|
له‌منداڵیمه‌وه هێنده‌ی عه‌شقم بۆ نیشتیمان و
سه‌ركرده گه‌مژه‌كانی هه‌بوو، هێنده خۆشه‌ویستیم بۆ
منداڵیی خۆم نه‌بوو. منێك كه چاوم هه‌ڵهێنا بینینم
نیشتیمان وشه‌یه‌كه هه‌موومان پێمان پیرۆزه و
خاكێكه هه‌ر خوا به‌ئێمه‌ی به‌خشیوه و به‌س. ناوی
سه‌ركرده‌كانمان له‌ناوی خوا پێ پیرۆزتر بوو،
له‌ئێستاشدا كه‌سانێك وان. حارێكیان له‌یه‌كێك له
كۆبونه‌وه‌كانی شوێنێك به‌شدار بووم، كه‌سێك له‌وێدا
ناوی سه‌ركرده‌یه‌ی هێنا و وتی: ئه‌گه‌ر "م.ج" بڵێ من
خوام، ئه‌وا یه‌كه‌م كه‌س ده‌بم سوزده‌ی بۆ ده‌به‌م.
هێنده‌ی ئه‌م قسه‌یه مانای هه‌ژاری تاكی كوردمان
نیشان ده‌دات به‌رامبه‌ر به‌بوونی خۆی، هێنده‌ش دیوێكی
تراژیدی هه‌یه به‌رامبه‌ر به‌تاكێك كه سه‌ركرده‌یه‌ك
وه‌ك خوا ده‌شوبهێنێت. ئه‌مه به‌رهه‌می نائه‌قڵانی
كۆمه‌ڵگایه‌كه كه تاكی خۆی هێنده بچووك كردۆته‌وه
له‌به‌رامبه‌ر مرۆڤه‌كانی دی. واشم ده‌هاته به‌رچاو
كه سه‌ركرده‌كانی ئێمه بوونه‌ته فیرعه‌ونی مێژوو.
له‌منداڵیمدا زۆرم بیست له‌باره‌ی شۆڕشه مرۆڤ
كوژه‌كانی كورد و دوژمنانی. نازانم له‌وكاته‌دا من
هێنده ده‌مارگیر بووم له‌خۆمه‌وه هه‌ستی كوشتنم
به‌رامبه‌ر به مرۆڤانێك لای دروست بوو كه دژی كوردن.
ئاخر داستانی باب و باپیرانمان ته‌نها ئه‌و
چیرۆكانه‌یان لێ ده‌تكا كه باسی دوژمنانی كورد و
حیزبه‌كانیان بكه‌ن. له‌هه‌مووشیان ترسناكتر ئه‌م
هه‌سته‌م بوو به‌رامبه‌ر به كوردێكی به‌رامبه‌ر كه
وه‌كو من له‌سه‌ر یه‌ك بیروباوه‌ڕ و حیزب نه‌بێت.
به‌حه‌ماسه‌تێكی زۆره‌وه بیرم ده‌كرده‌وه به‌رامبه‌ر
به‌و حیزبه‌ی كه وای له‌من كردبوو ئینتیمان
به‌رامبه‌ر نیشتیمان هه‌بێت. ئای تۆ بڵێی ئه‌گه‌ر
له‌سه‌رده‌می شۆرشه‌كان ژیابام چ قاره‌مانێكم لێ
ده‌رچووبا..! هێنده‌ی نه‌برد هه‌ستم كرد ورده ورده
ئه‌و ئینتیمایه له‌مندا ده‌مرێت، چونكه له‌گه‌ڵ
رۆیشتنی زه‌مه‌ن به‌ناو كوچه‌كانی ده‌سته‌ڵات و ئه‌و
كرداره نا ئینسانییانه‌ی له‌ناو حیزبه‌كاندا
به‌رامبه‌ر یه‌كتر ده‌كرێت، شته‌كان گۆڕانێكی تریان
به‌سه‌ر بیركردنه‌وه‌كانمدا هێنا. جارێكیان
له‌په‌ره‌گرافێكدا وته‌یه‌كی "میكاڤیللی"ی
فه‌یله‌سووفم خوێنده‌وه كه ده‌ڵێت: "شه‌ڕكردن
له‌سه‌ر نیشتیمان ده‌بێت هاوسه‌نگ بێت له‌شه‌ڕكردن
له‌سه‌ر ئازادیی"، كه‌واته شه‌ڕی ناوه‌خۆی نێوان
حیزبه‌كان شه‌ڕكردن بووه له‌سه‌ر كامه ئازدایی..؟
تێگه‌یشتم ئه‌و شه‌ڕكردنه شه‌ڕكرنێكی ئینسانی
نه‌بووه به‌ڵكو به‌های مرۆڤبوون له‌وێدا نه‌ماوه و
شێوه‌یه‌ك له شێوه‌كانی وه‌حشیگه‌ری زاڵ بووه
به‌سه‌ریدا. له‌كاتێكی تریشدا زانیم بیروباوه‌ڕی
"ئه‌لبێرت كامۆ"ی فه‌یله‌سووف به‌رامبه‌ر به‌شۆڕشه‌كان
جگه له پێزانینی قه‌سبخانه هیچی تر نه‌بووه، یانی
شۆرشه‌كانی مرۆڤ قه‌سابخانه‌یه‌كی گه‌وره‌ن و هیچ...
