|
له چوارچێوه‌ی ئه‌و خۆپیشاندان و ناڕه‌زاییانه‌ی له
دژی تیرۆر کردنی زه‌رده‌شت عوسمان ئه‌نجام درا، تا هه‌نوکه‌ش
له لایه‌ن ده‌زگا به‌رپرسه‌کان سه‌باره‌ت به‌و دۆسیه‌یه
هیچ شتێک ئاشکرا نه‌کراوه، له کاتێکدا ئه‌مرۆ له
دونیادا له حاڵه‌تی ڕودانی ڕوداوێکی له‌و شێوه‌یه ئه‌گه‌ر
چی کۆمه‌ڵگاو سه‌رجه‌م چین و توێژه‌کانیش به‌م شێوه‌یه‌ی
ئێستاش کاردانه‌وه‌یان نه‌بێت، ئه‌وا وه‌ک کاری ئه‌و
ده‌زگایانه‌ی ئه‌رکی لایه‌نی ئاسایشی ناوخۆ هه‌ڵده‌گرن
ئه‌و زه‌روره‌ته هه‌ڵده‌گرێت ڕاپۆرتی ڕۆژانه‌ی خۆیان
له به‌رده‌م سه‌رجه‌م ده‌زگاکانی راگه‌یاندندا بخه‌نه
ڕوو. لێره‌دا زۆر به داخه‌وه‌م ده‌بینین هه‌ندێک ده‌زگا
به به‌یاننامه‌ی ترسناک به‌شداری ده‌که‌ن که له
ناوه‌ڕۆکدا ئه‌م کێشه‌یه په‌یوه‌ندی نیه به سه‌ریانه‌وه،
ئه‌وه‌نده‌ی ده‌زگای ئاسایش و پۆلیس و وه‌زاره‌تی
ناوخۆ لێی به‌رپرسیاره. من له تێ قونینی ده‌زگای هه‌واڵگری
پارتی که به ده‌زگای پاراستن ناسراوه توشی شۆک هاتم
که به‌و شێوه‌یه‌ی ئێستای به چه‌ند به‌یاننامه‌یه‌ک
هاتونه‌ته نێو ئه‌م که‌یسه‌یه‌وه. باوه‌ڕناکه‌م له
هیچ قوژبنێکی ئه‌م دونیایه هاوڵاتییه‌ک هه‌بێت حه‌ز
نه‌کات که‌وا ئه‌و نیشتمانه‌ی تیایدا ده‌ژی خاوه‌نی ده‌زگایه‌کی
هه‌واڵگری به هێز بێت، هه‌واڵگرییه‌ک که کار له
پێناوی پاراستنی مافی هاوڵاتیان و نه‌ته‌وه‌دا بکات،
به‌لام مه‌خابن ده‌زگایه‌کی وه‌ک پاراستن یان زانیاری
ستراتیژیاتی کاریان هێنده‌ی ستراتیژیه‌تێکی به‌رته‌سکی
حیزبیانه‌یه ئه‌وه‌نده نه‌ته‌وه‌ییانه نیه، ئه‌مه‌ش
ئه‌و دودڵی و بێ متمانه‌ییانه‌ی لای تاکه‌کانی کۆمه‌ڵگای
کوردی دروست کردووه که‌وا هیچ دڵێکیان پییان خۆشنه‌بێت،
به‌ڵکو هه‌ندێک جاریش به مه‌ترسی له قه‌ڵه‌م بدرێن.
