‌بڕ
بووبێت ، به تایبه‌ت ئه‌و نیوه چڵه ده‌سه‌ڵاته‌ی
کوردی باشوور ( ئه‌و دوو حیزبه سه‌ره‌کیه ) له هه‌موو
لایه‌نه‌کان زۆرتر تاوانی تێرۆریان ده‌خرێته پاڵ ده‌بوو
له هه‌موانیش زیاتر خۆ له‌و دیارده گه‌نده‌ڵه
بپارێزن و بوارێکی وایان ره‌خساندبا که ته‌نانه‌ت ئه‌وه‌ی
له رابوردوودا له سه‌ریانه یان له بن دوڕدونگی و
گۆمان دان به‌با هانده‌رێک که مرۆڤی کورد ئه‌و
رابوردوه تاڵ و ناشیرنه‌ی له قۆژبنێکی مێژوویدا
ئارشیڤ کردبا. به‌ڵام موخابن نه‌وه‌ک ئه‌وه نه‌کراوه
دیسان هه‌ر ئه‌وانن که له کاتی هه‌ڵبژاردنه‌کانی
مانگی 3 ی 2010 پارڵمانی عێراق له سوله‌یمانی و ده‌وربه‌ری
مه‌ترسی هه‌واڵی رفاندن و تێرۆر و هێرش و هه‌ره‌شه‌ی
نادیار بۆ سه‌ر نه‌یاران و به تایبه‌ت رۆژنامه
وانانن بڵاو ده‌بێته‌وه‌و کاره‌ساتی ڕفاندن و تێرۆر و
فرێدانی ته‌رمی نه‌مر سه‌رده‌شت عۆسمانی خوێندکار و
رۆژنامه‌وان به رۆژی رووناک و له پایته‌ختی هه‌رێمی
کوردستان و له ناو زانکۆی هه‌ولێر دا له شێوه‌ی
تێرۆره‌کانی ک.گ.ب و ساوامای ئیتڵاعاتی کۆماری ئیسلامی
رووده‌دات . بۆ یه‌که‌م جار به گشتی کۆمه‌ڵگای کوردی
و ده‌ره‌وه ڕاده‌چڵه‌کێنێ و وه‌خه‌به‌ر دێنێت و ته‌نانه‌ت
ئه‌وانه‌ی جێ گۆمانی ئه‌و تراژدیایه‌ن بۆ پاکانه‌ی
خۆیان به له‌ق و لۆق ئه‌م تێرۆره شه‌رمه‌زار ده‌که‌ن
، هه‌ر چه‌ند له درێژه‌ی ناره‌زاته‌تی و ده‌نگی به‌رزی
هه‌مه لایه‌نه په‌نایان بۆ هه‌ره‌شه و گوره‌شه و
وه‌بیرهێنانه‌وه‌ی شه‌ری دۆراوی ناو خۆیی و تێرۆره‌کانی
رابوردوو ده‌به‌ن بۆ چه‌واشه‌کاری و ترساندن وه‌ها هه‌ڵوێستێک
له خۆ ده‌رده‌خه‌ن . مادام هه‌موو لایه‌ک قامک بۆ بنه
ماڵه‌ی بارزانی و پارتی وه‌ک بکه‌ری ئه‌و تێرۆره درێژ
ده‌که‌ن ئه‌وانیش ئه‌گه‌ر راست ده‌که‌ن ده‌بوو له گه‌ڵ
ئه‌و خه‌ڵکه نارازیانه له‌و په‌یوه‌ندێدا هاوده‌نگ
بان و هه‌ر چی زووتربکوژانی سه‌رده‌شت عۆسمانیان
ئاشکرا بکه‌ن و ده‌ری بخه‌ن که کێ یه له ئاوی لێڵی
کوردستان به دژی ئه‌وان ماسی ده‌گرێت.
درێژه‌ی هه‌یه
kawesoor@yahoo.com
|