جارێكیشیان شیعرێكی "عه‌بدوڵا په‌شێو"م خوێنده‌وه كه
ده‌ڵێت: "منداڵه چاو گه‌شه‌كان، كه گه‌وره‌بوون،
ڕه‌نگه زۆرتان به‌رگوێ كه‌وێ، باسی ئێمه و
ئازایه‌تی، باسی ئێمه‌و مه‌ردایه‌تی، به‌ڵام نه‌كه‌ن
باوه‌ڕ بكه‌ن، هه‌مووی درۆن، درۆی په‌تی". به‌ڵێ، باب
و باپیرانی ئێمه به‌ده‌ستی سه‌ركرده گه‌مژه‌كانی
خۆیان فریویان خوارد، مه‌به‌ستم به‌لاوه نانی ئه‌و
شه‌ڕانه نه‌بوو له دژی به‌عس، به‌ڵكو كۆبوونه‌وه‌یان
له‌ژێر چه‌تری حیزبانێك كه ته‌نها به‌دوای ده‌سته‌ڵات
و پاره‌ن. ئه‌گه‌ر فایلی هه‌ر یه‌ك له سه‌ركرده
گه‌مژه‌كانی وڵاتی خۆم هه‌ڵبده‌ینه‌وه، ڕه‌ش ده‌بینین
له مێژووی خه‌باتیان، بۆ نموونه چه‌ندین كه‌سی
شۆڕشگێر و دڵسۆزی نیشتیمان له‌سه‌ر ده‌ستی ئه‌م
سه‌ركردانه‌ی ئێستای كوردستان شه‌هید كراون، بۆچی؟
چونكه بوونیان بۆ ڕۆژێكی وه‌كو ئه‌مڕۆ ترسناك بوو،
ڕه‌نگه ئه‌وان ئه‌م نایه‌كسانییه‌یان قبوڵ نه‌كردبا،
هه‌روه‌ك چۆن ئێستا كۆمه‌ڵێك له پیاوانی شۆڕشگێڕی
دوێنێ به‌هه‌ڵوێستن له‌دژی ئه‌م نایه‌كسانییه‌ی كه
له كوردستاندا هه‌یه. له‌پاڵیشدا پاڵپشتی خۆیان بۆ
ئه‌و چین و توێژانه ده‌رده‌بڕن كه ده‌یانه‌وێت
به‌حه‌قی خۆیان بگه‌ن. لای من "حه‌ق" هێنده پیرۆزه
كه تاكو له‌توانامدابێت به‌دڵی ئه‌و ده‌بم، چونكه
به‌شێكه له‌هه‌ڵوێسته و بوونم.
