یه‌که‌م بینینی پۆشاکی نه‌ته‌وه‌یی گه‌لان له‌کاتی ئاسایی به‌‌سروشتی یا له‌پێشانگا و نمایشی وه‌رزی مۆده‌باودا‌ وێنه‌یه‌ک ده‌به‌خشێته‌ بینه‌ر به‌راوردی ده‌کا له‌گه‌ڵ هه‌موو ئه‌وانه‌ی تر که‌ تائێستا بینیویه‌تی ، ده‌یه‌وێ خاڵه‌کانی لێک چوون و جیاوازیان بدۆزێته‌وه‌ . کچه‌ ئه‌ڵمانی باڵا به‌رز له‌سه‌رووی مه‌تر و هه‌شتاوه‌ سپی پێست هه‌تا لێ ی بڕوانی جوان و بێ گه‌رد وه‌ک کورد ده‌ڵێ : نه‌بکه‌ی نه‌بخۆی هه‌رته‌ماشای سه‌روگه‌رده‌نی بکه‌ی ! له‌گه‌ڵ کچه‌ کوردی هاوڕێ ی له‌کۆتایی پشووی هه‌فته‌دا له‌ماڵێ که‌وتنه ئارایشسازی و پۆشینی به‌رگه‌‌ کوردیه‌کان هه‌ر کراسێکیان پێ ی ده‌دا نه‌ده‌گه‌یشته‌ گۆزینگی پێیه‌کانی ، سه‌ر‌ڕا ئه‌وه‌ی ئه‌ویشی شاگه‌شکه‌ی جۆری جله‌ کوردیه‌کان کرد هه‌ر ئه‌ته‌گله‌غ ( ژێرکراس ) و ده‌لینگی ژنانه‌ بوو به‌له‌‌به‌رکراوی وای زانی ئه‌وه‌نده‌ ته‌واوی جلکه‌کانه‌ به‌سه‌رسوڕمان و خۆشیه‌وه‌ گۆتی : ئۆۆۆۆۆۆ ئه‌لادین هۆزه‌ ئای که‌ جوانه‌ ، سه‌ره‌وه‌ی سپی یه‌ و ژێره‌وه‌ی ڕه‌نگاو ڕه‌نگه‌ ! به‌واتای شه‌رواڵی عه‌لائه‌دین ئه‌وه‌ی له‌فلیمی خه‌یاڵ کارتۆن دایه‌ دیویه‌تی زۆر پێ ی سه‌رسام بوو ! ژنانی کورد هه‌رده‌م هه‌وڵ ده‌ده‌ن ئه‌م دوانه‌ وه‌ک ژێر کراس به‌کار بهێنن و بیان شارنه‌وه‌ به‌شه‌رمه‌وه‌ ناویان دێنن به‌تایبه‌تی گه‌ر پیاو دیاربن یا گوێبیستیان بن که‌چی له‌چاوه شینه‌کانی ئه‌ودا زۆرجوان بوو ناوێکی نوێ ی به‌ده‌لینگ به‌خشی وه‌ک مۆدێلێک داوای کرد ئه‌گه‌ر چوونه‌وه‌ کوردستان ئه‌ته‌گ و شه‌رواڵێکی عه‌لائه‌دین واته‌ ده‌لینگێکی بۆ بهێنن ئه‌و هه‌ر ئه‌م دوانه‌ ئاوایی له‌به‌ر ده‌کا ، دیاربوو له‌گه‌ڕانه‌وه‌ی دواسه‌ردانی کوردستانی ما‌ڵه‌ کورده‌که‌ ئه‌ویش به‌ئه‌لادین هۆزه‌که‌ی خۆی گه‌یشت پلانی دانا پێیانه‌وه‌ بچێته‌ ئاهه‌نگ زۆر تایبه‌تیش بۆ که‌رنه‌ڤاڵ پێ ی ده‌نازی .


Dlshadtakana@yahoo.com