من له ژماره 18 ی 'ڕووبه‌ری داهێنان' که پاشکۆیه‌کی ئه‌ده‌بیی ڕۆژنامه‌‌ی 'ڕووبه‌ر'ه و له چاوپێکه‌وتنێکدا به شێوه‌یه‌کی پۆزه‌تیڤ ناوی هه‌ردوو نووسه‌ر شێرکۆ بێکه‌س و ڕه‌ئووف بێگه‌ردم هێناوه. دیدگای من له‌سه‌ر ئه‌و دوو به‌ڕێزه ئه‌وه بوو که ئه‌وان وه‌ک دوو که‌س له‌نه‌وه‌ی شه‌ست و حه‌فتاکان ڕێز له نه‌وه‌کانی دووای خۆیان ده‌گرن و ئه‌و داموده‌زگایانه‌ی کاری لێده‌که‌ن ده‌خه‌نه خزمه‌ت ڕۆشنبیریی کوردیه‌وه.ئه‌و ناو‌هێنانه له بنه‌ڕه‌تدا به‌شێک بوو له هه‌وڵی من بۆ داننان به هه‌وڵی که‌سانی دڵسۆز، ئه‌وه‌ش به مه‌به‌ستی فراوانکردن و هاندانی نییه‌تی باش، به مه‌به‌ستی گه‌وره‌کردنی تروسکاییه‌ک له تاریکستانی وڵاتدا ئه‌گه‌ر بچووکیش بێت. به‌ڵام خوێندنه‌وه‌ی نووسینه‌که‌ی کاک شوان ئه‌حمه‌د له‌سه‌ر ده‌زگای سه‌رده‌م که له ژماره‌کانی 227 و 228 هه‌فته‌نامه‌ی ئاوێنه‌دا بڵاوی کرده‌وه، به‌ته‌واوی بۆچوونی منی له‌سه‌ر ئه‌و دوو به‌ڕێزه گۆڕی. مایه‌ی داخه که رۆژ به‌ڕۆژ بارودۆخی کوردستان زۆرتر ئا‌ڵووده ده‌بێت و ئومێد هه‌ڵچنین له‌سه‌ر که‌س و ده‌زگاو دیارده‌کانی ناوی نه‌ک هه‌ر کارێکی سه‌خت ده‌بێت، به‌ڵکو له ڕۆیشتن به‌ناو کێڵگه‌ی میندا زۆرتر ووریایی ده‌وێت . که بێگومان ئه‌وه‌ش جێگای نائومێد‌ییه‌کی زۆره. بۆیه من لێره‌وه داوای لێبوردن له خوێنه‌ره‌کانم ده‌که‌م و به‌ته‌واوی له‌ ستایشکردنی ئه‌و دوو به‌ڕێزه په‌شیمانم.

ماردین ئیبراهیم
16/06/2010