ئاشكرایه‌ كه‌ تیرۆركردنی رۆژنامه‌نووسی(سه‌رده‌شت عوسمان) یه‌كێكه‌ له‌و هه‌وڵه‌ ترسناكانه‌ی كه‌ ده‌درێت بۆ سنورداركردنی ئازادی را ده‌بڕین له‌ هه‌رێمی كوردستاندا. هه‌ر له‌ سه‌ره‌تاشه‌وه‌ به‌شێكی زۆری هاووڵاتیان و نووسه‌ر و رۆژنامه‌نووس و هونه‌رمه‌ندان و خه‌ڵكانی ئازادیخوازی كوردستان له‌سه‌ر ئه‌م تیرۆركردنه‌ ناڕه‌وایه‌ هاتنه‌ ده‌نگ، به‌ڵام ئه‌وه‌ی هه‌ست ده‌كرێت هه‌وڵه‌كان تا ڕادده‌یه‌ك په‌رش و بڵاوی پێوه‌ دیاره‌. بۆیه‌ پێمان باش بوو كه‌ هه‌وڵه‌كانمان له‌ چوارچێوه‌ی كه‌مپێنێك رێكبخه‌ین، بۆ كاركردنی به‌رده‌وام له‌سه‌ر كه‌یسی شه‌هید(سه‌رده‌شت عوسمان).
ئێمه‌ وه‌كو ده‌سته‌یه‌ك نووسه‌ر و رۆژنامه‌نووس و كه‌سانی ئازادیخواز له‌ شاری هه‌ولێر كه‌مپینێكی نوێ راده‌گه‌یه‌نین به‌ناوی(كه‌مپینی شه‌هید سه‌رده‌شت عوسمان بۆ ئازادی را ده‌ربڕین) و هه‌موو هه‌وڵه‌كانمان چڕ ده‌كه‌ینوه‌ بۆ كاركردنی به‌رده‌وام له‌سه‌ر ئه‌و كه‌یسه‌ و ئازادی بیروڕا له‌ سه‌رانسه‌ری دونیا به‌تایبه‌ت له‌ هه‌رێمی كوردستان.
ئاشكرایه‌ كه‌ تاوه‌كو ئێستا هیچ هه‌وڵێكی ئه‌وتۆ نه‌دراوه‌ بۆ ئاشكرا كردنی بكوژانی شه‌هیدی رۆژنامه‌نووس و خوێندكار(سه‌رده‌شت عوسمان)، ئێمه‌ جگه‌ له‌وه‌ی نیگه‌رانین له‌و كه‌مته‌رخه‌مییانه‌ی ده‌زگاكانی ئاسایشی و پۆلیس و وه‌زاره‌تی ناوخۆ و ته‌واوی ده‌زگا و دامه‌زراوه‌ په‌یوه‌ندیداره‌كان، پێمانوایه‌ مه‌ترسی له‌سه‌ر ئازادی را ده‌ربڕین هه‌یه‌ له‌ هه‌رێمی كوردستان و ده‌بێت هه‌موومان كار بۆ فراوانتركردنی ئازادییه‌كان بكه‌ن. هه‌روه‌ها هه‌وڵی به‌رده‌وام ده‌ده‌ین بۆئه‌وه‌ی كه‌یسی تیرۆركردنی (سه‌رده‌شت عوسمان) به‌ كراوه‌یی بمێنێته‌وه‌ تا ئاشكراكردن و به‌ سزا گه‌یاندنی تاوانباران.
لێره‌وه‌ بانگه‌وازی جه‌ماوه‌ری ئازادیخوازی كوردستان و رۆژنامه‌نووسان و هه‌موو كۆمیته‌ و كه‌مپینه‌كانی (سه‌رده‌شت عوسمان بۆ ئازادی) له‌ ده‌ره‌وه‌ و ناوه‌خۆی كوردستان ده‌كه‌ین هه‌موومان هه‌وڵه‌كانمان له‌ یه‌ك كه‌مپین و رێكخراوی سه‌رانسه‌ری و فراوان چڕ بكه‌ینه‌وه‌ له‌پێناوی به‌ئه‌نجام گه‌یاندنی دۆسیه‌ی شه‌هیدی رۆژنامه‌نووس(سه‌رده‌شت عوسمان) و به‌ ڕه‌سمی ناسینی ئازادی راده‌ربڕین له‌ كوردستان.
له‌ڕێی ئه‌م راگه‌یاندنه‌وه‌ی ئه‌وه‌ راده‌گه‌ینین كه‌ ئامانجی سه‌ره‌كیمان ئاشكراكردن و دادگایی تاوانباران و بكوژانی شه‌هید سه‌رده‌شت عوسمان و به‌ ره‌سمی ناسینی ئازادی راده‌ربڕینه‌ له‌ كوردستاندا كه‌ ئه‌وه‌ ئامانجێكی سه‌رده‌شت و هه‌موو سه‌رده‌شته‌كانی تره‌. هه‌روه‌ها ئامانجێكی دیكه‌مان كاركردنه‌ بۆ ته‌واو بوونی په‌یكه‌ری (ئازادی شه‌هید سه‌رده‌شت عوسمان) و دواتریش له‌سه‌ر به‌چاپ گه‌یاندنی په‌رتوكێك كار ده‌كه‌ین كه‌ ته‌واوی نووسینه‌كانی شه‌هید سه‌رده‌شت و ئه‌و نووسنانه‌ش كه‌ له‌سه‌ر تیرۆركردنه‌كه‌ی نووسراون له‌خۆ ده‌گرێت. جگه‌ له‌مانه‌ش چه‌ند پرۆژه‌یه‌كی دیكه‌مان ده‌بێت بۆ داهاتوو. سوپاسی هه‌ر كه‌سێكیش ده‌كه‌ین ئه‌گه‌ر هاوكاریمان بكات. جا چ له‌ كۆكردنه‌وه‌ی كۆمه‌ك بۆ په‌یكه‌ره‌كه‌ یاخود له‌ كاره‌كانی دیكه‌مان.
¬
كه‌مپینی"سه‌رده‌شت عوسمان بۆ ئازادی راده‌بڕین" له‌ شاری هه‌ولێر
2010-06-26