سه‌باره‌ت به‌ بڕیارنامه‌ و بانگه‌وازه‌که‌ی( ڕه‌وه‌ندی سۆسیالیستی)
 

  

ئامانج پیرۆت


ڕه‌وه‌ندی سۆسیالیستی، له‌ چله‌ی ڕۆژنامه‌نوس سه‌رده‌شت عوسماندا بڕیارنامه‌یه‌کی ده‌رکرد و تیایدا وێڕای خستنه‌ ڕووی لێکدانه‌وه‌ و تێبینی یه‌کانی سه‌باره‌ت به‌ تیرۆر و ئه‌و هێزانه‌ی که‌ له‌ پشتیه‌وه‌ن و ئه‌و ئامانجانه‌ی که‌ هه‌یانه‌، سه‌باره‌ت به‌ بزوتنه‌وه‌ی ئازادیخوازی‌ و مه‌حدودیاته‌کانی، سه‌باره‌ت به‌ ئه‌هه‌میه‌تی ده‌خاله‌تی ئاگاهانه‌ی چه‌پ و کۆمۆنیسته‌کان و تد... بڕیاری ئه‌وه‌شی داوه‌ که‌ هه‌وڵ بدات بۆ به‌دی هێنانی لیژنه‌یه‌کی جه‌ماوه‌ری سه‌ربه‌خۆ و بێلایه‌ن، ده‌رهێنانی بلۆکێکی چه‌پ له‌ ده‌روونی ئه‌و بزوتنه‌وه‌یه‌وه‌. هه‌روه‌ها دوابه‌دوای ئه‌م بڕیارنامه‌یه‌، بانگه‌وازێکیشیان بڵاو کرده‌وه‌، که‌ تیایدا ته‌ئکید له‌سه‌ر پێویست بوونی په‌یوه‌ندی و دیالۆگ له‌ نێوان کۆمۆنیسته‌کاندا ده‌کاته‌وه‌.

به‌ ڕه‌چاوکردنی گرنگی و زه‌روره‌تی خولقاندن یان بوژاندنه‌وه‌ی( لانی که‌م) سونه‌تی په‌یوه‌ندی و جه‌ده‌ل له‌ ناو کۆمۆنیسته‌کاندا، به‌ پێویستم زانی وێڕای پشتگیری کردن و به‌ ده‌نگه‌وه‌چوونی هه‌ریه‌که‌ له‌ :
یه‌که‌م: ئیقدامه‌که‌ و میکانیزمه‌که‌ی( واته‌ گفتوگۆ کردن و پێکه‌وه‌ کارکردن)
دوه‌م: بابه‌تی گفتوگۆ که‌ ( که‌یسی سه‌رده‌شت)
‌‌ئه‌م تێبینی یانه‌ش بخه‌مه‌ ڕوو:
1. به‌ڕای من دیاریکردنی ئامانجێکی دیاریکراو بۆ بزوتنه‌وه‌که‌( که‌ خۆی له‌ پێکهێنانی لیژنه‌یه‌کی لێکۆڵینه‌وه‌ی نوێدا ده‌بینێته‌وه‌) هه‌نگاوێکی سه‌رکه‌وتوانه‌یه‌ و نه‌ک هه‌ر ده‌توانێت، زه‌مینه‌یه‌کی گونجاو و پته‌و بۆ گه‌یاندنی کۆمۆنیسته‌کان به‌ ئاستێکی به‌رزتر له‌ هاوکاری و پێکه‌وه‌ کارکردن له‌ بوارێکی دیاریکراودا فه‌راهه‌م بکات، به‌ڵکو ئه‌وه‌شی لێ ڕه‌چاو ده‌کرێت، که‌ به‌شه‌ خۆڕسکه‌که‌ی بزوتنه‌وه‌که‌ فشارێکی جددی بخاته‌ سه‌ر ئه‌و قاوغه‌ی‌ که‌ نوێنه‌ره‌ سیاسی و ئیعلامی یه‌کانی به‌شه‌ ناڕازی یه‌که‌ی سه‌رمایه‌داران و توێژه‌ مشه‌خۆره‌کان دایانسه‌پاندووه‌ به‌سه‌ریدا و به‌ قازانجی چین و توێژه‌ به‌شخوراوه‌کان و بزوتنه‌وه‌که‌یان و هه‌ڵسوڕاوه‌کانیان تێکیان بشکێنێت و ئه‌گه‌ر نه‌شگات به‌ ده‌سکه‌وتی مه‌لموس، ئه‌وا بگات به‌ ده‌رسی زۆر گه‌وره‌ سه‌باره‌ت به‌ ماهیه‌تی ئه‌و نوێنه‌ره‌ سیاسی و ئیعلامی یانه‌. ده‌رسگه‌لێک که‌ ڕه‌نگه‌ له‌ کاتێکی تر و به شێواز و وه‌سایلی تر ئاسان نه‌بن.

