|
ـ په‌یڤ ـ
دبه‌رپه‌رێن شاعران دا
یاری و ته‌به‌لانێ ب په‌یڤان دهێته‌كرن و
دئه‌زه‌ل دا هه‌می دغرور و مه‌غرورن
دسه‌رده‌مێ عه‌شقێ و نڤیسینا په‌یڤان دا
دبیته توفانا مروڤیبونێ و
یاری ب پیروزیێن وان دهێته‌كرن!
هه‌می سه‌مایێ لبه‌ر په‌یڤان دكه‌ن، هه‌كو ژ تاریێ
درژیێن
شاباشان دده‌ن!
هه‌می خوه لبه‌ر تێهنا په‌یڤان گه‌رم دكه‌ن
هه‌كو دسوژن و دبنه ره‌ژی یان خولیێ لجێهـ خوه
دهێلن
نه‌بویه،
جاره‌كێ عشق ل جاده‌ییان هاتبیته ژبیركرن و
شاعران بو قه‌له‌مێ خوه تیژ نه كربیت
یان عاشقه‌كی پیروزی لبن پیا كربن
هه‌رده‌م عشق و گونه‌هی پێكڤه دهێنه هلاویستن
هه‌ردوو دبنه خیانه‌ت
چنكو ژ ده‌ڤێ شاعری دهێنه بهیستن
په‌یڤ دهێنه نڤیسین و دهێنه گوتن و دكوفكان را
دهێنه گازیكرن
دئه‌زه‌ل دا دڤێت شاعر نه هاتبانه خولقكرن
شاعرن،
به‌تالترین ئاتافا ل ڤی عه‌ردی هاتینه دیتن
شاعرن، خه‌ونان دبینن
دخه‌ونان دا ئازادیێ رویس دهێلن چبلاق
شاعرن، سیاسی دچنه دخه‌ونێن وان دا و
تێكه‌لی ماچ و رویساتیا مه‌مكان دبن
شاعرن، دناڤ كه‌لتورێ عشقێ دا دمرن
درزن و په‌یڤێن وان حه‌فنوكی دبن
ـ په‌ره‌گراف ـ
تو، دوماهی په‌ره‌گرافی
ل سه‌ر ته‌خته‌ره‌شی دهێته نڤیسین!
هه‌می شوماتیێن دمێشكێ من دا رابوینه سه‌مایێ
دا درێژمه سه‌ر به‌رپه‌را و
هێڤێنێ شعره‌كێ یه د سه‌رێ من دا
یا، دناڤ ده‌مارێن له‌شێ من دا ئاوازه‌كێ دژه‌نیت
چه‌ند دچمه به‌ر خودیكێ،
وێنێ من به‌روڤاژی دهێته پێش چاڤێن من!
خو بو دده‌مه نیاسین
جاره‌كێ و دوو جارا و
ده‌هـ جاران..
خو بو جارا ئێكێ نینه
وێنێ من دخودیكان را دهێته به‌روڤاژیكرن!
ئه‌ز و شیعر
ژ پاشماوێ عشقه‌كا نه‌زوكین
ژ پاشماوێ كه‌لتورێ ترسێ و
كه‌لتوره‌كێ نه‌فره‌تێ ژبیركری، خو ئه‌گه‌ر ژێ ب
ڤه‌ره‌سیێین ژی
به‌لكو ببینه جوانی و ئێكه‌مین
په‌ره‌گرافێ شیعریێ ژ ته‌خته ره‌شی، نه‌هێته
ژێبرن!
دگه‌ل به‌رپه‌رێن خوه بتنێ
هه‌كو تابوت هه‌می تشتان بگومان دئێخیت
شعر چه‌ند ب تابوته‌كا داخستی ڤه دچن!
به‌لگێن وه‌ریای یێن پایزه‌كا ژبیركری و په‌یڤێن
شاعره‌كێ په‌نجه موركری
په‌یڤ به‌رسڤه‌كن ژ ره‌نگێ شه‌رابێ ڤه‌دچن و به‌لگ
دناڤ دوكێلا جگاره‌كێ دا
سه‌مفونیا پایزه‌كێ ڤه‌دگێرن
نه عشقا ژناڤ دوكێلا جگارێ
دومێ دكێشیت
نه هزرا، ژ پێكێ شه‌رابێ ده‌ردكه‌ڤیت!
ژیان سیدیه‌كێ به‌تاله و
شاعر سه‌مفونیا پایزه‌كێ ل سه‌ر تومار دكه‌ن
ئێك په‌ره‌گراف، ئێك تراك و ئێك پێكه‌نین
|