ئێستا سه‌ركرده گه‌مژه‌كانمان، سه‌رۆكه دز و
گه‌نده‌ڵه‌كانمان هیچ نه‌ما به‌رامبه‌ر ئینسانبوونی
ئێمه نه‌یكه‌ن. ده‌ستیان سوور بوو به خوێنی ئه‌و
رۆڵانه‌ی كه له‌پێناو ئازادیدا ده‌ژین، نموونه‌ی
هه‌ره به‌رزیان "سۆرانی مامه‌حه‌مه و سه‌رده‌شت
عوسمان". ته‌حدای مافی مرۆڤبوونی ئێمه ده‌كه‌ن،
هه‌ڕه‌شه و تۆمه‌ت ده‌خه‌نه پاڵ ئه‌و لایه‌نانه‌ی
واقیعبینیانه ده‌یانه‌وێت خه‌ڵك وشیار بكه‌نه‌وه،
له‌سه‌رووی هه‌مووشیانه‌وه میدیای ئازاد. خوێندنیان
داگیر كرد، هه‌ر بۆنموونه زانكۆی "ئه‌مه‌ریكی" له
سلێمانی، كه هه‌ر ساڵی یه‌كه‌م ده‌بێت دیالۆگ
له‌به‌رامبه‌ر بابه‌تێكی سیاسیی به‌زمانی ئینگلیزی
بكه‌یت، به‌ڵام ئه‌وه كوا بۆ نه‌وه به‌دبه‌خته‌كانی
نیشتیمانه؟ ئه‌وه بۆ كوڕ و كچی سه‌ركرده
گه‌مژه‌كانمانه. ئه‌وان ده‌ستیان خسته هه‌موو
شتێكه‌وه، ئێستا له كوردستاندا كه‌س كاتی بۆ هیچ
نه‌ماوه‌ته‌وه، هه‌موو خه‌یاڵی تاكی ئه‌م كۆمه‌ڵگایه
بۆته "پاره"، مرۆڤبوون، ویژدان، یه‌كسانی،
دادپه‌روه‌ری، ئیراده و ....تاد هیچ یه‌كێ له‌مانه
ئه‌و به‌ها پیرۆزه‌ی نه‌ماوه كه ده‌بێت هه‌یبێت،
به‌ڵكو "پاره" شوێنی گرتۆته‌وه. ئای نیشتیمانه
ناشیرینه‌كه‌م چه‌نده قێزم لێت ده‌بێته‌وه.
له‌ئێستادا من عه‌شقم بۆ ئینسانه جوانه‌كان هه‌یه،
ده‌مه‌وێت له‌گه‌ڵ كه‌سانێكدا بژیم، كه‌مانی مرۆڤبوونی
خۆیان بزانن. نیشتیمان ئیتر شوێنێك نییه لای من
قیبله‌ی هیواكانم بێت. چونكه نیشتیمان ده‌ستی به‌سه‌ر
ئازادیی مندا گرتوه، ئه‌وه نیشتیمانه منی كۆت
كردوه، كه‌واته من شه‌ڕ له دژی نیشتیمان ده‌كه‌م و
باكم به‌هیچی ئه‌م نیشتیمانه نییه، نه شۆڕشه
مرۆڤكوژه‌كانی، نه خاكه به‌پیت و به‌ره‌كه‌ته‌كه‌ی.
من ئینسانبوونم ده‌وێت، نه‌وه‌ك خاك. به‌ڵام
به‌داخه‌وه ئه‌م نیشتیمانه‌ی ئێمه بۆته زێدی
هه‌ندێك مرۆڤ، كه من ترسی دۆزه‌خم به‌رامبه‌ریان
هه‌یه. مرۆڤانێك نه له‌مانی خۆشه‌ویستی تێده‌گه‌ن و
نه هه‌ستی لێبوورده‌یان هه‌یه، مرۆڤانێك دڕنده‌یی
رۆحیانی ته‌نیوه، مرۆڤانێك له ناشیرینی له‌خه‌یاڵی
ئیبلیسیشدا جێگایان نابێته‌وه. كوردستان وشه‌یه‌كه
تاقووڵایی رۆح ئازارم ده‌دات، چونكه هێنده‌ی ناشیرینم
له‌م هه‌رێمه دیت هێنده به‌خته‌وه‌ریی و جوانییم
نه‌بینی. نازانم بۆچی هه‌ست ده‌كه‌م كوردستان
دۆزه‌خێكه بڵێسه ده‌ستێنێت له‌ناخمدا. من نه
ئینتیمام بۆ ئه‌م خاكه هه‌یه، نه بۆ كوردستانێكیش
كه هه‌میشه حه‌ز ده‌كه‌م پێی بڵێم "دۆزه‌خستان" ،
"ناشیرینیستان" ، "فشفشستان". بۆیه هێنده حه‌ز
ده‌كه‌م لێی هه‌ڵبێم و پڕ به‌ده‌نگ هاوار بكه‌م:
"ماڵئاوا نیشتیمانه قێزه‌ونه‌كه‌م". ئه‌م
ده‌سته‌ڵاته و كۆمه‌ڵگایه وای له‌من كردوه هه‌ستێكی
وام هه‌بێت.
Soran_Darbandy@Yahoo.Com
|