3. پایه‌کانی سه‌رکه‌وتنی ئه‌و ته‌رحه‌ ( دانانی لیژه‌یه‌کی تری لێکۆڵینه‌وه‌) و ئه‌و ئاڵوگۆڕانه‌ی که‌ به‌دوای خۆیدا ده‌یهێنیت، خۆیان له‌م خاڵانه‌دا ده‌بیننه‌وه‌:‌
أ. بزوێنه‌ری سه‌ره‌کی بزوتنه‌وه‌که ته‌جروبه‌ و وشیاری یه‌کی( سیاسی) بوو و هیچ ئومێد و خۆشخه‌یاڵی یه‌کی به‌ یاسا نه‌بوو وه‌ هیچ بڕوایه‌کیشی به‌ حیکایه‌تی که‌مته‌رخه‌می داموده‌زگا ئه‌منی یه‌کان و چی و چی‌ نه‌بوو و وه‌ک دادوه‌رێک، که‌ ده‌یان ساڵ به‌ڵگه‌ی کۆکردبێته‌وه‌، یه‌کسه‌ر حوکمی خۆی دا و تاوانباری سیاسی دیاریکرد، هه‌ر ئه‌مه‌ش خاڵی به‌هێزی بزوتنه‌وه‌که‌ بوو و پارتی و ته‌نانه‌ت یه‌کێتیشی شپرزه‌ کرد.
ب. بازنه‌ی چوارده‌وری تاوانباره‌ سیاسی یه‌کان زۆر له‌وه‌ سه‌ختتره‌ که‌ بتوانرێت به‌ هیچ سیناریۆیه‌کی یاسایی تێکبشکێنرێت،چونکه‌ هیچ سیناریۆیه‌ک ناتوانێت ئه‌و سابیقه‌ مێژوویی یه‌ ده‌یان ساڵه‌ و پڕ له‌ ڕووداوی هاوشێوه‌ له‌ بیر خه‌ڵک بباته‌وه. حوکمی خه‌ڵک له‌ ته‌جروبه‌یه‌کی زۆر دورودرێژ و سه‌خته‌وه‌ هاتووه‌. نه‌ک سه‌رۆکی هه‌رێم و پارتی خۆیان و داموده‌زگاکانیان، به‌ڵکو موعته‌به‌رترین که‌سی دنیا‌ بێت و بیه‌وێت حوکمێکی پێچه‌وانه‌ی ئه‌مه‌ بدات، خه‌ڵکی کوردستان ده‌یان بازنه‌ی گومانیش بۆ ئه‌و ده‌کێشن.