هه‌رێمی کوردستان ئه‌مڕۆ له چوارچێوه‌ی عێراق دا خۆی
پیشانی خۆی و ده‌ره‌وه‌ی خۆی ده‌دات، که‌وا هه‌رێمێکی
ئارام و به توانایه له ژیر سایه‌ی حکومه‌ته
فیدراڵییه‌که‌ی و ته‌واوی ئه‌و هێزانه‌ی که بۆ به‌رقه‌رار
کردنی ئاسایش و پاراستنی گیانی هاوڵاتیان پێکی هێناوه،
وای ده‌رده‌خات توانیویه‌تی ناوچه‌یه‌کی گه‌لێک ئارام
تر له چاو ناوچه‌کانی خوار و باشوری عێراق دا
هێنابێته دی، شه‌رمه‌و ناتوانێت وه‌ڵامی هاوڵاتییانی
بداته‌وه، شه‌رمه‌و چاو ده‌قوچێنێ له‌و تیرۆره‌ی به
ڕۆژی ڕوناک له به‌رده‌م زانکۆیه‌ک و له ناو جه‌رگه‌ی
پایته‌خته‌که‌یدا ڕووده‌دات به تێپه‌ڕین به فلته‌ری
ده‌یان کۆنترۆڵ و چه‌ک پۆینتا، شه‌رمه‌و ناتوانێت وه‌ڵامی
هاوڵاتیان بداته‌وه، ئه‌وه‌ی ئه‌مڕۆ ده‌بینرێت
هاوڵاتیان به سه‌رجه‌م چین و تویژه‌کانه‌وه ڕژاونه‌ته
سه‌ر جاده‌کان و له ده‌رگای په‌رله‌مان و ده‌سه‌ڵات
ده‌ده‌ن تا لێدوان له سه‌ر مه‌ترسی و تیرۆرێکی له‌و
شێوه‌یه بدات یه‌قه‌ی کۆمه‌ڵگای کوردی گرتووه، ده‌رکه‌وته‌یه‌که
پیش ئه‌وه‌ی ده‌سه‌ڵات خوێندنه‌وه‌یه‌کی ئاژاوه‌گێڕیان(ئه‌نارشستیان)ه‌ی
بۆی هه‌بێت ده‌رکه‌وته‌یه‌کی ئه‌وپه‌ڕی مه‌ده‌نیانه‌و
ته‌ندروسته که‌وا گوزارشته له‌وه‌ی کۆمه‌ڵگای کوردی
کۆمه‌ڵگایه‌کی هه‌ستیار و چاونه‌ترسه به جۆرێک
ئازادی له سه‌روی ژیانه‌وه ده‌بینێت و تیرۆری که‌سێک
له تیرۆری نه‌ته‌وه‌وه سه‌یر ده‌کات!
هه‌ڵبه‌ته لای هه‌ر هه‌مومان ئه‌وه ئاشکرایه
تاوانیکی وه‌ک تیرۆر کردنی نه‌مر زه‌رده‌شت عوسمان و
سۆرانی مامه حه‌مه‌و ده‌یانی هاوشێوه‌ی ئه‌وان زه‌نگێکی
مه‌ترسیداره به‌رامبه‌ر کۆمه‌ڵگاو هه‌م ده‌سه‌ڵات، له
به‌ر ئه‌وه‌ی ئه‌و ڕقه‌ی وه‌ک ڕه‌مه‌ک(غه‌ریزه) به‌رده‌وام
له نێوان ده‌سه‌ڵات و کۆمه‌ڵگادا ده‌جوڵێته‌وه،
دۆخێکی وا ده‌یگه‌یه‌نێته ئاستی مه‌رگی ته‌ره‌فێکیان،
که بێ گومان هه‌ر مه‌رگی ده‌سه‌ڵاته، چونکه له
مێژودا به شێوه‌یه‌کی ڕه‌ها هه‌رگیز نابینرێت ده‌سه‌ڵات
کۆمه‌ڵگای له ڕیشه ده‌رهێنابێت به پێچه‌وانه‌وه ئه‌وه
هه‌رده‌م کۆمه‌ڵگا بووه ده‌سه‌ڵاتی له ڕیشه ده‌رهێناوه،
من هه‌رگیز ناخوازم و باوه‌ڕناکه‌م که‌سی هه‌ستیار
بخوازێت ئه‌م ناکۆکیانه به ئه‌نجامێکی وا بگات،
چونکه ئاڵۆز بوون و به هه‌ند وه‌رنه‌گرتنی دۆخێکی له‌و
چه‌شنه ئاوێکی زۆری ده‌ویت و بۆ جارێکی تر دانیشتوان
به هه‌لاکه‌تدا ده‌بات، دیاره ئه‌ویش به‌خشینی
قوربانیه‌کی قورسه که‌وا به ته‌نها خه‌ڵکی هه‌ستیار
ده‌رکی پێ ده‌کات. زۆرجاریش بینیومانه، یان بیستومانه
له ئه‌نجامی لاوازی ده‌رکی ده‌سه‌ڵات له نه‌بوونی به‌زه‌یی
به‌رامبه‌ر به خودی خۆی و خه‌ڵکیدا ئه‌م دۆخه په‌نگی
خواردووه‌و چیتر خه‌ڵکی به‌رگه‌ی چاوه‌ڕوانی زیاتری نه‌ماوه‌و
ده‌ره‌نجام به ته‌قینی شاده‌ماری کۆمه‌ڵگا ده‌ستی
پێکردووه‌و به شاگه‌ردانی کۆتایی هاتووه، ئه‌گه‌ریش
هه‌ر دوور نه‌ڕۆین و ڕژێمی شای ئێران و ڕژێمی به‌عسی
له ناو چوو به نموونه وه‌ربگرین زۆر وێنه‌ی وێک چوو
به‌رچاو ده‌که‌ون.
ئه‌مڕۆ داخوازی کۆمه‌لگای کوردی بۆ لێدوان و ئاشکرا
کردنی بکوژانی زه‌رده‌ست به ده‌ر له هه‌ر تۆمه‌تیکی
ئه‌نارشستی داخوازییه‌کی گونجاوو به جێ یه، ئه‌مڕۆ
خه‌لکی له سه‌ر شه‌قام و شوینه گشتییه‌کاندا ده‌ستیان
له کار هه‌ڵگرتووه‌و په‌نجه‌یان له سه‌ر مه‌ترسییه‌که
که‌وا جاره‌نووسی هه‌موانی له سه‌ر به‌نده‌و ده‌ستنیشان
نه‌کردنی ده‌بێته هۆی له‌که‌یه‌ک له سه‌ر ئازادی و
ئارامی و دیمۆکراسی، هه‌روه‌ها دڵه‌ڕاوکه‌یه‌ک که
پێده‌چێت دواجار به‌ربه‌ستێک دروست بکات له به‌رده‌م
هه موو ئه‌و هه‌نگاوانه‌ی که به‌ستراون به داهاتوی
ڕوونی ئه‌م گه‌له‌وه. من نازانم حکومه‌ت و سه‌رجه‌م
وه‌زاره‌ت و ئه‌و دام و ده‌زگایانه‌ی که پێکهاتوون له
ناوه‌ڕۆکدا بۆ پاراستنی هاوڵاتیان و به جێ گه‌یاندنی
یاسا، چ زه‌روره‌تێک هه‌ڵده‌گرن له کاتێکدا بارستایی
ئه‌وه‌یان نه‌بێت هه‌فته‌یه‌که سه‌ره ده‌زویه‌ک له‌و
تاوانه ئاشکرا نه‌کراوه. خه‌ڵکی مافی خۆیه‌تی که‌ژاوه‌ی
سه‌رۆک و ته‌واوی لایه‌ن و ده‌زگا به‌رپرسه‌کان ڕاوه‌شێنێت،
خه‌ڵکی مافی خۆیه‌تی تیشکی گومان بخاته سه‌ر هه‌رچی
مرۆڤ هه‌یه له پایته‌ختدا، خه‌ڵکی مافی خۆیه‌تی
هاوار بکات و بڵێت: حکومه‌ت زیاده‌یه! مادام حکومه‌تێک
به ده‌نگی ئێمه دروست بووه‌و ئێمه له نێو ده‌نگماندا
شه‌رعییه‌تمان پێ به‌خشیوه بۆ چاودێری و باش تر کردنی
باری ژیان، که‌وا به پێچه‌وانه‌وه هیچ گۆڕانێک به
دی ناکرێت، چیتر زیاده‌یه‌و ناشێ هه‌بێت. ئه‌و مرۆڤانه‌ش
که ئه‌مڕۆ مه‌ستی حوبی خودان به ئیلحاده‌وه
کۆتاییان پێ دێ و له پێش ده‌مامکی خوداکانیانه‌وه ڕه‌وانه‌ی
دۆزه‌خ ده‌کرێن! زه‌رده‌شته‌کانیش بۆ هه‌میشه (گاتا)ی
عه‌شق و نه‌مری له گه‌ڵ (با)دا ده‌خوێنن.
12/05/2010
|