ج. به‌ڕای من چل په‌نجا ڕۆژی ڕابردوو، نه‌ک هه‌ر زه‌مه‌نێک نه‌بوو، بۆ ئه‌وه‌ی ئه‌و بزوێنه‌ره‌ سه‌ره‌کی یه‌ و حوکمه‌ سیاسی یه‌کانی کز بوبێت وه‌یان گۆڕابێت، به‌ڵکو چ ئیشه‌کانی هه‌ڵسوڕاوانی بزوتنه‌وه‌که‌ ( که‌ ناکرێت ده‌وری ڕاگه‌یاندن و نوسین فه‌رامۆش و که‌مڕه‌نگ بکه‌ین، چونکه‌ ئێستا ئێمه‌ له‌سه‌رده‌مێکداین، که‌ نه‌ک هه‌موو شتێک گرنگی نوسین و راگه‌یاندن ده‌سه‌لمێنن، به‌ڵکو هه‌ر خودی که‌یسی سه‌رده‌شت، له‌ سه‌ره‌تاوه‌ تا ئێستا کاریگه‌ری ئه‌م وه‌سیله‌یه‌ ده‌سه‌لمێنێت) و چ هه‌وڵه‌کانی خودی پارتی و یه‌کێتی و سه‌رۆک و سیاسه‌تمه‌دار و نوسه‌ر و ڕاگه‌یاندنه‌کانیان له‌ شپرزه‌یی یاندا( که‌ به‌شێکی گرنگی به‌هۆی گورزی ئه‌و نوسین و لێکۆڵینه‌وانه‌وه‌ بوو، که‌ ڕۆژانه‌ تێیان ده‌سره‌وێنرا) بونه‌ته‌ مایه‌ی ئه‌وه‌ی که‌ بزوێنه‌ره‌ سه‌ره‌کی یه‌که‌ هه‌رچی زیاتر خاراو و جێگیر تر بێت‌. هه‌ربۆیه‌ ده‌توانین بڵێین ئه‌وه‌ی که‌ کز بووه‌، ئه‌مه‌ نی یه‌، به‌ڵکو ئه‌و ئومێده‌یه‌، که‌ نوێنه‌ره‌ سیاسی و ئیعلامی یه‌کانی به‌شه‌ ناڕازی یه‌که‌ی سه‌رمایه‌داران، بۆ ئیحتوا کردن و ساتوسه‌ودا کردن و ئاراسته‌ کردنی هه‌یانبوو. من دڵنیام ئه‌گه‌ر بزوتنه‌وه‌یه‌کی خۆڕسک توانی چل ڕۆژ له‌مه‌وبه‌ر، نه‌فره‌تی سه‌رده‌شت به‌ڕاسه‌ری حزبێکی ده‌سڵاتداره‌وه‌ ڕابگرێت و شپرزه‌ی بکات، ئه‌وا هه‌وڵدانێکی ئاگاهانه‌ی چل ڕۆژی داهاتوو، ده‌توانێت نه‌فره‌تی ئه‌و بزوتنه‌وه‌یه‌ به‌ ڕاسه‌ری هه‌موو ئه‌وانه‌وه‌ ڕابگرێت که‌ ئینسان وه‌ک پیرۆزترین شت دانانێن و به‌جۆرێک له‌ جۆره‌کان ده‌یانه‌وێت پیرۆزی یه‌کی تری به‌سه‌ردا بسه‌پێنن.
‌‌
له‌ کۆتاییدا ته‌ئکید له‌سه‌ر ئه‌وه‌ ده‌که‌مه‌وه‌، که‌ منیش ده‌نگی خۆم ده‌خه‌مه‌ پاڵ ده‌نگی ڕه‌وه‌ندی سۆسیالیستی و داوا له‌ سه‌رجه‌م کۆمۆنیسته‌کان ده‌که‌م، که‌ لانی که‌م ئه‌وه‌ نیشان بده‌ن، که‌ ئه‌م جۆره‌ ئیقدام و بابه‌ت و میکانیزمانه‌یان لا گرنگه‌ و هیوادارم قسه‌ و هه‌ڵوێستی ڕۆشنی هه‌موو ئه‌وانه‌ ببینم که‌ ته‌وه‌قوعم لێیان هه‌یه.

 25.06.2010
amang70@hotmail.de




 

           

 

26/06/2010

 

goran@dengekan.com

 

dengekan@yahoo.com